جُــــــمران!

بـ18

المشهد كان قاسي على سدى اللي منهاره ولا هي فاهمه شو يصير او جمران شو ؟ هي بشر اساسا؟ كانت التساؤلات تضج في راسها ولا هي من الجن ؟ ولا كائن ماله تصنيف لكن كل الظاهر منها انها بس ساكته ولا هي حتى قادره تصرخ او تطلع صدمتها

اما جمران فحالها ماكان احسن كانت تتعذب من التحول اللي اول مره يصير بهالشكل كان مابين انها قريبه من التحول الكامل والانطفاء كان الحال متناقض بشكل وتحولها يوقف ويبدا مليون مره فاللحظه لحد ما هدت وصارت احسن ورد كل شيء طبيعي لكنها اول ما التفتت كانت سدى محد ؟ سدى هربت

تبعتها جمران ع طول وبدت تدورها فالشوارع عشان تلقاها اخيرا تمشي ع الشارع وتدور سياره تاخذها فنزلت من السياره وقالتلها : سدى انجنيتي ؟ اركبي بوصلك

سدى : وخري عني لو سمحتي انا ماعرف شو انتي ولا ابا اعرف

جمران : اركبي بشرحلك كل شيء

سدى : مابا تشرحين لي ابا اروح البيت

جمران : اسمعي اركبي طيب مابتكلم ولا بقول شيء بس بوصلك المكان مظلم سدى والوضع مب امان

سدى : مالي دخل يعني عندك الامان ؟ انا مادري انتي شو اصلا

جمران تصرخ عليها : سدى اركبي ما بسويلك شيء بوصلك قلتلك !!

سدى تخاف وتوقف مكانها : ...

جمران تقربلها : اسمعي انا نفسي مب فاهمه شو الوضع ولا شو صار بس لو سمحتي اركبي خليني اوصلك بيتكم من وين ما خذتك او نطلع من هنا وممكن تنادين ليانا تاخذك البيت بس ما بخليك فهالقطعه لحالك

سدى : لا تأذيني لو سمحتي لا تضريني والله ما سويت شيء ولا بتكلم ولا بقول لأحد

جمران تهديها : اسمعي اهدي والله ما بجي ناحيتك بشيء ولا نويت اضرك صدقيني انا اصلا ما اقدر انا ضعيفه عندك ومدري شو سبب هالشيء هذا

سدى تسكت : كيف كذا وجهك يتغير ويتلون مليون لون فالدقيقه

جمران : ممكن تركبين ؟ ونحكي والله بشرح كل شيء وبجاوب لو تبين ولو ما تبين بوصلك وخلاص ما بجي حولك ابدا

سدى تركب وهي ميته خوف : قوليلي

جمران : اسمعي بقولك الشيء من بدايته لكن ولا شيء من هذا طبيعي او منطقي وكله اشياء ي اما تآمنين فيها او لا لأن ماعندي براهين ولا ادله لها

سدى : طيب ؟

جمران تحكيلها : سدى انا شيء مختلف انا انسانه لكن ماعرف اللعنه هذي كيف حلت علي ولا على فردوس لكننا بشر ومتعايشين وانا مابضرك