صغيرة المتملك

6

الجزء 6 🍷

ليكراب مام الجي تاعهم بزاف مليح دخلنا حكمنا طابلة دموندينا واش ناكلو وهزيت تلفون نتصور عجبتني البلاصة مع هزيت راسي قابلني إسلام ومرتو ولي كان معاه باين ولدو مفهمتش لا صدفة ولا واش كان حاكم ولدو من يدو ومرتو مدايرة حجاب شعري نقدر نقول حتى هي شابة بزاف مام ضحكتها تهبل وحلوة سمرة عندها لخدود وليفوسات  ....محسيتش بروحي وانا نشوف فيهم غير كي قرصتني نسرين درت ليها قتلها هبلتي يدي قالتي هذا الاستاذ اقرصيني يرحم والديك قتلها تقول جامي شفتيه ياك كنتي تقراي عندو قالتي مي شغل شفتو اول مرة قتلها مكيش صفا كامل قعدت مرتو مقابلتنا وهو عاطينا بظهر مي مشافوناس ولدو كان يهبل الله يبارك ابيض وعينيه خضر يسما هذو من عايلتي ههه الدنيا شحال صغيرة وشحال غريبة وليد عمي ومرتو ميعرفونيش شكون انا وجدي ميعرفنيش وجداتي وعمومي صعيبة كي يطيح الانسان في هذا الموقف ما عندو لا اهل لا حباب وقت يطيح في الشدة مكانش شكون يهزو صعيبة بزااف .... هبطت راسي مش حابة نشوف فيه اصلا قالتي نسرين وشبيك قتلها والو جيست خلينا ناكلو ونروحو قالتي سيريو قتلها ولله مكان والو وحد الشوي ونطقت نسرين قالتها وشراكي استاذة لباس قالتها لباس ونتي هزيت راسي لعندها قالتي صفا ؟؟ قتلها لباس حمد لله دور إسلام وجهو لعندنا طاحت عيني في عينو وعاود رجع كيما كان ... جابونا واش دموندينا وانا نصور حتى طفى تلفون قريب بكيت اصلا ولا يطفى وحدو راحت نسرين تخلص وانا جيت خارجة  قاطعلي الطفل الصغير باسم كان فمو مخلط بشيكولا يسخف حلو بزاف هبطت لعندو قتلو اوو شكون هذا الزين شكون هذااا قربت منو نبوس فيه قاسني بشيكولا وانا عندي عادة شغل نقلب شواربي زي ليبيبي كي يكونو راح يبكو قتلو اوو علاه درتلي هكا حبيبي نطقت يماه قالتي ههه وليتو تشبهو لبعض شفت معاها ومع إسلام لي مركز معايا منحاش عينو قالتي هاكي مدتلي بابيي حكمتو عليها مسحت ومسحتلو بستو بلخف كي شفت نسرين جاية قتلها ايا ختي تهلاي في روحك وربي يحفضولك قالتي نشاله حنونة ديتو لعندها وخرجت قالتي نسرين واش حكيتي معاهم قتلها برك الطفل لسق فيا وبستو قالتي شفتي شحال شباب قتلها وي ربي يحفضو .... بقينا ندورو مروحين جايين ندخلو للحوانت نشوفو اللبسة بلا ما نشرو حتى لحقنا لوحد الحانوت تاع ليغوب بلونش قالتي هذا تاع سلف ختي قتلها ااا قالتي ولله الين امشي ندخلو نقيسو قتلها منيتك قالتي ولله نقولو راح تتزوجي نتي قتلها وقيل يخلصو باه يقيسو قالتي يودي امشي كركرتني دخلنا ( قولولي شكون مدارهاش هذي انا مع صحبتي قسنا تصديرة تاع العرايس شبعنا تصوار وخرجنا 😂😂) ...قصص إدمان سيما .. دخلنا زوج بنات ثما والراجل قاعد فوق الفوتاي حاكم تلفون قالت سلام هز راسو قالها اا نسرين قالتو موح وشراك قالها لباس وخزر فيا قالها راح تتزوجي وقيل قالتو ههه مش انا إلين شاف فيا قتلو مش انا قالنا مالا لاه جيتو قالتو موح ملخر انا حابة نقيس يا خويا ولله غير حلمي خليني بلييز قالها نتي ولله هبلتي قالتو تعيش محمد قالها منبعد نخبر سليمة قالتو ياااا صاي ولله ما نزيد ايا باي هيا إلين هيا جينا مروحين قالها استناوو يا طفلة درنا ليه شاف معايا قالي منقدرش نقولك نتي شحال يخرج عليك لي جبناه اليوم اذا حبيتي نمدلك تقيسي مي نصورك ونحط في لاباج شفت معاه حطيت يدي على راسي قتلو صرالتك حاجة هنا !! قالي واش قتلو وشنوووو وااااش تصورني صفااا في مخك ناضت نسرين تسكت فيا قتلو اسمع نتا بليغوب تاعك روح جيت ننطق منبعد سكت قتلو علابلك شكون لي يحطو تصاورهم ولا نو بلا ما نحكيلك انا هذي لي جابتني ولا مندخلش لواحد كيما نتا حبيت نخرج حبسني صوتو الين درت ليه قتلو بلاك تنطق أسمي قالي ولله ديزولي حسبتلي كي مش محجبة تصوري عادي ولله عندي خوتاتي ونخاف عليهم ولله ولله وراس بابا سمحيلي وهاي ليك دخلو قيسو واش تحبو قتلو نو صحيت حكمتني نسرين قالتي ولله غير تروحي هيااا دخلتني بسيف وهبطنا لتحت كانت صالة كبيرة وليغوب بلونش وليغوب تاع ليصواري يهبلو مي شفت في وحدة داتلي عقلي وحدي مخلاتش فيا كانت تلمع من بينهم روبة في البلوغوا (  عرفتو علاه حطيت الفوطو هذيك تاع الروبة الزرقة 😁) قتلها شوفي نسرين تهبل روحت نشوف فيها كانت تلمع وفيها دونتال ملور زي لاغوب بلونش برك زرقة قاطعنا صوت الطفلة لي جات قالتي عجباتك قتلها تهبل قالتي ارواحي تقيسي نحاتها من المانكا ونسرين خيرت غوب بلونش بفوال طويل قالتي ادخلي نتي الاولى دخلت وقلبي يخبط معرف لاه نحيت قشي وقستها طلقت شعري بقيت نخزر ونرمش وليت زي الاميرات وهذو ليغوب كنت مخلوعة بيهم وحلمي تكون عندي وحدة هكا ... كي خرجت شفت في نسرين ولات تصفر قالتي واش نقولك يا ختي مكانش الكلام زادت الطفلة لوخر قالتي ولله جاتك روعة جبدت نسرين تلفون وبدات تصور فيا وانا ندور كرة مرة ندير بوزيسيو خلاف تصورت حتى شبعت وزادت هيا قاست تصورنا وكملنا كي جيت خارجة عاود هذاك موح طلب مني السماح وروحنا .... وحد الشوي صونا تلفون نسرين كانت يماها هزت عليها حتى سمعتها قالتها واااش اوكي اوكي كوبات قتلها وشبيك قالتي ارواحي نروحو للدار هيا قتلها وشبيك اطفلة احكيلي قالتي هيا هيا طرنا مروحين للطريق طول الطريق وهي ساكتة محبتش تهدر كي وصلنا ...طبطبت في دارهم حلت يماها قالتي بنتي جيتي ارواحي باباك جاو دار جدك وداوه ويماك راحت معاك قتلها وااااش تحكي .......