يا اول احبابي...و يا مسك الختام

p29

صباح يوم ثاني، بالسوق

كانوا ام مشعل و أم ماهر و البنات يتمشون بالسوق يدورون فساتين واغراض ثانيه
طبعا عبير كانت معهم بعد ما أخذت اذن من المدرسه وهذا الشي ضايق الأستاذه نوره اللي اول ماوصلها الخبر جن جنونها ان شلون المدير حمد سمح لها وهي للحين ما صار لها فتره من بدت الشغل بالمدرسه
اما ماهر وصلهم ومر للخياط يفصل له و لأبوه و اخوه
ام ماهر بتعب: عبير يمه للحين ما عجبك شي؟
ام مشعل: البنات خلصوا ما بقى إلا انتي
عبير بتنهيد : شسوي ما عجبني شي للحين ابي شي مميز
شروق: عاد يلا خلصي تعبنا
عبير: انطمي انا العروس لازم فستاني يكون غير عن الكل و جذاب
مشاعل وهي تضحك: واي واي ما بتجذبين حد غير اخوي
شهقت عبير: شقصدك؟ مارح تشوفوني حلوه؟؟
بيان: لا لا اكيد بنشوفك حلوه انتي بكل وقتك حلوه
سحر: يوه يا عبير شفيك الحين ولا لا يكون طق عمدك عرق العرايس
ريم: ياقلبي انتي هدي هدي
بيان وهي تضحك هلى عبير اللي باين على عيونها التعب : بعدين بس ركزي على اخوي ما عليج منا فكري
شلون تخلينه يطيح
بشرى بدون قصد: اخوج طاح من زماااان يون شافها بالم......
شهقت وسكرت فمها بعد ما ستوعبت اللي قعد تقوله و البنات يحاولون يمسكون ضحكتهم اما عبير اللي تتوعد فيها
ام مشعل اللي ضحكت بخفه لإنها حاسه و مو بس حاسه إلا هي متأكده ام مشعل شايف عبير اكثر من مره: انطقي وين شافها
بشرى حست بورطه: هاا... انا قصدي اي انا قصدي بالمجلس يمه هذا قصدي يوم الخطبه
سحر وهي تحاول ترقع الوضع: اي اي يمه يوم الخطبه
ام ماهر تدري بالسالفة كلها لإن بناتها ما يعرفن يخبن شي بس هي حبت تلعب عليهم: هممم اكيد؟؟
شروق: اي اي اكيد
بدت عبير تحس بالحر بعد ما تذكرت اول لقاء لهم: يلا يلا مافي وقت لازم نخلص بسرعه
مشاعل: ابلش دخلت مود العروس
نغزتها عبير بنظراتها : طبعا انا عروس
ريم وهي تطبطب على عبير: اي يا عمري و احلى عروس
بيان: ايوه يا حلات مرت اخوي
رمت لهم بوسات : ياخي مافي مثلكم ، انتوا تفهموني
سحر: اكيد لأنهم متزوجات
بشرى: سحر انطمي
واخيرا بعد لف ساعتين لقت عبير فستان الملكه
كان فستان وردي فاتح طويل فيه فتحه بالظهر عاري الأكتاف فيه لمعه مناسب لجسمها يبرز مفاتنها
______

اما عند مشعل بالمركز قعد يضغط على نفسه بالشغل عشان ما يتراكم عليه وقت يكون بعطله واللي رح تكون بس يومين و قال لأخوه ناصر يجهز أغراضه ويشتري له ثوب جديد و غطره و عقال
______

و عند بدر اللي وصلته اخبار الملكه من غاده و هو بس يتوعد بمشعل و شلون بيخرب عليهم. ما يمديه يفكر بشي قبل المكله ففكر انه بيخرب عليهم بعدها صح ان عبير ما بتكون له و بياخذها غيره بس بالنهايه بتخرب علاقتهم و بترجع له
صار معمي عليه من شده هوسه فيها لدرجة انه معد يهمه إذا ذبح حد عشان ياخذها
اما زوجاته الثنتين بدوا يلاحظون تصرفاته الغريبه وشلون صاير عصبي كثير و مطنشهن ولا يقرب على اي وحده فيهم و حتى عياله اهملهم

دخلن المطبخ وسكرت الباب العنود : اكيد فيه شي، متغير واجد
ضحى: بعد انا لاحظت
العنود: شتسوي الحين، حاسه بيسوي مصيبه
ضحى وهي تفكر بحل: زيم اسمعي وقت العشا باخذ جواله و بشوف اكيد داس له شي فيه
العنود بخوف: نتأكده؟ والله لو يدري يذبحنا
ضحى: ما عليج ما بيلاحظ بس لازم نعرف لا يكون ناوي على شي الله لا يقدر
العنود: اي تمام
و بعدها بكم ساعه حطوا العشا و جلسوا كلهم ياكلون و قامت ضحى بعد ما اكلت شوي و سحبت جوال بدر اللي كان حاطه على الطاوله لفت عليه شافته للحين ياكل أشرت للعنود ان الحوال معها، و بدت العنود تسولف مع بدر عشان تلهيه
دخلت المطبخ و سكرت الباب وراها فكت الجوال و بدت تقلب فيه
شهقت بصدمه : وي ليه عنده صوره البنت؟!
ركزت بملامحها عرفتها على طول: هذي حفيدة عمي خالد، بس من وين له الصور؟ و شعنده فيها البنت مخطوبه الله يسامحه على هذي السوات، اكيد حد طرشها له
فتحت الوتس و و قعدت تدور بين كل المحادثات لين ما وصلت لحد اسمه غازي دخلت محادثتهم و قرت كل شي  وعرفت بكل السالفه صدمها اكثر شي يوم درت ان بنت خالتها غاده هي اللي طرشت له الصوره
ضحى بصدمه: اويلي شلون تسوي كذا !؟ هذي ما تخاف ربها
طلعت جوالها و صورت محادثتهم و بعد صوره عبير كان ودها تحذف صورتها بس ما تقدر لان وقتها بدر بيعرف
تنهدت بضيق: الله يسامحك يا بدي بشنو قصرنا معك وبعد ذي البنت المسكينه شذنبها الله يهديك بس