وجهك يذكرني بالمطر في نجد وشامتك الي تزين قمراك كانها نجد لا هّلت سّحايبها .

في بُعادك ضاقت فيني فجوج نجد العذيــه ياسمـح المحيا.20.

متجه لديار سَعَد لأجلها و كم متر خطوط نجد لأجلها...طبلونه يمشي ميتين وزقارته بوسط شفايفه ينفث من جوفه دخان نار البُعد وهواجيس الفراق ان ذبحه طاري الفرقا وش هي مستفيده؟ استوت في محاجرها السود قربه وابتعاده والظروف اقسى من الماضي على الي يستعيده
ودها يصافحها بمصافح القلوب لأنه اصدق من مصافح الأيادي وياليتها تسمح له يصافحها وهي بعيده علموها لا تسامر ببعده كل طيف وده تسامره هو لحاله...اتجهت يده للمسجل وده يشتت ذهنه من الهواجيس بدقة العُود ودندنة الفرقا أبتسم من اشتغل بالصُدفه الفنان الكبير علي بن محمد بصوته الشجي وعذب كلماته لأول مره مايشغل ابو نوره لكن هو ادرى بأن مافيه فنان ينافس فنان العرب بعذب الحانه ورقه صوته على القلوب قبل المسامع لكن مهما سمع ومهما شغل مايطري على باله غيرها
مستحله تفكيره من كل الاتجاهات ولو وده بدروبٍ جديده والمصيبه كل الدورب تؤدي للجمـره...

انا لمن دعيت الله يجيبك زدتني ببعاد...حبيبي ذا العمر يمشي زمن وايام محسوبه!.
نقش ريش الظلام وقلت لعلى المبطيات جداد...رقص وجه النهار وقلت يادوبي ويادوبه.
جمرةٍ لابغت ترمش هدبها يرتفع بالكاد...يعذبها الى من على الوجنه فدق ثوبه.
واميزها عن القمراء اليا من جت بلا ميعاد...والمن جت مع القمراء غدى كلنٍ وأسلوبه.
سحابة جدها من يم وابوها بارق ورعاّد...بقيت اسقي بها روحي لقيت الروح مشروبه.
تهادى كانها طفلٍ  يمشيها الهواء بركاد...تعاطف كانها نارٍ براس طويق مشبوبه.
تسولف للندى يسهر على النرجس يبى يزداد...تغني للمطر لليل تصيب الكون غيبوبه.
انا وش جابني للحيل مادام الي مضى مافاد...انا وش لي وش للموت لاجل عيون رعبوبه.

غريب أمره كل شيء يذكره فيها زي قول ابو نوره...كل شيء حولي يذكرني بشيء!...كل شيء يفعله واي طريق يمشيه لابد يلقى شيء يذكره فيها وكأنها تقول ان قلبه مَلك لها وعقله ايضًا مَلك لها لكن الواقع ان هو كله ملك لها هو مُدرك انه يفيدها بروحه لو تبي شيء كل شيء بيمشي على هواها والي تبي بيصير اهم شي حسنها لا يجيه حزن لآنه مايليق بحسنها والحزن كيف تجتمع؟ مصيرها تضحك له وتضحك الدُنيا معها ضحكتها تغير دنياه وتربكه وهو يدري ان حسنها يربكه ويتعبه ويهد عزومه لكنه مع كل هاذا مايغير دربه عنها ! ولو كان الدرب طويل وعثر وكله مشقات والجمره بنهايته بيمشيه لو على ايدينه...