One-way Passage || ဘာသာပြန်

21

[Unicode]

ညစာပြင်ဆင်ထားသည်မှာ အလျှံပယ်ဖြစ်သော်လည်း ရှဝမ်နန် စားသောက်ရတာ စိတ်သက်တောင့်သက်သာမရှိလှ။

မင်ချင့်တွင် တက်တက်ကြွကြွနှင့် စကားများသော စရိုက်မျိုးရှိသည်။ သူနှင့် လူငယ်ရည်းစားလေး ယင်ဇယ်ကျင်းက အလွန်ရင်းနှီးပုံရပြီး သား၊သားမက်တွေရှေ့မှာတောင် သူတို့နှစ်ယောက်၏ ချစ်ခင်မှုကို ပြသဖို့လည်း  နည်းနည်းမှ ရှက်ရွံ့မနေ။

မင်ချင့်၏ရည်းစားဟူသော အချက်ကို ဖယ်လိုက်ကာ ကြည့်မည်ဆိုလျှင် ယင်ဇယ်ကျင်းသည် လန်းဆန်းသော တက္ကသိုလ်ကျောင်းသားလေးလိုပုံစံပဲ ထင်ရ၏။ ထိုကောင်လေးက အစားကောင်းကောင်းစားနိုင်ပြီး စိတ်ဝင်စားသည့်နယ်ပယ် ကျယ်ပြန့်ပုံရသည့်အတွက် ညစာစားပွဲ၌ သူတို့ ဆွေးနွေးသောကိစ္စများကို ဝင်ပြောနိုင်သည့်အနေအထားရှိသည်- သူ့ထင်မြင်ချက်အများစုက ကလေးဆန်သည့်သဘောနှင့် အတွေ့အကြုံနည်းပါးမှုကို ထောက်ပြနေပေမယ့်လို့။ ထိုသို့ဖြစ်တိုင်းလည်း မင်ချင့်က ပြုံးရုံပြုံးကာ ကောင်လေးပခုံးပေါ် လက်တင်လျှင်တင်သည်၊ ဒါမှမဟုတ် ဝိုင်ခွက်ချင်း အသာတိုက်တာမျိုးလည်း လုပ်သည်။

မင်စီယန်းကမူ ခံနိုင်ရည်မရှိသူဖြစ်၍ ဝိုင်ခွက်တစ်ဝက်မျှ သောက်ပြီးသည်နှင့် မျက်နှာမှာ နီစွေးနေပြီ။ မျက်နှာကို လက်ဖမိုးနှင့် အုပ်ကာထားလိုက်လေ၏။

လုဟွိုင်ယယ်က သူ့အနားသို့ တိုးကပ်လာပြီး ခပ်တိုးတိုးပြောသည်။

“မင်း မသောက်နိုင်ရင် ကိုယ် ကိုယ်စားသောက်ပေးမယ်လေ”

မင်စီယန်းက လုဟွိုင်ယယ်၏ပါးပြင်ပေါ် နဖူးအပ်လိုက်ရင်း ခေါင်းခါသည်။

“ကျွန်‌တော် အဆင်ပြေပါတယ်”

မင်စီယန်းနှင့် လုဟွိုင်ယယ်ဆီကနေ အကြည့်လွှဲဖယ်ကာ ရှဝမ်နန် သူ့ရှေ့မှ တစ်ခွက်အပြည့်ရှိနေသေးသော ဝိုင်ခွက်ကို အကြည့်ရောက်သွားမိသည်။

ညစာစားပြီးသည်နှင့် မင်ချင့်က ယင်ဇယ်ကျင်းကို ဝိုင်တစ်ပုလင်းဖောက်ခိုင်းလိုက်ခြင်းပင်။