« بكره توقف من اللهفه على بابي »

بارت 53

وقف غيث مكانه يناظرهم يتكلم بصوت عالي يوجه كلامه لها : ماراح اطلع قبل لا تسمعين الي اقوله لك جوهره ، تنزل دموعك على جدك وهو عايش وكل الي حولك يعرفون ، ولا .
يلف على عزيز الي شاد كتف تميم يبتسم بسخريه : ولا الي سرق اسهم بقيمه ١٠٠ مليون من شركة الجد فيصل .
لف سعد بصدمه يحاول يستوعب الي يقوله يناظر عزيز الي بلع ريقه يتكلم برجفه يحاول يخفيفها : كمل هرجك قول السبب لا تسكت
سكت غيث يناظره يصرخ فيه عزيز الي حاوطه تميم يهديه : تكلمم
تقدم سعد يناظره يصدح صوت الكف الي انطبع على خد عزيز الي لف وجهه يشد ياقته سعد بغضب وقهر : كان ابوي معتمد عليك ويعلمك بكل صغيره وكبيره تصير بالشركه وتغدره من وراه بس اعرف شي يا عزيز ...
لف نظره على الي تناظر بغيث بصمت مرعب يلف عليه : انك خسرتها وتحلم فيها ولا عاد اشوفك حولها
هز راسه بنفي يرجف فكه غصب يخونه التعبير : انا ماغدرته اسمـ
قاطعه سعد الي ابعد عنه يسمع غيث الي يكمل كلامه ولا زال يناظر عزيز الي اشتدت اعصابه : ياحسافة حبها لك وانت تخون من وراها بـ
طيحت الفازه تقاطع كلامه ترجف يدها : برا اطلع برا
لف غيث لها يقرب منها تبعد على ورا تصرخ : لا تقرب لا تقرب اطلع مابيك اطلع ماراح اصدقك اطلع ..
صرخت تضرب صدره تبعده على ورا : كيف تبي اصدقك وانت أذيتني غيث أذيتني قدام عيني غيث شفتك غيث كنت اناديك اطلبك تطلعين بس ماكنت تسمعني واذيتني وتبي الحين اصدقك اطلع برا اطلعع
نزلت دموعها تمسح بكفها بسرعه ماتبي يشوف ضعفها ناظرته ساكت يناظرها يشوف رجفة فكها ويدها الي تحاول تسيطر عليها بس ماقدرت تنزل دمعه من عينها تصرخ فيه : اطلع مابيك
لفت عليهم : قول له يطلع مابيه مابيه ..
تقدم فيصل يمسكه سعد بسرعه يصرخ بغضب : اطلع ماتسمعها اطلع
هز راسه غيث يناظر فيصل ببتسامه : افاا تطردون اخو
ماكمل يصرخ فيصل : تخسى مانت اخوي مانعترف فيك اطلع برا اطلع ..
ابتسم بحزن يناظرهم يتنهد يعطيهم ظهره يطلع نزلت دموعها بشكل موجع تبعد عنهم تطلع للغرفه حذفت كعبها بعيد تناظر نفسها تفك شعرها بقوه ينتثر على ظهرها يغطي وجها تحس بنزول صدرها وارتفاعه من كتمانها عجز عقلها يستوعب وجوده ولا كلامه بكت يرتفع صوت شهقاتها من استوعبت كلمته بوجود جدها فيصل كانت حاسه بكذبت موته تنزل دموعها بكثافه من خذلانها منهم من معرفتهم ومن معرفته هو يزادد بكاها من خيانته لها من استوعبت كلام غيث بأن كان يخونها من قبل زواج سمر ترجع ذاكرتها من سفرته معها يوم بعثتها من كان يطول بالخارج ويرجع لها متأخر وكانت تنكر الي تشوفه من احمرار عنقه وريحة ملابسه ...
... كتمت شفتها من شهقاتها من تسمع صوت ضرب الباب تقوم تمسح دموعها بكفها ترد بصوت مبحوح : بخير
عض شفته بقهر يضرب الباب بكفه : افتحي الباب جوهره افتحيه افهمك .
سفهته تأخذ عبايتها تلبسها تسحب طرحتها تفتح الباب يتراجع على ورا يتقدم بخطوات عجله يمسك ذراعها : جوهـ
قاطعته من مدة يدها تصفعه بقرف تبعد ذراعها ترفع عينها فوق من حست بدموعها : لا تلمسني ما عاد ابيك اكرهـ
قاطعها يتنهد يناظر عيونها : لا تقولينها رجيتك ، طلبتك بس اسمعيني والي سمعتيه مو كذا وربك مو كذا جوهرة القلب تتوقعينها مني !
ماخلته يكمل تبتسم بسخريه : كل شي صرت اتوقعه منك عزيز ..
مشت بدون ماتزيد بكلامها من غصتها الي وجعتها
ناظرها من راحت قدام عينه يضرب الباب بكفه بتكرار يصرخ من الشعور فيه يتقدم تميم يحاول يوقفه يمسك ذراعه يلف له يحضنه يشد على كتفه : ولد عزيز
ابعد عزيز عن تميم بالقوه يطلع لسيارته يمسح على وجهه تميم بخوف : يالله يارب انك تحفظه ..
-
« بعد مرور اسبوع وبيوم عيد الاضحى الصباح »
بيت بندر ..
رجعوا ليث وابوه من الصلاة يبتسم ليث من امه الي تبخر : يا اهل البيت
ابتسمت عاليه تتقدم تبخره يبتسم يقبل يدها وراسها يحضن اكتافها : عيدك مبارك امي
ابتسمت تمسح على كتفه : وانت بخير امي
نزلت ربى ركض تحضن امها وابوها تعايدهم تتقدم عند ليث : قبل لا اسلم عيديه بسرعه
خزها ليث يمد لها مبلغ تأخذه تمشي ينصدم : لا ياشيخه
ضحكت بعبط تحضنه تعدل شماغه : كل عام وانت اخوي الوسيم الجميل الي مأخذ عقول البنات عيدك سعيد
ضحك يضرب طرف انفها يقبل راسها : وانتي بخير يالمزعجه .
ضربت كتفه يبتسم يتقهون يقوم ليث وابوه تطلع ربى ركض وراهم تشوفهم عند الخروف تمد شفتها بحزن : حرام صايره اعتني فيها .
ابعد ليث يناظرها : اجل خلاص تعالي نضحيك بدالها
خزته تبعد بسرعه من تقدم الخروف عندها يضحك ابوها : يلا ليث تعالى نسمي بالله
وسعت عيونها تدخل بخوف عند امها الي تكلم وتعايد : يويلي يمه
لفت على امها الي تمد لها الجوال تهمس : عمانك
هزة راسها ربى بنفي : يمه تكفين
حطت امها الجوال على اذن ربى الي انكبت تسوي تعابير بوجها تضحك عاليه تتقهوى ...
-
" بيت سعد "
طلعت الهنوف من غرفتها من بعد اخر موقف صار وهي ماكفت دموع تنهدة تعدل بجامتها تطلع تسمع اصواتهم من رجعوا تبتسم تعيد عليهم يبتسم فيصل يتكي على ابوه : وبنتس وينها ؟
ضحكت الهنوف غصب تضرب كتفه بخفيف : وانت من وين ماخذ حرف السين
تنهد سعد من اهبال فيصل يبعده عنه : من دخلنا المسجد ويجيك رجال ونعم فيه يتكلم بحرف السين وعاد ولدك ماشاءالله اجتماعي راح يسولف معه وحب كلامه ومن المسجد لما رجعنا وهو صج راسي من سوالفه .
ابتسمت الهنوف تغمز لفيصل : تعلمني ؟
ضحكت من تربع يعلمها ويسولف تقوم تقهوي ورفع راسه سعد من الي نزلت تعدل شعرها تبتسم برهاق : عيدكم مبارك
تقدمت تحضن امها الي تسأل عنها وتتقدم عند سعد الي فتح ذراعه يجلسها جنبه يقبل جبينها : حبيبت ابوها اخبارها .
ابتسمت بهدوء تتكلم عكس الي داخلها : تسرك
نقز فيصل من مكانه من شاف ابوه يمد للجوهره عيديه : وانا ابو فيصل
ضحكت جوجو بهدوء يبتسم فيصل ويبتسم الكل من سمعوا ضحكتها وهم يبون يطلعونها من المود الي هي فيه قام سعد وهو محاوط اكتافها : يلا يلا الضحيه
ركض فيصل برا من شاف الخروف يهج من الباب المفتوح يمسك شماغه لا يطيح يصرخ : تعالى يا حيوان
انهار الكل من ركضه تمسح دموعها الهنوف من ضحكها : بشويش لا تطيح
دخل البيت وهو ماسكها بتعب : يلا يبه استعجل يلا
ابعد سعد شماغه تأخذه الهنوف تبعد جوجو تناظرهم تغمض عينها من بدو يقصون راسها تشوف فيصل الي مسكه يلحقها فيه تصرخ بخوف تجي ورا ظهر سعد تتمسك فيه : بابا شوف بـ
ماكملت تصرخ من جاء وراها يبتسم سعد : فيصل اذلف وراك
خبت وجها بصدر ابوها تتمسك بثوبه يحط ذراعه : مقدر احضنك يا ابوي انتي كلي د*م
ابعدت بشويش وهي ماسكه ذراع ابوها من فيصل الي اختفى تناديه : فيصل
طلع وهو مغسل يدينه يضحك بخفيف : خلاص وربك
تنهدة براحه تدخل داخل وهي تناظرهم من الدريشه الواسعه والعاملات الي يسون الفطور والهنوف ترتب الطاوله حقت الفطور الي برا تقوم تساعدها وهي ماتبي تقعد بروحها وتقعد تفكر ..
ونفس الشي في باقي البيوت ....
" بيت هايف "
كانت تصوره وهو يسوي الفطور ومأخذه راحتها بعدم وجود لانا الي اخذها هايف بيت اهلها تبتسم تمد اصبعها : هايف هذا ايش ؟
لف عليها يبتسم وهو يقص الخيار : مقلقل
عقدة حاجبها بعدم فهم تجي عنده تتكلم : وهنا عندنا السلطه ،
سكرت الفديو تبعد جوالها تساعده تسكر خشمها من شمة اللحم : الله يكرم النعمه يارب
ضحك بخفه يشوفها تناظر راس الخروف بغرابه : يمه ليش يطالعني .
‏كتم ضحكته يحاوط اكتافها : حاقد عليك
لفت عليه تناظر عيونه بستغراب : معقوله
تأمل عيونها الي صابته ينحني يقُبلهم يرجف جفنها من ابعد بخفيف : ياتبارك الرحمن
شتت عيونها بسرعه تبعد عنه بخجل : اا هايفف الكبدهه
مسح على جبينه من استوعب يبتسم بحراج : مععليش
‏اخذة صحون الفطور تطلع برا تأخذ نفس من التوتر الي عاشته رتبت الصحون على الطوله بشكل انيق تشوفه طلع يحط الكبده وتتقدم تساعده وبين حين وحين يستهبل عليها ويبتسم من يسمع ضحكتها وسوالفها عليه وعيونها الي يقطع الكلام عندها من عجز وصفه فيها تنهد ببتسامه يتأملها وهي تسولف ..
-
" اليلل على الساعه ٧ في بيت الجد كالمعتاد تبدا جمعتهم "
كانوا البنات بجههة يسولفون على ريفان لفت ربى على جوجو الي ساكته تناظرهم تتنهد تلف على البنات تبي تسمع صوتها : عاد يوو تذكرة جوجو يوم اخذت بثاني ثانوي ٩٩،٩٩ وانهارت عند خاله هنوف ..
ابتسمت جوجو بخفيف توقف ربى تجي جنبها : جوجو خير ترا اشتقت لصوتك
عدلت جلستها جوجو : سمي
حضنتها ربى : صدق تذكرين ويوم بكيتي عند خاله هنوف عشان درجتك
ضحكت جوجو بخفيف : شسوي احب العلم وكنت احسب خلاص ماراح ادخل التخصص الي ابيه
ابعدت ربى تضحك تناظر لتين واميره وتقى : المشكله نقولها حلوه نسبتك وانا ابيها ولا زالت تبكي ومن هنا عرفنا ان جوجو دافوره .
ضحكت لتين : تذكرة ربى يوم تطق كرسي جوجو تبيها تغششها وكشفتهم المراقبه انهرت وقتها بالاختبار وطلعتني معكم ..
ابتسمت جوجو تحط يدها على كتف اميره الهاديه : واميره الكفو هي الي طلعتني من السالفه .
ضكت ربى بقهر : اي حيوانه وحنا سحبت علينا .
رفعت اكتافها اميره ببتسامه : ما كان لها ذنب جوجو
ضحكت ريفان منهم : والله فله عندكم اخخ ليتني معكم
ضربت لتين ذراع ريفان بخفيف : لا والله احمدي ربك
فزت ربى تتربع : تذكرة اخر سنه لنا بثاني قبل لا ننقل تخيلي كانت في وحده معجبه بجوجو وكانت من الي استغفر الله المهم وطول الفتره تحاول تتقرب وهنا حنا خفنا على جوجو وطبعا جوجو الغبيه تحسبها على نياتها مهي وسخه بس ماسكتنا واخر يوم اختبارات جيت انا ارفع اكمام قميصي ههههه ولتين قعدة تلم شعرها واميره قامطه العافيه وجوجو كانت عند معلمة الفيزياء تتأكد من دراجتها ..
ضحكت ريفان بهدوء : جوجو عالم موازي
ابتسمت جوجو لها تضحك ربى : منجد ، المهم وجت المعجبه ذي ومعها شلتها والمهم وجينا نقول ابعدي عن جوجو وحنا نعرف حركاتك الوسخه ذي ومن الكلام فجاء الله يأخذها بدة تقرب وتقول كلام مقزز ولتين ماتحملت وجرت شعرها وبدة مصارعه واميره ياحياتي كانت تصرخ تبيهم يبعدون ههههه وبعدها جت المديره وتقول بفصلكم وتقدمت انا قلت اصلن بننقل وجها تغير وطلعنا وحنا نضحك واهمشي انتصرنا عليها ...
ضحكت لتين : واخذنا اجمل اهواش من جدي ..
ضحكوا وبدا يتذكرون ايام قبل وريفان مبسوطه معهم وربى بين سالفه وسالفه تناظر جوجو الي عرفت انها تحاتي تبتسم وتهز راسها لها وكل وحده تحاتي الثانيه ...
-
" بيت سعد ثالث يوم عيد باليلل "
عدلت فستانها الاسود على جسمها بنعومه اخذت نص من شعرها تلمه بطريقه انيقه وتترك الباقي على راحته ختمتها بالروج الاحمر ناظرت نفسها تشوف العقد الي منه با ايام بعثتها تنزل دمعه حاره على خدها تحرقها واليوم بتنكتب على غيره بيكون اسمها على اسم غيره هي رفضت احد يدري ماتبي تشوفه وتوجع نفسها هي اخذت قرارها واصرت عليه تبي تنساه تعبت نفسيتها من كثر ماتحط له عذر تحبه ولا تنكر هزة راسها بنفي تمسح دمعتها : خلاص جوجو انسيه انسيه هو خسرك مو انتي ..
كتمت شهقتها تسكر العقد تحطه بدرجها تلبس واحد اخر عدلت ميكبها تطلع تسكر الباب خلفها تنزل تشد على يدها من تشوف ام سلطان واخته تحت تشوف هنوف الي تبتسم تتقدم تسلم برجفه واضحه ابتسمت بهدوء تشوف نظراتهم تلعب بظافرها بربكه
ترد عليهم بختصار من اسألتهم عن اخبارها قامت وبعد دقايق اتصل سعد ينتظرها بالمجلس عشان توقع وصلت تشوف سعد الي دخل ومعه الكتاب يبتسم يقربها لحضنه يقبل راسها بتكرار يحصنها ولا زال حاضنها يبعد وجها له : ابوي انتي متأكده من قرارك .
هزة راسها بنعم بغصه من عجزت تتكلم تأخذ الكتاب من ابوها تناظر اسم سلطان الي جنب اسمها ترجف يدها من طاح القلم بتكرار من عجزت توقع ترفع عيونها : بابا
عرف يهز راسه يحضن كفها بكفه يسمي عليها تشد يد ابوها الثانيه توقع تمد القلم يأخذه سعد الي قعد يبارك لها تبتسم مجامله يطلع تحط كفها على فمها خوف يطلع صوت بكاها عندهم فتح الباب فيصل ببتسامه تمسح دموعها علطول : والـ
ماكمل تتلاشى ابتسامته يتقدم لها يمسك يدها : جوجو
ابتسمت تمسح على يده من شافت عيونه عليها : مافيني شي بس حساسية
عجز يصدق يسكت ثواني : سلطان بيدخل
سكتت بخوف ورجف بس تتدارك : ايي تمام
ناظرها قبل يطلع : ماراح اصدقك شوي بكلمك
تنهدة ببتسامه تهز راسها تقعد وكلها ثواني ورفعت راسها من الي دخل ينسف شماغه تخبي يدها بحضنها من توترة ابتسم يتأملها يتنهد من اقصاه : اخيراً
عقدة حاجبها بعدم فهم تقدم يسحب كفها يقبله ويقبل باطنه تقوم بتوتر يشد على يدها من حس بتوترها يتقدم اكثر يحضنها غمضت عينها من حست بشعور شين داخلها تبيه يبعد بس ماقدرة من شده عليها وكلامها الي تسمعه : حبيتك واخذتك من الي يبونك مرجله وعناد ..
-
عنده عدل شماغه وهو صارم على قراره يسحب جواله الي يرن يركب السياره : سم
تميم بتوتر : وين رايح ليكون بتسوي الي براسك انتبه عزيز
ضحك بسخريه : وش تبي انت الحين
تميم وهو عارف الي بيبصير وتكلم بقهر واضح على نبرته : ترا بتوجع نفسك إذا رحت عزيز
استغرب نبرة تميم بس طنش يسكر وهو محد راح يوقف بوجهه وحتى ابوه الي رفض وهو راح يأخذها برضاها او بدون رضاها حذف جواله يناظر الطريق بعد دقايق وصل بيت سعد يدخل وقبل ثواني طلعوا اهل سلطان يلقي السلام يلف سعد بستغراب : وعليكم السلام وش جايبك بعد ؟
قعد يقوم فيصل بيقهويه يوقفه عزيز : تسلم انا جاي بتكلم بموضوع واطلع
ابعد فيصل يناظر ابوه الي يأشر انه يطلع وطلع قعد سعد يناظره : وش تبي بعد وانت سارق المليون مهقيتها منك ياولد عبدالله اجل تسرق الي كان حاسبك مثل ولده وانت مو ناقصك شي
عض شفته عزيز وهو عارف سعد مستحيل يفهمه ومأخذ فكرة غلط عنه بس سكت يخلي الكلام الجده : معليه تعرف إذا جاء جدي فيصل يعلمك على قولتك سارق ..
هز راسه سعد يبيه يكمل كلامه يجمع يدينه عزيز : انا جاي اطلب القرب منك وابي الجوهرة زوجتي على سنة الله ورسوله ، والموضوع ذاك لا تحطه بينا مالها ذنب هي ..
تصدد وجه سعد ويوتر عزيز من سكوته يرفع راسه : انت عارف مستحيل احط الجوهره بالموضوع بس البنت راحت مع نصيبها وعسى ربي يقوي قلبك
وقف عزيز بصدمه يضحك بهبل : عمي الله يهديك وش قاعد تقول .
سكت سعد ينزل راسه يرفع راسه بسرعه من طلع عزيز يصرخ بأ اسمها يبيها تكذب الي يسمعه : جوهـ
وقف كلامه يشوفها واقفه مع سلطان الي سحب ذراعها بسرعه يحطها وراه ناظرة بصدمه تغمض عينها من تكلم بـ ...

العيدية المتأخرة ✨
" قريب في بارتات 🫣 "