مأوى الغربية

part 8

Writer: حِوار آلـ سُليمان

              أنثـُر لُطفـك بـ بارت رِوايتـي ..

لا تنسون التصويت والتفاعل بين الفقرات حَبيبيني ،

تستمَر فـيّ أخفـاء حُزنـك ، حَتى ينجَح هوَ بـ أخفائِـك !

             ____________________

تخَللت خيـوط الصـباح بـ ذلك الظلام ،
و أيقظت فاتنـة العَينيـن ..

مسحَت وجهّي حتى اصحصح ،
گمت غسلت وباوعت لـ ماما وديريـن ثنينهن نايمات ..

فتحت ستائـر البلكونـه باوعت للشارع الناس توهـا بادية تطلع ، اكيد عدهم دوام ..

اتنهـدت خوفي يوم افتـح هذِه الستارة والگة ابويـة !

اخذت فلوس و رتبت شعـري ، فتحت الباب بـ هدوء ونزلت للمحَل ..

المحَل صاير گدام الشقـه بالضبط ، اشتريت منه بيض وجبن وگلاصات سفري و حتى چاي وشكـر

ورجعت للشقه لگيت امي واگفه تخرمش بـ خدودها ..

لزمت گلبـي بـ أيدي خايفة من حالتها ،
بس طبيت ركضت عليه تسحلني من ظهري ..

رَبيعة: لچ العَرمـة وين چنتـي وين لچ فرفحتيني من الصباحيات عسانا لا صبحـنا !!!

فلتت روحي منها و رفعت العلاگة احچي بـ خنگه ،

_ويـن وليت ! شفتچن نايمات طلعت اجيب ريوگ قبل لا اروح للشغل ..

_الله لا ينطيچ .

بلعت ريگي اتخبل ولا تشملني بـ أي دعوة أن كانت ألي أو ضدي ..

گعدت ديريـن غسلت و گعدت هيَ وماما ،
سويت ريوگ اخذت الصينيه خليتها ..

بدينا نتريگ و ويه كـل لگمة امي توصيني حاجه شكل ،

رَبيعة: يتحرشون بيچ تنعليـن والديهم وترجعين للبيت خوش ؟

_خوش .

_طلعه منا منا ماكو طريقچ واحد من الشغل للبيت والعكس ، الخفه تبطلينها والتمضحك .

_اهو اليسمعچ يگول شارگه حلگي ليل ونهار .

_هو أنتِ صح كئيبه بس الحـذر واجب

وبقت توصي لحد ما بزعت ،
لبست ملابس تخـزي لان ما چنا حاسبين حساب هالشيء وچنت ماخذه ملابس عاديه ،

الشي الوحيد المرتب بيه هوَ شعـري ظافرتـه ومنزله خصل تايهَا ..

إتنهـدت وقبل لا اطلع بست امي وهمست ،

_احلفچ بكل عزيز لا تطلعين ولا تروحين لـ مكان يمه فدوه بس خلي تعدي هالايام .

_دروحي لچ ام حلگ توصيني .