المارشال (متوقفة حاليا )

البارت : 51

۞  ما خلــف ستار العشق  ۞

📌: 𝐂𝐡𝐚𝐝𝐢𝐚_𝐚𝐫𝐢𝐟

♟️لســــتُ عظِــــيم ، لَكـِـــــن أترك بكِ آثــــــــراً لـاَ يُنسَـــى♟️

                              البـــــارت :  51. #

نزلات من الطاكسي وفيديها طاخت ديال ديسير مكايكلش الحلاوة ولكن دخلات ليه شي فشي .. غاديا والفرحة باينا من وجهها.. كَاع المرضى شيرات ليهم وهي غاديا كتمايل وعلاش لي لا وحبيب ديالها لي مازال مابغاتش تقبل مشاعرها تجاهو بدا كيتحسن أكثر من اللول..

دخلات لأسانسور والابتسامة باقا مرسومة على وجهها.. مع الخرجة كتصادف مع الطاقم الطبي كيتجرا ما فهمات والو.. ركبها الخوف والذعر لوهلة..  دغيا مشات لشامبر ديالو حلاتها لقات البياص خاوي.. خرجات لكلوار تشوف فين هو غير يديها والريح..

عيات تسول شي وحدة فيهم فين هو مريض لي كان فهاد شامبر.. تا واحد ما بغا يجاوبها.. شدات على واحد الفرملية كتسولها..

الفرملية دخلات لشامبر لي كان فيها وليد وبلعات ريقها راجعا عندها.. وقفات قدامها حطات يديها لي عليهم صباعات طبية وشداتها بقوة وهي تنطق : كنظن هذا هو المريض لي جاتو جلطة دماغية و ماقدرناش نساعفوه.. نتمناو ليه الرحمة

ضياء ( لاحت المول ديال لطااخت من يدها وغوتاااات) : هااااااااااا... لا لا لاااااا مايمكنش

مشات كتجري لشامبر.. كتردخ فالباب ولكن لا من مجيب وكتغوت.. لي بان ليها قدامها كتشنق عليه باش يخليها دخل ولكن والو حدهم كيقولو : الله يصبرك..

: الله يكون معاك

: إن لله وإن إليه راجعون

ضياء حسات بالدنيا ضارت بيها..  ذاتها كلها حمرا  كتسمع غير تصفار.. حتى قالت لقيتو.. لقيت لي كيفهمني.. ولكن واش القدر ضدهم واش لهاد درجة كلهم مسكَيين من مغرفة وحدة..

حسات بالخنقة والضبابة على عينيها.. آخر حاجة عقلات عليها هي شي واحد جاي كيجري شدها من خصرها قبل ماطيح ونقاطعات على العالم الخارجي

.. ..

جبدات يدياتها  ورجعات  عويناتها ليها : خالتي نعاونك فشي حاجة..

بقات المرا كتشوف فالبحر بنظرة فارغة : كتبغيه؟

بلقيس ( عقدات حجبانها) : هاااا

شافت فيها ورجعات شافت فالبحر : كتبغي ولدي؟؟

بلقيس ( دارت يديها على فمها) :. و.. واش ماماه.. لا لا سمحيليا..

ناضت باش تمشي وهي تجرها بجهد مجلساها : هادي حرب.. حررررب خاصك تخرجي منها رابحة.. ولدي معاش الحب لي بغيتو يعيشو.. ولدي لقا معاك رفاهية الحياة لي مالقاهاش مع هاديك..

بلقيس بلعات ريقها بلا حتى كلمة وهي تكمل :  عارفا ولدي عاملك بلا ذرة إحترام وبلا ذرة قيمة.. ولكن محتوم عليه.. صعيب دخلي لحياتو وتستاقري صعييب.. قلت ليه خلينا غير بسطاء بغيت غير نعيش قريبة منو.. نشم فيه ريحة المرحوم.. نسقي عويناتي بضحكتو.. ولكن.. ولكن ختار البلاد على مو.. واش البلاد فيها ريحة باااه.. إلى كان غايمشي لاخر هاد الأرض ويشمها انا راضية عليه.. ولكن عمرني بغيتو يتزوج بيها.. عمرني قلت ليه سترها.. من حقو يعيش حياتو مع المرا لي كيبغي

مسحات دموعها لي خداو طريقهم على أنحاء تجاعيدها وسولاتها : سميتك بلقيس ؟؟

بلقيس ومات ليها وهي تنطق : انا مُهرة سميتي باقي غاتسمعيها بزاف.. نهار دخلي لقلب ولدي وتكوني ليه..

تسندات عليها مُهرة بشويا نايضا.. وهي تنوض حتى بلقيس..

مُهرة ( حطات يديها على خدودها) : صلحي لي ماقدرتش نصلحوو انا.. عيت نقلب عليك واخيرا  لقيتك.. رجعي ليا ولدي.. بغيت ولدي عفاك.. حسابك معاه.. ولكن ضحكتو شفتها غير فاش كيعاود عليك.. حافظي على معدنك الله يرضي عليك..

مشات مخليها مامصدقاش شهادشي.. واش القدر كيلعب لعبتو.. مامستوعباش باش معرفاتهاش هو لي مصيفطها ليها باش يكمل لي بدا.. صاطت هازا شكارتها ومشات للدار..

#يتبع