لدغة اقارب

الجزء الرابع والثلاثون

               لا تـسـتـهـلـك طـاقـتـك  كـلـهـا 
          اعـرف مـتـى تـقـفـز و تـنـقـذ
   مـا تـبـقـى مـنـك ومـن حـيـاتـك

-----

كل السبل متاحا في الحرب حتى تنتصر

اي نعم  انا كنت بحرب ويا سالم  حرب نفسي وجسدي جنت اصارع حتى احافض علي بيتي وبناتي وابني

ايام زين وايام يرجع الطبعه وخاصه بعد ما يروح يم امه

كعدتهم طولت  يمي والشهر صار شهرين والسنه صارت سنتين  وثلاثه
  اتمادو حيل وصلت بيها عمتي تحكم ببيتي

وجنت محاوله اكسب گلب سالم  لهذا ما اسوي وياها مشاكل  مجرد اغلس منها
بس طغت وصارت تدخل بناتي هيه وعمي

حتى روحتهن للمدرسه واكلهن ودراستهن  يتدخلون بيها

  جنت دوم العصاري اخلي مينا عينها على اخونها بالكاع مسويتلهم  مرجوحه كبال شباك المطبخ كل شوي اطل عليهم

  ومحذرتها ما تاخذهم ناحية الساكيه اخوها ما يفهم
   واخاف يطيح بيها

  سالم يجي من الدوام الظهر  يتغده ويتمدد فد ساعه والعصاري اوقات يشرب جاي يمي و اوقات يروح يم اهله
  ظليت اسايس واخترعلي سوالف وضحك  اشوف اكثر الاوقات يلين  ويبادرني  نسولف ونضحك

بس ماكو فايده  مجرد يدوس بيت اهله يجي يشمر بالاغراض ويصيح علي اي شي  يدور الزله

رغم ما عندي زله  لا بالنظافه لا بالترتيب البيت لا بتربيت بناتي ما اخذتهن مكان وحرجني ابد  والكل يحمد بيهن وبتصرفاتهن ويكلولي عشتي على هالتربيه

اوقات ادور بروحي  الغلط اسئل بنات خالتي  خالاتي
امي بعد مشاكلها ويا بيت جدي اعتكفت حتى ما ظلت تسمعلي

كلنه انقهرنه  لمت خوالي الحلوه اطشرت وبيت جدي الي فتحت عيوني بي راح وراحت ذكرياتنه  بي

والخبر الاكبر والي  هلكنه هلاك  واهذ نص عمري وحيلي
خبر وفاة خالي  علي

من بعده امي حيل انهارت ظليت عدهم كم يوم كل يوم المغرب قبل الصلات تكعد تندب وتبجي وتدعيله بالرحمه وتعاتبه شلون رحت  زعلان وشلن انطاك گلبه تروح قبلنه تحاجي وكأنهُ  كاعد يمها

احنه كلنه انقهرنه علي  رغم السانه وعصبيته بس شايل حنيه ونظافة قلب وهالشي خله الصغير والجبير   يبجي على خالي علي وخاصه احنه الي  كبرنه سوه سيف وخالي وانا واديان واريان وحمود ابن خالتي

بيومها حسيت فقد جزء من طفولتي وحياتي مو بس خالي
لكن قدر الله وما شاء فعل  وهذا يومه  
بس  الناس ما ترحم وتهمو خالاتي  بموتت خالي بسبب  ما انزل الله به من سلطان لو ما انباع البيت علي ما مات وكأن رب العالمين   ينتظر حجه  حتى يقبض ارواحنه