لدغة اقارب

الجزء السادس عشر

عَـزيـز الـيَـوچـعـك مَـا تـگـدر تـحَـاجـي

يَـدبـچ بـالـگـلـب وتـصِـيحـلـة مـدَلـل .

----------

علاقتي ببيداء قويه وصار سرها  وياي  وشكد لحت ساعديني اشتري نقال ما خليتها وكفت شوك ببلعومها

بس جانت اكثر كعداتها يمي  تسئل عن سيف  

مشاكل ورده زادت بالبيت وتريد تحط راسها براس رباب وانا  عمتي دوم تحط اسمي بالنص  واكثر من مره سالم ردها  ودافعلي وما يقبل عليه ويكللهم مرتي فقيره واعرف شنو جاي احجي

وخاصه بعد ما حبلت   جانت الدنيا ما سايعتنه 

بس ظلت شغلات اشوفها وره البيت وخاصه من حبلت

لو اسمع صوت سالم يصيح علي اروح اركض للكاع ما اشوف احد

  لو عمتي   تخطف كبالي 

و اوقات اشوف زوج هناء حماتي  واكف گبالي  ويسويلي حركات بوجها   ومن ادخل للبيت اسئل عن هناء لو منو اجه  يكولون شبيج  محد موجود

  هالشغلات ظلت ترعبني ومن اسولف الامي تكلي وهم وتتخيلين

بس المشكله كل ما حملي يتقدم كل ما هاي الامور تزيد  ظليت اخاف اكلع للكاع وحدي الا بيداء او سالم وياي

بسبب اخر مره من شفت مره كاعده على الساكيه  صحت خاله خاله  ما التفتت عليه

بس حجت وكالت راح يعثرونج   وكامت وكفت وجانت طويله حيل  ما حسيت الا افتر راسي  و طحت

  تالي سولفت بيداء راكضين عليه  ومدخليني للبيت  وصارت السالفه بسبب الحمل
لكن انا متاكده من المره شفتها  مو خيال  لا مره وصوتها بذاني  بس خفت احجي ظليت ساكته كلت اروح الامي اسولفلها ..

حليمه

     زينه  صرخت يما جهالي وانا كعدت من طولي  هاي اذا طلكت وخذو جهالها تموت

وعلي يريد يطلع    ياخذ صديقه ويلم حجار ويشمر على سيارتهم بس يطلعون من ام قصر وحتاريت المن اكض

  راح عبد اليسر  بدل وصاح الامه وزينه تحضرن وكل هاي هو ما ساكت

ما تكعدن ما تحملن العيال كل يوم وحده جايه
وجايبه فروخها وتعال عبد اليسر ربيهم وكبرهم  وهو تاليته لهله

  عرفته اجالي مسمار    ورديت ..
يا خويه الحيط من تميل  غير اعلى اهلها  البنيه منو الها غير بيت ابوها وتذب روحها 

سلمه .. واحنه شنو ذنبنه   شو كاعدين انا ورجلي لا مشاكل لا طلايب  بس مشاكلكم هيه مخربطه احوالنه

عبد اليسر .. سدي حلكج  لا ابتلي بيج

سلمه .. هاي لان احجي حجاية حق   صف صف ويا امك وخواتك