ياسماء امطـري واعصفي الريـف

Part:18

اللهم صلى وسلم ع نبينا محمد ...

_____
ابتسم الدكتور ونطق : لو اعرف ان فيه متبرع مسوي تحاليله من اسبوع عشان يتبرع ل الريف خصوصاً كان من البدايه اختصرتها عليهم
اخذ الدكتور البنج ونطق : جاهز
عاصف : انا دايم جاهز
بنج الدكتور عاصف وبدت العمليه
مرت على عمليه عاصف 3 ساعات ، نقلو عاصف ع غرفه الافاقه وعلى طول جهزو الريف للعمليه صارت مضاعفات بعمليه الريف لكنها عدت على خير وحطوها بغرفه الافاقه وطلع الدكتور وهو يطلع الكمامه بتعب
جاء ملهم ونجمه لدكتور وكان ساطي معاهم ونطق الدكتور : الحمدلله ع السلامه العمليه كانت ناجحه
ابتسم ملهم وحضن نجمه وهم مبسوطين ، ابتسم الدكتور وتركهم وراح ناظر ملهم ب اطراف المستشفى وماشاف عاصف ونزل عشان يبلغه ولما نزل م حصل عاصف تحت التفت على الموظفه ونطق : فين الرجال الي كان هينا
هزت الموظفه كتفها بمعنى مدري ونطقت : اتوقع راح
ملهم استغرب انه راح معقوله خلاص راح ؟ ماسال عن الريف م دقق وطلع يشوف الريف
...
| عند راكان & البندري |
كانت البندري جالسه وراكان جالس وبحضنه ليث ، كان يسمع البندري تبكي اخذ نفس ونطق : ان شاءالله لقو متبرع واكيد الريف الحين بخير
رفعت البندري نظرها عليه ونطقت : كلمتهم؟
بلع راكان ريقه وهو من اول يتصل ع عاصف م يرد ونطق : اي كلمتهم وبخير
ناظر راكان ليث الي غفى بحضنه ونام ابتسم ونطق : حطي فراشه خل نحطه ينام بكى كثير
مسحت البندري دموعها وقامت دخلت غرفه ليث تسوي الفراش ودخل راكان وهو شايل ليث بين يدينه ، حط ليث بشويش ع فراشه ولبسه البطانيه لف وشاف البندري الي واقفه ع الباب ، طفت البندري الانوار وطلعت طلع وراها راكان وهو يقفل الباب ع ليث
كان البندري واقفه وناظرت راكان ونطقت : ابي اروح المستشفى تكفى راكان
ناظر راكان بعيونها ولا قدر يردها ونطق : طيب بس اصبري
طلع جواله ودق ع امه ونطق : الو يمه
ردت ام راكان : هلا ي خلف ابوي
كان كل كلامهم في مسامع البندري
راكان : يمه عطي الجوال ساره ابيها
ام راكان : اي ابشر ي امك ،
بدت ام راكان تنادي ساره وجت ساره اخذت الجوال من امها ونطقت : هلا راكان
راكان : اسمعي خلي واحد من عيال الديره يجيبك لديره الريف بس امي لاتدري تسمعيني
ساره استغربت بس حست ان في شيء : خلاص تمام ابشر
قفل راكان المكالمه وناظر البندري : خلي اختي ساره تجي تجلس مع ليث وحنا نروح
هزت البندري راسها وجلسو ينتظرون ساره ، وراكان احتراماً ل البندري قعد ينتظر بالحوش وبيده سبحته يستغفر ابدت البندري من الباب وهي تناظره جالس ب الحوش وبيده سبحته شويات ودق جوال راكان قام وهو يرد ويفتح باب الحوش لين وقفت سياره واحد من عيال الديره ونزلت ساره ، قرب راكان عند ولد الديره ونطق : بيض الله وجهك
ابتسم ولد الديره ونطق : كلنا اخوان انفداك ولو تبيني اجيك لاخر الدنيا جيتك ي راكان
ابتسم راكان ونطق : م تقصر انفداك
قفل ولد الديره باب السياره وحرك راجع ل الديره ، التفت راكان ع ساره ونطق : ادخلي ادخلي
دخلت ساره وقابلتها البندري ونطقت : حياك
ابتسمت ساره : الله يبقيك البندري ، وش فيكم ؟
راكان اخذ نفس وبدا يشرح ل ساره ، شهقت ساره ونطقت : الريف بخير ؟
البندري والي نزلت دمعتها نطقت : ماندري م وصل لنا خبر عاصف راح ولا سمعنا منه شيء وامي وابوي م معاهم جوال
راكان : اسمعي ساره خليك عند ليث وانا باخذ البندري للمستشفى
هزت ساره راسها ونطقت : تمام ليث بالحفظ والصون
باس راكان راس اخته ساره ونطق : ها انتبهي واي شيء يصير دقي علي
ساره ابتسمت : تمام روحو انتم
طلع راكان والبندري متوجهين للمستشفى بعد م وصلو ، نزلت البندري تدور ع الريف
ملهم التفت وشاف البندري : البندري
جت النبدري تحضن ابوها ونطقت : الريف ؟
ابتسم ملهم : بخير يعيوني بخير سوا عمليتها ونجحت
البندري ضحكت وهي تبكي ونطقت : حصلتو متبرع
نجمه : اي عيوني حصلنا واحد الله يجزاه الف خير ويوفقه بحياته
بلع راكان ريقه وناظر ملهم فيه ونطق : الحمدلله ع السلامه يعم
ملهم هز راسه ونطق : يسلمك ، عاصف كان فيه ومعاد ادري وين راح
راكان توتر ونطق : اي كلمته رجع الديره وقالي ابلغه
ملهم استغرب وحس بقهر كيف يروح ويترك الريف ويترك ملهم ؟ نطق ملهم : اجل كذا
راكان هز راسه ب اي والتفت وشاف ساطي بوجهه عقد حواجبه واستغرب ، قرب ساطي من نجمه وملهم بقوارير ماء ونطق : اشربو وريحو ريقكم
راكان نطق : ساطي !!!!!
التفت ساطي ونطق ببتسامه : راكان
راكان : وش تسوي هينا
ملهم ناظر راكان ونطق : الله يجزاه خير كان بيتبرع لاخر لحظه حصلو متبرع جاهز
راكان وهو م يتوقع ذا الخير من ساطي ونطق : غريبه
ساطي ناظره ونطق : وش الغريب ؟
راكان ناظره ونطق : تعرف انت وش الغريب
تركه راكان وراح
| عند عاصف |
بدا البنج يروح عن عاصف وبدا يصحى ، يفتح عيونه وتسلط النور لعيونه وكان الدكتور فوق راسه ونطق : عاصف تسمعني
كان عاصف م يسمع زين بحكم انه توه يصحى ، بدا الدكتور يفحص عيونه وينطق : عاصف
راكان والي واقف ع راس عاصف نطق : عاصف ولد تسمع
عاصف ابتسم ونطق : مع الاسف اني اسمع صوتك الخايس
راكان ابتسم ودقه من كتفه : اهم شيء انك عايش اسمعك اياه كل شوي
عاصف وهو يفتح عيونه ناظر راكان ونطق : مع الاسف اني عايش
ابتسم الدكتور ونطق : الحمدلله مافيه مضعفات
عاصف : كان فيني امل اصحى واحصل روحي عند ربي لكن الواضح روحي م تبي تفارق الحياه
راكان صكه ع راسه ونطق : تبيني اهبدك روحي طلعت لين شفتك وتقول فيك امل تكون روحك عند ربك
ناظر عاصف راكان ونطق : هات سبب اعيش عشانه
راكان ناظره وقرب منه ونطق : خويك واخوك الي بالدنيا بتتركه ؟ ولا خالتك امك الثانيه تبيها تحس بفقد الولد ؟
اخذ عاصف نفس ونطق : لو لاكم ممكن انتحرت من وقت راح
مسح راكان ع وجهه وهو منجلط منه : انتحرت ثم رحت النار وش استفدت ؟
عاصف وهو يعدل راسه ع المخده نطق : انا في نار بالدنيا
عاصف وهو يغير الموضوع : كيفها ؟
راكان والي متنرفز منه اخذ الكرسي وجلس عليه : منهي
عاصف ناظره ونطق : من يعني الريف
راكان وهو يلعب بسبحته نطق : الحمدلله بخير طلعوها من العمليات
عاصف ناظره ونطق : لاتقول انك علمت احد اني تبرعت
راكان : م علمت احد ، بس فيني اقولك العم ملهم كرهك
عاصف ابتسم وناظر السقف ونطق : عشاني م وقفت جنبه
راكان اخذ نفس ونطق : لو تعلم انك المتبرع
عاصف ناظره ونطق : محد بيعرف غير ربي ، مابي احد يعرف خلهم يدعون لفاعل الخير المجهول
تافف عاصف ونطق : خل نرجع الديره
راكان : منت بصاحي لالاجد منت بصاحي ، توك طالع من العمليه اي ديره اي خرابيط انثبر لاعطيك كف
عاصف ناظره ونطق : المستشفيات م تناسبني
راكان والي تكى بيدينه ع رجوله ونطق : وش يناسبك طال عمرك ؟
ضحك عاصف ونطق : ترا صادق ان م طلعتني من المستشفى طلعت بروحي
طلع راكان شماغه ورماه بحضنه وهو يناظر عاصف
عاصف وهو يناظر المغذي ونطق : هذا ليش
راكان والي شوي يشق ثوبه من عاصف ونطق : انا اشك انت العمليه بعقلك مب بطنك
ضحك عاصف وناظره ونطق : لاتفلها قم بس
مسك عاصف المغذي بطلعها ، وجاء بيقوم وراكان معاد معاها الا يساعده وقف عاصف وهو متكي ع كتف راكان جاء بيطلعون وداهمهم الدكتور
الدكتور انصدم ونطق : ليش تقوم توك تصحى ؟
عاصف ابتسم ونطق : ابي اطلع من المستشفى على مسوليتي
الدكتور : لازم ننضف عمليتك ونراقبها
عاصف ناظر الدكتور ونطق : مايجيني شيء انا انظفها ي دكتور
الدكتور يأس من عاصف ونطق : تمام وقع انها ع مسوؤليتك وتطلع
طلع عاصف الي كان سانده راكان لين وقفو عند موظفه ، طلعت لهم اوراق وقعها عاصف وطلعو
راكان وهو يدور سياره عاصف بعيونه نطق : سيارتك وينها ؟
عاصف : حطيتها ورا المستشفى عشان ملهم مايشوفها
راكان ناظره ونطق : بجيب لك عربه تجلس فيها وانا بدفك
عاصف هز راسه ب لا : ترا ماني عجوز اقدر امشي معليك
ضحك راكان ونطق : ها رح اركب انا باخذ البندري وارجع لك ونمشي
عاصف استغرب ونطق : وش دخل البندري ؟
بدا راكان يشرح له وانه جابها وساره عند ليث ، عاصف : زين رح وتعال
.....
| في العنايه المركزه |
كانو يناظرون الريف من وراء قزازه ، كانو يشفون على فمها اكسجين وبيدها المغذي وجهاز يراقب دقاقت قلبها واجهزه كثييره حولها كانت نجمه تناظر بنتها وهي تبكي وتتمتى لو كانت هي بدال بنتها وبنتها واقفه على حيلها ، جاء راكان وشاف ساطي الي واقف معاهم عض راكان ع سنونه ونطق : مصيري بعرف وش وراك اصبر انت
قرب راكان من ملهم ونطق : يعم
التفت ملهم ع راكان ونطق راكان : تبي ارجعكم البيت ترتاحون
ملهم ناظر نجمه ونطق : خذ عمتك يولدي والبندري
التفت البندري ونطقت : لا يبه روح انت وامي وانا بجلس عند الريف انتم تعبتو من اليوم
جاء ساطي ونطق : اوديهم ياعم ؟
ناظره راكان جاء بيتكلم بس رد ملهم ونطق : لا يولدي انت تعبت معانا اليوم جزاك الله خير
ساطي ابتسم ونطق : يلا استاذنك ياعم
وطلع ساطي من عندهم وفعلاً اخذ راكان نجمه وملهم وعاصف كان بسيارته ينتظر راكان يوديهم ويجي راح راكان لبيت ملهم ونزلهم واخذ ساره ورجع لعاصف
راكان نزل من سيارته ونطق : انزل من الشاص واركب معي
عاصف : وساره ؟
راكان التفت يناظر ساره الي جالسه بالسياره ونطق : معليك ذي دلخه مابتعرف انك مسوي عمليه
عاصف وهو ماسك مكان عمليته الي تعوره بعض الشيء ونطق : يلا يلا وارسل احد يرجع الشاص
راكان : انت اركب وازهلني
ركب عاصف مع راكان قدام وساره وراء ، شغل راكان السياره ومشى نزل عاصف مرايه السياره وهو يشوف نفسه فيها ويسوي عصبه لشماغه ، وهو يرفع يده ع راسه كانت العمليه تعوره شوي بس كان ساكت ومتحملها عشان ساره م تشك انه مسوي عمليه طول الطريق كانت عيون ساره ع عاصف تحس ان قلبها يحن له كثيررر ، تحس انها كانت تظلمه كل الي عاصف يحبهم يروحون من بين يدينه ومن ضمنهم الريف
ساره ابتسمت ونطقت : عصوف
راكان من الصدمه ضغط فرامل اقوى م عطاه ربي ، مسك عاصف عمليته ونطق : اههه ورع
ساره الي مسكت راسها الي صقع بالمرتبه ، راكان التفت ع ساره ونطق : ويش ويش عصوف ؟ تعالي امسك اذا عليك حراره ولاشيء
ضربت ساره يد راكان الي مدها لها ونطقت : وجع ، اذا زانت علاقتي معاه قلتو ويش ويش واذا خربتها هاوشتوني خيررررر
عاصف نطق : بس عصوف مايجي كذا بخربها انا
ساره : انا عارفه انك م تستاهل من يدلعك بس وش اسوي قلبي حن
راكان ناظره ونطق : اقول ي بزره اوسكتي
ساره : اوسكتي هذي وش اسمها اسكتي
راكان الي عدل جلسته ونطق : طناخه بقولها اوسكتي وعيب تعترضين ع اخوك الكبير
ساره نطقت : الله واكبر ي الكبير تراك اكبر مني ب 9 سنين بسسس
ضحك عاصف ونطق : صح بس 9 سنين
ساره التفتت عليه ونطقت : وانت بس اكبر مني بعشر سنين
راكان ضحك : مره قليله تدرين
عاصف مسك عمليته وعدل جلسته وهو يضحك ونطق : عمرها 18 وتتفسلف علينا
ساره : انا اتفلسف يالشايب ؟؟؟ انت باقي لك سنه وتصير ثلاثيني اوص
ضحك راكان ومشى بالسياره ونطق : الله يخلف علينا
تنزفزت ساره ونطقت : اقولك شيء ؟ معاد بتناقش معاكم انقلعو
وصل راكان عند البيت وع طول فتحت ساره السياره ونزلت ، نزل عاصف قزاز سياره ونطق : ي ام الشوشه سوينا لنا كيك شرايك
التفت ساره ونطقت : لك عين بعد ؟ وام الشوشه ؟؟؟؟؟
راكان : يب ام الشوشه انا رعبي شوشتك لاصحيتي من النوم
تنزفزت ساره واخذت حجر من الارض ورمته عليهم ، ودخلت البيت
......
| في غرفه الريف |
كانت البندري جالسه جنب راس الريف وتنتظرها تفتح عينها ، كانت البندري مبتسمه وتلعب بشعر الريف وهي تنتظرها تصحى وفعلاً بدت الريف تصحى ويروح البنج منها
البندري فرحت ووقفت ونطقت : ريفي
كانت الريف ماترد بس تفتح عينها وترجع تقفلها ، فتحت البندري الباب وهي تنادي الدكتور وتقول انها صحت وفعلاً جاء الدكتور عندها وبالكشاف يكشف ع عيونها ونطق : تسمعيني ؟
الريف وهي تحس بان لسانها ثقيل ولا تقدر تنطق ، الدكتور قرب منها ونطق : راقبي اصبعي بعينك
وفعلاً بدت الريف تراقب الصبع الدكتور ، طلع الدكتور سماعاته يكشف ع قلبها ناظرها ونطق : تقدرين تتكلمين ؟
الريف والي جت بتتكلم بس ثقل لسانها يمنعها ، البندري بخوف : دكتور وش فيها اختي ؟
ناظر الدكتور البندري ونطق : هذا بس ثقل بلسانها بسبب البنج لسانها متبنج ساعه بالكثير ويفك عنها تطمني اختك بخير وعمليتها جداً كويسه
تنهدت البندري براحه كبيره ونطقت : يعطيك العافيه
طلع الدكتور وجلست البندري عند راس الريف ونطق : كذا تخوفينا ؟
ابتسمت الريف وبلعت ريقها وكان ناشف ، ناظرت البندري ونطقت : تبين مويه ؟
هزت الريف ب اي وقامت البندري تصب مويه وتشرب الريف شوي شوي
......