ياسماء امطـري واعصفي الريـف

Part:16

صلو ع نبينا محمد عليه افضل الصلاه والسلام ...

_____
فزت البندري والتفت وراها وبلعت ريقها ونطقت : م تخبيت ليش اتخبى
راكان ابتسم ونطق : الله اعلم ليش انتي وراء الجدار
البندري : اسوي حذياني
هز راكان راسه وهو مبتسم ، سحبت البندري عليه ودخلت ، وكانت اماني تلبس طرحتها بتطلع
البندري : اماني
اماني ابتسمت : البندري كيفك
البندري ابتسمت : بخير كيفك انتي ، وين رايحه اشوفك ماشيه
اماني : بخير ، اي راكان ينتظرني برا جيت عشان اعزمكم ع عرسي
البندري فرحت ونطقت : يعمري مبروك متى
اماني وهي تسوي طرحتها : يوم الخميس
البندري قربت وحضنت اماني وهي تبارك لها ، طلعت اماني ودخلت البندري
اماني : مشينا راكان
راكان الي واقف قدام سيارته ويسوي شماغه وهو يناظر قزاز السياره نطق : مشينا

~ نقدم الوقت ~
| يوم زواج اماني & ممدوح |
كان عاصف مسوي عرس فخم ولا بالحلام ، كان واقف وقدامه ممدوح الي يلبس بشته ويوريهم
ضحك راكان ونطق : يبوي شفيها يدك ترجف
ممدوح ببتسامه : مدري متحمس ومتوتر وخايف
عاصف وهو واقف بانت طيف ابتسامه بارده ع وجهه ونطق : توكل ع الله
ممدوح ناظره ونطق : ماقدر اوفيك حقك
دفه عاصف ونطق : وش الي مقدر اوفيك حقك تراني اخوك
حضن ممدوح عاصف وشد عليه ونطق : الله يوفقك
عاصف ابتسم ونطق : يلا يلا تجهز اماني تنتظرك لاتتاخر ع بنت عمي
جاء عاصف بيطلع بس ناظر ب راكان ونطق : وش ذا الي ع وجهك
راكان والي الحلاق مسويه له صنفره في وجهه وحاط له ماسك ترطيب : مدري الحلاق قال بتصير ابيض من بعده
عاصف والي طبطب ع كتف راكان ونطق : يرجال شيله بس قال ابيض قال وهو كل ظهر جالس لي في الشمس
ضحك راكان ، وطلع عاصف من عند الحلاق راح عاصف ياخذ بشته يلبسه
| عند اماني |
كانت واقفه تناظر فستانها الابيض المعلق ، واخواتها الي بالغرفه والناس الي تجهز لعرسها ابتسمت وهي تتذكر وهي صغيره
فلاش باك ~
اماني بعمر 8 سنين طالعه من بيتها تلعب مع اطفال الديره زي اي يوم كان ، كانت اماني وهي صغيره دلوعه وبس تبكي
اماني : هات الكوره ذي حقتي
الولد دفعها وطاحت ع الارض : الكوره مو للبنات
طاحت اماني وجرحت يدها ، ونزلت دموعها وبدا الولد يضحك ويقول : شوفو شوفو الطفله تبكي دلوعه بابا وماما
كانت اماني ماتشوف الولد من الشمس وهي تبكي ، شافت الولد الي جاء ودفه واخذ الكوره منه ورجع دفه لين طاح
ممدوح والي كان بعمر 12 ، قرب ممدوح من اماني ومد لها يده ناظرته اماني وكان طفل لابس ثوب ومشمر ثوبه والتراب موصخ ثوبه ، حطت اماني يدها بيد ممدوح الي وقفها وبدا يشيل التراب من ع يدها مد لها الكوره ونطق : اذا احد ضربك قولي لي ، وعد ماراح اخلي احد يسوي لك شيء

انتهى الفلاش باك ~
كان ذا اول لقاء بين اماني وممدوح ، ابتسمت اماني وهي تشوف ممدوح وفى بوعده ومن ذاك اليوم اماني م صار لها شيء
دخلت بنت اخت اماني عليها ونطقت : يلا ياخاله م جهزتي
التفت اماني عليها ونطقت : الا بس الريف م جت ؟
بنت اخت اماني : لا ماجت
تاففت اماني واخذت فستانها تلبسه وجت بنت اختها تساعدها ، لين اماني لبست الفستان بدت تحط الحلق وهي تنطق : يارب يالريف تجين
....
| عند الريف |
كانو جاهزين ولابسين فساتينهم ، وطلتهم تسحر ونجمه معاهم طلعت الريف الي قالت انها بتشغل السياره لين م يطلعون ، قربت نجمه من عند ملهم ونطقت : من عزمك مصلح
ابتسم ملهم ونطق : لا متوقعه رخمه يعزمني ، ولد برق وممدوح عزموني مابغيت اروح بس عشان عاصف
نجمه هزت راسها وطلعو كانت الريف مشغله السياره ومتكيه ع باب السايق ونطقت : عادي اسوق
نجمه : يويلي ويلاه صاحيه انتي
ضحك ملهم ونطقت الريف : وشو يمه والله اعرف اسوق
ضحكت البندري ونطقت : لاتسوين سواتي
ضحكت الريف ونطقت : معليكم ها يبه تكفى بسوق
ليث فز ونطق : اي اي خل الريف تسوق
ناظرها ملهم واخذ نفس ونطق : طيب ، اركبو يلا كلكم وراء وانتي اركبي عند السايق
ركبت الريف عند السايق ونجمه والبندري وليث وراء ، وملهم قدام عشان يعلم الريف ولا صار شيء يقدر يتدخل
شغلت الريف السياره وضغطت ع البنزين ومشت ، بدت تمشي وتناظر بالمرايه وكانت سواقتها تعتبر متقنه بعض الشيء
ابتسمت البندري : اوخسس تعرفين
الريف : قلتكم م صدقتوني
ضحك ملهم ونطق : لفي يمين لفي
لفت الريف يمين ، وبدا ملهم يوصف لها الطريق لين دخلو ديره البرق ودخلتها الريف وهي تحاول تقوي نفسها وقفت السياره وشافت عاصف الي يمشي ببشته وجنبه راكان وممدوح وكان عاصف هيبه ، دقنه وهو يمسح ع شنبه وهيبته بمسكه البشت نزلت الريف من السايق وعينها بعين عاصف نزل ملهم من السياره ، التفت عاصف من عند الريف ل ملهم ونطق : ي مرحبا بالي جانا
قرب عاصف من ملهم يسلم عليه ، وراكان وراه يسلم
ملهم وهو ماسك يد ممدوح : مبروك منك المال ومنها العيال
ممدوح : الله يبارك فيك ونشوف ليث عريس
ملهم : اللهم امين " التفت ملهم ع البنات ونطق " ادخلو ادخلو
عاصف التفت عليهم وهو شوفه الريف تقطعه ، وده يحضنها ونطق : اي حياكم حياكم
جو بيدخلون ناظر ملهم الريف ونطق : الريف وقفي السياره موقف زين كذا مو مزبوط
الريف والي فتحت باب السياره وركبت ، شغلت السياره وكان عاصف واقف قدام السياره بالضبط ، ضغطت ع البنزين وشطفت السياره عاصف الي بعد عنها بسرعه بغت تصدمه ملهم ابتسم من حركتها ، ووقفت الريف السياره ونزلت دخلت العرس وتوجهت عند اماني
فتحت الباب وكانت اماني واقفه بفستانها وابتسمت : ريفييييي حيوانه حسبتك م راح تجين
ابتسمت الريف وحضنتها ونطقت : معقوله انا اسحب عليك
حضنت اماني الريف وناظرتها الريف وابتسمت : تهبلين
اماني : عيوووونك الي تهبل
الريف : يلا انا بطلع ، وانتي تصوري مع ممدوح
ضحكت اماني وطلعت الريف وهي ترسل بوسه لها ع الهواء ، طلعت الريف ودخل ممدوح ع اماني كانت اماني واقفه وامها جنبها قرب ممدوح يسلم ع ام اماني وسلمت ام اماني من غير نفس عليه بعدها شاف ممدوح اماني الي كانت ملاك واقف قدام طلعت ام اماني من عندهم وقعد ممدوح متنح في اماني ونطق : وش ذا الزين
اماني وهي مرخيه راسها ومستحيه ، ممدوح ابتسم وهو يرفع يده يحصنها ويقراء عليها بنفسه ونطق : لايعطون زوجتي عين الي م يستحون
ابتسمت اماني بحنيه ، ونطقت المصوره : ي عريس م ودك نصوركم
ممدوح التفت ونطق : اعذريني ذبت من الجمال
ابتسمت المصوره ، واماني استحت وبدو يتصورون
قرب ممدوح وبدت المصوره تعطيه وضعيات يسويها ، رفع ممدوح بشته وحضن اماني
...
| عند الرجال |
كان عاصف واقف يرحب ب الرجال وجنبه الشيخ مصلح ، كان عاصف م يناظر عمه ابد لان لو ناظره ممكن يذبحه سلم ع الرجال وجلس شويات وجاء ممدوح من عند اماني بعد م خلص من التصوير بدو يرقصون ويفرحون من فرحه ممدوح ، طلع عاصف من العرس وهو ياخذ نفس طلع بكيت الدخان من جيبه وبعد عن العرس وهو يدخن وبهدوء يطلع الدخان من فمه كل ماله ويبعد عن العرس وهو يهوجس ، بيده الثانيه يرفع شماغه الي طاح ع كتفه رجعه ع راسه قرب من عرس الحريم وشاف الريف وهي واقفه عند سيارتهم فاتحتها وتطلع شنطتها منها جاء عاصف من وراها وحشرها ، التفت الريف وشهقت بخوف وهي تمسك قلبها وطاحت طرحتها الي كانت ع راسها لكتفها وبان شعرها وبدت الهبوب تهبه ، كانت الديره فاضيه كلهم بالعرس مافيه احد يمر ويشوفهم
الريف ناظرته ودفته وهي تاخذ شنطتها : بعد عني
جت بتمشي ومسكها عاصف من يدها ، وسحبها لين صك ظهرها بباب السياره قرب منها وهو ماسك يدها ماقدر يقاوم شوقه وهو نفسيته تعبانه ، بعد شعرها من ع رقبتها ونزل يدفن وجهه برقبتها وشفايفه تلامس رقبتها ، حست الريف بكهرباء بجسمها رفع راسه يناظر الريف الي متجمده مكانها استقرت عيونه ع شفايفها قرب منها والريف بلعت ريقها قرب عاصف ودفته الريف ونطقت : وش قاعد تسوي انت ، شايفني لعبهه بين يدينك انا ؟ متى م بغيتني جيتني ومتى م بغيت تركتني من تكون
عاصف والي رمى الدخان الي كان بيده وناظرها ونطق : يحق لك تقولين كل شيء معك الحق
ضحكت الريف وناظرته : اي معي الحق لانك تحسبني لعبه بين يدينك بس انا مو كذا يولد برق
عاصف ناظرها وهو مكسور ويوضح بعيونه الكسر نطق : كانت بلحظه غضب في اشياء انتي ماتعرفينها
الريف ناظرته وجاءها فلاش باك
فلاش باك |
وهي تسمع من خلال باب غرفتها |
ناظرته نجمه وتنهدت ونطقت : هو ليش سوا كذا ي ملهم انا شفت بعيونه حبه ل الريف
ملهم تنهد ونطق : عرف الحقيقه ي نجمه عرف الحقيقه وصعبت عليه ، هو الحين مشوش خل يهدى مع نفسه شوي
مسكت نجمه فمها بصدمه ان عاصف عرف ونزلت دموعها ونطقت : انجرح ؟
هز ملهم راسه ب اي ونطق : وشلون م تبينه ينجرح ، انا مستغرب انه صامد للحين
نجمه اخذت نفس ونطقت : يويلي عليك يولد جميله يويلي عليك
انتهى الفلاش باك |
وناظرت الريف عاصف ونطقت : عرفت الحقيقه عرفت ان مافي ثار وان ابوي برئي
عاصف عقد حواجبه وناظرها : انتي كنتي تعرفين عن عمي ؟
الريف وهي تجهل ذا الموضوع نطقت : لا ، مهما كان الموضوع كان خليتني اوقف جنبك مو ترميني وتخليني ع جنب ولا اعرف وش الموضوع متى م بغيت والظروف حدتك رميت الريف ومتى ماظروف بغتك تاخذها تاخذها غلطان ذي مو الريف عشان كذا ورقه طلاقي توصلني
تحولت ملامح عاصف ومسكها ونطق : الريف يوم قلت طلاق كان وقت تشوش بعقلي
الريف ناظرته وبعزه نفس فيها نطقت : يعني كل م تشوش عقلك تفكر تطلق وترميني ، انا م اسمح لك طيب ورقتي توصلني
جت الريف بتروح ومسكها عاصف وصك ظهرها ب السياره مره ثانيه وهو ماسك خصرها ومايبي يخسر الريف ناظرها ونطق : لاتروحين
الريف والي الدموع بدت تبين بعيونها وبدت تلمع ونطقت : حياتك بدوني افضل
هز عاصف راسه ب لا ونطق : الريف لاتروحين وتاخذين قلبي معك لاتتركين معلق بين هواجيسي
بلعت ريقها ودمعتها تنزل ع خدها ونطقت : انتهت قصتنا يولد برق ياليت توصل ورقتي لي بكره ذا اخر طلب اطلبه منك تكفى تكفى اسمع كلمتي ذا المره وعطني ورقه طلاقي بكره
بعدت الريف عن عاصف ، وعاصف وقف غمض عيونه ياخذ نفس يحس بالم الحب قوى نفسه ومشى يرجع لزواج الرجال
دخلت الريف الزواج وماتحملت دخلت الحمام وهي تحط يدها ع فهمها وتبكي وتسد شهقاتها عشان محد يسمعها كانت تبكي بحرقه رغم الالم الي تحس كل شيء ولا عزه نفسها اصرت ع الطلاق ولو ع موتها
وقفت قدام المرايه وهي تمسح دموعها تعرف ان الورقه اذا جتها يعني اعلان موتها ، مسحت دموعها وبشنطتها طلعت مكياجها تعدله وتحاول م تبين انها بكت اخذت نفس وطلعت وكان مافيها شيء تنهار من الداخل ومن برا صامده قويه
~ بعد م خلص الزواج واخذ ممدوح اماني والكل رجع لبيته ~
رجعت الريف للبيت وهي متضايقه مره ، دخلت الغرفه تبدل ملابسها وتلبس بجامتها دخلت البندري عندها وبيدينها قهوه ونطقت : ودك نتقهوى ؟
التفت عليها الريف وابتسمت ونطقت : هاتيها
جلست البندري والريف مع بعض وحطو القهوه ، اخذت البندري الفنجال تصب ل الريف ومدته لها اخذت الريف الفنجال من يدها ناظرتها البندري ونطقت : وجهك شاهب فيك شيء
الريف اخذت نفس وماتحملت الي بداخلها وانفجرت عند اختها : ليش حظي كذا
البندري ناظرتها ونطقت : ممكن خير لك
نزلت دمعت الريف ع خدها ومسحتها وهي تنسدح ع رجل اختها ونطقت : قلبي يحترق روحي نار
البندري وقلبها معورها ع اختها بدت تلمس شعرها ونطقت : بسم الله ع قلبك ي قلبي
الريف بدت تبكي وهي منسدحه ع حضن اختها ، نزلت دمعه البندري وهي تشوف اختها كذا
نامت الريف ع رجلين البندري وضلت البندري تمسح ع راسها وتسمي عليها
~ يوم طلعت الشمس واصبح اليوم الثاني ~
صحت الريف ع ورقه طلاقها الي وصلتها فعلاً ، مسكتها بين يدينها وهي تناظرها وكان مع الورقه مكتوب فيها " لا قلتي تكفى وطلبتك اسوي الي تبينه ولو كان فيه موتي "
نزلت دمعتها ع الورقه ، ومسحتها ع طول اول م دخل ابوها
ملهم ناظرها وقرب منها ي حضنها ، حضنته الريف بقوه
ونطق ملهم : انتي بخير
هزت الريف راسها ب ابتسامه مزيفه : بخير
.....
| عند عاصف |
كان جالس ع كبوت السياره يدخن ، وجنبه راكان الي يناظره ونطق : يخوك انت من متى تشرب دخان
عاصف وهو يطلع الدخان من فمه نطق : من اليوم
راكان اخذ نفس وهو يشوف عاصف مبهذل نطق : ارسلت ورقتها ؟
هز عاصف راسه بكسر ونطق : سويت الي هي تبيه حتى لو اعرف انها تبي موتي بسويه
مسك راكان كتف عاصف يطبطب عليييه ، ونطق : طيب وش بتسوي لعمك
عاصف قام وهو يرمي السقاره ويدعس عليها نطق : باخذ املاك ابوي واقف في وجهه
راكان وقف وناظر عاصف ونطق : انا معك لو تقول طب في الموت ي راكان طبيت
ابتسم عاصف من وقفت راكان ونطق : م تقصر
..
ننهي البارت هينا
البارت قصير بس ذا الي قدرت عليه في وسط ظروفي 🩷