وأنا جاهل في درب المُحبـين

البارت التاسع عشر

انعزلت عن العالم ماعاد ودها بشي حتى الأكل ماصارت تأكل ماصارت تطلع من غرفتها دايم ضايق صدرها تحس الدنيا ظلمت وانطفى نور قلبها.
حتى الستاير ماصارت تفتحهم عشان الشمس تدخل دايم نايمه كل م دخلوا اخوانها يتطمنوا عليها يلقونها نايمه
بالمستشفى
كان جالس جنبه وماسك المصحف ويقرا ودموعه تنزل
مر شهر من هذاك اليوم الكئيب وهو للحين ما صحى وللحين ما يدرون من اللي متسبب بالحادث لأنه هرب واختفى
سمر باقي لها شهر على ولادتها وتحاول تكون صبوره عشان البيبي ما يصير له شي
مطلق دايم بالمستشفى يقول ما اتركه لحاله
الهنوف تحاول تقوي نفسها عشان امها
دخلت غرفتها وكالعاده ظلام فتحت الستاير عشان الشمس تدخل
شيهانه : نجد يابعد حيي تكفين مايصير هاللون صارلتس شهر ع هالحال
نجد وهي مغطيه نفسها بالبطانيه: روحي وخليني لحالي ما ابغى اشوف احد
تنهدت: متعب بيروح المستشفى ما تبين تروحين معه
نجد: لا
شيهانه: تكفين ي نجد لا تسوي بنفستس هاللون قومي واطلعي
نجد بعدت البطانيه وبصراخ: اطططللللععععيييي
تنهدت بضيق من حال اختها وطلعت وسكرت الباب
متعب: وينها
نزلت دمعتها: ع حالها ي متعب عيت تنزل
طلع لها وفتح الباب ودخل لها وبعد البطانيه بقوه
نجد ناظرته بحده : اطلع برا متعب
متعب اللي اول مره يعصب عليها: بيقوم يعني هالحين بيتعدل كل شي لو نمتي لو ما طلعتي لو عزلتي نفستس ابشرتس ما بيقوم وانتي تسذا
نجد وهي تحس قلبها محروق عليه: ادري هاليودعوه "عشان كذا" اتركني بحااااللييي وااططلللععع
عطاها كف: مابيتغير شي ي نجد ماغير تذبحين نفستس ناويه تموتين انتي ولا وش
بكت بحرقه آخر كلام بينهم كان كسر خواطر ودها تروح له وتقوله ماصدقت فيه بس من حرقة قلبها اللي أشعلت نيران الغيره بوسط صدرها قالت له كذا ودها تعترف له بحبها له ودها تحضنه ودها تبكي بصدره ودها تعتذر له عن كل شي طلع منها بلحظة غضب منها
تنهد متعب وهو اللي ما تعود يقسى عليها ضمها بقوه: اسف ياملي ماصيدي بس تكفين لا تضعفي طلبتس/ وطلع تاركها بدموعها
————-
:اي برسل لك المبلغ ماعليك
: مثل م اتفقنا
:تطمن وبعدها الله يستر عليك
————-
سعود: تطمن صار له شهر مختفي محد يدري وينه
محسن: اي زين باقي نجد
سعود: متى
محسن وهو يضحك: لا مساكين خلهم يعيشوا حزنهم
———-
سمر: مافي خبر عن نجد
همس: صار لها شهر ماترد على احد كلمت شيهانه قالت عزلت نفسها عنهم
الهنوف: شرايكم نروح لها نشوفها
اديم: والله فكره
ترف: اجل بقول ل فهد يوصلنا/ وراحت عنهم
مدى: والله تحزن
سمر تنهدت وتسللت دمعه حاره على خدها
الهنوف: سمور حبيبي تبين نروح نزوره اليوم
سمر: والله ودي
الهنوف: اجل بس نطلع من عند نجد نروح نشوفه
ترف: يلا فهد ينتظرنا
طلعوا كل البنات الا سناء وسحر وراحوا يشوفوا نجد
شيهانه: يأهلا والله حياكم الله تفضلوا
دخلوا البنات
همس: جينا نشوف نجد ي شيهانه
شيهانه: اليوم تهاوشت معي أنا ومتعب ماهي راضيه تنزل
سمر: وديني لها انا بطلعها
مسكت أيد سمر وساعدتها تطلع فوق
دقت الباب
نجد: خلوني لحالي ما تفهموا إنتوا
تنهدت شيهانه: هذا وضعها ي سمر
سمر: ماعليه انتي روحي بدخل أنا
شيهانه: طيب ياملي/ وراحت
دخلت سمر وجلست جنب نجد : نجد
بعدت البطانيه وشافت سمر: سمر
سمر تحاول تكتم بكيتها: ليه تسوين بنفستس كذا ي نجد
نجد: ماصحى؟
سمر: لا ما صحى بنروح بعد شوي نشوفه تبين تجين
نجد: لا ما أبي
سمر: شصار ي نجد ليه كل هالحزن
نجد نزلت راسها: تهاوشنا وجرحنا بعض كثير بس والله اني ندمانه قد شعر راسي ماقلت اللي قلته إلا من حرقة قلبي عليه والله يسمر ان قلبي يبيه بس مالي وجه اروح له
سمر: يمكن إذا سمع صوتتس قام تكفين امشي معنا
قامت ولبست عبأتها بعد اصرار من سمر ماتقدر تنكر اكثر من كذا ودها تروح تشوفه ونزلت عند سمر
شيهانه فرحت لما شافتها وضمتها بقوه: الحمدلله
نجد همست: بروح أشوفه
شيهانه:روحي ياملي روحي
طلعوا البنات وراحوا المستشفى
في المستشفى
متعب شاف بنات كثير ونزل راسه ومشى مايدري ان اخته من بينهم
دخلت نجد قبلهم ولما شافته كان بالسرير وحوله أجهزه كثير نزلت دموعها ومشت له ومسكت ايده: نمر والله اني أبيك واحبك وأموت فيك تكفى طلبتك قوم عاندت كثير ي نمر تكفى عاند النوم و قوم تكفى ينمر افتح عيونك نمر والله والله اني ماصدقت فيك بس داخلي احترق ي نمر يوم قالوا بياخذ سناء بغيتك لي ي نمر والله ادري اني غطانه وادري المفروض ما اقول اللي قلته بس طلبتك
نزلت دمعه ب ايده
نجد: إذا مو عشاني عشان أمك ي نمر اللي تعبت من البكى عشان سمر والهنوف عشان مطلق اللي ماله سند غيرك وعشان خالي عشان كل اهلك والناس اللي تحبك وتبيك طلبتك تقوم
ويقطع كلامها صوت الاجهزه خافت لا يكون صار له شي
كانوا الدكاتره يركضون ودخلوا غرفته بسرعه وطلعوا نجد
سمر بخوف: وش صاير يامطلق
مطلق: اهدي ي سمر اهدي
طلع الدكتور
مطلق: شفيه
الدكتور: في استجابه الحمدلله يعني في تقدم يقدر يسمعكم الحين اللي دخل وكلمه كان له تأثير قوي على حالة نمر قدر يسمعه يعني نقول تعدا مرحلة الخطر
تنهد براحه وجلس ودموعه تنزل
الدكتور ابتسم: ادعي له ي مطلق / وراح
سمر ناظرت نجد وضمتها بقوه وبكت
نجد شدت عليها
————
سحر: وصار مثل ما بغينا وخططنا وانتي بعد كفو عليتس قدرتي تقنعي الكل ان نمر هو اللي طلب
سناء وهي تضحك: شفتي شلون تهاوشوا هو ونجد برد قلبي الحين الحمدلله بس باقي حبيبي يقوم من الغيبوبه والله طول
سحر: بيقوم وتتزوجوا ياقلبي ونجد بتموت من حرتها
سناء: إلا عطيتيه الفلوس
سحر: اي عطيته من زمان ارتحنا
سناء: بس ودي اروح أشوفه
سحر: نروح باكر اليوم خواته عنده
تنهدت براحه
سحر: سناء
سناء: هلا
سحر: يعني بسألتس هو هذاك الشي يعني ماصار
سناء شهقت : لا وين خير ماصار تطمني
تنهدت: اي أشوّه
——————
مر اسبوع طويل من آخر مره تحرك فيها نمر وغيرها مافي اي احداث تذكر
دخل المجلس عند عمه كان وده يتكلم بالموضوع من زمان بس لان نمر بغيبوبه ف اجله بس شاف ان نمر للحين ما صحى ف قرر يروح يكلمه
الجد: يأهلا ب ولد الغالي
بو متعب: هلابك عمي شلونك
الجد: الحمدلله اخبارك انت
بو متعب: الحمدلله والله ياعمي جايك بموضوع صار من فتره بس مابغيت أتكلم فيه عشان نمر
الجد: وش صاير
بو متعب قاله كل شي عن بتال ونجد وزود بهارات وده يرمي نجد على بتال لانهم هم الاثنين عاندوه وهو ما يحب احد يعانده
أنصدم: وش تقول انت
بو متعب: اللي سمعته بس نجد والولد رافضين ودي تكلم ناصر يعمي وانا ابو البنت ماودي سمعة بنتي تطيح بالأرض
الجد بغضب: بياخذها ورجله فوق راسه دق عليه وقله عمك يبيك
ابتسم : ابشر ياعمي إلا نمر وش أخباره
الجد: يقولوا بدأ يتحسن
بو متعب: اجل بقوم اروح أشوفه
الجد قام: خذني معك بعدين وينهم اخوانك المخزين وراهم م جو يشوفونه
بو متعب: بيجو يعمي بس المدارس أشغلتهم
بو فهد: يأهلا طارق شخبارك
بو متعب: الحمدلله
بو فهد: وين رايح اجلس تقهوى معنا
بو متعب: بروح اشوف نمر وبآخذ عمي معي
بو فهد: اي زين / وطلعوا
ام فهد: يا سعاد مايصير كذا قومي أكلي لتس شي
ام نمر : ما لي نفس
ام فهد: عشان بناتتس ي سعاد قومي والحمدلله شوفي هذا نمر بدت حالته تتحسن
ام نمر: ااههه ي مها حرقوا قلبي عليه
ام فهد مسكت ايدها: يا سعاد ما يصير كذا يخيتي الحمدلله بدأ يتحسن ويسمع لكم
ام نمر: ادري بس
قاطعتها: لا بس ولا شي هذا من خوفتس عليه قومي الحين انزلي مع بناتس واجلسي مع سمر ترا والله انها تعبانه بس تقوي نفسها عشانتس قومي ي سعاد تراها تحتاج لتس الحين
تنهدت وقامت ونزلت مع ام فهد تحت
في المستشفى
طلع الدكتور
بو نمر: طمني عليه
الدكتور : تطمن ياعم حالته احسن بكثير عن قبل باقي بس يصحى وان شاء الله خير
الجد: نقدر نشوفه
الدكتور: تقدر ياعم بس خمس دقايق/ وطلب من الممرضه تساعده عشان يدخل وهو راح
___________
وصلت اجازة الأسبوع وأهل حايل راحوا عند الجد سلمان يتطمنوا على نمر ويكونوا معهم صحيح تأخروا حيل بس الظروف ماكانت تسمح. لهم
ام منصور ضمت ام نمر: ياويل قلبي عليتس يوخيتي الحمدلله على سلامة ولدتس
ام نمر: يسلمتس ربي ي مريم
ام منصور: شلونه الحين عساه بخير
ام نمر: الحمدلله بدت حالته تتحسن
ام رعد: جعلها آخر الأوجاع يابعد حيي
ام نمر: امين يارب حياكم الله
لميس: سلام عليكم ياهل البيت
سمر اللي كانت جالسه: عليكم السلام اقلطو يالله انك تحييهم
لميس: ربي يحييتس يابعد حيي شلونتس عساتس طيبه
سمر ماعرفت من هذول: طيبه الحمدلله
الريم شافت انها مستغربه : حنا أهل نجد ياقلبي جينا من حايل
سمر: ياهلآ والله اعذريني ماعرفتكم
سندس: معذوره يقلبي نجد وينهي
سمر: بيت ابوها م جت للحين بس ابشري الح
وقطع كلامها دخول شيهانه ونجد: وصلنا ياملي
نجد ضمت لميس: الحمدلله ع السلامه
لميس: يسلمتس ربي ياقلبي
شيهانه: متى وصلتوا
العنود: من شوي وصلنا
________
عند الرجال
بو منصور: جعلها آخر الأوجاع ي ثامر
بو نمر: امين يارب
الجد: ادري ان مهو بوقته لكن دامكم وصلتم بعلمكم
ابتسم بو متعب
الجد : وين اللي اسمه بتال
بتال راح له وباس راسه: موجود طال عمرك
الجد: هالطول والعرض وشنبك بوجهك وتمثل الاحترام وانت قليل الخاتمه
بلع ريقه مصدوم وش يقصد بسم الله توهم وصلوا ولا يعرفه
بو منصور: خير ان شاء الله ياعمي ولدي وش مسوي
الجد : اجل يسوي سواته ف بنت آخر العناقيد وتقول وش مسوي هالحين يكتب كتابه عليها
بتال مسك راسه متى لحق يدري بس ناظر عمه يبتسم وفهم انه هو اللي علمه: جدي اسمعني قبل كل شي اللي وصل لك العلم وصله غلط البنيه طاحت لو ماشلته محد درا عنها
الجد بعصبيه: ترد علي ياللي ما تستحي وانت ي ناصر ما عرفت تربي ابد
بتال بغضب: إلا ابوي ي جدي ابوي عرف يربي رجال وان كان تشوف ان لازم أخذ بنت عمي أبشرك ماني مآخذها لو على قص رقبتي لعنبوكم انتم ما تشكرون اللي يساعد بناتكم
الجد: احترم نفسك ولا تعلي صوتك ي ولد ناصر
بتال: محترم نفسي قبل لا أعرفكم
بو منصور: بتال يبوك خلاص
بتال طلع وهو منفجر من العصبية حتى هنا ماسلم من الموضوع
ناظرته وراحت له: خذها وفكني منها
استغرب ولف وراه: ابو ناصر ابوه من انتي
ابتسمت له: تزوجها ي بتال لأنها بتسرق حبيبي مني
ضحك: تسرقه؟ منهي! وحبيبتس فلوس عشان تسرقه منتس
سناء: نجد تبي نمر
شمقها: ويوم انها تبيه وراتس واقفتن لها مثل العظم ف البلعوم
سناء: احنا مختوبين لبعض عشان كذا تزوجها مابي حياتي تخترب
انفجر ضحك يوم قالت مختوبين: اسألتس بالله مختوبين يمه بطني ههههههههه ااااههه ياربي اقول انقلعي بالله شعندتس جايه تعلميني يحليلك ي نمر م لقيت إلا ذي تختتبها: وراح وهو ميت ضحك عليها
انقهرت منه: هين والله والله تتزوجها اجل هذي تاخذ نمر مني تروح لين عنده تكلمه ويستجيب لها وانا لا
——————
بتال: اقول ي مطلق
مطلق: سم
بتال: سم الله عدوك
مطلق: عندكم خيل
منصور: ترا ولدنا م يصبر عن الخيل وان كان بوه نياق علمه
ابتسم: عندنا اسطبل شكبره تعال
قام بتال وراح مع مطلق
بتال: بسألك يا مطلق
مطلق: اسأل يخوك
بتال: ان كان ما بوه احراج نمر متزوج
مطلق: لا
بتال: خاطب طيب
مطلق: لا ليه تسأل
بتال: لا بس تسذا يخوك انت ما عرست
مطلق تنهد: مأجل الموضوع لين يقوم نمر بالسلامه
بتال: ربي يقومه بالسلامه
مطلق : يخوك هذاك الإسطبل "واشر عليه" أنا اعذرني بروح انام باكر بروح المستشفى من الفجر
بتال: معذور يخوي وحنا بعد باتسر بنجي نشوفه
مطلق: فيكم الخير والبركة/ وراح
وصل الإسطبل وشاف خيول شكثرها ابتسم: الله يبارك لهم برزقهم
شو وسمع صوت بكا
راح لمصدر الصوت وكانت نجد جالسه جنب خيل نمر وتبكي وقف ورا الباب هي داخل الإسطبل وهو برا والباب فاصل بينهم
بتال: شنوحتس تبتسين
رفعت راسها: شدخلك شعندك جاي هنا
بتال: جيت بآخذ لي خيل بس سمعت احد يبتسي قلت اشوف
نجد: انقلع عني ي بتال مو وقتك
بتال: هذا خيله
انصدمت: وش قصدك خيل من
بتال: نمر
نجد: شدخل
بتال: تحبينه ي نجد
نجد:منهو وش تخثردز انت
بتال: وحده تقول عن نمر ختيبي" وضحك" تقول تزوج نجد وابعدها عن نمر صح نسيت أعلمتس ابوتس المحترم علم جدتس عن هذاك اليوم وجدتس مُصر يقول بتاخذها غصب ان كان بقلبتس احد ي نجد علميني
نجد: اي ي بتال احبه وقلبي يبيه وهو يبيني بس احد مبتلي عليه ويبون يزوجونه سناء غصبن عليه بس هو رافض
ابتسم: اجل خلاص تمسكي بحبتس ي نجد ولا تسمحين ل احد ياخذه منتس/ وراح عنها
تنهدت وطلعت من الإسطبل ودخلت عند البنات تفضي له المكان
اما بتال حس بألم ف قلبه بس طنش وخذا له خيل وانطلق فيه
________
الصبح الرجال بالحوش والحريم داخل
بو نمر: فهد وين مطلق
فهد: راح المستشفى ياعمي
بتال: ابوي نحن بعد ودنا نروح نشوفه
بو منصور: بنروح يبوك العصر
منصور: ودنا الحين يبوي أنتوا روحوا العصر
هزاع: اي والله يبوي
رعد: اجل كلنا بنروح
قاموا العيال كلهم وراحوا المستشفى
بو نمر: جزاكم الله خير الجزاء
بو منصور: هذا ولدنا يخوي وأخو ل عيالنا
بو فهد: فيكم الخير والبركة
بو مازن كان ضايق صدره على ولد اخوه: استأذن أنا / وطلع
عند البنات
الريم: كم باقي ليتس ي سمر
سمر: شهر تقريبا والله من التعب احسني بولد الحين
سندس: ربي يسهل عليتس وتقر عينتس بشوفة البيبي
سمر: امين ياقلبي ويرزقتس ان شاء الله ويفرح قلبتس وعقبالكم ياللي للحين م تزوجتوا
اديم: منييين ي حسره
الهنوف: ترا كلنا ندري انتس تحبين اخوي وهو يحبتس وتبون بعض
شهقت: ممممددددددى
مدى: بالغلط والله يعني ف النهاية قدر الله وماشاء فعل وترا ما قصدت يعني واحيانا يندم الإنسان على افعاله
همس هزت راسها :اتفق جدا مع بنت خالي
مدى: حي عينتس والله
الريم: م تبون نتمشى بالمزرعه شوي الجو حلاته
الجوري: اجل يلا قوموا
العنود: مشينا/ وطلعوا يمشوا
_______
عند الجد سلمان
الجد: اقولتس بتاخذه غصبن عليها
الجدة: ما كفاك اللي سويته ف بنتك الحين بتسويه ف بنتها ي سلمان خاف الله ف هاليتيمه
بو نمر: يبه كلام امي صح وترا بتال شرح لنا الموضوع مو نفس ما قال ابوها يبوي بتال رجال بكل ماتعنيه الكلمة ماهو قليل خاتمه
—————
في المستشفى
كل مره واحد يدخل يشوفه يتطمن عليه وآخر واحد كان بتال
دخل ولما شافه حس بشي غريب وقف فتره يناظره يحس في غلط في شي ف الموضوع
حط ايده ب أيد نمر: قم ي نمر لا تروح نجد من إيدك
بس مافي اي حركة
تنهد وطلع
فهد: ربي يقومه بالسلامه ي مطلق
مطلق: امين يارب جزاكم الله خير
تميم: وان احتجت شي حنا موجودين
مطلق: فيكم الخير والبركة ما تقصروا
————-
الجوري : بنات بقولكم شي
ترف: قولي
الجوري  كاتمه ضحكتها :سمعت شي
شيهانه: وشو
نجد: قولي بسرعه
الجوري: سناء
سمر: شفيها
الجوري: قالت ل واحد مدري من هو بس يشبه لتس ي العنود قالت له عن نجد ونمر وتقوله تزوجها بس هو لعن خيرها ومشى
العنود ناظرت نجد بصدمه
نجد انحرجت ماكان ودها احد يدري
العنود: تحبين نمر
نجد: ما اكتشفت إلا لما قال جدي بيزوج سناء ل نمر
ابتسمت: ربي يقومه بالسلامه
البنات: امين
الريم: ودي اركب خيل ماشاء الله عندكم خيول
نجد: مشينا اجل
سناء وسحر كانوا بالإسطبل وسناء كل م حاولت تركب الخيل يطيحها
سناء بقهر: ليه م اقدر وهي تقدر
نجد بعدتها بقوه عن الخيل: لان يحب الناس النظيفه مو الوسخه انقلعي/ وركبت الخيل
انصدموا البنات انها قدرت تركبه بسهوله
نجد ضحكت: شفيكم ترا من زمان أنا وهو أصدقاء يلا مشينا
كل وحده ركبت لها خيل وانطلقوا كانوا مأخذين راحتهم لان العيال محد
تطاير شعرها الأسود وبانت غمازتها ضحكتها اللي وصلت له وهو بعيد ابتسم و راح وبداخله "ربي يسعدكم ويكتب بينكم نصيب"
اي تمناها ل قلبه بس لما درا انها تحب غيره داس على قلبه وانسحب
————-
فتح عيونه وشهق بقوه وبدا يكح
دخل الدكتور وابتسم لما شافه قام:بسم الله عليك الحمدلله ع السلامه
نمر: وين أنا
الدكتور: بالمستشفى / وبدا يفحصه يتطمن ان مافيه شي خطير
نمر بصوت مبحوح: اي ماي
.
.
.
.

نوقف هنا
لا تنسوا النجمـة ✨
الكاتبـة نجـد✍🏻