يالغايب الي كبلتني مراسيك نورس حنيني عاف كل المواني

بارت 4

~ في مجلس الامير سالم بن جسار ال زيدان ~
سالم بصوت شبه عالي : القهوه
تقدم بلال وصب قهوه لسالم وعياله نايف وسلطان
سالم وهو يرشف من القهوه وجه كلامه لسلطان : وش اخبار الشركه
سلطان وهو يلعب بسبحته : والله الأمور ماشيه بحمد الله
سالم : الحمدالله
نايف بتساؤل : يبه العيد بعد له 5 ايام ماقررتوا وين نتجمع
سالم : قررنا 
نايف : وين
سالم بحده : ب قصر عمك مطلق 
التفتوا جميع الي في المجلس للباب لما سمعوا اصوات خطوات
دخل سعد وهو يكلم بجواله
سالم : شرف
سعد : معليش ياناصر بعدين اكلمك
دخل سعد وباس راس ابوه وجلس وهو يطقطق بجواله
سالم بصرامه : نزل جوالك بكلمك
نزل سعد جواله وناظر بعيون ابوه وهو ساكت
سالم : انت تحسب اننا نستهبل معك لما نقول ملكتك بعد اسبوع ؟؟!
سعد الي شد على قبضه يده من السيره ونزل راسه بغضب
سالم بغضب : اتمنى يصير لك درس تفكر بالشي مليون مره قبل تسويه
وقف سالم بغضب وخرج من المجلس تقدم نايف من سعد ومسكه من كتفه يواسيه
نايف : مصيرك ياسعد تتزوج تقبل الموضوع وترا ليل بنت مطلق محترمه ومابها عيب
وقف سعد وخرج بدون ينطق كلمه ومسك جواله واتصل على علي
سعد بضيق : علي انا ضايق بجيك نطلع بتكلم معك
علي بأستغراب : طيب وش صاير معك وش فيه صوتك
سعد بتعب : مخنوق مره ياعلي مخنوووووق
علي : طيب انت خلك انا جايك
قفل سعد من علي ورجع راسه لورا

في بريطانيا تحديداً لندن في فيلا الامير مطلق بن جسار ال زيدان

صحت من النوم والتفتت لساعه جوالها الي كانت 2:33 الليل قامت من فراشها
سهر بصوت خافت : اللهم اجعل لنا من كل ضيق مخرجا ومن كل هم فرجا ومن كل بلاء عافيه
بعد ما انتهت مرحبا دعائها المعتاد توجهت لدورة المياه ( يكرم القاري )
غسلت وجهها طلعت من الحمام وتوجهت لتسريحتها اخذت المرطب الي كان بنكهه توت حطت على شفايفها ومشطت شعرها الطويل
بخت من عطرها ( Miss Dior ) وفاحت ريحة عطرها لانحاء الغرفه فتحت باب غرفتها ونزلت للمطبخ وفزت من شافت ليل واقفه قدام الثلاجه
ليل بخرشه : بسم الله سكنهم مساكنهم
ضحكت سهر : وجعه وش تسويين هنا
ليل بهمس : جوعانه
سهر : حتى انا
ليل : وش رايك نطلب دليفري
سهر : تم بيتزا
ليل : تم بحساب ابوي
ضحكت سهر : تم 

في السعوديه تحديدا الرياض في كافيه هاف مليون
علي بعدم فهم : الحين مافهمت وين المشكله
تنهد سعد : ياربي وش فيك جالس اقول مابي اتزوج مسؤليه انا مابي
علي : بالعكس تتعلم على المسؤليه
سعد : اي انا مابي اتعلم المسؤليه
علي : سعد استرجل ولا تقعد تتحلطم زي النسيوات
سعد : انا الغلطان اني جيت افضفض لك
علي : يارجال استريح
سعد : انا بعرف بس ليه ابوي سو كذا
علي : عشان تترك سوالفك
سعد : هو على باله بترك هذي السوالف اذا تزوجت
علي : ذا الحل الوحيد
سعد : اساساً راح اثبت له العكس ومابترك سوالفي الي يقول عنها
تنهد علي : طولنا قم عندي شغل
سعد : وش شغلك
علي : موب شغلي شغل ابوي عشان العيد
سعد : مشينا اجل

في لندن تحديداً فيلا الامير مطلق بن جسار ال زيدان

جالسين في البلكونه وياكلون البيتزا بصمت
قطع الصمت صوت سهر وهي تقول : ليل بقولك شي
ليل بتساؤل : وش عندك
سهر : بس عاد تاخذين كلامي بجديه مب عبط
ليل : الله يستر وش عندك قولي لي خوفتيني
ابتسمت سهر بحياء : علي ولد عمي متعب
قاطعتها ليل : احلفي ، لايكون الي ف بالي
سهر : الحين خليني اكمل لاتقاطعيني ، تذكرين يوم جدي جاء وكلمك على سالفة الملكه
تنهدت ليل وبضيق : ايوه
سهر : انا دخلت الحديقه وما انتبهت لوجوده وبعيد رفعت راسي وشفته خقيت على عيونه وبعدها ابتسم لي واحس توترت زياده وكنت بدخل لكنه مسكني من يدي
وقالي يالغايب الي فزت خفوقي يوم شفتك
وصراحة انا بعدت يده ودخلت
ليل : ما اصدق انك حبيتيه من موقف واحد
سهر بهيام : انتي وش فيك انا من زمان احبه واهيمه
ليل : ماني خابرتك خفيفه
ضربتها سهر بخفه : قلت لك اخذي كلامي بجديه
ليل بجديه : يعني لو هو يحبك زي ماتحبينه بيجي يدق الباب مب سواليف الورعنه ذي
سهر : كلي كلي وانتي ساكته

في قصر الامير سالم بن جسار ال زيدان

دخل سالم بالصاله وشاف بناته وزوجته جالسين جلس وسلم عليهم اما نوره الي صبت له شاي ومدت له البياله رشف سالم من الشاي بتمتع
سالم : نوره ملاذ دانه اسمعوني زين
نوره بخوف : صاير شي
تنهد سالم : ملكة ولدك سعد على ليل بعد العيد بيومين
شهقت نوره : ملكة ولدي بعد العيد بيومين وتو ادري
سالم بتبرير : كل شي صار بسرعه ومالحقت اقولك والزواج ماكان متفق عليه بعدين اقولك السالفه
دانه همست لملاذ : احس ما استوعبت للحين سعد يتزوج
ملاذ : اساساً هو قالي
ضربتها دانه : ليه ماقالي
ملاذ بألم : وش دراني

في السيارة جالس جنب علي يناظر لسنابات سلطان
رعد : ياخي ذا سلطان حياته منظمه يعني احسها ممله من النادي للشركه ومن الشركه للمجلس مايمل
علي : احسن منك عند بلكونة ملاذ 24 ساعه
التفت رعد بسرعه على علي وبأستغراب : وش عرفك ؟؟!! انطق !!
ضحك علي : قفطتك مره من بعدها بديت اراقبك وطلعت توصل لملاذ رسايل بيد الشغاله
انلجم رعد من كلام علي وجلس يناظر لعلي بصمت
علي : بس انتبه يقفطونك اخوانها بتروح فيها مع البنت
رعد : والله انك ملقوف
ضحك علي : اقول روح اخطبها احسن لك من حركات المراهقين
وصلوا للبيت كمل علي : يلا اقول رح نام احسن لك
نزل علي ووراه رعد وقفلوا السياره ودخلوا للقصر
تقدم رعد بأستغراب : مين جايب ثلاجه جديده خابر عندنا ثلاجات واجد
علي بأستغراب : غريبه مين جايبها عاد حجمها ممتاز كبيره وعريضه
وقفت حصه الي كانت منحنيه بالارض تعدل شوزها : وجعه انا عمتك حصه ماني بثلاجة
رعد يمثل الخرشه : واي من ياينا هالحزه
علي : يعني لهجه كويتيه وكذا
رعد : افا عليك اضبطك انفع اكون جاسم
علي : قصدك جسوم
رعد : ايوه ايوه جسوم
علي : اي والله تنفع
ناظرتهم حصه : صحيح نسيت مين مصع بنتي شموخ من اذانها ؟؟
علي بكذب : وش عرفنا حنا من الصبح برا البيت صح رعد
التفت رعد لعلي : ايوه ايوه
حصه : اقول توكلوا نامو عشان بكره ابيكم تودوني للسوق الساعه 8 الصبح
علي : عمه عندنا سايق روحي معه
حصه : معليش ابيك انته ياعلي توديني
تركها علي : يصير خير
دخل رعد للقصر وترك عمته وتوجه لغرفته ينام