ထိုအချိန်က မစ္စတာလု တစ်ယောက် နုတ်ထွက်စာတင်ရန် စီစဉ်နေသောကြောင့် ဥက္ကဌပိုင်က ထိုဓားကို လက်ဆောင်ပေးကာ ဆက်လက်နေထိုင်ဖို့ ဆွဲဆောင်ခဲ့သည်။
သစ်ပင်မျိုးနွယ်စုသည် အတော်လေး ရိုးသားသော မျိုးနွယ်စု ဖြစ်သည်။
ထို့ကြောင့် ဥက္ကဌပိုင်၏ လှည့်စားသော အစီအစဉ်က အောင်မြင်ခဲ့သည်။
ဤ "ညင်သာစွာလမ်းလျှောက်သူဓား"သည် ထိုအချိန်က မစ္စတာလု အလွန်လိုချင်ခဲ့သော စိတ်ကူးယဥ်အရာ တစ်ခုဖြစ်သည်။
သူက ထိုဝိညာဉ်ဓားနှင့် ပတ်သက်သော အသေးစိတ် အချက်အလက် အားလုံးကို ဥက္ကဌပိုင်ထံသို့ ပေးပို့ခဲ့သည်။
ဥက္ကဌပိုင်က မစ္စတာလုအား ထိုဓားကို ဝယ်ပေး၍ စာချုပ်သစ် ထပ်ချုပ်နိုင်ခဲ့သည်။
ထိုဓားကို ဝယ်ယူရန် ကြီးမားသော အသုံးစရိတ် ဖြစ်သည့် အင်မော်တယ်ရွှေချောင်း ဆယ်သန်းခန့်သည် ဥက္ကဌပိုင် ကြိုတင်စီစဉ်ထားသည့်အရာ ဖြစ်ကောင်းဖြစ်နိုင်သည်ဟု ငွေရောင်လေး ခံစားခဲ့ရသည်။
နဝမတန်းစား သူတော်စင် လက်နက်တစ်ခုပေါ်တွင် အင်မော်တယ် ရွှေချောင်း ဆယ်သန်း သုံးစွဲရလောက်သည်အထိ မည်သူမျှ မိုက်မဲမည် မဟုတ်လောက်ပေ။
ဥက္ကဌပိုင် ကိုယ်တိုင်က ကျင့်ရှီ အပြည်ပြည်ဆိုင်ရာ လေလံပွဲကို ကျင်းပခဲ့တာလည်း ဖြစ်နိုင်ချေ ရှိသည်။
ယင်းက ဘယ်ဘက်အိတ်ကပ်ထဲမှ ပိုက်ဆံကို ထုတ်ပြီး ညာဘက်အိတ်ကပ်ထဲသို့ ပြောင်းထည့်သည့် အရောင်းအဝယ်တစ်ခုပင်။
ဤသို့ဖြင့် ဥက္ကဌပိုင်က စရိတ်စက များများစားစား မကုန်ဘဲ သစ်ပင်မျိုးနွယ်စုမှ အစွမ်းထက်သော အကြီးအကဲတစ်ယောက်ကို သူ့ဘေးတွင် လက်ထောက်အဖြစ် ခေါ်ထားနိုင်ခဲ့သည်။
"ငါပြောတာ မမှားလောက်ဘူး.. ဒါအမှန်တရားပဲ"
ငွေရောင်လေးက မစ္စတာလုကို ပြောလိုက်သည်။
လောလောဆယ်တွင် ငွေရောင်လေးထံ၌ ခိုင်လုံသောသက်သေ မရှိပေ။
သို့သော် မစ္စတာလုက ငွေရောင်လေး၏ စကားကို ကြားပြီးနောက်တွင် အမှန်တကယ်ပင် သံသယ ဖြစ်လာသည်။