العمر مع جنابك و العمر معك ما امله

" البارت الـ 16 "

كُل يوم ندخل عدد جديد وقلبي مثل الـ 🦋🦋🦋🦋🦋

البارت الـ 16 ⬇️⬇️

دخلت القسم وهي متعقده منه وكارهته من بعد اخر مره دخلته جلست قدام مكتب الضابط وهي تنتظر احد يجيها دخل مع الباب وتوجه للمكتب وجلس
الضابط: سِوار جسار الادهم من شركة ** لتصميم الداخلي!
هزت راسها بالموافقه وتكلم الضابط بهدوء
الضابط: شركتكم عليها بلاغ فساد !
عقدت حواجبها : فساد!!!
الضابط : البلاغ وصل قبل ساعتين و ارسلت اذن تفتيش لشركه و اغلب شغلكم اللي تشتغلونه ماهو جيد ياخذ شهر بالكثير ويخرب وهاذا بشهادات الناس اللي مجربتكم وشخص منهم تقدم ببلاغ و يوم فتشنا لقينا ادله تثبت ان عمل الشركه سيء !
سِوار : بس انا مالي علم في شيء انا مجرد مساعد مدير وما على الا اني اتابع اداء فريقنا واكتب تقارير عنها وانظم وانسق مع المدير واذا عندي افكار اطرحها مالي شغل في الباقي يعني اذا لكم كلام ف كلامكم مع المُدير نفسو مو معايا!
الضابط: اعرف لاكن في حالة عدم وجود المدير انتي المسؤله واذا ما تدرين اكتشفنا ان شركتكم تشتغل في غسيل الاموال
صُعقت سوِار : غسيل اموال!!!!!
هز الضابط راسه بالموفقه : وبما ان المُدير مو موجود وانتي اللي ماسكه مكانه والادله والاثباتات موجوده مضطرين نقبض عليك الين نقدر نتواصل مع المُدير
وقفت برعُب : ايش يعني تقبضون عليا تدخلوني السجن !!!
الضابط بهدوء : اي نعم وتقدرين توكلين محامي
جلست بصدمه وحطت يدها على راسها وهي تمسح على وجهها وترفع جوالها تتصل على ابوها تديه خبر وبعدها على جود رفعت عينها ل الضابط اللي لازال يناظرها
سِوار بهدوء: اقدر اقابل مساعد!
الضابط رفع حاجبه : الفريق مساعد!!
هزت راسها بالموفقه وعقد حواجبه وتوجه لمكتبه وطلب منها تلحقه دق الباب ودخل ودق التحيه ودخلت سوار وهز مساعد راسه لضابط وخرج الضابط وتوجهت سوار تجلس قدامه
مساعد : سِوار وش عندك ياولدي جايه ! عسا خير
هزت راسها بالنفي وهي تبدا تسرد له اللي قاله لها الضابط
—
دخلت وهي تشغل اللمبات وترجف وتدور في غرفتهم وخر اللحاف عن عينه وناظرها وعقد حواجبه
هياف: بنت علامك!!
دُرر برعب: رانسي انخطفت
فز سياف اللي كان يسمعهم بس ما يبي يتحرك ومن سمع سيرة رانسي فز وطالع فيها : وش اللي انخطفت تستهبلين!!
دُرر : والله العظيم جدي دق على ابوي يقوله الحق هذال لا يذبح عبدالعزيز
هياف : وش دخل عبدالعزيز!!
دُرر : يقول ابوي هو اللي خطفها ابوي راح للقسم يشوف عمي هذال
سياف وهو ينط من سريره : هياف قوم بنروح
هياف: انثبر بس وش نروح للقسم بيجي ابوي ويعطينا العلم اقعد مكانك
سياف : وش يقعدنا تقولك انخطفت خطف هياف خطف تستهبل!
هياف : وش بتسوي هاه علمني وش بتسوي؟
تأفف وصد عنه وصرخ على دُرر تجلس وما تقعد تدور
هياف: لا تنافخ عليها وش دخلها هي والبنت اذا عند ابوها ما بيجيها شر اقطع لا اسمع صوتك لا تغثني
—
دخل نياف لمكتب هذال: وش ذا المشاكل اليوم تنحذف علينا من كل مكان
هذال بضيق: وش صاير بعد !!
نياف وهو يجلس : اخت حرمتك ماسكينها بتهمة فساد توني شفت جسار واقف برا
رفع راسه رسلان وعقد حواجبه: فساد وشو!!!
نياف بضيق : وش دراني يا رسلان روح شوف وضع البنت حرام يسجنونها وهي توها صغيره اذا تقدر تسوي شيء لا تقصر ولف على هذال وانت قوم نشوف الكلب ذا وين ودا البنت دخل خلف ومعاه امر التفتيش وفز هذال ونياف معاه وتوجه رسلان لجسار اللي كان واقف عند مكتب مساعد قرب منه
رسلان بهودء: عسى ما شر يا ابو سهاج
تنهد جسار : تقاعدت قلت برتاح الظاهر مالراحه عندي مكان
رسلان : تعوذ من ابليس يا ابو سهاج علمني وش صاير
—
دخل ومعاه الرجال والمملك وقلطهم فالمجلس وتوجه لها فالمخزن : صحيتي؟
رانسي ببكى : ابغا امي ودني لها
عبدالعزيز : اسمعيني زين الرجال صاحبي لا تفشليني عنده والمملك معه والحين كلهم فالمجلس بزوجك وتروحين معه وافتك منك ، بفكك الحين تدخلين عند عمتك تجهزك
رانسي بصراخ : عساها العمى ما ابغا اتجهز ما ابغا شيء ابغا اروح عند امي
رفع يده بيضربها ونزلها من شافها رجعت على ورا يسحبها مع زندها ودخلها للبيت عند زوجته وتوجه للمجلس خرج وهو يشوفه متوجه لهم
: وش صار يا عبدالعزيز !
عبدالعزيز : عطني الفلوس الحين تحولها على حسابي وبعدها بزوجك ياها
خالد: ارفع جوالك وتحصل الرساله تعال يله خلنا نعقد وبعدها باخذها واختفي انا وياها ولاعاد تسألني عنها
—
حمد: بنت جسار !
ساطي: اي تدري ان المدير حق الشركه لعاب! ومن تحت لتحت وانا اللي اكتشفته بالجاسوس اللي توظف عندهم ، الشركه كلها تلاعب وفساد والفلوس حقت الشركه اغلبها غسيل اموال يعني فلته كل فلوس الشركه حرام و شغله كله ع الثقيل ، قطع اثريه ممنوعه وله في المخد**ات يعني الدنيا سايبه وبما اني كشفته و بنت جسار عنده !!
ضحك حمد: بتلعب ع الثقيل اكيد و كلعاده وجبه ثقيله
هز راسه بالموافقه وهو يبتسم ويفتل شنبه
حمد: ما تحس انك كثرتها على جسار ثاني بناته!
ساطي: ما بردت كبدي من اللي سواه فيني احسها نار تكويني يحسب اذا تقاعد بسكت له واعض على شحمه لكن معصي والله لا العب فيه لعب وبنته بتخيس في السجون
حمد: كيف والمدير اذا طلع!
ساطي: المدير مسافر انا هددته اذا رجع بتمسكه الحكومه لكن طول عدم وجوده هنا يعني الامور طيبه وبيجي وقت المحاكمه وهو مو موجود وبكذا بتطيح في راس بنت جسار وشوف كم سنه تنحكم بذات ان توقيعها موجود على الاوراق يعني السجنه في ظهرها وبتخيس فالسجون
—
في المركز '
الضابط : والله ياجسار ما نقدر لازم ننقلها لسجن الين نحصل المُدير و المدير مسافر من ٣ ايام مو من اسبوع ننتظره يرجع ونشوف فيه محاكمه لها بعد اسبوع ونشوف الوضع
جسار بقهر : اذا ما رجع مراح تطلع بنتي!
هز الضابط راسه ، و خرج رسلان متوجه لتوقيف عند سِوار دخل وشافها واقفه تمشي والتفتت عليه وعقدت حواجبها من شافته وقف قدامها يناظرها
سِوار: نعم!!!
رسلان: نعامه ترفسك اهرجي معي زين
سِوار: انتَ جاي تدور حرش معايا ايش تبغا مو ناقصتك اخلاقي في خُشمي فارق عني !
رسلان: انتي كيف تشتغلين في شركه ما تعرفين عنها شيء؟
سِوار: ايش عرفني جاتني وظيفه منصب عالي تبغاني ارفضها !! اكيد لا
رسلان : ع الاقل كان سئلتي عنها استفسرتي بحثتي مو تدربين راسك
سِوار : لاني حماره ما سئلت
رسلان : رحم الله امرئ عرف قدر نفسه
سِوار بغبنه : مالك دخل اطلع من راسي واطلع برا
رسلان: بساعدك بس منتي وجه مساعده لسانك طويل يبيله قص
سِوار: محد طلب منك مساعده فاارق ماني في حاجتك ولا حاجة مساعدتك
طالعها رسلان بنص عين : قليلة حياء
خرج و صرخت بعد خروجه وهي ترفس الحديد اللي قدامها وتوجه رسلان لشركه
—
نزل من السيارة وتوجه للباب ومسك هذال قبل يضرب على الباب
نياف : بهدوء محنا حونشيه بشويش دق الباب ولفتح نعطيه امر التفتيش وندخل
دق نياف الباب بهدوء وبعد دقايق فتح وطلع منه ولد صغير عمره تقريبا عمره ١٤ سنه طالعه هذال وصد عنه وتكلم نياف بهدوء : شلونك ياسعد ؟
سعد : طيب الحمدالله
نياف: وين ابوك؟
سعد: فالمجلس عنده رياجيل
هذال : منهم وش رياجيله!
سعد ببتسامه: زوج اختي والشيخ
طير هذال عيونه وهو يطالع في نياف يدري ان عبدالعزيز ماعنده بنت الا رانسي وخر سعد عن الباب ودخل
—
بيت جسار'
سُهاد بدموع: ايش يعني تنسجن بابا الله يخليك طلعها
جسار بقهر : ايش بيدي ايش بيدي هاذا القانون
سُهاد : ايش يعني القانون يسجن وحده مظلومه
جسار وقف: لاحول ولا قوة الا بالله انا ايش اسوي اقتل نفسي عشان ارتاح ! كل شيء ضدها لازم ننتظر المدير الزفت يرجع وان شاءالله يرجع قبل محكمتها يوم الاربعاء الجاي
سُهاد: اذا ما رجع ما تطلع يعني !
مشى جسار بدون يرد عليها ويتوجه لمكتبه والتفتت لسهاج بضيق وقام توجه لها ياخذها في حضنه ويربت على كتفها
سهاج بهدوء : سوسو حبيبتي لا تضغطين على ابويا تراه مقهور فوق ما تتخيلين يعني انتي كنتي من جهه و ما صدق نلقاك وفوقها انسجن وطلع منها وهو مطعون و الحمدالله عدت سلامات والحين سِوار ابويا بينفجر سُهاد بينفجر يتحمل ايش ولا ايش ،بكت اكثر لانها تعرف انه تعبان نفسياً وجسدياً يحس بفقدان زوجته بس ما يقولهم هو لوحده يتحمل مسؤليتهم الثلاثه حتى وهم كبار فقد زوجته و حياته توفت معاها ، عاش حياته يلهي نفسه في شغله يحاول ينسى وفاتها لاكن هي صاحبته ورفيقه دربه صعب نسيانها مانساها وهو وسط اندماجه بين اشغاله كيف بينساها في هاذي الاوضاع هو الان بـ أمس الحاجه لها بلعت ريقها بضيق ولفت عليه سُهاد: زعلتو سهاج زعلتو ضغطت عليه مرا !
هز سهاج راسه : راضيه حبيبتي
وقفت سُهاد وهي تمسح دموعها : تمام بس سهاج ابغا رقم هذال
سهاج : ليش! ليكون عشان سِـ
قاطعته: ايوا ايوا بيطلعها هو بيجيبها ليا نفس ما جابني لكم سهاج بليز ماقدر انام بدونها والله
هز راسه وهو يسلم على راسها : حرسلك هوا روحي لـ ابويا
—
في المجلس'
الشيخ: قول ياعبدالعزيز زوجتك ابنتي رانسي على كتاب الله و سُنة الله ورسوله
عبدالعزيز ببتسامه: زوجتك ابنتي رانسي على كتاب الله وسُنة رسوله
الشيخ : خالد قول قبلت
خالد : قبلـ
قطع عليه الباب اللي انفتح و الصرخه اللي هزت المكان
وقفو وهم يناظرونه بصدمه وبلع عبدالعزيز ريقه وهو يطالعه توجه له هذال وهو يضربه على خشمه بقبضة يده : بتزوجها ياكلب خاطفها عشان تزوجها!!
عبدالعزيز: مالك دخل بنتي وانا ادرى بمصلحتها
نياف بغبنه: مصلحتها !! اي مصلحه مصلحتها ترميها على واحد بدون تاخذ برايها !
عبدالعزيز: رايها من رايي اهمشي انا موافق
مسكه هذال من ياقته: اهمشي انت موافق ليه اللي بيتزوج انت ياكلب !!
صارو يتهاوشون ويحاول عبدالعزيز يفك نفسه لكن بدون جدوى وجا نياف يفرق بينهم وطالع فـ الشيخ
نياف: زوجتهم؟؟
الشيخ: لسع ما كملت
هز نياف راسه: توكل الله يستر عليك مافيه زواج
خالد بحنق: عبدالعزيز قلت بتعطيني البنت وانا عطيتك فلوسك والحين مافيه بنت وش معناته ذا!!
عبدالعزيز : بزوجك ياها بجيب شيخ ثاني
هذال : تعقب وتبطي عظم ما زوجتها ولف لخالد مالك بنت عندنا فارق يله
خالد بغبنه : وفلوسي اللي اخذها !
نياف : روح اشتك عليه يردها لك بنت مالك عندنا
طلع خالد ودف هذال عبدالعزيز على الجدار وهو يصرخ على سعد: روح ناد اختك بسرعه
خرج سعد مفجوع وهو يركض لداخل ولفت عليه رانسي وهي تبكي
رانسي : علامك! ليكون كمان يبي يزفني له !
هز راسه بالنفي: خالك هنا
فزت : خالي !!!
سعد: هذال
خرجت تجري متوجهه للمجلس واول ما دخلت وشافتهم توجهت لـ هذال اللي اخذها بحضنه مذهول من حالتها كانت تبكي والكحل سايح على خدها وحالتها يرثى لها مبهذله حتى في لبسها رمت نفسها في حضنه وهي منهاره مسح على راسها وعينه على عبدالعزيز تطلق شرار
ناظرها نياف بضيق ولف على عبدالعزيز ونطق: العسكر برا يا عبدالعزيز اطلع لهم بكرامتك هاذا اذا عندك كرامه ولا بيجون يتلونك مثل العنز
عبدالعزيز بقهر: انتم وش تبون مني البنت بنتي وش دخلكم لو اذبحها مالكم كلمه علي
هذال : تخسي و تعقب تمد يدك عليها والله ان قربتها مرا ثانيه انه نكدك خرج ورانسي بحضنه ولحقه نياف
—
في الشركه '
دخل وتوجه ل الاستقبال وهو يسأل عن غرفة الكاميرات عقد حواجبه موظف الاستقبال بمعنى ليش تسأل ورفع رسلان بطاقته هز راسه الموظف وتوجه للغرفه واخذ رسلان معاه واول ما دخل نطق
رسلان : ابغا تسجيل اخر ثلاث شهور
الموظف : ابشر لاكن فيه يوم محذوف من هاذا الشهر
رسلان: مين حذفه وليش حذفه!
الموظف: ماعندنا علم ولمن ادينا خبر ل استاذ حامد قال مو مهم
رسلان: طيب عطني التسجيل ، و من متى وانت تشتغل في ذا الشركه؟
الموظف: مالي كثير يمكن سنه وظفوني بعد م اللي قبلي تعين مدير في شركه ثانيه وبينا وبينهم شراكه
رفع رسلان حاجبه: تعين مدير في شركه ثانيه!
هز الموظف راسه بالموافقه
رسلان: وعندك معلومات عنه وعن شركته !
الموظف : اكيد هاذا استاذ عبدالملك
—
الديره '
كانو كلهم جالسين في بيت الشعر ينتظرون هذال دخلو بتال وروح عقد حواجبه بتال وهو يشوفهم جالسين برا وزين تدور ولا انتبهت لهم
روح : علامك تدورين عميتي امي وابوي اهجدي بعدين وين السوسه بنتك غريبه راقده الحين ، ماردت عليها وتنهد البدر بصوت مسموع
بتال: علامكم!!!!
البدر : ما فينا شيء امشو اقعدو ولا فارقو عني ماني ناقصكم
قربت منه روح : ابوي !! شفيك يا ابو روح من مزعلك !؟
البدر: اجلسي اجلسي مفحالي للكلام
بتال: انتم علامكم !! ووين رانسي!
بكت زين وفزت روح تتوجه لها وتوجه معاها بتال و تنهدت ام نياف بضيق
ضمتها روح: زيون وش فيك ليش تصيحين !! وش صاير و وين رانسي
زين : اخذها حسبي الله عليه اخذها عبدالعزيز الله ياخذ روحه
ناظرها بتال بذهول : اخو هذال !! كيف اخذها من بينكم وينك انتي عن بنتك ما تدرين عنها !!!
البدر : لا ترفع صوتك على اختك ولعنه كبرك هي كبرك اعقل يا بتيل لا تزيدها على اختك و البنت اخذها ابوها من مدرستها
روح : ابوي كيف عرفت ان اللي اخذها ابوها !! امكن مو هو!
زين بدموع : هذال يقول لقاها عند ابوها حسبي الله عليه
توجه بتال للباب بيخرج وصرخ عليه البدر : ان ظهرت يا بتيل تراني غضبان عليك ليوم الدين
التفت عليه بتال برعب : ابوي تعوذ من الشيطان علامك خلني اروح العن ثواه الكلب ذا !
دخل تميم : درب ياولد
البدر : تعال اقلط ام نياف متغطيه ، دخل تميم طالعهم وتفقد ملامحهم وعقد حواجبه من منظرهم
تميم : علامكم وجيهكم مقلبه وانتي علامك تصيحين !
بتال بغبنه: ابد سلامتك ملعون الجدف عبدالعزيز ماخذ البنت بدون علمنا ومكركب الدنيا هنيا
تميم بصدمه: عبدالعزيز منين ظهر !! لنا سنتين عنه !
سكتو على صوت السياره اللي وقفت عند الباب وخرجو بتال وتميم قربو من السياره وفتح بتال باب الراكب ومن شافته تعلقت برقبته مسح على ظهرها بحنيه وغمض عينه وتنهد براحه
بتال: بس بس وخري كتمتيني
رانسي : وحشتني مره
بتال: ياكذبك واللي اليوم الصبح مسفله فيني من !
تميم : حمدالله عالسلامه رنوس
توجهت له تحضنه : الله يسلمك جدو ميمو
تركتهم ودخلت و توجهو تميم وبتال ل هذال اللي قافله
معه
تميم: وش صاير!!
هذال : وش صاير يعني من عندنا هالاسبوع غير عبدالعزيز الزفت ! والله العظيم لو مره ثانيه تعرض للبنت اني لذبحه مو صاحي خاطف البنت عشان يزوجها عشان كم ريال !!
التفتو عليه بصدمه
تميم : يزوجها !! يزوج الورعه هاذي!
هذال : هذا الكلام نفهمه انا وانت ياعمي مير الثور عبدالعزيز ما يفهمه ما يشوفها ورعه واللي يغبن مزوجها واحد في عمره ولا يقول راي البنت من راي ابوها دام ابوها موافق ماله داعي رايها
بتال بغبنه : الله ياخذ عمره ليتني دريت قبل اطلع من الرياض والله انه ما يمسي
هذال : جايب الشيخ البجيح مضبط اموره
تميم : ووش سوا الرجال اللي جايبه؟
هذال : يخسون ولا واحد فيهم رجال الزفت الثاني معطيه فلوس عشان يزوجه بنته مدري كم معـ
قاطعه جواله اللي رن وشاف رقم غريب و طنشه وصمت جواله ودخل البيت مع تميم وبتال وهو يكمل السالفه

لا تنسون النجمه يانجومي 🙈💫

قولولي ميـن اكثر شخصيه حبيتوها و اكثر شخصيه كرهتوها ؟؟ 🌷🌷🌷