كل ما حنّ لـ الشوق غنأ بصوت عاشق

البارت 26

سعود بجديه: ايه بتزوجها هذا الحل الاخير اللي وصلت له...
مشعل: ياولد لا تحد نفسك على قصاك بنلاقي حل نعلم اهلها ولا نعلم الدكتوور...
وقف سعود: يا مشعل انت معي ولا ضدي...
مشعل بقلة حيله: اكيد معك بس...
قاطعه سعود: انا يا مشعل كذا ولا كذا ادور على بنت حلال اكمل معها نصف ديني والظاهر ان نصيبي بهذي الطريقه وانا والله راضي بالمكتوب فاحسن لي اتزوجها واطفي تأنيب الضمير اللي يشتعل بداخلي والا بعيش حياتي كلها بتأنيب الضميرر....
وقف مشعل بحزن لاخوه وابن عمه لف ذراعه على اكتاف سعود: تكفى يسعود قول انها من قلبك...
ابتسم سعود له: يا ابن عمي تعرف ابن عمك عاد انت اخبر بقلبه...
مشعل: الله يسهل لك يا حبيبي بس اممم ويش بتقول لعمي وعمتي ولا جدي الافضل ما يدري بشي ما ابي يصير لك مثل ما صار لي...
سعود:انا الحين بحرك صوب هلي اعلمهم ما اعتقد ابوي يرفض ولا امي كلمتين وترضا...
مشعل: الله معك وازهمني كل ما احتجتني بتلقاني موجود...
سعود وهو يربت على كتف مشعل: ما تقصر جعلك ذخر...
وادعو بعض وحرك سعود صوب هله اما مشعل اللي تنهد وهو شايل هم سعود ومن اللي بيصير وهو ما يعتقد ان عمه بيوافق خصوصاً بعد المشاكل اللي صارت رجع البيت وهو يناظر الارض بسرحان رفع راسه وانصدم وهو يشوف موتر فهد استغفر وهو يمسح وجهه هذا اللي كان ناقصه لانه اكيد جده ابو ناصر موجود في البيت دخل البيت وراح على طول المجلس كان فيه ابوه وفهد وحصه و الجد ابو ناصر سلم عليهم كلهم بهدوء وقعد قريب ابوه،قال ابوه بفرح: ما ودك تبارك لعمك فهد...
مشعل باستغراب: على!!!!
حصه: على الخطوووبه خطبنا له بنت الحسب والنسب...
مشعل بفرحه وهو يتجاهل كلام حصه وقف يبارك من قلب لفهد: ما بغيت واخيررا ههههههه...
فهد:هههههههه حلفت ما اتزوج الا بعدك....
مشعل:هههههه اييه بعدي ولا قبلي المهم دخلت الموضوع براسك الا من بنته...
فهد: بنت***ال**...
مشعل:ونعم....
فهد: ما علييك زوود...
ابوناصر: ناسً ونعم فيهم تاخذ من بناتهم وانت مرتاح...
مشعل: اييه يا جد دام مافيه من يخلق مشاكل بتكون مرتاح سوا كانو من أي عرب...
ابو مشعل: الله لا يجيب طاري المشاكل شبعنا مشاكل
مشعل: متى الفرح باذن الله يا فهد ...
فهد: قريب ان شاءلله قريب....
............................
ابو سعود: انت مهبووول...
سعود: يبه جعلني فدااك اسمعني...
ام سعود: يا سعود يا وليدي انت صادقً باللي تقوله ان كان ودك بالزواج انا بدور لك باللي تحفظك وتصونك....
سعود: يبه يمه جعلني فداكم اسمعوني انا مالقيت مواصفات شريكة حياتي الا بهذي البنت والله انها بخاطري يبه ابيها ودام القلوب هاديه مشوها عشاني احنا كذا ولا كذا ال مهيان خوال عيالنا....
ابو سعود بشك: مشعل قايل لك شي...
سعود بصدمه: حرام حرم الدم ماهو بقايل لي شي انا اخذت القرار من شوري...
اما نايف اللي كان يسمعهم وساكت بالبدايه انصدم مثل ابوه وامه لكنه كسر خاطره سعود وهو اول مره يشوفه بهذي الحاله قرر يساعده: يبه يمه خلاص لا تقطعون احلام الرجال ترا واضح انها بخاطره اول مره اشوفه بهذي الحاله وبعدين لما طرا طاري الزواج لاول مره وقفتو ضده المفروض تفرحون وال مهيان والله ما شفنا منهم اي شر مير جدي حدهم علينا وكانت ردة فعل منهم لا غير....
سعود اللي كان وده يقوم يبوس راسه ابتسم له بامتنان، قال ابوه: تعرفني ما عمري وقفت ضد قراراتك لاني داري انك رجالً عقلك براسك وانا ماني واقفً ضدك ان لقيت حل لجدك توكل واخطب وانا مثل ما قلت لك عقلك براسك وكل شي على مسؤليتك عاد حنا نصحناك....
ام سعود: وشووو ناصر موافق...
سعود: يمه جعلني فدا مواطيش عشاني...
تنهدت ام سعود بقلة حيله: الصراحه انا ما شفت من شوق الا كل خير كامله والكامل الله مير اني خايفه عليك لا يصير بك مثل ما صار لولد عمك...
سعود: يمه هذاك اول الحين تغير كل شي دعواتش لي يمه تكفيين...
ام سعود وهي ترفع يدينها: الله يسهل لك ويرزقك ببنت الحلال اللي تحفظك وتصونك ويرزقك بالذريه الصالحه وعقبال ما اشوف عيالكم كلكم يارب...
وقف سعود بفرحه وهو يحب راس امه وابوه،، تربع نايف بفرحه: سعيود متى تخطب...
سعود بجديه: الليله...
.......................
في الليل عند شوق ومشعل اللي دخل وشافها على السرير وكانت تقلب بجوالها اللي جابته حصه معها أبتسم وهو يقعد جنبها وقال: الحسنه الوحيده لجدي هو انه اخذ منش الجوال اخاف يلهيش عني...
ضحكت وهي تسكره وتحطه جنبها: ما قدرو يلهوني عنك ربع وقبايل بيلهيني عنك جوال..
مشعل: دخيـ... قاطعه صوت جوال شوق اللي يرن ضحك وقال: توش تحطينه الا ويرن ردي ردي يا مديرة الاعمال..
ضحكة وهي تاخذ الجوال تغيرت ملامح وجهها لاحظ عليهت مشعل عقد حواجبه وقال: من...
قالت بقلقل: هذا عمي راضي ما هو من عوايده يتصل بالليل عساه خير ...
توتر مشعل اكثر منها قال بسرعه: ردي وحطيه على سبيكر...
استغربت شوق لكن حطيته مثل ما قال لها وردت عليه بعد السؤال عن الحال قال ابو صالح: سامحيني يا بنيتي ازعجتش في هذا الوقت وما خلاني ادق عليش في ذا الوقت الا الحاجه يا بوش...
شوق بخوف وهي تناظر مشعل:آمرني يا عم ان شاءلله اني قدها...
ابو صالح: وافيه يا شوق والله اني ما ادري ويش اقول مستغرب يا ابوش جاني صالح ولدي يقول عندنا ضيوف في المجلس واروح الا وهم عم زوجش ابو سعود و ولده سعود حياكم الله عساه خير قالو والله الخير بوجهكم جاايين نطلب القرب منكم مره ثانيه دام الصلح بيننا.....
شوق بصدمه: سعووود يبي هدييل...
ابو صالح: مشعل ما يدري..
شوق ناظرت مشعل بعتاب وهي متاكده انه يدري قالت: مشعل ما جا اليوم من الصباح وهو برا البيت عنده شغل...
اما مشعل اللي كان مصدددوم من سعود ما توقعه يقنع اهله بهذي السرعه وفي نفس اليوم يروح يخطب سمع صوت ابو صالح اللي صحاه من صدمته: وانا والله مدري ويش اقول خايف من المشاكل وخايف عليش وعلى هديل و صالح يمدح في الولد والمشكله انهم مصرين الا يبون الرد ذلحين...
شوق فهمت وش يبي عمها انا يا عم عايشه بين ناس ونعم فيهم ومرتاحه مع زوجي الحمدلله واهل سعود ينحطون على الجرح يبرئ وسعود والله شهادتي فيه مجروحه هديل ما بتلاقي احد مثله واما عن المشاكل كانت من جدهم في لحظة عناد ومشاكل قديمه ما نساها....
ابو صالح: ان شاءلله ما يصير الا كل خير صالح لا ذلحين يحاول في هديل...
شوق: قول لها تقول شوق لو ما توافقين يا ويلش وعلمها اني ابيها جنبي وسعود ما بتلاقي مثله...
ابو صالح: هههههه ان شاءلله الله يحفظش ريحتيني مع السلامه يا بنيتي...
ودعت عمها وهي تلتفت لمشعل بعتب وتسوي يدينها على خصرها: الحيين انت تدري وانا اخر من يدري...
ضحك مشعل بوهقه وهو يحك راسه: يا بنت الحلال توني القاش من الصباح...
شوق بزعل: هذا موب عذر عمي يتصل يبي العلم مني وانا مثل الغبيه قدامه لان زوجي المصون ما علمني....
وقف مشعل وهو يحاول يضمها لكنها انسحبت منه بخفه قالت بزعل: لا تحاول... وراحت وهي تسكر الانوار وتنسدح على السرير تنهد مشعل بتعب من كل اللي صار له اليوم فسخ ثوبه راح الحمام اخذ دوش على السريع وطلع وهو لابس سروال البجامه والمنشفه على صدره العاري نشف بها شعره ورماها وراح ينسدح من الجهه الثانيه ناظرها كانت معطيته ظهرها ابتسم ومد يده لشباصه صغيره كانت مثبته شعرها سحبها وانسدل شعرها الحرير على المخده مشط شعرها باصابعه يده قال وهو ببحه وهو يحاول يكسر خاطرها: اجي تعبان وارمي تعبي بحظنش بس الظاهى الليله مافيه حظن...
شوق وهي معطيته ظهرها: تستاهل والحين رجع شعري مثل ما كان...
ضحك مشعل: الظاهر مافيه رجا... مد يدينه لخصرها وسحبها بخفه له ورفع جسمه فوق جسمها عشان ينتقل مكانها وينام مكانها ويصير وجهها مقابل وجهه وبلمح البصر دفن وجهه بحظها وهو يلف يدينه حولها قبل تقوم ضحك وقال: انا والله اني تعبان اليوم ومحتاج حضنك الليله عشان اضمن اصحى نشيط وراي باكر شغال لين راسي...
كتمت ضحكتها وما طاوعها قلبها توخره غطت نفسها زين ومدت يدها وهي تغطي مشعل اللي بحضنها باسته على جبينه وهي معلنه الرضا شدها له ونامو بسلام...
......................
اليوم الثاني طلع مشعل اللي كان يدق على سعود وما كان يرد رفع راسه وباله مشغول عليه وهو يدق للمره الاخيره وكان ناوي اذا ما ردي يروح له لعنده سرحان ما ابتسم وهو يشووف موتر سعود جاي وسعود اللي ياشر له بيده تقدم له و وقف سعود ركب مشعل وهو يعاتبه: يرجال ادق عليك ما ترد اشغلتني...
سعود: اعذرني ياخوك والله ماني داري وين رميته هنا مدري هناك...
مشعل: الزبده وش صار علييك تراني انتظر احر من الجمر...
تنهد سعود وهو يحرك لسوق الديره: الحمدلله تمت الموافقه والعرس بعد اسبوعين...
مشعل بصدمه: بهذي السرعه...
ضحك سعود على خفيف: قلت لك هذا نصيبي...
مشعل بهدوء: شفتها بالنضره...
سعود: لا اعتذر ابوها يقول انها رفضت لانها سوت حادث بسيط و للحين راسها ملفوف يا حسرتي لو درت اني انا...
مشعل: الله صرنا نحسب لها حساب من الحين هههههههه....
سعود: هههههههه اصلا ما يحتاج نضره صورتها للحين ببالي لما اسعفتها...
مشعل: الله يتمم على خير متى الملكه...
سعود: مع العرس وترا اصريت على ابوي يكون العرس بالديره...
مشعل بفرحه: على العين وعلى الراس زين ما سويت عرس المدينه مافيه اي روح كلها رسميات...
سعود اللي ياشر بعيونه قدام التفت مشعل وابتسم وهو يشوف مناف وحسين يشربون شاهي عند محمود وحسين ياشر لهم بيده يجون وقف سعود ونزلو رايحين عندهم قعدو على الكراسه اللي كانت وسطهم طاوله خشبيه مستطيله بعد الترحيب والسؤال عن الحال قال سعود: ترا يالربع جاي اعزمكم لعرسي بعد اسبوعين ان شاءلله...
حسين بصدمه: ابن ابوي متى انخطبت...
ضربه مناف على راسه: انخطبت وشو انخطبت حنا في الهند وانا مدري...
حسين يحك مكان الضربه: يا ولد كل شي واحد...
مناف بفرحه من قلب: مبروووك ياسعود عقبال ما نشوف عيالك حواليك...
سعود: الله يبارك فيك..
حسين: مليون مبروك عقبال العرس واللعب والوناسه..
مشعل: هههههههه هذا اللي همك...
..........................
بعد اسبوعين اليوم المنتظر كان بيت ابو مشعل يشع بالانوار والزينه وصوت الزفات والضيوف تعلو منه وبعيداً من البيت كان مكان الرجال حيث الارض مفروشه والانوار بكل مكان والضيوف مالين المكان والقهوه والبخور تدور حولهم وقف سعود وابوه عشان يروحون للعروسه واتجهو لموتر سعود المزين بالورد والشرائط ومشعل وابوه بموتر مشعل ونايف اخذ موتر عمه فهد واخذ سعد معه اما فهد والباقين قعدو عشان الضيوف، همس مشعل لابوه: الحين جدي صادق ماهوب بجاي!!
ابو مشعل: عاد هذا اللي قاله مانيب بجاي...
نايف من وراهم: من هو جدي ما تشوفونه قاعد هناك...
التفتو بصدمه وكان بهيبته وسط الحضور وحاط يدينه على عصاته، قال سعد: قال مانيب بجاي عشان سواد عيون سعود انا جااي لاني سعد ابن *** ال رماح...
مشعل: هههههههه المهم جا...
ابو مشعل: الحمدلله انه جا يلا يا شباب مواقعكم خلونا نلحق سعود وابوه...
الكل اخذ موقعه وحركو لديرة ال مهيان بعد ساعتين وصلو واللي كان الكل باستقبالهم رحبهم في وضيوفهم وزفوهم واخيراا جا وقت ياخذ هديل اعتذر سعود عشان ما يدخل وقال انه مستعجل طلعوها له وركبت معه وابوه راح مع موتر فهد مع نايف وسعد اما مشعل اللي راح عند محمد وقال له يقول لشوق تطلع اللي جات عند اهلها قبل اسبوع عشان تساعد هديل، طلعت شوق باستعجال وركبت مع مشعل وابوه حركو راجعين لديرتهم وصلو الديره وكانت باستقبالهم زفه من اخوياه وشباب الديره جنب موتره سعود جنب باب عمه ابو مشعل نزل وهو يلف يفتح لها الباب ساعدها وهو يشيل فستانها معها استقبلتهم المها وامها من عند الباب باركو له بفرحه واستأذن منهم وطلع راح موتره وهو يطلع اوراق هديل من الصندوق تردد يخليهن وخاف احد يفتش موتره ويشوفهن اخذهن ودخلهن بشنطته اللي فيها ملابسه سكر عليها وراح اما عند هديل اللي دخلت على انغام هاديه وصوت الحريم اللي يذكرون الله جمالها الهادي ادمعت عيون ام سعود وهي تكلم المها: ياربي لك الحمد طلعت مثل خيالي واحلا واضح عليها الهداوه والخجل والطيبه...
المها: جعني فدااه سعود رزقه الله على قد نيته وطيبة قلبه....
عند شوق اللي قعدت جنب الورد قالت بمرح:هااه شلون شفتي بنت عمي...
الورد: ماشاء الله بارك الرحمن تجنننننن حلييييوه ودش تاكلينها سعود توفق والله العظيم..
شوق: هههههه ربي يحفظها،، ناظرت الورد بتركيز: الورد في شي يوجعش...
الورد: والله ما ادري وش صايبني ميته نوم وتوني صاحيه....
شوق: اشربي عصائر طازجه يمكن خمول...
الورد بتعب: ان شاءلله..
التفتين على صوت الطقاقه اللي تنبهه ان العريس بيدخل ياخذ عروسته تغطين كلهن ودخل سعود طلعت ام سعود تغطي هديل وتساعدها هي وسعود تنزل من الكوشه ركبت الموتر وحركو للفندق وكان الصمت سيد الموقف وصلو وفتح لها الباب وساعدها تنزل دخلو جناحهم ودخلت الغرفه لحقها سعود بشنطته وشنطتها حطهم بـ الغرفه اللي كانت مزينه بالشموع والورود لاحظ عليها الحياء قال لها: انا بطلع اجيب العشاء وانتي بدلي على بال ما اجي...
طلع وهي سكرت الباب وراه وراحت باستعجال وهي خايفه انه يجي بأي لحظه فتحت شنطة سعود اللي كانت تشبهه لشنطتها واول ما فتحتها تناثر الاوراق منها ارتبكت وهي تلفهم بسرعه لمحت اسمها من بين الاوراق انصدمت وهي تركز بالأوراق فتحت عيونها بصدمه وصدااع قوي هاجم راسها حست بدوخه قوويه حطت يدها على راسها بألم شديد مزلت دموعها بصدمه من اللي تشوفه

:::