.
.
.
الصباح في مكه المكرمه ~
بعد م خلصوا العمره راحوا البنات يقصقصون اخر شعورهم وراح ابو سيف وعياله يحلقون صفر امر من ابوهم
سعود / بروح اخطب وانا حلاقتي صفر !
سليمان / استغفر بس لااتوطاك بعد هالعمره
ضحك سعود وقال / لو م حنا بهالمكان كان بواجهك
عبدالمجيد / عين خير بس
ضحك سليمان عليه ودخل يوسف اول واحد يحلق بعد ابوه وسيف بعد دقايق طلع وهو ينفض حرامه ودخل وراه عبدالمجيد وبعده سليمان ونفس الشي طلع بعد دقايق واخر شي سعود ، مشوا للحريم اللي خلصوا وطلعوا يتغدون
العنود / يبيله البيك الحين
سعود / انشهد
سيف / امي وابوي وش ودهم به ؟
ابو سيف / البيك
ناظر بنته اللي ابتسمت وغمز لها وضحكت ، ابوهم م ياكل هالسوالف لكن قال البيك عشان عياله
سيف / وانتِ يايمه ؟
ام سيف / البيك
سيف / ادري م ودكم به لكن يلا
ضحكوا ومشوا يودعون الحَرم ويطلعون للبيك ، بعد م أكلوا وخلصوا مشوا لفندق يتروشون ويبدلون ويطلعون للرياض لجل خطبة سعود !
الخلف ~
اخذ ابو محمد ومحمد الذبايح وذكوها بالحوش تحت انظار البنات وصراخهم
ضحك طلال / دامكم خايفين وش يقعدكم هنا ؟
هديل / بصور ستريك !!
محمد / وشو هذا السراميك
هديل بضحك / وش جاب الستريك للسراميك ؟
محمد / م سمعتك زين
ليان بضحك / اي اي واضح
محمد / دزن داخل
رفضن يدخلن ولطخ يده بالدم وركض وراهن وركضن داخل البنات يصارخن برعب
ام محمد / وجع وشبكن!
هديل / يمه شوفي محمد !!!
ام محمد / يامحمد فكني من سوالفك
ضحك محمد وقال وهو يطلع / خوافات
هديل / تعقب
محمد / اخو سلمى !
ضحكت هديل وركضت للدور الفوقي تتجهز للعشاء اللي تأجل الين يجون المسعود !
المسعود ~
وصلوا الرياض بعد مسافه طويله وحجزوا فندق وارتاحوا فيه وقبلها ..
فتح جواله ابو سيف يتصل على ابو روان
ابو روان / مرحبا
عقد حواجبه ابو سيف / السلام عليكم
تنحنح ابو روان / وعليكم السلام ارحب
ابو سيف / الله يبقيك ، بكرا العصر موعدنا ان شاء الله ياابو روان
ابو روان / حياكم الله انشهد انه اغلى من جاء
ابو سيف / الله يرفع قدرك ، ياهلا
قفل ابو روان بعد م ودعه ورفع عينه ابو سيف على سعود اللي الضحكه شاقه وجهه
ابو سيف / والله اني ماني بمرتاح لهالخطبه هذي كلها لكن بشوف اخرتها !
سعود / يبه تكفى لا تكنسل ترا والله انها غير عن اهلها
ابو سيف / يصير خير ، نَم !
انسدح سعود يفكر باللي صار وهو مو قادر ينام من الحماس ..
ثاني يوم الظهر ~
الكل يركض ويتجهز البنات اللي تحط ميكب وتزين شعرها والعيال اللي تروشون ويلبسون بعد م انتهوا بعد اذان العصر الساعه ٤ العصر طلعوا لبيت ابو روان لجل خطبة روان لسعود
بيت ابو روان ~
دخلوا الرجال وفز ابو روان وعمها يرحبون فيهم ابو روان / ياهلا والله اسفرت وانورت
ابو سيف / النور والله نور اهله شلونكم عساكم طيبين ؟
ابو روان / الحمدلله بخير دامكم بخير حياكم ، الحريم بابهم من الجهة الثانيه
خرج لهم عبدالمجيد يوصفلهم الباب ودخلوا
ابو سيف / انت ياابو روان عارف سبب جيتنا وهو اننا بنخطب بنتك روان على سُنة الله ورسوله لولدي سعود
ابو روان / والله انها ابرك الساعات ياابو سيف نسأل البنت ونردلكم خبر
ابو سيف / انا مستعجل ياابو روان يااخوي ودي لو تسألها الحين عشان نتيسر
ابو روان / ليش مستعجلين م بتفطرون هنا ؟
ابو سيف / لا والله مانفطر ورانا طريق وعندنا ظروف هناك والله
ابو روان / الله يستر عليكم
الحريم ~
اول م شافن روان عجبتهن مره وطلعوا للسيارات والرضا واضح على وجيهن !
ام سيف / والله وعرفت تختار ياولدي
ابتسم سعود برضا وقالت العنود / لو انها انا كان ذكيتوني
ناظرها سيف بحده وقال / اخو العيال ! يابنتي انا لو بيدي ذكيت هاللي م يستحي لكن يحمد ربه انه خطبها !
سعود / الحمدلله ماني مثل عيال هاليومين اللي يلعبون على بنات الناس
رغد / كبرت بعيني
ضحك سعود ولفت رغد تسولف مع العنود عن البنات اللي شافوهم .
