-
“Mom, only the two of us?” inosenteng tanong ni Wayne habang palabas na ang sasakyan sa malaking gate.
“Oo, tayo lang. Susunduin natin si Mommy mo,” sagot ko habang nakatuon ang tingin sa daan.
“But my sisters wanted to come too,” sagot niya sabay silip sa side mirror ng sasakyan, para bang tinitingnan kung susunod ang mga ito.
“Wayne, ikaw lang ang gusto kong isama. Baka tuluyan na akong mabaliw kung isasama pa natin sila,” pabiro kong sagot, pero may halong katotohanan. “Okay lang ‘yun. Gusto ko lang mag-day off sa kanila.” Sa sobrang likot ng tatlo, baka mawala ko sila—o mas malala ay baka ako pa ang mawala nila. Malawak ang siyudad.
Napangiti si Wayne at tumango, tila naunawaan ang dahilan ko. Kahit bata pa siya ay mas madali siyang kausap kumpara sa mga kapatid niyang parang may unlimited energy sa katawan. Habang binabaybay namin ang kalsada, nakasandal lang siya sa upuan at tahimik na nakatanaw sa labas. Iba talaga siya sa tatlo, mas kalmado at tahimik.
“Mom, where is Mommy now?” Tanong niya matapos ang ilang minutong katahimikan.
“Susunduin natin, diba sabi niya kanina?” Nakangiti kong sagot. Alas sais pa lang, at hindi ko sigurado kung anong oras ang uwian ni Amour kaya mas mabuti nang agahan namin ang pagpunta.
"Can we go out after picking up Mommy? I want the three of us to spend time together." Malambing niyang tanong habang nakatingin sa akin.
Ngumiti ako at hinaplos ang kanyang ulo. “Oo naman, lahat ng gusto mo ay gagawin natin, okay?”
Masaya siyang tumango, pero habang binabaybay namin ang kalsada, bigla akong napaisip at napahinto. Sandali... alam ko ba kung saan ang ROE Hospital?
Mabilis kong binuksan ang MAPS sa aking phone para siguraduhing hindi kami maliligaw. Ayoko namang umikot-ikot pa at patagalin ang paghihintay ni Amour. Makalipas ang ilang minuto ng pagmamaneho at pagtutok sa direksyon, sa wakas ay narating namin ang ospital. Napabuntong-hininga ako ng maluwag. Salamat naman at hindi kami naligaw! Malaking tulong talaga ang MAPS, kung hindi ay baka sa kung saan pa kami nakarating.
Pagkarating namin sa ROE Hospital, agad kong ipinarada ang sasakyan sa malapit na parking area. Lumingon ako kay Wayne, na abala sa paglalaro ng kanyang maliit na laruan.
“Andito na tayo, baby. Ready ka na makita si Mommy?” Tanong ko habang inaalis ang seatbelt ko.
Tumango siya nang excited at mabilis ding tinanggal ang kanyang seatbelt. “Yes!”
Bumaba kami ng sasakyan at agad akong nag-text kay Amour para ipaalam na nasa labas na kami. Hindi ko alam kung nasa opisina pa siya o nasa isa sa mga pasyente niya, kaya mas mabuting maghintay kami sa lobby. Pagpasok namin, sinalubong kami ng malamig na hangin mula sa aircon ng ospital. Malinis at eleganteng tingnan ang buong lugar, kitang-kita ang pagiging high-class nito. Napansin kong may ilang empleyado na napatingin sa amin, siguro dahil kasama ko si Wayne na tila excited na hanapin ang kanyang ina.
“Mommy! We're here!” Sigaw ni Wayne habang lumilinga-linga sa paligid.
Napatawa ako at marahang hinawakan ang kanyang kamay. “Shh, baby, nasa ospital tayo. Bawal sumigaw.”
“Sorry po.” Mahina niyang sabi, pero nananatili ang excitement sa kanyang mukha.
Biglang may lumapit na nurse sa amin. “Good evening po, Ma’am. Kayo po ba ang naghahanap kay Dra. Amour?” Magalang niyang tanong.
“Yes, Ma’am,” sagot ko. “Nag-text na ako sa kanya na nandito na kami.”
“Hintayin niyo na lang po siya saglit. Nasa office pa po siya at kasalukuyang may tinatapos.”
