MGA TULA NG NAKARAAN

PATINTERO

Para kaming naglalaro nito,
Sa aking sakripisyo,
Ako ang sumusuyo,
Lugi ma'y waring nanalo.
Sa iyo sa unahan ng aking listahan,
Hanggang kaligayahan ay tumahan.

I

Harang-harang, ilang dipa ipangharang,
Palagi ng mayro'ng rason ipanghadlang.
Kaliwa't kanan bantay pati paanan,
Mayapak sa linya, inantabayanan.

Kulang-kulang, liksi't bagal nagkukulang,
Sablay sa kupad kung tumakbo'y pasemplang.
Urong-sulong balaki'y bagot sinumpong,
Saka kumaripas, wari ba'y nandambong.

II
Para-para, pambata 'tong di-kawasa,
Kapagura'y walang tigil, kumakasa.
Humigi't kumulang laging humahapay,
Tantiyahin ma'y nasasaring, sumasablay.

Kuhang-kuha, bawa't naisi'y makuha,
Hakbang muna sasagi't mahihinuha.
Suka't akalain, dili nga'y hinele,
Hilang kuba, talon sa linya'y umere.

III
Kalung-kalong, kabang dibdib kinakalong,
Inimpit na loob, nabahalang balong
Taas-baba, hapong pulso't kumakaba,
Kapag nahuli'y patulak, patumba.

Dahan-dahan, yabag sukdulang marahan,
Pagyapak sa guhit sadyang inilaan.
Tulak-kabigin, alanganing isipin,
Hinakbang sa look, ginawang alipin.

IV
Kawing-kawing, patintero'y kumakawing,
Mabuhangin, mahangin, nakapupuwing.
Tag-araw ma'y tatakbuhing palahaw,
Mapaso, mainitan, magkakamayaw.

Siniklut-siklot, pahapyaw nasiklot,
Madulas, malamig, kumikislot.
Tag-ulan ma'y kaligayahang kapantay,
Ginawin, sipunin, laban walang humpay.

V
Halu-halo, kalituhang humahalo,
Pagharang, sampung balakid, naliliyo.
Atras-abante, patuna'y 'di matuod,
Huwag lamang sa pagtawid, 'di matisod.

Iba't-iba, grado ng pagkakaiba,
Kinimkim, mapusok, nais umariba.
Suntok sa buwan, sapilitang ibulaan,
Saloobin, iwinaglit sa kawalan.

Buwan ng Nobyembre
Lungsod ng Doha,
Bansang Qatar