القماري الغريبة... طارق اللبيب

7

   البنات قعدن يتجارن ..ويكوركن .. يابنات في شنو؟.
قالو الترحيل جا ..
الترحيل شنو؟ ده بص بودي البنات الجامعة .. بص واحد لكل القيامة القايمة في الداخلية دي .. والدفسيبة دي والزحمة .. واحدات يقعن وواحده شنطتها تروح او تقع وتتشتت .. ومدافرة غريبة .. واندفسن في البص ده دفسيبة الجداد والله ..
غايتو الوصف مابكمل الصورة للزول الماشاف الحالة دي ..
وطبعا زي ماعارفين العددية بالميات .. والبص واحد اتخيلو ؟؟ اها الباقيات بمرقن سريع يمشن يحصلن المواصلات .. يعني الناس ديل برسلو لينا بص واحد .. وهم عارفين انو ماممكن يشيلنا ماعارفة ليه؟
يعني عشان يقولو الداخلية فيها ترحيل؟؟ غايتو جنس شي .. الله يدينا الصبر .. .. بتذكر زمان كان في حلتنا في مؤذن .. اسمو حماد .. كل شهر بدوهو 45 جنيه ..
قالو يوم وقف في الجامع قال ليهم .. اسمعو يا ناس انا من الليلة ..عايز اذن في الجامع ده مجان .. لانو ناس لجنتكم ديل قاعدين يقولو نحن بنصرف ماهية لي حماد المؤذن .. والماهية البدوني ليها خمسة واربعين جنية .. وال 45 على ود تاتي ما برضابا في قلع نخلة ..
النخلة بقلعوها بي 50 ..
اها بس ياها البقت علينا .. يعني البص ده لو طار السما حيشيل ليهو كم طالبة ؟؟؟
المهم غايتو انا ابيت اندفس مع الكبسيبة دي .. خليتهم مشن وركبنا المواصلات انا وليلي وعشة . وليليان ديك في اليوم الاول ده قدر مافتشنا ليها مالقيناها .. مابعرفها ركبت مع رفاقتها ومشت.. ولاطشت ليها على جيهة ..وماعندي ليها رقم .. انا الصباح طبعا باللخمة والجوطة مالقيت طريقة امشي ليها .. مشيت ليها بعد لبست .. اها غايتو لمينا لينا في حافلة.. مشينا الجامعة وطبعا نحن في السنة الاولى دي كلها مسمننا البرالمة .. والواحده برلومة .. وغايتو جنس عجايب في الجامعة دي وحات الله انا صاتني صدمة حضارية من الشي ده ..
بري يايمة اريتن ديل بنات التاباني ..
الواحدي تلقاها منتكية فوق الولد كدي وتقعقع زي المافي شي .. وكمان ترصعو فوق كتفو ..
وهم زاتهم اولاد شنو؟؟ والله انا بعاين اشوف لي شلة قاعدين .. الا ادقق النظر عشان افرز البت من الولد .. ماشافو اولاد حلتنا .. ناس السر ود يوسف .. وباباكر ود الحسن .. وحات الله الواحد كان رصع الحمار بجيبو واقع في الواطة .. الواحد ايدو زي الطوبة .. لكن هنا عشنا وشفنا ..ونحن لابسين عبايات ولافين راسنا وماشين مع بعض متلصقين ف بعضنا كدي . زي النعاج المودينهن السوق ..
ونعاين للمناظر دي .. والليلة طبعا محاضرات مافي كلها ترتيبات وتوجس وماعارف واي ناس دايرين يفرضو السلطة والسيطرة على الجامعة ..
وتعرف وونسات ونحن لافين زي الطرش عشان نشوف القاعات واماكن الدراسة ..
انا من بعيد اكان اعاين ليك لي لليان قاعدة مع شلة بتاعة شباب .. كدا زي الزرازرير في حوض البرسيم ..
اي واحد لابس لبس مختلف والوان زاهية وشاذة .. وحات الله بس علبة ماكنتوش دفقوها فوق الطربيزة ..
جيت طوالي ماشة عليها .. ليليان يابت نحن من الصباح كايسين ليك ..
وانا طبعا" شكلي قدام الناس ديل مافي اي تناسب .. كر يا يمة دي انا الفي حلتنا هناك بسموني بت الغندله .. هنا شكلي وسط الاشكال دي زي الراجل ..
اها ليليان لمن شافتني اتحرجت وخجلت قدام الناس ديل .. والحاجة دي ظهرت فوق وشها .. وهن ولد على بت كل واحد بقى يعاين للتاني وفي عيونهم الف سؤال .. هم ما اكتر من اربعة انفار وهي الخامسة .. والسؤال الفي عيونهم واضح .. اناقريتو ..
وبعد امشي حيصرحو بيهو ..
دي منو العربشن دي .. وجاية من وين؟ ومالا لابسة كدا .. البلد دي لمتين بتتحضر؟ ودي علاقتها بلليان شنو؟
واسئلة تانية كتيرة .. مطبوعة فوق عيون الحناكيش المعولقين ديل .. وانا زاتي ضاحكة فيكم الله يهديكم .. وترجعو تبقو رجال زي اخوان البنات ..
والضنف ده من البشر دنيا قايمة بي ذاتها في الجامعة وانا لازم يوم اقعد اوريكم عنهم تفاصيل واسرار قليل البعرفها عنهم ..
المهم انا وقت لقيت ليليان ما متشرفة بوجودي .. وخجلانة مني .. طوالي اخدت بعضي ورجعت ..
بعد مسافة كدا كدا جاتني كايسة لي .. وكت لقتني قالت لي .. يا فاطمة انا اسفة طبعا" انتي عارفة .. قلت ليها يا لليلان نحن اتفقنا مافي اسف .. وانا مقدرة موقفك .. وفاهمة كل حاجة ماتحكي لي ..
قالت لي في حاجة مهمة انا عايزة احكيها ليك واخد رايك فيها ..
الكلام ده كان زي الساعة 10 ونص او حداشر صباحا" ونحن خلاص عرفنا البينا والعلينا .. وتوزيعاتنا واماكننا ..
قلت ليها يا لليان .. الحاصل شنو ؟ احكي ..
قالت لي بس الكلام ده يكون سر بيني وبينك .. ولا اقول ليك انسي .. ّّ!!
قلت ليها يابت احكي .. لاني حسيت انو البت دي ماشة في طريق ماياهو ..
هي اساسا بريئة ومسكينة .. ياربي البت متين هسي جات عشان .. تجر ليها بلاوي؟ .. يابت احكي ..
وبدت تحكي لي المصيبة ..
الى اللقاء ..