القماري الغريبة... طارق اللبيب

17

كان في الداخلية .. الكلام ده كان في نص السمستر التاني .. في بت من ولاية من ولايات السودان ..حصلت ليها مشكلة .. وانا سمعت عنها كلام كتير .. وكنت متحفظة .. وماقادرة اتهمها لاني الحقيقة ..مابقدر اتهم انسان بي كلام الناس .. بس يوم من الايام لقيتها قاعدة براها وبتبكي ..كان في يدي كباية شاي .. جيت قعدت جمبها .. اسمها مقبولة ..
قلت ليها يامقبولة الحاصل عليك شنو ؟احكي لي ..

قالت لي انا سمعت البنات بتكلمو عني كلام ماكويس؟ .. ولليلة حصلت مشكلة كبيرة .. والله انا ماكدا .. انا بعرفك يافاطمة ..بس ماحصل احتكينا مع بعض .. انا عايزة احكي ليك ..ومتأكدة انك حتصدقيني ..
الحاصل يافاطمة انا مما جيت هنا ..اهلي مارسلو لي قروش مصاريفي انتهت من اول اسبوع وبضرب في تلفون ابوي بلقاهو مقفول ..
ونحن بلدنا بعيدة شديد .. الناس بمشو ليها بالطيارة والله ..
يعني عايزة مبلغ عشان اصل اهلي .. وقرش ماعندي .. وماعندي اي زول بعرفو هنا .. وتلفوني فاضي من الرصيد .. وحتى تلفوني الوسيلة الوحيدة الممكن اتواصل بيها لي اهلي .. كنت عايزة ابيعو ..مع انو تلفون منتهي 30 جنيه مابجيبا ..
وبقيت بزوغ من البنات ..عشان مايعزموني للاكل .. وبقعد مرات تلاتة يوم بدون اكل .. بس في صحبتي مرات تديني الفين اشتري رغيفة واحدة وابلها بموية ..
لغاية ما حسيت اني عيانة ..اها يوم صحبتي ادتني الفين.. مشيت نزلت رصيد .. وحاولت اتصل على ابوي .. وبرضو ماجاني .. وقعدت ابكي في الدكان .. وسيد الدكان سألني .. وحكيت ليهو اني انا مماعارفة اعمل شنو ..
قالو لي امشي لناس الصندوق .. والموظفة بتاعة الصندوق افتكرت اني بكذب عليها.. واحرجتني شديد ..وتاني مارجعت ..
بعد يومين من الموضوع ده .. جاني اتصال في تلفوني من رقم غريب.. رديت عليهو .. قال لي انا عمك محمد خضر .. قلت ليهو انا مابعرفك ؟.. قال لي انتي مابتعرفيني .. انا من طرف ابوك لازم تلاقيني واحكي ليك .. قلت ليهو الاقيك وين؟ . قال لي انا بجيك في الجامعة وبضرب ليك الساعة كدا .. وفعلا ضرب لي ولاقيتو برة الجامعة .. وكان زول كبير وشكلو عاقل ..وقال لي امسكي القروش مرسلا ليك ابوك ..قروش في ظرف ..
قلت ليهو ابوي مالو ؟وتلفونو مالو ؟.. احكي لي الحاصل شنو ؟..
قال لي هسي انا مستعجل ..بحكي ليك وقت تاني بتصل عليك ..
وانا فعلا كنت محتاجة لي القروش كانت كتيرة زي 350 وكنت متدينة من بنات ..
مشيت سددت ليهم.. ومسكت القروش بصرف منها بالقطارة .. ونزلت رصيد ..واتصلت على الراجل .. ومارد لي .. بتصل عليهو اسبوع عشان يرد رلي .. ومرات بقفل مني الخط ..
يوم رد لي ..قال لي اسمعي يابت الناس انا مابعرف ابوك ولاشي .. انا خال الولد الماسك الدكان . وحكى لي قصتك لمن جيتي تشيلي منو الرصيد .. وشلت منو رقمك ..عشان اساعدك .. لكن والله تمشي تسألي الولد ده انا اعمل ليك مشكلة ..
طبعا" انا خفت خوف شديد .. وسكت ساي .. بعد كم يوم ضرب لي بسأل عن وضعي .. قلت ليهو عايزاك تسأل تشوف لي زول من بلدنا ..عشان اسأل من ابوي واهلي الحاصل عليهم شنو ؟
انا مما بدت السنة ما مشيت حتى اجازة السمستر ماكان عندي حتة امشي عليها ساقتني واحدة زميلتي ساكنة في حتة اسمها التكلة ابشر عديت معاها الاجازة ..
المهم الراجل ده كل مرة بضرب لي وبرسل لي رصيد .. وانا كنت شاكة فيهو وحاسة انو عندو نية ماكويسة .. لكن والله من اليوم داك تاني ماطلب يلاقيني .. في مرة .. انا طلبت الاقيهو .. وطلعت معاهو ..
وقلت ليهو انا زهجانة وحزينة ..
انا ضايعة وماعارفة اعمل شنو. ؟ وكنت فعلا محتاجة ليهو .. ومحتاجة ليهو في شنو ماعارفة .. وحسيت انو كان بالنسبة لي المنقذ الوحيد ..
وكنت زعلانة من ابوي .. لانو كلو كلو مماجابني تاني مارجع لي ولو بتلفون ..
المهم محمد قالي خلاص انا يوم بجي اسوقك معاي البيت .. وكنت محتاجة لاي حضن حنين ياويني .. وحاسة بخوف ماطبيعي ..
بس يومو الجا يسوقني عشان امشي ازور ناس بيتو . شكلو فهم انو انا بتكرم ليهو بشرفي وعفتي .. وما حس بانو حوجتي للامان .. ما للحرام .. قال لي نحن ما ماشين البيت .. ماشين حتة نكون فيها برانا .. وبدا يتكلم معاي كلام ماياهو ..
طوالي قلت ليهو رجعني .. انا ندمانة على اني شلت منك قرش .. وندمانة اني وثقت فيك .. واحتجت ليك ..
ونزلت منو في نص الشارع .. وقطعت منو وبقيت مابرد عليهو . و رجعت لي نفس المربع الاول بتاع الحوجة والضيق ..
وبقيت ببكي الليل والنهار .. وحساة اني انا اكلت قروش حرام ..
وبقيت بسأل اني القى زول من بلدنا ساي.. في اي حتة في الخرطوم عشان أسالو من ابوي ..
وصفو لي زول من بلدنا في السوق المحلي .. مشيت ليهو .. اداني تلفون زول من جيرانا ..
وضربت ليهو ..
قال لي ابوك حصل ليهو حادث.. وداخل في غيبوبة ليهو 4 شهور ..
وقروشو كلها صرفوها اعمامك الاتنين في علاجو وباعو عفش بيتكم ..وطردو امك من بيتهم .. وامك دخلت معاهم في محاكم واليومين ديل قاعدة تنضم براها اظنهم عملو ليها عمل ..
وابوك هسي مالاقين البعالجوهو بيهو .. ومهتمين بيهو نحن الجيران ..لو لقيتي اي طريقة سيبي الجامعة وتعالي .. قلت ليه خلاص بس انا ماعندي قروش ارجع بيها.. رسلو لي قروش في تلفوني ده .
قال لي كويس .. وانا منتظرة يرسلو لي حق التذكرة .. هسي لي اكتر من عشرين يوم وانا محتاجة لحق الاكل.. ماعندي البشتري بيهو رغيفة .. والله يافاطمة تعبت من الجوع وحيلي اتهدا وماعارفة اعمل شنو .. في لحظة فكرت ارجع لمحمد خضر .. لكن نفسي ماطاوعتني ..

وفي الايام دي شايفة البنات بعاينو لي معاينة ما ياها بتاعة استحقار وحاسة بعيونهم بتتكلم عني كلام ماكويس..
يوم المشرفة نادتني وقالت لي في زول جا هنا وقال انتي قاعدة تبيتي معاهو في البيت وعندو اثبات .. وعرفت من وصفو بانو ده محمد خضر عايز ينتقم مني .. وهسي مشكلتي حيرفعوها لادارة الجامعة ..
والله انا ماعارفة اعمل شنو؟ والله يافاطمة ماحصل مني ..
انتي مصدقاني يافاطمة صاح؟

طبعا ياجماعة وانا بسمع في قصة مقبولة .. بكيت جنس بكا في الدنيا دي .. والله لمن حسيت حسي راح ..المهم قومتها من محلها داك وجبتها معاي ..
واتلمينا انا وزميلاتي وصاحباتي البعزهم .. وشلت قروش من عمي نصر وجمعنا ليها حق التذكرة .. وسفرناها .. الحمد لله ..
وتاني ماعارفة خبرها شنو .. ربنا يحفظها وين ماكانت .. ودي قصة الاستقلالية واللف والدوران البحصل لينا نحن لمن نحتاج ..
والذئاب البشرية اللافة المابترحم الضعيف .. وممكن يصرفو اي كمية من المال لقاء النزاهة الشرف ..

حتى انا سمعت في بعض اسياد الدكاكين .. اصحاب الضماير الوسخانة ببيعو ارقام البنات البجو ينزلو منهم رصيد .. يبعوهن للشباب التافهين عشان يعاكسو البنات بالليل ..
عشان كدا انا بشتري كرت وبس.. ومابوري اي مخلوق رقمي ..
دي واحدة من عشرات قصص المأسي.. الانا شفتها بعيني وتابعتها بي نفسي .. حصلت مع البنات الجايات غريبات بعيدات من اهلهم ..
اما قصتي انا الحصلت لي مع ناس عمتي دي دايرة ليها قعدة ..
الى اللقاء ..