لقينا مصعب قاعد..
انا سلمت على الناس كلهم ..ومن ضمن الناس سلمت عليهو .. سلام عادي ..
وهو اتجاوب مع السلام طبيعي .. لكن قام طلع طوالي وتاني ماجا ..
انابكرة مسافرة وفعلا سافرت منهم الصباح ..
ومشيت البلد وكنت كئيبو و وحزينة وامي لاحظت اني ما طبيعية
الحالة دي انا احسن كتير من الايام الاولانية ..
يوم من الايام امي بالليل لقتني قاعدة في الاوضة براي ..جات قعدت جنبي قالت لي يافاطمة .. انتي من زمان زي صحبتي ومابتدسي علي حاجة ..لازم تجاوبيني على اسئلتي ..
انتي مصعب ود عمتك عندو معاك مشكلة؟
امي كانت لابسة توبها .. وبالليل ياربي امي دي لابسة توبها ليه ؟ هسي ده وقت مرقة؟
قلت ليها يا امي كدي خليهو مصعب انتي لابسة توبك مالك؟
قالت لي انا بوريك لابساهو ليه .. بعد توريني ..
قمت حكيت ليها قصة الرسايل ..وكيف مصعب قفل في وشي التلفون ..
وتاني قريبا الشهرين ما بعرف عنو حاجة .. لكن انا نسيت الموضوع ده يا امي ..
امي قالت لي انتي دايراهو مصعب ده..مانسيتيهو ماتكضبي .. يعني متمسكة بيهو والكلام ده شايفاهو متعبك شديد ..
انتي عارفة انا لابسة توبي ده ليه ؟ احمد ود خالتك يهودا في الشارع الرابع جاني خمس مرات هنا وانت في جامعتك ..
بقول لي حنسي لي فاطمة انا عايزها .. وانا طبعا عارفاك عايزة ود عمتك ..
وهسا من شكلك عرفت انك في مشكلة ..قلت البس توبي امشي لي احمد وابشرو ..
انا قلت ليها يا امي الله يخليلك ..انا هسي ماقادرة افكر حتى ..خليني كدا شوية ..
وانا عندي احاسيس غريبة شديد .. ومتضاربة جواي وماقادرة اعمل حاجة ..
طبعا ياجماعة .. عقلي بقول لي .. انو مصعب مابستاهل اي تضحية .. والمفروض طوالي ابيعو .. قبل ما يكتشف انو غلطان فيني .. وناس عمتي ما بتعايشو ..
وقلبي بقول كلام تاني بقول انو مصعب طيب وحنين وراجل واخو اخوان ومواقفو قوية ..
ومافي زول خالي من العيوب . انا لازم اديهو فرصة تاني احتمال يكون مخدوع فعلا ..
لكن عزة نفسي مابية علي اسلم قلبي ليك تاني ..
المهم قدرتا سكتا امي من موضوع احمد ده نهائي .. احمد مزارع وزول خدوم وطيب لامن مسكين .. لكن انا جواي مافي ليهو غير انو اخوي ود خالتي ..
الاجازة انتهت ورجعت لي الخرطوم السنة النهائية ..
والمرة دي اتصلت اتصال على ناس عمتي ..مامشيت ليهم وسألت من اخبارهم وكدا ..وقلت ليهم انا السنة دي مابقدر اجيكم زي السنوات الفاتت عشان دايرة اتخرج بدرجة كويسة ..
ورحبو بالفكرة هم اساسا ما متمسكين بي جيتي ليهم كتير.. وتاني ما مشيت ليهم ..
اها في يوم إتصل علي عمي نصر..
انا كنت في الداخلية وبنتونس مع ليلى جعفر.. خطبوها طبعا ..وفرحانة فرحة شديدة وكنا بنكاوي فيها .. لانو خطيبها قالو زول ضعيفوني ومسكين ..وهي ماشاء الله .. بتهرش الرجال حتى المشرفات بخافن منها .. عاملة زي جون سينا ..
اها جاني الاتصال من عمي نصر .. قلت ليهن دقيقة اشوف عمي مالو ؟
لمن فتحت ليهو الخط .. اتاريهو شايل لي خبر زي الصاقعة ..
قال لي سمعتي بي خطوبة مصعب . قلت ليهو لا . قال ليهو مصعب خطوبتو يوم الخميس الجاي وكلمني .. حيخطب ليهو واحدة دكتورة كدا .. لكن ماوروني اسمها .. انا قلت ليهو اسمها صفاء ..
قال لي اها تراك عارفة ..يعني كلموك ؟..
قلت ليهو ماكلموني ..
انا طبعا" ياجماعة بعد ماكنت طبيعية ..وبديت انسى.. الكلام ده هداني هد من جوة.. ودمر الباقي في حيلي وتماسكي .. بعد المكالمة بقيت ببكي بلاسبب .. زي الزول الشالو منو حاجة حقتو .. انعل ابو الحب لبو اليعرف دربو ..
الكلام ده كان يوم الاتنين تقريبا اوالاحد مامتذكرة المهم الخطوبة ماباقي ليها غير يومين تلاتة ..
وانا التقول بالله حاكمين علي بالاعدام ..مع وقف التنفيذ . وحاسة بنيران قايمة في جوفي .. الحمد لله ..
اها اليوم القبل يوم الخطوبة يوم الاربعاء العصر .. بقيت بتكلم براي قلت والله لو اتصلو علي عزموني للخطوبة امشي طوالي ..واكون عادية وانبسط زي الماحصل شي ..
قبل ما اكمل كلامي تلفوني ضرب .. عاينت ليهو لقيتو رقم مصعب .. قلبي قال شحححح .. وضهري ده زي الضربوه بي فرار ..وانشليت عديل ..
وايدي الاتنين ماتن يا الله رفعت التلفون وفتحت الخط ..
الى اللقاء ..
أنت تقرأ
القماري الغريبة... طارق اللبيب
Short Storyكل مرة بحكي ليكم القصة براي .. الليلة انا عايز اكون مستمع معاكم .. .. ونخلي بطل القصة يحكي لينا .. وبالاحرى البطله انثى .. القصة دي غير حقيقية . لا احداثها ولا شخصياتها .. وانا اخترت شخصية انتقائية .. لان الشخصيات العوجاء لاتعنيني .. وده منهجي...
