القماري الغريبة... طارق اللبيب

23

  قلم طارق اللبيب ..
فتحت ليهو الخط قلت الو مرحبا" ..
قال لي فاطمة كيفك ؟
قلت ليهو مرحب معاي منو؟ معليش ماعرفت الرقم ..
قال لي.. فاطمة عليك الله بطلي الهبالة.. انا عايز اتكلم معاك في موضوع ضروري.
قلت ليهو موضوع شنو ؟ احكي سريع خلصني .عشان انا مافاضية عندي قراية..
.. قال لي بس كدا ما ينفع في التلفون ..لازم نتلاقى. وهسي تعالي لي في نهاية الشارع. .. لسه الوقت معاك .. عايز اتكلم معاك وارجعي ..
قلت ليهو اسفة مابقدر اجي ..
قال لي فاطمة الله يخليك ما تعاندي..
انا ماعندي وكت .. والله انا بنتظرك في الزلط الشرقي جنب الصيدليه .. لو ما جيتي بكون واقف لغاية الصباح.
قلت ليهو اقيف بي راحتك انا ماجاية ..
وقفلت منو الخط ..بي نفس طريقتو قبل ما يكمل كلامو ..
لكن والله قلبي وجعني .. من تصرفي .. وبقيت اقول ان شاء الله يضرب تاني .. ان شاء الله يضرب تاني .. مايستاهل التعامل ده ..
ليه انا عنيدة كدا؟
.. لكن برضو كنت زعلانة شديد وحاسة اني مافششت فيهو .. ونفسي اعرف عايزني في شنو؟
ونفسي اسألو من غلطي شنو .
اها انا بفكر كدا .. ضرب تاني .. قال لي فاطمة انا قلت ليك والله بنتظر لغاية بكرة الصباح .. انتي عارفاني بعملا ..
قلت ليهو خلاص يامصعب جاية انتظر .. طوالي لبست وطلعت استاذنت قلت ليهم ماشة الصيدلية قريب وجاية ..
وطلعت لابسة سفنجة .. لابسة عبايتي ولافة خماري .. اصلا مابطلع غير كدا ..
احمد الله ماحصل طلعت وانا معطرة .. مازي واحدات كدا .. المهم ..
وصلت ليهو ..
لقيتو لابس جلابية وشكلو طالع من البيت بي استعجال .. ولا ركزت في العربية كويس ..
قال لي اركبي ..ركبت معاهو دور طوالي .. انا بقيت اتلفت زي العاملة لي جريمة ماعايزة زول يشوفني .. ماعايزة اجيب لزميلاتي سمعة .. والناس طبايعهم سوء الظن ..واصلا الناس عاملين بنات الداخلية ملطشة .. بنات الداخلية بعملن ..وبنات الداخلية بتركن ..
وماعارفين جوة الحاصل شنو ؟؟
الزول العايز يعرف بنات الداخلية على حقيقتن ..يسأل واحدة قرت داخلية ..
اها ركبت معاهو وطلعنا ..وقف بي جم كافتريا ..واصلا مابتكلم معاي ..وانا زاتي غضبانة برجف بس عايزة اسألو اسئلة ..
نزل وقال لي انزلي.. وقعدنا قال لي ختي بالك معاي كويس ..
اولا" انا اسف اسف اسف .. على كل الحصل ..وفعلا انا ظلمتك وليك الحق تشيلي النعال دي وتضربيني بيها ..
طبعا ياجماعة انا اتمحنت .. تكلت يدي في الطربيزة وختيتها تحت حنكاتي وبقيت اعاين ليهو بكل احتقار ..
هو سكت .. وقال لي اتكلمي يافاطمه ..قولي لي اسف في شنو؟
قلت ليهو واصل سمعني انا هودي ساكتة بسمع فيك ..
قال لي طبعا ..
انا في زول اتصل علي ..وقال لي احسن ليك تبعد من فاطمة دي ..دي حبيبتي انا .. وما ح أخليها ليك ..وانا عارفها بتلعب على حبلين .. بتعشقني انا وعايزة تتزوجك انت ..
لكن انا ما اتخلى عنها .. وقفل مني الخط ..ـــــــ
ضربت ليهو تاني.. قلت ليهو انت كذاب .. لو انت صادق اثبت لي الكلام ده ..
قال لي انت لاقيني وانا بثبت ليك .. وفعلا لاقيتو في نفس اليوم .. ولقيتك مرسلا ليهو كم رسالة كدي بتاعة حب شديد..
وهو رقمك الانا بعرفو ..بدون ماياخدني شك .. ومافي اي حاجة تخليني اخت ليك عذر ..
بس مافكرت غير اقطع العلاقة معاك .. وقطعتها وانتهيت ..
انا قلت ليهو يامعصب طيب ماقريت الرسالة الاولى الرسلا لي؟

قال لي ماقريتها ..
قلت ليهو هاك اتفضل اقراها ..
قال لي لالا مافي داعي يافاطمة انا هسي عرفت الحقيقة ..
دقيقة اكمل ليك الكلام ..

قلت ليهواها كمل ..
قال وبعد ماقطعت علاقتي معاك ..بديت علاقة مع الدكتورة الاختارتها لي امي ..واصلا ماحبيتها ولا دخلت في راسي .. مافيها ولاصفة من صفاتك .. ولابتشبهك .. وانا قلت بس انا اتزوجها ارضاء لامي .. وعشان امي ماتخلف وعدها ..

انا قلت ليهو من متين يامصعب انت بتشتغل بي رضاء زول .. قال لي من يوم القلت لي انتي كدا ..
دقيقة اكمل ليك .. وبقيت مواصل معاها ..والله بتهرب من لقاها وماحاسي باي حاجة تجاها .. و طواالي بتقول لي انت مابتحبني ..
وانا بكضب عليها ..وبقول ليها بحبك ..لكن الحقيقة انا غضبان عليك وقلبي وروحي معاك ..وماقدرت اتخلص منك ..

اها امبارح بالليل اتصل على نفس الزول ..من رقم تاني وقال لي سلام عليكم .. قلت ليهو عليكم السلام قال لي .. انا الزول الاتصلت ولاقيتك ووريتك الرسايل من فاطمة ..
انا عايز اعترف ليك بحاجة .. اقسم بجلال الله انا فاطمة دي لاشفتها لا لاقيتا لابعرف شكلها ..
وانا كان عندي علاقة مع اختك مودة .. ومودة هي القالت لي نحن عايزين نبعد فاطمة الغجرية من مصعب اخوي
وانا تصرفت كدا .. عشان اشكك فيها ..وتسيبها ..وفعلا انا نجحت لكن ضميري مأنبني شديد ..
خصوصا انو مودة انسانة سيئة ومابتستاهل خير ..
والله انا رسلت لي فاطمة على اساس اني مصعب ..وهي صدقت واتواصلت الرسايل على الاساس ده ..
لكن دايرك تفهم ..انو مودة ماطلبت مني ارسل رسايل ابدا .. طلبت مني اتصرف ابعدك من فاطمة وبس ..
وشكرا ليك وانا اسف ولو في اي طريقة معالجة حصلا ..
وقفل الخط ..

..وانا مشيت البيت ..وقلت ليهم طبعا" يامودة ويا امي.. انا خليت فاطمة ..بس ماكان توسخو سمعتها وتشككوني فيها .. امي قالت لي في شنو يامصعب ؟ حكيت ليها الحصل ..
وتلفوون الولد والرسايل واعترافو الاخير..
امي لمن عرفت القصة قعدت تبكي.. وتلعن في مودة .. وقالت ليها فاطمة نحن فعلا " ماعايزنها لمصعب صاح .. لكن مابتستاهل منك كدا يا ملعونة .. ومعزة اختي الصغيرة تفت لي مودة في وشها ..
ومودة زاتها انزعجت .. لانها ماعارفة الولد اتصرف كدا ..
وانا طبعا طيلة الفترة ماحكيت ليهم التلفون الجاني ولا الرسايل الشفتها ولاكنت عارف الولد عندو علاقة بمودة .. وهو زاتو ماكلم مودة بالعملو ..

(طبعا ياجماعة انتو بتتذكرو مودة اخت مصعب الكبيرة البتساهر برة البيت وبتجي خايفة من مصعب ..)
مصعب قال لي.. عارفة يافاطمة امي ومودة انتقمو مني انتقام مابعدو انتقام ..
وانا ندمان اني ما اتحققت منك .. بس اي زول في محلي مابياخدو اي شكك في الموضوع .. والحمد لله دي مقادير ربنا ..اتحرم منك في الفترة الفاتت ..
وهسي انا ماخد مواعيد مع اهل صفاء .. امشي ليهم بكرة للخطوبة ..
لكن ما ح أمشي لاني ماعايزها نهائي .. وقلت قبل ما اتصل عليهم واعتذر ليهم اني صرفت النظر ..
لازم الاقيك واكلمك ..
اها قلتي شنو؟ مسامحاني ..؟ والله دي الحقيقة مازدت ولانقصت ..
قلت ليهو خلاص يامصعب ؟؟خلصت ؟؟ كلامك كمل؟
قال لي ايوة نعم ..
قلت ليهو يلا اسمعني كويس ..
انا سامحتك .. ومافي اي مشكلة .. وكأنو ماحصل حاجة ..
بس مستحيل انا ارجع ليك تاني .. سريع امشي جهز روحك .. واعمل خطوبتك .. وربنا يتم ليك على خير .. ولو بتعزموني للخطوبة بجيكم ..
لكين انا خلاص قنعت منك .. ونسيتك اساسا".. وحأبدا حياة جديدة ..وعايز يخطبني احمد ود خالتي ..
بعدين امك ومودة انا عفيت ليهم من حقي ..
الي
اللقـاء