القماري الغريبة... طارق اللبيب

25

  اها يا جماعة انا لمن وصلت بت ناس عمتي .. كنت متوترة .. وما عارفة افرح ولا اخاف .. وشلت معاي كتبي عشان استفيد من الوكت.. الحمد لله انا السنة دي متكربة ومجتهدة شديد ..
زي ماحكيت ليكم.. المراة دي طبعا عمتي بت عمة ابوي.. يعني ابوي ود خالها .. وبناتها تلاتة مودة ومروة ومعزة .. واولادا اربعة .. الكبير محمد . بعدو مصعب . بعدو محمود . بعد مزمل اصغر واحد .. وهو اخر العنقود .. اصغر من معزة طوالي ..
محمود في عمري نفس السنة . مصعب اكبر مني . محمد الكبير خاطب ليهو خمس سنوات . لسع ما اتزوج .. بسافر برة كتير عندو تجارة كدا ما عارفاها .. ومصعب شغال في شركة .. وانتو عارفين قصتو ..
المهم عشان مانفصل كتير ..
لمن جيت عمتي قابلتني احسن مقابلة.. وكانت فرحانة بي جيتي .. وجات قعدت معانا في الغرفة بتاعة البنات .. واتونسنا وانا قلبي وروحي وعيوني كلهم بفتشو لي مصعب مافيش ..
وماقادرة اسال منو .. معزة الوحيدة الحست بي ..
جات قعدت جمبي وقالت لي مصعب جوة في الاوضة ديك .. ارح سلمي عليهو ..
قلت ليها لالا خليهو ياخد راحتو.. لمن يطلع بنسلم عليهو ..
المهم ماطلع نهائي .. وماعارفاهو عارفني برة ولا مو عارفني ..

بعد شربنا شاي المغرب وانا بتونس عادي وبنحكي وبنضحك .. غايتو المرة دي االناس ديل منفتحين معاي فتحة عجيبة خلاص .. ويافاطمة شفتي ويافاطمة عايني .. وشنو وشنو .. غايتو لامن استغربت ..
بالليل كدا بعد العشاء عمتي قاعدة في اوضتا .. نادتني يافاطمة تعالي عايزاك في موضوع ..
قالت لي طبعا يافاطمة .. انا عارفة انو مصعب ولدي متعلق بيك.. وروحو دايرة تطلع .. لكن انا عايزة ليهو واحدة دكتورة اسمها صفاء ..

وانا ياجماعة طبعا بسمع في عمتي بكل برودة ..

ومواصلة في كلامها قالت لي .لكن انا برضو دايراك انتي .. تكوني لي بت ..
قلت ليها ياعمتي انا عارفة مصعب عايزني.. لكن المشكلة اني انا ماعايزاهو .. انا عايزني ود خالتي .. انا بجيكم هنا في البيت عشان دايراكم انتو ..الناس الوحيدين القريبين لي الخرطوم ..مابجيكم عشان مصعب .. وانا هسي بقول ليك انا مصعب ماعايزاهو ..انا عايزة ود خالتي ياريت تقنعيهو .. لانو ما حيلقى فايدة مني ..
قالت لي لكن يافاطمة انا عندي حل يرضى كل الاطراف ..
ويخلي مصعب يقتنع بالدكتورة ..
قلت ليها اللهو شنو الحل؟
قالت لي اناعايزاك لمحمد ولدي الكبير .. اساسا بينو وبين خطيبتو المشاكل كترت ..
وانا ماعايزة افكك انتي من يدي ..
قلت ليها سبحان الله ياعمتي .. الحل ده حل غريب.. وحل كعب كلو كلو .. وكلو اضرار ..
قالت لي كيف يافاطمة يابتي ؟
قلت ليها كيف ياعمتي .محمد يخلي خطيبتو ..ويتزوج واحدة بحبها اخوه .؟
وكيف انا اقدر اعيش مع راجل اخوه كان عايزني ..
وكيف انا اعيش في بيت فيهو زول بحبني اكتر من روحو ..وانا اكون في عصمة اخوهو ؟
وكيف مصعب يقدر يشوف حبيتو يتزوجها اخوهو ..وهي عايشة قدام عينو ؟
ده كلو انتي مافكرتي في المساوئ والاضرار .. والعواقب البتجي بعدو؟

انا ياجماعة اقتنعت انو الفهم ما بالعمر .. الفهم قسمة ونصيب من رب العالمين ..
عمتي زولة بسيطة وبتاخد الامور بي فهم محدود ..
قالت لي ..ما مشكلة ..انتي ومحمد تمشو تسكنو بعيد من جيهة مصعب ..
قلت ليها .. اولا ياعمتي مافي اخو بنفصل من اخوهو مهما البيوت اتباعدت ..
الشي التاني الحكاية بالرغبة.. انا ماعندي رغبة اتزوج ..لامحمد لا مصعب .. ياريت لو انتي بتعزيني تحترمي رغبتي ..
بعدين انا بتك ..من دون اتزوج واحد في اولادك .. انا بشوفك زي امي ..
ومستعدة اخدمك تحت كرعيك طول حياتي .. بس ماتجبريني على حياة انا ماعايزاها ..
والله ياجماعة المراة دي فجأة كدا بقت تبكي وتتنخج .. قالت يافاطمة
انا عندي تلاتة بنات ماحصل واحدة قالت لي كلامك ده ..
ربنا يحفظك يابتي ..
خلاص انا خليتك وماعندي كلام اقولو ..كلامك صاح وربنا يهدي مصعب ويمرق من الحالة الهو فيها دي ..
المهم انا كلام عمتي وجع لي قلبي.. وجع شديد خلاص .. وده احساس مابحسو الا الزول الجربو ..
اها الصباح اصبح ..ونحن كلنا طلعنا نشرب الشاي.. فجأة مصعب جاء مارق وكت شافني .. بدون مايحس قال..
فاطمة ؟؟.. انتي هنا؟؟
كيفك وكيف احوالك .. وكيف الدراسة ..؟؟
الناس ديل كلهم طيرو عيونهم بعاينو ليهو .. لانو قالو ليهو فترة ما بتكلم مع زول ..
قلت ليهو تمام يامصعب ..والله غايتو درش شديد ..وتعب مايعلمو الا الله ..
مشى استحمى وغير وجا قعد معانا ..
وشكلو منعنش .. طوالي عمتي المابتعرف تتصرف .. قالت ليهو اها يامصعب.. قلت شنو في موضوع خطوبة صفاء ..يهدي فاطمة قالت ما عايزاك ؟ رد عليها ..
قال ليها .. فاطمة كذابة .. عايزاني عايزاني .. لكن المشكلة فيك انتي يا امي ..
الشي التاني ..لو صفاء دي بقت اخر بت في الدنيا انا مابتزوجا ..
الشي التالت .. انا يااما فاطمة .. يااما عايز حاجة من الدنيا ..
رابعا . الموضوع ده تاني ماعايزين فيهو نقاش ..

انا طبعا" خليت الناس بتكلمو في كلامهم ..وقمت خشيت جوة في الاوضة ..