القماري الغريبة... طارق اللبيب

18

طبعا ذي ما حكيت ليكم انا لمن رجعت للسنة التانية ..رجعت بنفسيات مختلفة .. وفي البلد هناك لامن ابوي وافق على مصعب ود عمتي .. اصلا ابيت اتصل وابشر مصعب .. عارفين ليه؟ ..عشان احكي ليهو وجها" لوجه . واشوف الفرحة فوق وشو عاملة كيف ..
اها فعلا لمن رجعت المرة دي ..نقلونا من الداخلية الفرعية لي مجمع سكني قريب من الجامعة.. وانا كنت فرحانة شديد ..انو تاني مافي مواصلات ولاغيرو .. طوالي من الداخلية على الجامعة كلها مسافة 150 متر .. يعني لو المحاضر اتحرك من مكتبو وانا اتحركت من الغرفة .. ممكن انا اصل القاعة قبله ..
وكنت فرحانة بالداخلية الجديدة .. المجمع مابختلف كتير عن الداخلية الفرعية ..غير انو فيهو اهتمام بالخدمات اكتر .. والحاجة البتبوظ بصلحوها سريع ..
وبخافو من الطالبات شوية كدا ماكتير .. لاننا بقينا خلاص بنعرف من اين تؤكل الكتف ..
اها اليوم النزلت فيهو في الداخلية .. وقت خلاص عرفت راسي من كرعي كان المساء حلا .. وما عندي طريقة بالليل ده اطلع امشي لناس عمتي ..
فقلت امشي ليهم بكرة .. اصلا الجامعة ماحيكون فيها حاجة في اول يوم ..
لكن البنات اصرن انو نمشي نشوف الحاصل شنو .

اها اول يوم في الجامعة .. كنت كايسة لي مصعب ..وعيوني بتفتش ليهو شديد ..
والبنات لاحظو لي..و انا كنت ما جايبة خبر .. لكن هن قهرتهن بي الله مابفوتن حاجة ..
اها لقينا الجامعة لسع ما فيها حاجة .. انا زوغت منهن براحة ومشيت لناس عمتي .. وما اتصلت على عمي نصر لاهسي ..
وكنت فرحانة فرح شديد اني حشوف مصعب .. لانو كان قلبي مشتاق ليهو شوق ماطبيعي ..
وعايزة ابشرو بي كلام ابوي .. اها ناس عمتي استقبلوني عادي يعني مافي حاجة زايدة ..
وما حسيت انو في اي مشكلة ..
وماعارفة الراجيني ..
بس عمتي ماقدرت تدس مشاعرها .. كانت كاجاني كجة شديدة ظاهر عليها فوق وشها ..بس البنات بتعاملو معاي عادي .. لكن انا عملت رايحة وزي المافاهمة شي .. عشان انا روحي دايرة تطلع واشوف مصعب ..
طبعا كالعادة لقيتو مافي .. رسلت ليهو رسالة في تلفونو ..
(مصعب انت وين ؟ انا في بيتكم ..)
الكلام ده كان قريب المغرب ..
طبعا" طيلة فترة الاجازة دي مارسلت ليهو اي رسالة.. ولا اتصلت عليهو وهو اتصل علي مرتين ..ومافاتت مكالمتو في الواحدة عن دقيقة ونص .. بسال مني ومن اخباري ومن ناس البيت وبقفل الخط ..
وانا طبعا كنت قاصدة ما أعمق العلاقة معاهو .. عشان مامعروف المصير شنو ؟
اها جاتني منو رسالة مفادها ..
(حمدلله على السلامة انا في الطريق جاي على البيت)..
كلها كم دقيقة كدا وحسيت بي حركتو جا .. قلبي فرررا طبعا وبقيت ماطبيعية .. وحاسة بي عمق الروح مشتاق اشوفو ..
وبقيت ماسكة روحي قدام البنات.. عشان ما افقد الكنترول واقعد اتهابل ..
هو طبعا برضو عامل تقيل والود رزين.. اولا اتوضا صلى المغرب .. حتى جانا داخل في الاوضة ..
قال .فااااطمة كيف الحال حمد لله على السلامة ..
وكيف ناس البيت وقالو خالي نزل البلد .. حمدلله سلامتو ..
انا : الله يسلمك يامصعب والله الحمد لله ..
كويسين ابوي طيب وبسلم عليكم بدون فرز ..
اها سرقت ملاحظة كدا للبنات.. كل واحده عاينت للتانية كدا ..وكانو ساكتين وبعاينو لي انا مرة.. ويعاينو لي مصعب مرة ..
ومصعب منداح ويسأل فيني ..وشكلو مبسوط بوجودي.. وانا ما مركزه معاهو كويس ..بالي كلو في البنات ..
حقيقة انا ما ارتحت من الموضوع ده ..لكن ما عايزة اظلم زول وانسج لي ظنون ماعندها اساس من الصحة .. وانتو طبعا" عارفني اكتر حاجة بكرها الظن في ناس بدون دليل ..
بس ان شاء الله ربنا يكضب الشينة ..ويكون شكي مافي محلو ..
المرة دي عمتي ما اتونست معاي كويس ..وانا طبعا" عاملة فيها تليفة وهبلة .. وشغالة ليها ..كيفك ياعمتي ..وان شاء الله كويسة ..

وانا خايفة تقوم تعارض لي في الموضوع انا بتكلم ليكم بصراحة ده احساسي الكان في اللحظة ديك ..
والله اشتقت ليكم ياعمتي شديد ..التقولي عديت منكم سنة ..
وهي طبعا بترد علي باختصار ..وبي كلام مرضان كدي ..
المهم عديت معاهم الليلة ديك وانا قلبي مقبوض .. ومسخو علي فرحتي بي شوفت مصعب ..
احسن زول اتكلم معاي ابوهم ..
حتى معزة الكانت صاحبتي حسيت بيها مايايها ..
ياجماعة دي حالة شنو انا احلها من البلد مع ابوي دايرة تتعقد لي بي هنا ..
باكر الصباح طلعت بدري شديد على الجامعة عشان مصعب مايبراني ويزيد الطين بلة ..
ومرقت براحة زي الحرامية عشان هو مايحس بي ..
في الجامعة هناك حاولت اقاوم القلق من الموضوع ده .. مرات اقول انا بتخيل ساي ناس عمتي عايزني وماعندهم اعتراض ..
ومرات اقول لو تم تم ولوماتم ماهاميني كتير .. انا احسن اخت بالي في دراستي ..
لغاية شوفت ليك مصعب حايم بي هناك.. لابس قميص كاروهات .. وبنطلونو الكبير العوير داك ..
.. لسه المحاضرات مابدت .. وحتى لو الليلة في محاضرات بتكون بعد الساعة عشرة ..
خليني امشي عليهو كدا.. واحاول اتشمشم من بعيد لي بعيد ..
جيت عليهو ماشة .. وهو مما شافني وشو اتهلل وقعد يتبسم .. قعدنا كدا في الحتة البنقعد فيها دايما .
قلت ليهو اها احكي لي يامصعب.. كيف عديت الفترة دي وانا بعيدة ..؟ تلقاك بس انا فت بي جاي.. وانت نسيتني بي جاي ..
قال لي ..حرام عليك والله ..انتي من مشيتي وصورتك من خيالي ماغابت ..
انوم بيها واصحا بيها ..
قلت ليهو .. اها كيف؟ ناس البيت وردة فعلهم مع موضوعنا ده من اساسو ..
قال لي دي حياتي انا .. وانا البقرر فيها .. يافاطمة هو الزمن ده البنات بقو يقررو حياتهم ضد رغبات الاهل .. لما الاولاد..
قلت ليهو يعني افهم من كدا .. انو انك قررت ضد رغبة الاهل .. قال لي طبعا انتي عارفة ناس المدينة ونظرتهم للبت البتكون جاية من البلد ..
لكن انا متأكد لما يكتشفوك زي ما اكتشفتك انا .. حيغيرو من رايهم ..
لكن حتى لو ماغيروا رايهم .. انا انا . مصر عليك ..
طبعا ياجماعة حتى البشارة الشايلاها عشان اكلم بيها مصعب.. طارت لي في راسي .. والكلام ده احبطني شديد غايتو ..
قلت ليهو يا مصعب انا طالبة منك طلب ممكن؟
الى اللقاء ..