القماري الغريبة... طارق اللبيب

20

وفعلا حصل .. انو مصعب خلا الجامعة.. واشتغل في شركة . وشغل كويس شديد .. وانا كل بعد فترة بمشي لناس عمتي .. وعلاقتي بمصعب كويسة .. وهو زاتو مرات بطلع من الشغل بدري ويجيني في الجامعة.. واتصالاتنا مع بعض جيدة ..
وانا بحاول اتقرب من عمتي.. واتعامل معاها معاملة راقية .. وبتصل عليها واسال منها .. لكن الموضوع ماغير فيها اي حاجة ..
وبحس بانها متضايقة مني .. وبترد لي باخر نفس ..
لغاية ماحسيت بنفسي ثقيلة وفارضة نفسي ..
وماعرفت اعمل شنوعشان اخليها تحبني وتقربني منها ..
لكن مصعب اصلا ما اتغير مني ..
ومرت الايام ونحن على الحالة دي .. وانا لمن حسيت اني شبه قنعت من الموضوع .. مصعب حبو زايد .. وتمسكو بي بلغ الحد الاقصى .. وبدا يجهز في روحو .. وعمي نصر عرف الحكاية .. واتكلم معاي قال لي انا بنصحك تبعدي من الناس ديل ..
ماعارفة الكلمو منو وانا ماسألتو ..
وانا زي ماحكيت ليكم .. كل اجازة سميتسر اونهاية سنة بمشي الشمالية .. وبقيت مابحكي لامي اي حاجة ..
في كل اجازة بتقدم لي زول في البلد وانا برفض .. وماندمانة طبعا" لانو لو شي كاتبو ربنا.. كان حصل .. كل شي قسمة ..
وكل مايتقدم لي زول بقفلو طوالي .. لاني عندي امل انو عمتي ترضى عني ..
ويوم مصعب قال لي احتمال نعقد قبل ماتخلصي الجامعة .. قلت ليهو .. انت قدرت تقنع عمتي ؟
قال لي لا مابتقتنع .. هي راسها قوي وانا راسي اقوى منها ..
حقيقة انا كتير بستغرب في مصعب في القصة دي ..؟
وماعاجباني فيهو الطبعة دي.. انو زول عنيد والفي راسو بعملو.. وماعندو اي اعتبار انو دي امو ولا ده ابوهو .
واتكلمت معاهو في الحتة دي.. وهو بقول لي دي حياتي الخاصة .. وماصح زول يتسيطر فيني ..
لكن برضو ياجماعة رضاء الوالدين.. المفروض نقدمو على حياتنا الخاصة .. لانو نحن وحياتنا الخاصة مملوكين للوالدين ..
المهم انا لاحظتا الطبعة دي في مصعب.. العناد وقوة الراس.. حتى مرات كتيرة بكاجرني في حاجة .. وبعد يعرف انو غلطان مابرجع من الغلط ..
وانا لسه ماعارفة سر انو ناس البيت بخافو منو ليه ؟ يعني مابكسرو ليهو اي كلام حتى لو مارضيانين ..
طبعا" قدامي مافي اي حاجة غريبة.. لكن برضو قلبي ماكلني ..
يوم من الايام وكان الوقت داك في تالتة . .. اتصلت علي امي من البلد وقالت انها تعبانة .. من بطنها ومشت الدكتور ووقال ليها لازم عملية .. عندها لحمية في الرحم .. وقالت لي انا جاية الخرطوم .. اعمل العملية هناك ..
وانا اقترحت عليها تنزل عند ناس عمتي .. وامي طبعا" بريئة وطيبة .. ودرويشة .. وبعدين ماكانت عارفة انو المراة دي كان دايرها ابوي .. قبل كدا ؟ ابوي زول كتوم ماحكا ليها نهائي ..
و في تفاصيل كتيرة في التعقيدات دي ..
لكن خلوني في المهم . امي جات الخرطوم ونزلت عندهم .. واتعاملو معاها بي كل ادب .. وامي كل ماتشوف مصعب تقول ليهو هوي يا نسيبي .. وهو بقول ليها حبابك ياحماتي الغالية .. وعمتي وبناتها يعاينن لي بعض .. وامي ماجايبة خبر .. وماعارفة الناس ديل مادايرني ..
قلت اكلم امي اقول ليها اتقلي شوية.. الناس ديل ماهن دايرني.. لكن قلت ماعايزة احطمها نفسيا.. اساسا هي عيانة وخاشة عملية . .. حتعمل عمليتها وترجع ..
لكن صراحة مصعب بقا ليها زي ولدها .. ووقف معانا وقفة راجل .. لغاية ما امي عملت العملية وسافرت متكيفة منو كيف ..
وقالت لي الولد ده نعمة .. اوعك يفك منك ..
اها بعد امي سافرت .. عمتي وبناتها بقن حاسات انو الموضوع بقى جد ..
مع انو الفترة كلها مصعب بجهز في حالو للعرس .. وما بتكلم ..
وهن كانن شاكات انو لسع باقي علي ولا خلاني .. لانو مرة قال لي انا بقيت مابجيب سيرتك في البيت ..
لانهم بضايقو .. حتى قال لي انا لو ماعرست العارض الاسمها صفاء دي حقو ما اعمل اي خطوة ..
وانا فعلا بقيت مابتصل عليهو.. نهائي الا هو يتصل علي ..
اها يوم من الايام مصعب رسل لي رسالة من رقم غريب ..
الكلام كان بعد امي سافرت بي عشرة ايام تقريبا .. انا كنت في نص تالتة .
قال لي ..
(فاطمة كيفك ده رقم جديد عملتو خاص ليك ..
ماتتصلي في الرقم القديم نهائي .. )
..
رديت ليهو قلت ليهو (حاضر ياحياتي) ..
..
تاني بعد شوية رسل لي .قال لي (انتي عارفة انا بحبك قدر شنو)؟
طبعا" اول مرة في حياتو يقول الكلمة دي.. انا حسيت بي حمى..
وحيلي مات .. وبقيت ارجف من راسي لي كرعي .. من رسالتو دي ..
لاول مرة احس بي طعم الحب في الكلمات ..
بقيت ماسكة الرسالة وبعاين ليها .. لامن بكيت .. وماعارفة نفسي ببكي ليه؟
يمكن كنت محتاجة للكلمة دي ..
تلات سنة حارمني منها .. لكن زي ماحكيت ليكم .. كل معاملتو وحالو وتصرفاتو.. بدل على انو بحبني شديد.. بس مابقول لي انا بحبك نهائيا"
ياربي الليلة الحصل ليهو شنو؟
انا لغاية المساء ما قدرت رديت على الرسالة .. بس مهجومة ..
حتى لاول مرة احكي لي بدرية صحبتي .. تفاصيل زي دي .. وقلت ليها تفتكري يكون الحصل ليهو شنو؟
وارد ليهو كيف هسي.. اقول ليهو شنو ؟
قالت لي ردي هسي .. قولي ليهو اها بتحبني قدر كيف؟
طوالي كتبتها ورسلتها ليهو طوالي ..
رد لي سريع ..
قال لي (قدر ماتشيل بحور القافية من همس الشعر في الروح ..
قدر مايطول نفس ريد القليب في البوح ..)
....
لالالا .. انا كدا حاجن مامعقول الزول ده يقول كدا .. الا يكون شرب حاجة الليلة ..
طبها تاني مارديت ليهو .. وبقيت خجلانة وماعايزة الاقيهو تاني كلو كلو ..
ده جنس الكلام البجيب لي توتر .. نحن كنا بنتونس زي الاخوان .. بس بحس وانا معاهو اني بملك العالم ..
اها انا قلت تاني كان جا بزوغ منو.. مابقدر الاقيهو ..وهو زاتو تاني ماجا الجامعة اظنو حس بالخجل برضو .. بس بقت القصة دي شاغلاني الليل والنهار ..
اها بعد كم يوم كدا .. لمن شفتو طول لا اتصل ولارسل .. رسلت ليهو رسالة ..
قلت ليهو (مالك منقطع مني ؟)
مارد علي ..
تاني رسلت رسالة .. قلت ليهو فيها ..
(ماتخليني اتعلق بي رسايلك وتقطع مني .. انابقيت ال24 ساعة بعاين في التلفون عشان تجيني منك رسالة) ..
برضو مارد ..
حقيقة طول مني شديد .. دي هسي 17 يوم لاجا ولا رسل لاتصل لارد .
طبعا انا قلقلت اتصلت عليهو في الرقم الجديد لقيتو مقفول .. اتوكلت على الله ودقيت عليهو في الرقم القديم الهو مانعني منو..

فتح لي الخط .. قبل مايسلم علي . قال لي كمان عندك وشي بتضربي ؟؟لي .. تاني ماتتصلي علي اوعك ..
وتوت توت توت قفل الخط ..
..الى اللقاء ..