القماري الغريبة... طارق اللبيب

8

وبدت ليليان تحكي لي المصيبة العايزة تعملا ..
قالت لي .. طبعا يافاطمة .. ديل اولاد صحبان وبنات .. وبحبو بعض شديد .. والبتين القاعدات ديلا .. جوري .. ومنة .. وهم الاتنين .. برضو اصحاب شديد .. اها جوري دي اخوها طلال .. الود اللابس الفنيلة البمبية ..
هم الاتنين جيرانا في حي الصفا في جدة.. وانا بعرفهم شديد ..
واهلي واهلهم صحبان .. وانا فرحت شديد لمن لقيتهم هنا ..
طلال ده من السنة الفاتت كان ساكن في داخلية ..وهسي لمن جوري جات ابوهم أجر ليهم شقة واسعة ومريحة ..
وانا كنت بحكي ليهم عن داخليتنا وبكيت .. وهم قالو لي تجي تسكني معانا ..
وانا طبعا" الحكاية دي يافاطمة ..احسن لي شديد من الداخلية القاتلة دي .. بالجد دي غوانتنامو .. دي اصلا ماسكن طالبات ..
انا مابقدر مابقدر ..
انا قلت ليها بالمنطق يا ليليان.. الكلام ده مابجي ..ماصح تسكني معاهم.. لانو الظروف مامعروفة .. واولاد الزمن ما بتقدري توثقي فيهم .. ضف على كدا امك مابتقبل ..

اها قالت لي .. انا بتصل على بابا واحكي ليهو.. اولا" لو بابي وافق .. تاني مامي ولابشتغل بيها ..
قلت ليها حرام عليك ياليليان .. الرسول وصى على الام تلات مرات.. وعلى الابو مرة واحدة .. انتي كيف يعني تهملي قرارات امك .. وانتي براك شفتيها جات معاك الداخلية .. وقعدت معاك لغاية ماطردت خوفك واطمأنت عليك ومشت ..
كدي هسي انتي قبل ماتكلمي ابوك .. خلينا نتشاور في القصة دي بتجي ؟
اولا انتي ساكنة مع ولد وبت اخوان غربا عنك .. في شقة مقفولة ..
مابتضمني الظروف .. مثلا البت تكون مافيشة.. او اتاخرت في الجامعة او حصلت ليها ظروف.. وانتي اطضريتي تكوني في الشقة براك.. مع الولد .. وممكن البت يكون عندها لاب متأخر بالليل .. او اي شي ؟
كيف تضمني تقعدي مع الولد براك في الشقة .. قالت لي : طلال ود كويس ما ممكن يحصل منو شي كعب ..
..اولا انا طلال شايفني زي اختو جوري بالضبط .. وماممكن يفكر فيني تفكير سيء ..انتي ليه قلبك وسخان كدا يافاطمة؟
قلت ليها والله قلبي ما وسخان.. لكن خايفة عليك .. ولازم الزول يعمل حسابو على الحاجة البحبها وخايف عليها ..
انتو ماعارفين ليليان .. انا البت مع اني بت زيها مابقدر اوصف جمالا ..
اول حاجة قواما زي الفرسة الجامحة .. لمن تقيف على حيلا كدا .. البنات ديل كلهن بسكتن ويعانن بس .. وكت تتكلم بتغريد عيونا كدا ..وكان انتكت كدا تخاف عليها من العين .مقسمة تقسيم الهي بديع والله .. وبشرتها دي زي الدهب المجلى .. وصوتها زاتو بجيب الفتنة .. وطريقة كلامها المعجن ..
غايتو انا كان بقيت راجل مابعرس غير ليليان ..
وتجي تقول لي طلال زي اخوي .. عان العويرة ..

قلت ليها .. يا الغالية الشيطان بكون حاضر بينك وبينو وانتي ذاتك مابتأمني على نفسك الفتنة ..
قالتلي .. يافاطمة انتي معقدة شديد وخوفك ده ما مبرر ..
قلت ليها بعدين لو اهلك الهنا سمعو .. بانك قاعدة في شقة مع اولاد طلبة اغراب .. ما برحموك والله وابوك ذاتو ما بريحوهو ..
ناس بلدنا ديل مايلقو ليهم موضوع .. بعملوهو كعنوان رئيسي في الجرايد .. وتبقى لبانة في خشوم الناس.. وتجيبي الكلامات لابوك ..
قالت لي خلاص انا بحاول ادس الموضوع ده ولا بكلم ابوي . لانووو من كلامك ده شكلو ابوي ما حيوافق ..
قلت ليها ده اسمو التصرف الاسوأ من السئ .. يعني هي اساسا الحكاية غلط .. وكونو تدسيها على اهلك يبقى انتي بتعملي في غلط مركب ..
والاولاد الحتسكني معاهم حتما حيكلمو اهلهم ..واهلهم زي ما قلتي هم جيران اهلك.. يعني كدا كدا الخبر ح يصل ابوك وامك .
قالت لي ياخي انتي شنو ؟ ..اي باب تقفليهو لي .. انا قلت ليك مابقدر اعيش ف الوضع ده.. لو ابوي قتلني .. انا خايفة لو قلت لابوي ماعايزة الداخلية ..يقوم يمنعني الجامعة ..
انا لازم اتصرف ..انتي بس اطلعي منها وزي الماحكيت ليك حاجة ..
اوعديني ح تحفظي السر ده ..
قلت ليها اطمئني ما أنا البطلع السر .. بوعدك
لي علمكم .. في حاجات زي دي كتيرة .. بس ما معلنة يعني .. اخوان ساكنين في شقة مع بعض بنات واولاد .. وتجي تسكن معاهم قريبتهم او واحدة من معارفهم ..

بالاضافة لي حاجة اسمها السكن الخاص مجموعة من البنات بأجرن بيت او شقة مع بعض (دي بجي بحكي ليكم عنها برواقة )
.. بس ماعارفة الحاجات اولياء الامور بقبلو بيها كيف ؟؟ وهل بكون عندهم علم ..
يا ريت اولياء الامور يتابعو اولادهم .. ويكون عندهم دراية بي ادق تفاصيل تصرفاتهم وتحركاتهم .. لانو بالجد في طالبات ما مسؤلات .. كان داخليات كان خارجيات ومحتاجين لمتابعة .. ومراقبة .. وطبعا الناس ماواحد .. هسي زي البت ليليان دي .. يعني بتصرف بي كل سذاجة وهبل .. وممكن تضر نفسها وماتنتبة الا بعد فوات الاوان ..
والمشكلة انها عنيدة وراسها قوي ومابتسمع كلام زول .. مع انها بثق فيني لكن برضو فشلت معاها ..
والله ياجماعة انا قدر ما اتكلمت مع ليليان تغير رايها من الموضوع ده .. ماأثر فيها اي شي .. وهي طبعا حلفتني اني ما أتكلم بالموضوع .. وشكلها حتعمل زوغة .. ولا تعمل شنو ماعارفة لاننا لسه في اجراءات كتيرة نحن ماعارفنها ..
المهم انا هسي بين امرين .. احاول اشيل تلفون امها منها واكلمها بيها تمنعها .. ولا اوفي بي عهدي ليها واسكت ..
الى اللقاء