القماري الغريبة... طارق اللبيب

13

بدا عمي يحكي لي في قصة ..قال لي شوفتي يا فاطمة عمتك دي.. زمان بتذكر نحن صغار حصلت قصة .. بتذكرها زي البارح .. طبعا كان في علاقة بينها وبين ابوك .. اها وهي طبعا" كانت في البلد .. بس طبعا هي كانت اكبر من ابوك بي تلا سنوات تقريبا .. وكان بيناتهم حب شديد .. اها فجأة كدا ابوك بدا يشك فيها .. وانا شخصيا" ماعارف دوافع الشك شنو ؟.. لكن كان متأكد لدرجة قال لابوي.. لو جبرتوني على الزولة دي انا بطش من البلد .. وحصلت مشكلة كبيرة بين ابوي واخته اللهي امها .. بي سبب رفض ابوك ..
جدك قام قال لي محمد ابوك . انا حالف انت ماتتزوج الا بت عمتك تتزوج اول ..ابوك قال ماعندي مانع .. لو خليت العرس كلو كلو ..
وسافر مشلى الجنوب عدا فترة .. وهي جاها الزول ده.. ابو الاودلاد ديل من الخرطوم .. كان صاحب اخوها وخطبها واتزوجا وجو استقرو هنا.. في ناصر.. حتى بعد بعد عشرة سنة تقريبا ابوك جا واتزوج امك ..
اها حكيت ليك القصة دي .. لانو الناس ديل لغاية هسي مابكونو نسو القصة دي .. والمراة دي مراة حاقدة ونيتها سودا ..
قلت ليهو .. معقول ياعمي ؟ .. هسي المراة دي كان ابوي عايزها ؟
اكيد ابوي ده عندو مشكلة في الشبكية بتاعة العين .. قال لي لالا يا فاطمة الزولة دي زمان كان سمحة سماحة .. اسكتي خليها ساي ..
اها طبعا" انا صراحة ياجماعة .. بقيت خايفة وشاكة شديد .. وعمي نصر ده لازم حكي لي القصة دي عشان اعمل حسابي من الناس ديل ..
وهسي انا ح ابيت معاهم واخد معاهم الجمعة ..
ايوااا.. اتاريها المراة دي اليوم الجيتهم داك مجحمة فيني كدي.. التقولي انا اسرائيلية ..
بلا مصعب بلا غم .. بعد كدا يايمة بعيد بعيد من الولد ده . الليلة لازم افهمو براحة انو تاني مايجيني في الجامعة ..
اها الحمد لله وصلنا امتداد ناصر .. والمرة دي استقبلوني استقبال كويس ..
وعمتي ظاهر عليها فرحانة بي غايتو .. ماعارفاها نست شاكوش ابوي ولا بتمثل ساي ..
غايتو يا ابوي شاكوشك عينة . اها انا لامن جيت .. مالقيت مصعب .. لانو هو اكتر زول في البيت بعرفو وبطمئن ليهو .. عشان كترة جيتو لي الجامعة . وفعلا حسيت بي وحشة في البيت .. رغم انو البنات احتفن بي احتفاء مبالغ فيهو .. وحسسني فعلا بانهن مشتاقات لي .. وعمتي كل مرة تجي تاخد معانا قعدة وتسألني .. اها يافطوم كيف الداخلية؟ .. يابتي الداخلية دي ماصعبة ماتلعني الشيطان وتجي تسكني معانا في بيتنا ده .. والله اخواتك ديل بريدنك .. والبيت شايلكن .. اصلو لا جايبين ليك شئ زايد .. ولابتنقصينا حاجة ..
قلت ليها ياعمتي والله المشكلة زميلاتي المعاي .. وبنقرا سوا ومعتمدين على بعض .. انا لاقياكم وين؟ .. لكن ان شاء الله السنة الجاية.. او البعديها.. افكر في الموضوع ..
انا زاتي اتعودت عليكم .. وبي قلبي بقول ليها .. (بري يايمة البقعدني معاكم شنو كمان ؟)..
طبعا عمي وصلني قبيل .. وفات .. اصلو ماقعد معاهم .. غايتو عمي نصر الناس ديل اصلو مابدورهم ماعارفة ليه .
وماعارفة ابوي موقفو منهم شنو؟ .. اها هسي الحاصل انو الوقت اتأخر ..
وانا راقدة مع بنات عمتي في الغرفة.. البت الكبيرة مافي .. ولا في زول سأل منها ..
وانا ذاتي ماسألت خايفة من الاحراج ..زي الساعة 11 وربع البت جات داخلة .. كركرب زي الراجل.. ولابسة لبس يرمي اللقمة من الخشم ..
ودخلت تووش ولافي زول قال ليها كنتي وين ولا الوكت أتاخر ..
بس لمن جات سألت سؤال واحد .. قالت مصعب جاء ؟
قالو ليها لا ماجا .. قالت الحمد لله كنت خايفة خوف .. قلبي مقطوع ..
والغريبة عندها اخوان تاني اكبر واصغر من مصعب قاعدين وابوها قاعد .. ما اشاتغلت باي زول ..
اظنو مصعب منجضهم نجاض .. عافية منك أب عضلات الشباح .. هع ..
اها يازول بعد البت شالت نفسها وختتو .. وجابت ليها عيشة من جوه ودخلت حشتها من التلاجة وجات تلوك .. وشايلة ليها كباية موية في يدها التانية .
واللقمة في خشمها وتتكلم .. ولسع خشمها مليان الوان من المكياج .. وعيونها وجفونها غايتو جنس بشتنة عليكن .. تنضم معاي كيفك يا فاطمة وكيف الداخلية ..؟
نفسي اسكن داخلية قالو حلوة ...
قلت ليها ايوة حلوة .. اريتا عيشة الهنا والمنى يايمة .. ومن قلبي بضحك عليها .. اقول ليها يابت العز .. كان جيتي يوم واحد بتعرفي الله واحد ..
المهم اتونسنا ونستة" مسيخة ورقدنا ..

بعد شوية سامعة كركبة مصعب جا .. وانا غالباني النومة .. لكن ساكتة ساي ..
اصلو ابيت اصدر صوت .. المهم هو ماعارفني انا جيت .. جاء طوالي كابس غرفة اخواتو .. اظنو جيعان يحليلو .. لمن شفتو فتح الباب سريع اتكمسدت بالملاية.. وقبلت علي الحيطة قبل ماهو يفتح النور .. عشان مايشوفني زاتو ..
وفعلا فتح النور.. ومسافة ساكت يعاين اظنو بعدعد فينا .. لقانا عددنا اكتر من اخواتو ..
المهم براحة قفل النور وطلع قفل الباب وراهو.. حتى انا اتعدلت والنوم طاير من عيوني ..
وعندي تفاكير غريبة وعجيبة .. اول حاجة اتأكدت انو مصعب ده بختلف من ناس البيت ديل .. ومخوف البنات ديل خوف جد ..
حتى امو وابوهو بعملو ليهو الف حساب .. والكلام ده اكتشفتو الصباح ..
لقيتو ليك بزرزر في البنات ديل جنس زرزة .. وبرة لمن طلعت في الهول عشان نشرب الشاي .. هو بصرف في الاوامر وابوهو واخوانو ساكتين ..
قام فجأة كدا قال يا ابوي .. نحن عايزين فاطمة تجي تقعد معانا هنا .. الداخليات ديل مامضمونات ..
انا طوالي نطيت ليك فيهو .. قلت ليهو هوي يامصعب .. ما تتكلم ساي اسألني انا السكنت في الداخلية ..
الداخلية مكان منضبط اكتر من بيوت الاسر والعوائل .. نحن ماعندنا بت من الداخلية بتاخر لغاية انصاص اللليالي .. ولو في واحدة حصل منها كدا بكلمو ولي امرها ..
فجأة كا انا انتبهت اني طعنتهم بالكلام .. وتِم.. قطعت الكلام في نصو ..
وبلعت ريقي .. وواصلت .. قلت ليهو والله انا شايفة بنات الداخلية مؤدبات ومربيات شديد .. واي زول قال ليك الداخلية ما مضمونة كذب عليك ..
قال لي يابت .. هسي انا جاي من حفلة .. فيها واحد خالط ليهو بت من بنات الداخلية ..لابسة لبس يخجل ..
قلت ليهو اسمعني يا استاذ.. في فرق .. بين الداخلية الخاصة والداخلية الحكومية ..
والسكن الخاص .. والمشكلة كلهن بقولن طالبات داخلية ..
اقول ليك مافي بت بتتأخر برة الداخلية الحكومية بعد 9 ..
قام قال لي .. طيب هسي انتي مش بايتة برة الداخلية ؟
قلت ليهو بس انا استأذنت وجا ساقني عمي .. ووصلني لغاية هنا ..
تم سكت ...
بعد مسافة كدا رما ليهو قنبلة قدر الهجيمة..
قال ليهم يا امي . ياابوي.. اسمعوني .. انا قررت حاجة بخصوص فاطمة .. وعايز اطرحها ليكم .. وياريت تفكرو فيها قبل ما تدوني رد .. لاني ما ح اتراجع منها ابدا" ..
الى اللقاء ..