القماري الغريبة... طارق اللبيب

10

البنات .. كل واحده قعدت تعاين للتانية .. واحدة قالت لي انا غايتو الليلة ماشفتها؟.. قت ليهن يعني جات الليلة من الجامعة ..؟ ولا ماجات ..
قالت لي بري ماشفناها قلت لك ..
انا اتخلعت قلت ليها انتي متأكدة ؟
قالتلي .. يعميني فيها .. هسي الوقت بعد المغرب يعني قريب الساعة سبعة ونص.. والبت دي المفروض تجي من 4.. يعني مشت وين؟ ..بس اوعا يكون مشت للناس ديك ..
المهم مشيت منهم وبقيت مقلقة .. وكل مرة اقول لي نفسي ياخي انا مالي ومالا؟..
تاني القى نفسي مقلقة بدون ما أحس ..
قعدت في الغرفة آكل في اضافري .. واقوم واقعد .. البنات المعاي قالن لي انتي مالك يافاطمة ؟..
قلت ليهن البت الاسمها ليليان دي لاهسي ماجات .. ما بعرفا مشت وين؟
ليلى جعفر قالت لي .. يعني شنو ما كتيرات قاعدات يتأخرن زي الوقت ده لسع المواعيد ماجات ..
انا قلت ليها ايوة لكن ماااا...
وغلبني اتم الكلام لانو سر طبعا" ..
ليلى قالت لي شنو يابت .. ماتمي الكلام ..؟
قلت ليها ..أبدا مافي حاجة بس لانها البت جديدة.. وشهادة عريبة ..مافاهمة حاجة ..
قالت لايختي ماهو نحن كلنا جداد ..
لالا يافاطمة الموضوع ده فيهو (انّ) .. انتي مقلقلة قلق ماعادي .
قلت ليها ياليلى لو البت دي ماجات بكشفوها في التمام . وبتحصل ليها مشكلة لا ليها اول ولا ليها اخر .. قالت لي ياشيخة سيبك بالله ..
انا عاينت للساعة.. لقيت الساعة 8 جات .. قمت مشيت تاني لي غرفة ناس ليليان ..
وبرضو لقيتها ماجات ..
اها المرة دي ابيت ارجع غرفتي ..انتظرت مسااافة.. الزمن خلاص كبس المهم قبل الزمن بشوية.. اشوفها ليك جات مقلعة براااها ..
اول ما شفتها قمت عليها ليليان انتي كويسة ؟.. وانا بالجد كنت مخلوعة وخايفة عليها .. لكن والله احرجتني ليك جنس احراج .. قدام البنات .. مافضل لي الا ادخل تحت السرير ..
قالت لي .. هي يا انتي .. هي انتي مين قايلة نفسك ؟
ومالك هسي مهجومة كدا .. يا استاذة انا ماصغيرة.. ماتحسسيني اني محتاجة لي حد فهمتي ؟
قلت ليها اسفة جدا والله .. ده اخر جزاي اني خفت عليك ؟
قالت لي تخافي علي ليه ؟ انا اول واحدة اتأخر ؟ ماكل الناس حاكماها ظروف ..
وانا طبعا" ابلع في ريقي وغالبني اقول كلمة .. ورجعت لي غرفتي .. مع اني كنت محرجة شديد من كلام ليليان .. لكن برضو حسيت اني اطمأنيت .. والقلق الجواي راح ..
مشيت رقدت كدا .. وما اتكلمت مع اي زول . ليلى شايلة ليها تلفون فيهو كشافة شكل بطاريه كدا..
ولعت الكشافة ونورتها لي في وشي ..
وقالت لي يابت انتي قصتك مع لليان دي شنو.؟ بالجد حيرتيني ..
قلت ليها والله صحبة ومحبة.. زي علاقتي بيك بالظبط .. وفعلا بقلق عليها .. يعني ياليلى لو انا اتأخرت وانتي ماعارفة الحاصل علي.. مابتقلقي علي ؟..
قالت لي لكن انا حاسة انك فارضة روحك عليها .. وهي ماشغالة بيك اي شغلة ..
قلت ليها ماصح .. هي بتعزني زي مابعزها .. وانا هنا عارفة نفسي بكذب ..
لكن في اللحظة دي بالذات .. ليليان جات في غرفتنا ..
ووقفت كدا جنب الباب .. وعاينت لي وقالت لي .. انا اسفة يافاطمة ..
قلت ليها ولايهمك حبيبتي .. بس تاني ماتتأخري كدا ..قلت ليها كدا عشان ناس غرفتي مايفهمو انها غلطت معاي وبتعتذر ..
قالت لي حاضر يافاطمة.. ما ح اتاخر تاني.. بس انتي ما تزعلي مني ..
بس هسي انا عايزاك في كملتين ضروري شديد .. مابثق في زول غيرك ..
طوالي انا عاينتا لي ليلى جعفر بي طرف عيني .. كاني بقول ليها .. أها شفتي .. ؟ يعني كلامك طلع ماصح .. وليليان بتعزني زي مابعزها ..
وليلى بتكتب ليها في حاجة .. عاينت لي كدا خطفة ودنقرت راجعة ..
اها انا طلعت مع ليليان ..
قربت مني ومسكت يدي .. ونحن طالعين .. وقالت لي اكيد مازعلانة مني ؟
قلت ليها أكيد ياليليان .. قالت لي تعالي نطلع السطوح احكي ليك برواقة ..
وطلعنا سلم سلم .. لمن وصلنا لقينا في بنات مفرشات وراقدت فوق السطوح ..
والحتة جميلة والهواء ضارب .. والحتة امان شديد.. والسلم حق السطوح عندو باب ..
اها قالت لي مافي طريقة نحكي هنا .. قلت ليها نحكي عادي نشوف لينا حتة كدا لي قدام نقعد فيها وزول هنا بعرفنا مافي ..
حودنا بي غادي للبنات الراقدات ديل .. هن اساسا" مانايمات الوقت لسه بدري ..
قعدنا كدا ساي على الاسمنتي بتاع السطوح مافرشين تحتنا اي شي ..
قلت ليها اها يا ليليان احكي لي ... وانتي ليه اتاخرتي كدا؟ ومشيتي وين؟
قالت لي صبرك علي حبة حبة ..
وبدت ليليان تحكي لي .. قالت لي ..
قالت لي طيب يافاطمة صراحة انا اتكلمت مع المشرفة انو انا عايزة اسكن مع قرايبي .. المشرفة قالت لي مستحيل .. الا يجي ولي امرك ويعمل اجراءات الاخلاء .. انا ما كنت قايلة القصة كدا ..
عشان كدا مافي طريقة سكن الا بحاجة واحدة بس.. تحاولي تقنعي معاي امي .. تخليني اسكن مع صحباني ..
طبعا" يافاطمة . زي ماحكيت ليك بي طلال اخو جوري الشفتيهو معاي في القعدة ..
طبعا" الزول ده بمرور الايام بقيت احس انو .. بتقرب لي .وعايز يتكلم معاي في حاجة ..
وما أخفي عليك انا زاتي في البداية استلطفته ..
وبديت فعلا اتعلق بيهو لاني شايفة انو بقى يهتم بي اهتمام زايد ..
ودايما في القعدة بوجه كلامو لي.. وبتونس وبعاين لي .. وابتساماتو الحلوة دي .. طوااالي قدامي ..
اها اخر يوم امبارح قال لي انا بحبك .. وانا قلت ليهو حيلك حيلك يا طلال . الكلمة دي كبيرة لازم تكون قدرها.. لكن صراحة انا فرحت بي كلمتو فرح عجيب ..
وهو قال لي .. الحب يا ليليان .. يجي هاجم على قلب مابستأذن ومابكون عندو اسباب وسيدو مابعرف نتائجه ..
انا طبعا" كلامو ده يافاطمة ماعرفتو قاصد منو شنو؟
لكن الشي المتأكدة منو.. انو طلال بحبني لدرجة الهبل .. ياخي قال لي من زمااان في جده هناك.. كل ما اشوفك طالعة من العمارة ..قلبي بدق بسرعة وماكنت قادر اتكلم معاك ..عشان خايف من اهلك .. واهلي برضو ..
اها الليلة من الصباح قبيل في الجامعة .. قال لي بعد المحاضرات تمشي معانا الشقة .. وتشوفي الوضع عامل كيف .. حتن بعد داك تتكلمي مع امك ..
اها الليلة من الجامعة طلعت معاهو .. ومشينا الشقة القالها دي ..
هي في بحري.. ))
طبعا يا جماعة ليليان بتحكي لي .. وانا قلبي داير يطلع من محلو ..
كدي اشوف باقي كلامها ربنا يستر عليها البت دي ..
الى اللقاء ..