القماري الغريبة... طارق اللبيب

11

وليليان مستمرة في الكلام وحكاية قصتها .. قالت لي عارفة يافاطمة وانا ماشة على الشقة ..كنت خايفة شديد .. ماعارفة ليه . وكان طلال بطمن فيني ..بقول لي مافي زول اساسا" بعرف انك جيتينا .. وانا بعدين بوصلك الداخلية بنفسي .. المهم حسيت اني اطمأنيت ليهو شديد ..
وكان بتونس وبضحك معاي.. ونحن في الطريق .. وبحكي لي في قصص .. مغامراتو مع الشباب ..وصاحبو السعودي الكان بركب معاهو للتفحيط ..
المهم لمن وصلنا الشقة لقينا جوري سبقتنا.. وقاعدة بترسم ...
طبعا" جوري وطلال صحبان شديد ومتفاهمين .. يعني هي لمن شافتني جاية مع طلال.. ولا استغربت ولاشي .. وكانت بتتونس معانا عادي ..بعد شوية قالت انا بخش الغرفة.. اخد لي نومة انتو اخدو راحتكم.. احتمال عندكم ونسات حبابيب ..
انا اتبسطت منها شديد.. لاني صراحة كنت عايزة اتونس مع طلال كتير ..
وفعلا اتونست معاهو ..وحكينا الحاجات من البتحصل في السعودية . وقصص الاولاد ..
وكل مرة كان بقول لي انا فرحان بيك يا ليليان ..
طبعا" ياجماعة ليليان كان بتحكي لي وانا متوترة.. انها تقوم تحكي لي كارثة ..
وكت بقت تحكي في حكاياتها دي انا فاجأتها بسؤال ,,
قلت ليها .. اسمعي ياليلبان .. اوعه يكون طلال ده قرب منك ؟
هي قال لي .. طبعا" قرب مني ..كان قريب مني ..وقاعدين في كنبة واحدة وبنتونس .. يعني زي قعدتي وقعدتك دي ..
قلت ليها .. لا لا انا بقصد اوعا يكون هبشك او لمسك ..
قالت لالا ..بس كان بطقطق في اصابعينو .. وتاني بدا ينضف في وشو من الشعر الزايد .. يعني الود ده مهتمي بي نفسو شديد يافاطمة ..
انا قلت.. في سري .. وحات الله د مو راجل زي الرجال ..
انا كدي اطمأنيت على البنية تب .. هسع عليك الله جنس البت القدامي دي .. يقعد قدامها ويطقطق اصابعيهو؟ وينضف وشو؟ ..
اها واصلي يا ليليان منو العوض وعليهو العوض ..
قالت لي اتونسنا كتير ..وتاني لما جوري طلعت من الاوضة.. وماقدرت تنوم .. طلال قال لي قومي ارح نوديك.. وأجر لي امجاد وجابني ..

وخلصت حكايتها المخيفة دي و انا طبعا" بالجد اطمأنيت شديد .. وهي ذاتها انا حسيت بيها مطمئنة ..
لكن برضو المفروض اشوف لي طريقه امنعها.. من تمشي للناس ديل ..
لانو الزول مابضمن .. وبعدين احتمال الولد الخنيتة ده يجوهو اصحابو في الشقة دي .. لانهم عندهم الحركة دي كتير ..
اها طبعا" قلت ليها قوماكي خلاص ..ننزل بس اوعديني تاني ماتمشي براك ..
لانو الحكاية دي في سمعتك ماكويسة ..
قالت لي ان شاء الله اقدر ..
الحاجة الكويسة.. انو ليليان بقت تثق فيني وتطمئن لي.. وبتحكي لي اسرارها ..
وانا لو قمت شكيتها لي امها .. وحكيت ليها طلعتها دي ..
البيني وبينها بتخرب ..
وتاني مابتحكي لي اي حاجة ..
اها ياربي اعمل شنوووو اعمل شنو ؟
فكري فكري يافاطمة .. اهااا خطرت لي فكرة .. انو ادخل زول في النص عشان ننقذ البت دي ..
نزلنا انا مشيت على غرفتي وهي مشت على غرفتها ..
ومرت الليلة دي عادية كانو مافي شي .. وتاني ما مشت كل يوم بشوفها قاعدة ..
طيب نحن ياجماعة في بداية السمستر الاول .. لسه ماكملنا شهر .
وخلاص الفلس خيم علينا بكل مايحمل من اضرار .. لكن بنباصر مباصرة جد .. مرة قالو لينا ناس الصندوق بدفعو ليكم مية جنية لكن انا طول السمستر ده يعميني فيها .. قالو كان في ظروف معينة كدا وماصرفو لينا ..
لكن لي قدام جاتنا .. وهي ذاتها التقول مدعية مابتقعد من الصباح للعصر ..

اها حصلت قصة تاني في الاسابيع التلاتة الاولى دي ..
بعد كم يوم وانا في الجامعة.. اشوف ليك مصعب ود عمتي واقف مع ليلي جعفر ..
ده الجابو شنو؟ وعلاقتو شنو بي ليلي ..
المهم لمن شافوني الاتنين ..بعاين لي ليلى تأشر ليهو علي ..
جيت ماشة عليهم ..وسلمت على مصعب .. كيف الاحوال يا مصعب .. اها مالك بي جاي ؟
قال لي جيت بفتش ليك ..والبنات دلوني على ليلى دي ..وجيت سألتها منك .
انتي كنتي وين ؟
قلت ليهو مصدعة ..مشيت شربت لي كباية قهوة ..
اها الخبر شنو ؟وناس عمتي كيف .. ؟ قال لي تمام ..كل خميس نتوقع انك تجينا ..وانتي مابتجي ..وانتي وعدتينا انك تجي .
وناس بيتنا كل يوم بيسألو منك .. وبترقبو كل يوم خميس ..
قلت اجي اشوف الحاصل عليك ..واطمن عليك بس ..
قلت ليهو الله ييدك العافية ياود عمتي ..انا تمام ..والله الداخلية بقت زي بيتنا ..وانا مرتاحة شديد .. ومعاي اخوات ابدا" ماحسسوني باني غريبة ..
قال لي اها رايك شنو بعد المحاضرات تمشي معاي البيت؟ ..
قلت ليهو مابقدر والله .. لكن ان شاء الله بجيكم يوم الخميس ..
هه .. امشي معاهو وين كمان المخلوع ده؟ ..

مصعب ودعمتي .. من النوع المامسؤل .. وعندو تصرفات غريبة.. وكت يمشي بمشي مجنح ..وبشبح شبيح كبار كبار ..ماعارفة مشية مصطنعة ولا اصلا طبعو كدا ..
وبحب يلبس الفنايل الاكماما قصيرة ديك .. لكن بعد كدا النصيحة لله .. زول راجل ومشيتو مشية رجال ..واسلوبو في الكلام كلام رجال ..
لكن في النهاية ياهم رجال التسعينات .. انا غايتو مابثق فيهو كلو كلو ولايمكن ابراهو.. ان شاء الله امشي براي.. لكن معاهو ؟؟ ..بري يايمة ..
اها طبعا ودعني ومشى.. بعد اتاكد اني يوم الخميس بجيهم ..

بس في حاجة عملا الود الغبي ده .. لمن جا الجامعة قبل يلاقيني .. اي زول يلاقيهو يسأله مني.. يقول ليهو بت عمتي خطيبتي اسمها فاطمة ..
يعني البنات والاولاد خلاص ..ثبتت عندهم فكرة.. انو انا مخطوبة من ود عمتي .. وشايفين الود العاتي والبتباها بي عضلاتو باكمامو القصيرة ..
تاني مستحيل واحد منهم يقول ساي دايرني هههه ..
يعني كان رفاقتي لقت سعدهن في الجامعة.. انا بمرق ساي .. بي سبب كلام الاهبل ده ..
والبنات بقن يكاون فيني .. ويوصفن في مصعب والطويل القيافة .. والجسم الرياضي وماعارفة شنو وشنو؟
وهن ماعارفات انا كرهتي في الدنيا مصعب ده ..
المهم الخميس الجاي جا ..وانا برضو ما مشيت ليهم .. ومتوقعه انو بداية الاسبوع مصعب العوقة يجي فازعني ..
الود ده شكلو حيفقع مرارتي غايتو ..
عارفين المصيبة وين ؟ يوم الخميس ده ..البت العبيطه الاسمها ليليان دي مافيشة .. ولمن سألت منها قالو اخدت اذن ..
يعني حتأخد باقي الخميس والجمعة مع ناس طلال ..
ولا تكون مشت وين ياربي ؟
.. لكن صراحة ماخايفة عليها .. طلال ده ..شكلو الوصفتو لي ده ما منو خوف تب ..