وليليان تاني ماشفتها الا في الجامعة ..شايفاها ماشة هناك مع واحدة اول مرة اشوفها .. ناديتها .. قلت ليها كنتي وين يابت ؟.. قالت لي مشىت قعدت مع جوري .. لانو طلال سافر مع اصحابو حتة اسمها الكاملين .. وقالو لي لازم تجي تقعدي مع جوري .. بس برضو ماعايزة زول يعرف انا مشيت وين ..
قلت ليها والله بتبالغي يا ليليان.. انتي عارفة انو ممكن اي زول من اهلك اوقرايبك يجي .. يشوفك .. يلقوك مافيشة وماف زول ماعارف انتي وين؟
حبيبتي انتي كدا بتعملي في مجازفات .. لازم تخلي بالك على روحك ..
وهي بتستمع لي وشكلها بالها برة .. وما منتبهة لي كلامي .. وبقت تعاين بي اندهاش كدا على جيهة .. انا رفعت راسي اشوفها بتعاين لشنو لقيتو ده مصعب ودعمتي.. جاي ماشي علىنا ..
وليليان مقهية فيهو لامن وصل .. اها جا سلم علي وشكله زعلان وللا مالو مابعرف .. قال لي .. ليه يعني بتغشي علي؟ .. موش وعدتيني انك تجي يوم الخميس ؟ وانا كلمت ناس البيت . والناس كلهم محضرين شعورهم عشان تجي تطلعيني كضاب؟ .. وشكلي بقى صغير زي الشافع ..؟
قلت ليهو معليش يامصعب انا اسفة .. بس كان عندي غسيل ومكوة وحاجات .. وما كان عندي فرصة .. غير الخميس والجمعة ..
وانا بتكلم معاهو وبعاين لي لليان .. فاتحة خشمها وتعاين ليهو بطريقة هبلة خلاص ..
وهو كل مرة بتكلم وبدبها كحلة كدا بطرف عينو .. عايز يعاين ليها لكن شكلو مستحي مني ..
وبكل وقاحة قال ليها معليش انا اسف يا اخت.. انشغلنا منك بالكلام .. ماعرفتيني على صاحبتك دي يافاطمة .. قلت ليهو اسمها ليليان .. شهادة عربية وكدا ..
ده مصعب ود عمتي يا ليليان ..
اتشرفنا .. اتشرفنا .. سلم عليها في ايدها تاني .. وهي طبعا .. عييييك .. انا ماعارفه المخليها تتهابل كدا شنو في الود ده ..
ان شاء الله تحبو ولا يحبها .. عشان يحل عن افكاري شوية ..
قال انتو مالكم برة وينها محاضراتكم ؟.. قلت ليهو محاضرتنا الساعة 2
ياخي ده عايز يكتم لي نفسي ..
قلت ليهم دقيقة بس.. انتظروني امشي اشوف ليلى واجيكم .. عندي عندها حاجة اجيبها ..
وانا عملتها مخصوص.. لاني حسيت باني عاملة ليهو حقنة وضيق ..
ماعارفة لو اتصرفت صح ولاغلط المهم ده الحصل ..
اها لمن جيت راجعة بعد عشرة دقايق .. مصعب قال لي اتاخرتي شديد..
قلت ليهو كست ليها كتير حتن لقيتها .. قال لي ياريت يافاطمة تتواصلي مع ناس عمتك .. نحن برضو اهلك ولحمك ودمك ..
ماتحسسيني انك انطوائية وماعايزة الناس ..
قلتليهو .. حاضر والله يا مصعب ان شاء الله .. شكلو الزول ده لانافعه فيهو ليليان ولاغيرها ..
يلا لمن ودعنا ومشا .. الحمد لله طيلة النص ساعة الهو قاعدها .. ليليان مافاتت خلتو معاي براي ..
اها لمن فات.. ليليان قالت لي حظظك يا فاطمة ..
قلت ليها حظي في شنو يابت ؟ قالت لي الود ده مبالغة .. خطيبك ده .. ماشاء الله ذوق وادب وفهم وأسم وجسم ..
قلت ليها القال ليك منو خطيبي؟ .. قالت لي قال لي هو .. عارفة يافاطمة صراحة انا كنت عايزة اتكلم معاهو واصطادو .. قفلني طوالي من الاول التقولي حس بي .. قال انا بحب فاطمة اكتر من روحي.. وما ممكن افكر في غيرها .. دي بت خالي وخطيبتي .. وقال لي خلي لي بالك من فاطمة ..
قلت ليهو بالعكس فاطمة هي المخلية بالها مني ..
انا طبعا"ياحماعة اندهشت من الموضوع ده .. وقلت الزول ده شكلو جادي كلو كلو ..
بعدين كونو ليليان ماتأثر فيهو .. ويقفلا بالطريقة دي.. معناها الزول ده مابتاع ملعبة نهائي .. والله غايتو .. انا شكلي الزول ده كنت ظالماهو .. وبقى داك تفكيري كل اليوم .. حقيقي تصرف مصعب ده صدمني شديد ..
وبقيت بتذكر في مواقفو من اول يوم .. من يومو الفي بيتهم بعاين لي من برة الغرفة .. ووكت رسل اخواتو عشان يفضو ليهو الغرفة .. وطريقة كلامو معاي وهو بقلب في الدولاب ..
انا ماعارفة.. الزول ما بدرت منو اي حاجة مسيئة .. بس انا ماعارفة متحسسة منو ومابياهو كدا ليه ؟
ياربي الزول ده افتح ليهو طريق واشوف فهمو شنو .. وللا احسن اردمو كدا بس ..
بقى كل يومين تلاتة يجي الجامعة ويلاقيني.. ياخد معاي عشرة دقايق .. ويسألني من صحتي ومن حالتي .. محتاجة لي حاجة ؟ ظروفك المادية كيف ؟
بقول ليهو .. تمام مية المية والقروش راقدة ويمشي ..
وانا فعلا ياحماعة امي دايما بترسل لي ..رصيد العشرين والتلاتين كل يومين تلاتة .. يعني الحال ماشي مية المية .. وعمي برضو برسل لي رصيد .. بدون ما أقولو الله يبارك فيهو ..
بس في بنات معاي .. والله حالتني تحنن .. وظروف اهلهن صعبة .. نحن بنتشايل وبنتعاون كتير .. لكن طبعا" اي بت عندها احتياجاتها الخاصة ..
خصوصا نحن اكلنا وشرابنا وكل منصرفاتنا علينا ..
بصراحة لو زول مابقدر يأمن لي بتو مصاريفها ويسد ليها حوجتها مايرسلا للداخلية نهائي .. ده على حسب تجربتي وحسب الشفتو ..
لانو ياجماعة البنات ديل هنا بعيشن حياة قاسية شديد .. والفتن مالية البلد ..
والبلد ملانة ناس استغلاليين .. يعني لو البت ضعيفة .. واتعرضت لاي اغراءات .. ممكن تنجرف بسهولة ..
انا مابقدر اثبت حاجة زي دي.. لاني ماشفت الموت حار .. مع اني بسمع ..
المهم انا مهما احتجت انا مستحيل اشيل لي قرش من مصعب ود عمتي ..
ولا من اي بشر .. يا ترسل لي امي او عمي .. وبسسس..
اها ياجماعة مرت الايام .. وانا يوم الخميس استاذنت وضربت لي عمي.. عشان يجي يوديني لي ناس عمتي .. طبعا لغاية هسي بخاف من المواصلات ماتسمعو الفصاحة دي ..
كان في زول ساي قعد يعاين لي .. بخاف واقعد ارجف زي القصبة ..
بس ياها زاتها الحيلة قليلة والخشم بليلة ..
وطبعا بصراحة عشان اكون صادقة مع نفسي .. اليوم ده بالذات انا مشيت عشان مصعب.. لاني بالجد بقيت احترمو شديد ..
يعني ما بقول حبيتو .. وخلاص يعني وقعت في غرامو ..
لكن على الاقل بقيت .. ارتاح ليهو شوية كدا ..
مع انو زول مسيخ .. وكلامو زي الدراب.. لكن كل مرة بكشف لي انو جواهو نضيف ..
وزول مسيطر جدا .. اعملي كدا .. وماتعملي كدا وبتاع ..لكن برضو يعني مابكرهو زي زمان ..
وعمي جاني قريب المغرب كدا .. وركبت معاهو ماشين لي ناس عمتي ..
بس نحن في الطريق .. عمي نصر حكا لي حكاية غريبة خلاص .. اول مرة اسمع بيها .. وماعارفاهو حكاها لي ليه؟
الى اللقاء ..
أنت تقرأ
القماري الغريبة... طارق اللبيب
Короткий рассказكل مرة بحكي ليكم القصة براي .. الليلة انا عايز اكون مستمع معاكم .. .. ونخلي بطل القصة يحكي لينا .. وبالاحرى البطله انثى .. القصة دي غير حقيقية . لا احداثها ولا شخصياتها .. وانا اخترت شخصية انتقائية .. لان الشخصيات العوجاء لاتعنيني .. وده منهجي...
