القماري الغريبة... طارق اللبيب

16

قالت لي تتذكري يافاطمة ..؟اليوم الانا كنت بايتة عند ناس جوري.. ولمن سألتيني ..قلت ليك طلال مسافر الكاملين مع اصحابو ؟
انا كنت بكذب عليك .. عشان ماتهيجي وتزعلي مني .. طلال مامشى الكاملين ولا حاجة . كان بايت معانا في البيت ..بس هو في غرفة وانا وجوري في غرفة ..
وحات الله ياجماعة انا قلبي قالك شح . قلت ليها اها يا المبروكة.. نعل مافي عوجة ..؟
قالت لي لا مافي اي حاجة ..نحن قافلين الاوضة من جوة ..لغاية الصباح ..
قلت ليها .. قطعت قلبي الله يقطع قلبك ..
طيب الحمد لله ..
قامت ليليان قالت لي انتي قايلاني يافاطمة انا ضعيفة ولا بتغش .. انا ماسكة ادبي كويس .. وعاملة حسابي على روحي .. بعدين خوفك على من طلال ده مامبرر .. لانو والله طلال ولد مهذب.. ماحصل يوم قال لي كلمة كدا ولاكدا ..
بالعكس انا كتير بتغزل فيهو ..وهو بضحك ويدنقر ..
قلت ليها تكلي يا يمة على الله .. اريتا دي ولدة التاتباني ..
ومن اليوم داك تاني ليليان انا وهي ما اتفرقنا ابدا .. وهي عرفت تمام ليه انا كنت بخاف عليها .. وبقت تسمع وصاياي ..
وبقت بت مترتحة وصحراوية ..وخلت الحكنشة الماعندها طعم ديك وبقت تقول كرعلي .. وسجم امي ..عااااادي ..
المهم مرت الايام والشهور .. وانا طبعا كل اجازة سمستر بمشي البلد .. وفي اجازة مشيت البلد وكان ابوي جا من السعودية ..
الكلام ده تقريبا في نهاية اولى .. وانا ماشة تانية ..
طبعا" حكيت لامي علاقتي بي ناس عمتي واني بمشي ليهم .. وحكيت ليها اهتمام مصعب ..وكيف انو سجل يقرا في الجامعة بتاعتنا ..عشان يكون معاي ويحميني ..
طبعا" امي حكت لي ابوي الكلام كلو .. وقالت ليهو اظن فاطمة بتحب مصعب ..
ابوي يوم الصباح ناداني .. قال لي اقعدي .. انتي عندك علاقة بي مصعب ودعمتك؟
قلت ليهو يعني ..نص نص ..
قال لي نص نص دي يعني شنو ..؟
انتي الزول ده عندك تجاهو مشاعر ولالا ؟ يعني لو اتقدم ليك بتقبلي بيهو ؟ قلت ليهو نعم .
قال لي .. طيب وانا ماعندي مانع ..
انا طبعا" قلبي عمل فرر .وراسي ضرب واستغربت شديد .. وكنت مفتكرة انو ابوي حيقول لي لا ..
ويمنانع شديد من ارتباطي بيهو .. وبكون متذكر الشاكوش الطقا بيهو عمتي ..
قلت ياربي اسألو من الكلام ..القالو لي عمي نصر ولا اسكت .. في النهاية فكرت انو احسن اسكت ..عشان ما أجيب لي كلام لي عمي الحبيب ..
قال لي خلاص مادام مصعب منتظر ردي.. انا موافق ..خليهو بس يشيل حيلو ويجيني .. وانا ماعندي احسن منو ياهو ود عمتك .. ولحمك ودمك ..
اها بعد يومين كدا وانا في الشمالية ..
ابوي ناداني وامي كانت مافيشة .. قال لي تعالي نتونس شوية يافاطمة وتحكي لي عن الداخلية والجاجمعة ..
حكيت ليهو قصص كتيرة ..من قصص بنات الداخلية ..من ضمن القصص في قصة خلتو يبكي .
وانا طبعا" ما حكيتها ليكم ..ياريت القى لي فرصة .. احكيها ليكم ..
اول مرة طبعا اشوف ابوي بيبكي بالطريقة دي ..
قام قال لي يافاطمة.. انا عايز احكي ليك قصة سرية ..امك ماعارفاها ..
وياريت تفضل سر بيناتنا ..
قلت ليهو سرك في بير يا ابوي ..
قال لي عارفة يا فاطمة.. انا عمتك دي المفروض تكون زوجتي.. على حسب اتفاق جدك مع اختو ..
طبعا هي اكبر مني بي كم سنة كدا ..
اها في يوم من الايام .. وهي كانت ممتحنة من الثانوي للجامعة.. في استاذ بجي بدرسها في البيت اسمو استاذ عيسى .. وانا كنت في الوقت داك مجنون بيها جن .. اها بقت تتكلم كتير عن استاذ عيسى . استاذ عيسى قال لي . واستاذ عيسى عمل .. وانا بقيت شاكي فيها .. وحاسي بانو عندها علاقة مع الاستاذ ده ماحلوة ..

اها يوم من الايام كان عندها معاهو درس زي العصرية كدا .. انا ادخل القاهو ليك حاضنها زي الناس الجايين من سفر ..
وكت شافني اصلا ما ارتبك .. بقى يقول ليها والله انتي اكتر طالبة كيفتني في حياتي ..
انا مبسووط منك .. طبعا انا جيت دخلت ودمي قعد يغلي ..
وقعدت لغاية ماخلص وطلع .. قلت ليها ده شنو الانا شايفو ده؟ ..
قالت لي عارف يامحمد.. انا حليت مسألة في الرياضيات غلبت الاستاذ وكان بحل فيها تلاتة يوم مقادر حلاها .. وكت حليتها ليهو اتكيف ومسكني كدا بدون مايحس ..
انا يافاطمة ما اقتنعت بي كلامها .. وقلت ليها يعني اي زول يتكيف منك بتسمحي ليهو يمسكك كدا ياعبيطة يامغفلة ؟ ..
وكرهتها كراهية شديدة .. وانا وكت شكيت فيها ..هي زعلت وقالت لي استاذ عيسى زي ابوي .. وانت شكيت فيهو وفيني . ما حأسامحك ..وطلعت اشاعة انها بتحب استاذ عيسى وحتتزوجو ..طبعا" مكايدة لي انا ..
ولمن اهلها يسألوها بتقول ليهم ماصح ..
وانا رفضتها .. وسافرت .. لكن لمن هي اتزوجت ..ابو ناس مصعب ده ..اتكشفت لي حاجات كتيرة ..وعرفت اني كنت ظالمها ..
وظالم استاذ عيسى .. استاذ عيسى زول درويش وتصرفاتو غير محسوبة ..لكن زول نضيف .. لكن انا كنت غيور ..
في النهاية القسمة ,,
المهم انا بعد داك .اعتذرت ليها عن الشكوك الحصلت وطلت منها العفو والسماح .. وهي قبلت عذري ..
وقالت لي مافي مشكلة . اي زول في مكانك ممكن يفتكر كدا ..
القصة دي سرية يا فاطمه ..
كدا قصة ابوي انتهت ..
سبحان الله ياجماعة قالو الصبر ده مافي زيو .. انا اول امس كنت عايز اسال ابوي من القصة بس قلت اسكت عشان اكتم سر عمي .. اها بدون ما أسال عرفت القصة بالتفصيل ,,
وطبعا رجعت الجامعة سنة تانية بي نفسيات متغيرة .. وشخصية متغيرة ..
وكانت اجمل سنة عشتها في حياتي .. ومستواي الدراسي اتصلح .. وعلاقتي بي مصعب واهلو بقت مختلفة شديد .. وبقو فعلا زي اهلي .. ومصعب بقى هو كل حياتي ..
وطبعا قبيل قلت ليكم ..كان في قصة حصلت في الداخلية ..وحكيتها لابوي.. وابوي قعد يبكي .. بالتاكيد انتو عايزين تسمعوها .. ماكنت عايزة احكيها ليكم.. لكن دام سمعتوني بحكي لابوي ماعندي حل لازم احكي ..
الى اللقاء ..