انا طبعا" اتبكمت واتسمرت في مكاني داك من كلام مصعب .. كلامو دخل في قلبي زي الحراب والسيوف المسمومة .. وبقيت افكر ياربي انا سويت شنو ؟
اول ماخطر على بالي الرسايل .. قلت يمكن الرقم الجديد ده ماحق مصعب .. يمكن ناس عمتي عملو فيني مقلب ..عشان يشككوهو فيني .. ده اول كلام جاني لي في راسي ..
وقدر ماحاولت اسطر لي كلام .. تاني برجع واقول لالا مابظن فيهم.. ان بعض الظن اثم.. انا المفروض اعرف مصعب مالو ..؟
ومشيت لصاحبتي بدرية حكيت ليها ..
قالت لي.. انتي حصل اتكلمتي مع مصعب في الرقم ده؟
قلت ليها لا رسايل بس ..
قالت لي مية المية الرقم ده ماحق مصعب .. ود زول عايز يفرقكم .. ومشى ورى رسايلك لي مصعب ..على اساس انك بتلعبي من وراهو ..
قلت ليها لكن يابدرية الكلام ده كلو احتمالات ..
قالت لي خلاص امشي ليهو عديل واسأليهو ..
انا طبعا" سرحت بعيد ..وقلت الزول ده تاني مابنفع معاي .. زول مقفول واحمق واتجاه واحد ومابفهم .. وراسو قوي ..
واحتمال ربنا داير يبعدو من طريقي لخير ..
وبرضو مادام ناس عمتي ماعايزني .. انا الحمد لله الجات منو ..
قلت ليها يا بدرية سمعتي بي قصة الملك ودقشرقني ..؟؟
قالت لي ده شنو كمان .؟
قلت ليها قالو كان في ملك .. اسمو الملك ود قشرقني .. وملك ظالم شديد.. قال للرعية انا امي مريضة ..وعلي وشك الموت.. وانا ماشي مزرعتي في الريف .. لو امي ماتت بي وراي .. ومافي زول جا كلمني هناك .. بجي راجع بكتلكم كلكم .. والبجي يكلمني بكتلو ..
ومشى المزرعة ..باكر امو ماتت .. والناس احتاروا ..
في واحد شين .. وقبيح وقنعان من روحو .. قال ليهم انا بمشي بودي ليهو الخبر للملك ..
اها لمن الراجل الشين وصل للملك قاليهو ..
يا الملك ود قشرقني .. خبري الشايلو اشنا مني..
الملك قاليهو مالك؟ امي ماتت؟
قال ليهو بركة الجات منك ماجات مني ..
الملك احتار من ذكاء الراجل الشين ونجا من الكتلة ..
اها يابدرية انا ساسا فعلا بحب مصعب ..وبتمناهو واي حاجة ..لكن في حاجات واقفة قدامي .. عنادو وقوة راسو وحماقتو .. وناس عمتي ماعايزني .. وفكرت كتير انهي العلاقة دي .. لكن كنت عاملة حساب لي حبو لي ..وتمسكو بي.. وكان عندي امل عمتي وبناتها يتغيروا ..
لكن مادام جات منو براهو .. الحمد لله ..
على الاقل المفروض يوريني انا مالي ..وعملت شنو؟
لكن يشخت فيني كدا ..ويقفل التلفون في وشي .. تاني لو بقى قبلة مابقبل عليهو ..
بدرية قالت لي.. يافاطمة ..ماتتحامقي امكن الزول ده اتخدع ..
قلت ليها حتى لو اتخدع المفروض يوضح لي .. وبعدين معناها شك فيني ..
اذا شكو صحيح ماينفع يرتبط بي .. واذا شكو غلط ماينفع ارتبط بيهو .. الشك دايما" هو عدو العلاقات يابدرية ..
واصريت جواي اني اصلا ما حأسألو عمل كدا ليه الا هو براهو يسألني ..
وكمان اصريت اني ابدا ما أقطع زيارتي ليهم في الوقت الحالي بمشي ليهم مرتين تلاتة اصلا الفترة قربت تنتهي كلها شهرين الا وبمشي الشمالية ..
وحاولت اني اتأقلم مع الوضع.. واخت بالي في دراستي ..لكن قلبي واجعني شديد .. وبقيت بقعد براي وابكي ..وبالليل بمشي برة واقعد في الضلمة ..وابكي لامن الله يغفر لي ..واقشقش دميعاتي واجي راجعة انوم ..
يعني بصراحة ..مصعب كان فارق معاي فرقة شديدة خلاص ..
كم مرة قلبي بقول لي .. لو ظهرت لي اي بوادر علاقة ادخل فيها بدون تفكير عشان انسى حاجة اسمها مصعب ..
مصعب كان كل حياتي وانفاسي .. وعشرة تلات سنوات ماحاجة هينة .. حاجة كبيرة مدفونة جواي.. ياربي تعيني واقدر انسى ..
يوم مشيت لناس عمتي .. وعادي اتونسنا وضحنا انا والبنات واصلا ماجابو لي سيرة ولا جبت ليهم سيرة ..
ومصعب كان مافي كالعادة .. وجاء بالليل زي الساعة عشرة ..
وطبعا" وضعو اتصلح واشترى عربية انا ماشفتها ..
ولامن جا البيت مادخل على غرفتنا نهائي والصباح يوم الجمعة طلع بدري الشاي ماشربو ..
وانا ماشفتو ولاشافني .. ماعارفاهو عارفني قاعدة ولا ماعارفني ..
انا ياجماعة كان بامكاني امشي ليهو في الشركة.. او اتصرف اي تصرف اعرف منو الحكاية شنو.
لكن براي ماعايزة تاني افتح معاهو اي موضوع .. انا زاتي راسي قوي وعنيدة .. هو موش ماعايزني بي سبب انا زاتي ماعايزاهو ..
بس التفكير والفرقة عاملة لي شلل في روحي من جوة والله ..
ولغاية مامشيت منهم مالاقاني .. وكنت بتمنى التقي بيهو ولو اشوفو بس ان شاء الله لمحة .. دي كانت امنية في قلبي .. وجواي حاجات خاصة بيهو كتيرة محتاجة ليهو ..
لكن انا كنت معاندة روحي واصلا ماسألت منو ..
ومشيت منهم يوم الجمعة العصر زي كل مرة ..
وبقيت مشتتة وفي المذاكرة بسرح .. وكل الوكت تلقيني مسخية وحزينة
وقدر ماحاولت اطلع من الحالة دي غلبني كلو كلو ..
فوضت امري لله .. وصليت ودعيت كتير انو ربنا يثبتني .. الحمد لله خفيت شديد ..
مرت علي ايام طويلة وسوداء ومسيخة .. لغاية ما امتحنت الامتحان الاخير .. المنو انا بنتقل لي رابعة ..وقبل ما اسافر اليوم القبل السفر طوالي .. مشيت لناس عمتي والمرة دي مشى معاي عمي نصر ..
وطبعا انا بمشي ليهم ماحبا" فيهم .. بس عشان ما انقطع ويقولو كانت بتجي لمصعب .. ولمان مصعب خلاها خلت الجية ..
والمرة دي لمان دخلنا لقينا مصعب قاعد..
الى اللقاء ..
أنت تقرأ
القماري الغريبة... طارق اللبيب
Kurzgeschichtenكل مرة بحكي ليكم القصة براي .. الليلة انا عايز اكون مستمع معاكم .. .. ونخلي بطل القصة يحكي لينا .. وبالاحرى البطله انثى .. القصة دي غير حقيقية . لا احداثها ولا شخصياتها .. وانا اخترت شخصية انتقائية .. لان الشخصيات العوجاء لاتعنيني .. وده منهجي...
