القماري الغريبة... طارق اللبيب

15

  مصعب يوم جا الجامعة الصباح.. واليوم داك كان محاضرتنا بتبدا الساعة 12 ..ناداني قال لي تعالي عندي معاك كلام مهم .. جيت معاهو وانا مستغربة.. وبعاين ليهو في وشو .. طبعا نحن في الفترة الفاتت.. ونستنا كلها ونسة جادة .. وحكاوي وتوصيات .. بس دايما بوصي فيني التقول انا شافعة .
اها جا قعد وانا قعدت مقابلاهو ..وبقى يفرك في يدهو.. ويبلع في ريقو .. انا قلت الود ده مالو الليلة؟ ..
قال لي الكلام العايز اقولو ليك ده.. مابقولو ليك عشان انا زول فارغ ..وماعندي موضوع .. لكن كلام حسيت بيهو .. وعايز اسمع منك مصيرو ..
انا بقيت بفكر فيك الاربعة وعشرين ساعة .. ومن ساعة نتفارق في الجامعة ..وانتي تمشي على داخليتك .. صورتك مابتفارق مخي كلو كلو ..
لغاية تاني يوم .. ويوم يكون مافي جامعة ..انا بحس زي الناقصة لي حاجة ..
عشان كدا انا مابقدر استغنى عنك.. وعايزك لي قدام تكوني انتي في حياتي كل شي .. رايك شنو؟ لو عندك اي اعتراض او عندك حاجة تمنع تقولي لي ..
قلت ليهو .. والله كدي هسي انت فاجأتني بالكلام ده ..
وما عندي اي استعداد للرد .. بعدين انا احتمال ابوي يكون عندو لي تدبير .. نحن عاتنا مافي بت بتجيب لها ولد ..وتقول ده داير يعرسني .. ده ماشفناهو الا عندكم في خرطوم الجن دي ..
البت عندنا بعرس ليها ابوها.. وهو البختار ليها ..ويتحمل نتيجة الاختيار .. ولو في اي حب .. الحب بجي بعد العرس ..

قال لي.. ده شنو التخلف ده ؟.. ابوك داير يعيش معاهو ولا حتعيشي معاهو انتي؟ ..
قلت ليهو لو دايرين نتناقش بالمنطق ..
عمرها البت ماحتعرف حقيقة الزول المتقدم ليها كاملة.. الا بعد العرس .. لانو الاولاد بجيدو التمثيل .. واللعب واللف والدوران .. واسهل مايكون يغشو البت بشخصية مزيفة ..تظهر عيوبها بعد العرس ..

وياما بنات صاحباتي اتصدمو في رجالهم كان عندهم معاهم علاقة ومعرفة قبل العرس ..
لكن الرجال بعرفو بعض .. واكيد الزول البجيبو لي ابوي ده ..بكون درسو دراسة تفصيلية .
انت شيل تلفون ابوي واتصل عليهو.. قول ليهو انا عايز بتك ..اها لو قال ليك ماعندو مانع يبقى انا ماعندي مانع ..
لكن على شرط ابوي مايعرف انك اتكلمت معاي اول .
مصعب قال لي .. غايتو عندكم جنس عقد وتخلف ..

قلت ليهو المهم ديل نحن كدا ياخوي .. ونحن شايفين انو ده اسلم حل.. للمشاكل الكتيرة البتحصل ..
طيب انا أسالك سؤال .. لو في واحد من جيرانكم اتقدم لي معزة .. وانت عارف عنو اسرار . معزة ماعارفاها .. بحكم انو الرجال بعرفو عن بعض ادق التفاصيل .. اها بتعترض ولا بتقول ده اختيارها وحبها ..
قالي طبعا بعترض .. لكن انا ود عمتك ما ود الجيران ..
قلت ليهو مافي حل ولا بديك اي راس خيت ..الا عن طريق ابوي ..

وحقيقة ياجماعة .. طبعا" ده الحاصل انا ماعايزة اتشبك لي في موضوع ماعارفة رد ابوي يكون شنو .. خصوصا انو ابوي عندو راي فوق الناس ديل بداية بي امهم ..
المهم غايتو قفلتو وقلت ليهو لمن تنوي تتصل بي خالك كلمني اديك تلفونو ..
وبقينا متواصلين بي نفس القرب والارتباط ..لكن طبعا ..زي الكانو ولدين متصاحبين .. مابينا اي تواصل عاطفي رومانسي.. هههه شفتو كيف؟ ولا اتطورنا في المدينة ..
صاحباتي في السكن دايما بسألوني عن مصعب .. قاعد يقول ليك شنو؟
وبتتونسو كتير كدي بتقولو في شنو؟
كل يوم يجن يتلمن فوقي .. اها الليلة قال ليك شنو؟
وانا قعدة اكضب عليهن .. واقعد اجيب ليهن كلام من راسي .. قال لي بريدك
قال لي بحبك .. قال لي انا ماعندي في الدنيا غيرك .. الليلة بكى لي عديل ..
وهن طبعا" فاتحات خشومن مصدقات الغبيانات ..
الايام مرت بنفس الوتيرة ..
والملل في الداخلية والوتيرة المملة في الجامعة والبرامج المكررة ..

اها في يوم نحن في الداخلية ليليان صاحبتي . جات دايراني .. ليليان في الفترة الاخيرة ..بقت بعيدة مني تماما ..
وانا طبعا " عاذراها .. لانها حاسة بي قاعدة ليها فوق نفسها ..
بقيت بلاقيها عادي زيها وزي بنات غرفتها .. ومرات يومين تلاتة مابشوفها .. اها الحصل انو يوم تقريبا في نهاية السمستر التاني ليليان نادتني بالليل.. وهي بتبكي شديد .. وقالت لي ياريت يا فاطمة لو سمعت كلامك ..
تصدقي نفس الكلام الكنتي بتحذريني منو حصل ..
طبعا طيلة الفترة دي وانا منتظرة طلال يقول كلمة ويصارحني بمشاعرو
بس ماحصل .. وبرنامجو كلو يشتري في العقود والسلاسل .. ويختار في الاطقام البلبسها .. ومركب السماعات في أضنيهو يرقص بي صلبو .. انا جاتني نفسيات عديل .. والمشكلة اني ما زلت بريدو ..
يوم من الايام الانا بمشي ليهم في الشقة .. كان جو معاهو اتنين من صحبانو .. واحد حبيب جوري ..والتاني من اولاد ام درمان .. المهم الولد المن ام درمان ده اسمو فادي ..
قعد جنبي وقعد يعمل في حركات ماحلوة انا ماحبيتها .. واتضايقت منو شديد ..
المشكلة انو طلال بعاين فيهو وبضحك ..
وكانو الموضوع ده ماهاميهو . او تسلية بالنسبة ليهو .. الكلام ده كان امبارح العصر وطلعت طوالي منهم وجيت . والله حلفت تاني ما امشي ليهم ابدا .. ياريت لو سمعت كلامك ..
حسيت بي نفسي تافهة وحقيرة .. وبقيت اشك انو طلال ما راجل والله .

انا قلت ليها ليليان يابت امي .. طلال ده ..انا من اول يوم ..عرفت اني انا ارجل منو ..
يادوبك انتي اكتشفتي خيبتو ؟؟ .. ده ود منتهي.. ماشايفاهو كيف يتمايع زي قالب الجلي ؟
بري يا يمة .. اخواني قالو قبلو ..
انتي كان المفروض تفهمي الكلام ده من زمان .. المهم هسي الحمد لله جات علي خير ..
قامت قالت لي بس في حاجة تاني ..حصلت عايزة احكيها ليك .. وخايفة تزعلي مني ..وتطرديني وتاني ماتعايني لي .. والله حصلت مرة واحدة بس . واعاهدك تاني ما اكررها ..
قلت ليها شنو الحاجة الحصلت ؟؟
قالت لي اوعديني انك ما ح تزعلي مني ..
قلت ليها عليك الله يا ليليان قولي حرقتي اعصابي ..
الى اللقاء ..