القماري الغريبة... طارق اللبيب

24

مصعب لامن سمع كلامي انزعج شديد .. وبقى يتكلم زي الماواعي .. ويقول .. لالا يا فاطمة.. كدا صعب علي.. حرام عليك والله ..

انا كدا بموت والله بجن .. والله احتمال تاني ما انفع ..
لالا يافاطمة كدي استهدي بالله.. ومدا يديهو الاتنين عشان يمسك يديني .. في شكل حناسة وكدا ..طوالي سحبت يديني قبل ما يهبشن ..
وختيتن بي وراي.. ووقفت على حيلي .. قلت ليهو قوم يامصعب.. قوم وصلني لو سمحت ..
وحات الله الزول ده اتجرس جراسة .. كان ما شفتها شينة .. قربت اقول ليهو خلاص وافقت ..
بس جواي شي رافض الاستسلام .. ياهو ده العناد وقوة الراس حقة اهلنا ..
المهم بالاختصار ياجماعة ..
انا كان جواي شعورين ضد بعض .. شعور انو مصعب حباني بالصدق .. واتخدع .. ومعذور وانا بحبو واعتذر وندم ..
وشعور بتاع انو اهاني.. وما اتحقق مني.. وقطع علاقتو مني بالشك والظن .. واهلو ماعايزني وعمتي وبتها .. ممكن يعملو فيني اي حاجة .. عشان يبعدوني منو ..
لكن الاحساس التاني دا كان اقوي .. لانو كلام العقل .. والكلام الاول طبعا كلام القلب ..
وطبعا انا دايما بحب احكم عقلي في الامور .. لاني شايفة خوازيق الحب الاعمى بتسوي شنو في الناس ..
اها قدر ما حاول واتجرس.. انا كلوكلو ابيت الين وانكسر .. وقلت ليهو بس وديني المحل الشلتني منو .. ولا بركب ركشة ..
قام على حيلو وقال لي .. يعني حناستي دي كلها وجراستي دي ما اثرت فيك بي شي ؟
قلت ليهو ابدا .. ولا ح تأثر اقنع بس وشوف حياتك .. انا الله كريم علي ..
قال لي كويس يا فاطمة والله ح تندمي ..
ومشى طوالي دفع حق البارد .. والبارد قاعد فوق طربيزتو .. لا أنا شربت ولاهو شرب .. ركب وانا فتحت الباب ركبت .. ومشى نزلني قدام الصيدلية .. وتاني ما اتصل علي خالص ..
طبعا زي ما ملاحظين مادعاني للخطوبة ..ومرت الايام .. وانا ماعارفاهو خطب ولا ماخطب .. ومافي اي زول اسأله من الحاجة دي الا عمي نصر .. وخايفة اسأل نصر .. ويديني خبر صادم .. انا عايزاهو يخطب ويبعد مني .. وماعايزاهو يخطب .. انا ماعارفة عايزة شنو؟ وماعارفه مالي .. و بقيت بقرا وما مركزة .. والاحاسيس جواي عاملة معركة حامية ..
وفعلا . بعد اسبوع ولا عشرة يوم اتصل علي نصر .. وبسأل فيني من صحتي واوضاعي .. ولو محتاجة لي حاجة .. وكل ما ادور اسأله من خبر مصعب شنو تاني اغير راي..
وبقيت بدعي وبصلي كتير.. اني انسى مصعب واليوم الوراني مصعب ..
وبمرور الوقت بديت اركز في الدراسة الحمد لله ..
والفضل بعد الله .. لاخواتي حبيبات قلبي .. بدرية وعشة وليلى .. والله هم الساعدوني على اني اتجاوز المحنة دي ..
لكن كل ما تذكره تجيني وحة في قلبي.. ووابقى زي المراة الولدا الوحيد غرق .. وبحاول اتجاوز الاحاسيس بي شجاعة..

مرت الايام وانا لغاية هسا ماعارفة مصعب خطب الدكتورة ولا ماخطبا .. ونصر اتصل علي كم مرة .. ولاهو قال لي حاجة .. ولا أنا جاتني الشجاعة عشان اسأله ..
والكلام بتاع التهمة والرسايل .. ماحكيتو لاي بشر ..
يوم اتصلت علي معزة بت عمتي اصغر واحدة في اخوات مصعب ..طبعا" اخوات مصعب تلاتة زي ماقلت ليك .. مودة الكبيرة . ست القصة ومروة الوسطانية زولة مسكينة وسكوتة وامعه . يسوقوها جاي تمشي يسوقوها جاي تمشي .. ومعزة دي الصغيرة وهي صحبتي شديد بتحبني ومعجبة بي من اول يوم جيت وشخصيتها قوية بس عندها الهبرة والكضب .. المهم اتصلت علي وقالت لي انا في الجامعة يافاطمة انتي وين .. وصفت ليها جاتني معاها صاحبتها ..
وقالت لي ليه اتقطعتي مننا؟ .. والحصل شنو؟ والحصل شنو بينك وبين مصعب .. ؟
قلت ليها ولاشي.. انا اساسا مصعب ود عمتي .. وبعزو جدا لكن ماعايزة ارتبط بيهو .. لاني عايزة ود خالتي .؟وخطوبتنا بعد التخرج مباشرة ..
بعدين انا مصعب قال لي حيخطب دكتورة اسمها صفاء ..
قالت لي مصعب عيان ليهو شهر ونص.. وانتي ولا سألتي عنو ولا اتصلتي عليهو .. ولا جيتينا تاني زيارة .
قلت ليها عيان مالو ؟ .. قالت لي طبعا هو حكا لينا اي حاجة .. ولمن جا البيت حلف .. ما حيتزوج تاني عمره كلو .. كعملية انتقامية من ناس البيت ..
ورفض البت الدكتورة بي طريقة دبلوماسية . في شكل تأجيل .. والبت لسه منتظراهو.. وامي واعداها .. وهو الاربعة وعشرين ساعة رابط راسو مصدع .. وبجي من الشغل بقفل روحو في الاوضة .. مابطلع الا الصباح .. ولا بياكل في البيت.. ولابشرب في البيت .. وناس البيت كلهم عارفين انك انتي زعلانة من الاتهام والعملية العملوها ناس مودة .. لكن والله نحن ماعارفين ..
ونحن هسي خايفين انك تكوني حكيتي لاهلك او ابوك الحصل.. وتاني مايظنو فينا خير ..
انا قلت ليها معقول يا معزة؟؟ .. معقول انا اتكلم في عمتي وبناتها واشيل حالهم ؟؟ .. يبقى انا مافاطمة بت محمد ..
بعدين انتو ماعندكم ذنب.. انتو بس كان دايرين تبعدوني من ولدكم ..
وده شي من حقكم .. والولد الرسل هو الاتصرف من راسو ..اناعارفة كدا ..
انا ماشايلة لوم عليكم .. وده موضوع نسيتو والله .. وماحكيتو لاي زول من اهلي ربنا بشهد ..
ولما عرفت انكم ماعايزني في حياتكم.. رفضت مصعب ووقفتو في حدو ..

اها قالت لي يافاطمة . معصب عيان شديد .. لو بتقدري تجي لينا في البيت .. ولو بس يشوفك ايمكن نفسياتو تتغير شوية.. لانو نحن الحياة مسخانة علينا ..
قلت ليها ان شاء الله القا لي وقت .. لاني هسي بجهز مسافرة ..
انا ياجماعة طبعا" صراحة ماصدقت معزة .. لانها هي الوحيدة في البيت بتريدني.. وبتريد مصعب وهسي نفسها نحن نكون لبعض ..
اها ما مشيت ليهم ..وجات اجازة السمستر ومشيت البلد ..
وكانت قرايتي كتيرة .. ووكت مشيت ماحكيت لامي الشي الحصل نهائيا .. ولاذكرت ليها الحاصل بيني وبين مصعب ..
ولما تسألني من مصعب بقول ليها طولت منهم يا امي انا مشغولة مع قرايتي وتاني هي ما بتسألني ..
طيلة فترة الاجازة انا مقلقة على مصعب .. وماقادرة اتصل عشان اسأل منو ؟
عشان عمتي ماتقول ساكاهو وجارية وراهو ..
يوم بالليل انا في الشمالية .. معزة اتصلت علي قالت لي .. الحمد لله مصعب بقى كويس ..
قلت ليها الحمد لله .. معناها ماكان عيان بي سببي ..
قالت لا والله عيان بي سببك.. بس لانو امي اتكلمت عنك قدامو كلام كويس ..
بالمناسبة امي بقت تريدك عديل .. وبتقول ياريت لو عندي بت زي فاطمة ..
عارفة ليه؟
لاني انا حكيت ليها انك ما اتكلمتي بكلام الرسايل لاي زول .. وقالت دي بت زيها مافي في الزمن ده ..
مع انو نحن ظلمناها وهي برضو سترتنا .. وبقت طوالي بتتكلم عنك بالخير ..
سبحان الله ياجماعة .. انا حسيت بي فرحة مابعدها فرحة ..
التقول بالله امالي كلها اتحققت ..
لاحظو انا عارفة انو معزة بتزيد الكلام وبتكذب واحتمال غالبية كلامها ده يكون ماصح بس انا برضو فرحت ..
انا مصعب قنعت منو .. بس كونو عمتي ترضى عني.. ده عندي بالدنيا ..
الحمد لله ربنا وفقني ونهائيا ماقت الكلام لانسان ..
ولو فعلا هي رضت مني بظهر ..
اها فعلا بعد انتهت الاجازة .. وانا جيت راجعة الجامعة .. عمتي اتصلت علي لاول مرة في الاربعة سنوات ..
وقالت لي تعالي لينا مرة واحدة.. نحن عارفنك مشغولة مع القراية لكن بس اشتقنا ليك ..
قلت ليها حاضر ياعمتي .. باكر الخميس بجيكم .. انا زاتي اشتقت ليكم بس القراية كملت لحمي ..
وطبعا ياجماعة انا فرحانة .. ماعارفة افرح بشنو ولاشنو ؟ بي شوفتي لمصعب .. ولا مصعب بقى كويس .. ولا بي عمتي الرضيانة مني ..
لكن هل عمتي فعلا رضيانة مني ولا دي خطة من معزة عشان اخوها يشوفني . ؟
ومشيت ليهم . وتعالو شوفو الحصل ..
الى اللقاء..