القماري الغريبة... طارق اللبيب

14

الناس ديل صن ..يسمعو في مصعب داير يقول شنو؟ ..قال ليهم طبعا" انا عندي نية ارتباط بي فاطمة دي . لكن هسي ده ماموضوعي.. هسي عايز اسجل في جامعتها .. وفي نفس كليتها ..عشان اكون قريب منها ..عشان هي محتاجة لي سند يكون قريب منها .. .. من يوم الاحد ان شاء الله بمشي .. ابدا جراءات تسجيل ..
امو قالت ليهو لكين ياولدي انت ماكملت الجامعة السنة الفاتت؟؟ .. قال ليهاطيب ومالو اقرا جامعة تاني .. انا هسي قاعد عاطل مالاقي اي وظيفة ..احسن اقعد في البيت ولا احسن اقرا .. ؟
في ناس بقرو تلاتة واربعة جامعات ..
انا طبعا" ياجماعة خليت كبايتي بي باقي شاهيها ..ودايرة اقوم ادخل جوة ..
عمتي قالت لي .. الكلام ده شنو يافاطمة .. ؟ انتي ماسامعة ؟ ولا ده اتفاق بينكم ؟
قلت ليها ياعمتي .. ياتو كلام يا .. كلام انو عايز يرتبط بي ده انا اول مرة اسمع بيهو ؟
بعدين ده ما كلام بقررو هو .. والمفروض يشاورني قبل ما يقرر براهو .
في قعدة بتاعة شاي .. و انا عندي ابو وام ..
وهم العندهم فيني حق التصرف .. والموافقة والرفض ..
لكن قصة عايز يقرا جامعة دي حاجة بتخصو ..
وقمت طوالي خشيت جوة الاوضة .. وحقيقة اتضايقت من تصرف مصعب .. قام جا محصلني جوة .. وقال لي فاطمة مالك قمتي؟؟ انا قلت حاجة غلط؟
قلت ليهو .. بالمناسبة انت انسان عشوائي ومابتعرف تتصرف .. وزول عندك استبداد ودكتاتورية غريبة ..
وانا من هسي ممكن اقول ليك ماعندي معاك اي علاقة ..بلا مرتبط بي . بلا كلام فاضي ..
انت يازول الشابكك فيني شنو.؟
قال لي حرام عليك يافاطمة ..ليه بتتكلمي معاي بالطريقة دي .. يعني فيها شنو انا لو كلمت امي وابوي عن حقيقة مشاعري .. يعني هو عيب ولا حاجة ماكويسة .. ؟
العيب اننا نعمل حاجة بوراء اهلنا .. لكن اي حاجة في النور . انابفتكر شي عادي .. بعدين انا هسي لاطلبتك .. لا قلت ليهم خطبتها .. اناقلت عندية نية ارتباط .. في النهاية هي نية قيد التنفيذ ..
قلت ليهو يا مصعب موش الموضوع ده بيعنيني انا؟ المفروض اول حاجة تفتحو معاي .. او تقول ليهم بس انا عايز اسجل في جامعة فاطمة .. وخلاص ..
قال لي خلاص يا بت خالي .. انا ااسف بس مع اني شايف الموضوع طبيعي .. لانو انا صريح مع امي وابوي وناس البيت.. ونحن اسرة واحدة وانتي واحدة مننا .. ومافي زول غريب .. ونق ونق نق .. بقى يبرا فيني عشان ما أزعل ..
قلت ليهو خلاص يا مصعب حصل خير.. امشي لناس امك ..شوفهم بقولو في شنو؟ بكونو ماخلو لي صفحة ارقد عليها ..

اها تاني مافتحو السيرة دي ..وانا بقيت متضايقة وماقادرة اقعد في البيت .. بقيت بتخيل انهم خاتيني انا جيت عشان الموضوع ده ..

في نفس يوم الجمعة ده بعد الغدا ضربت لي عمي قلت ليهو تعال سوقني .
قال لي والله انا بعيد شديد وعندي مناسبة في ابو ادم .. انا طبعا لابعرف ابو ادم ولا ابو حواء لكن عرفت انو بعيد ..
قلت ليهو مامشكلة انا بمشي بالمواصلات ... قام مصعب سمع المكالمة ..
وطلب من ابوهو .. قال ليهو تديني العربية اوصل بيها فاطمة ..
انا قلت ليهو لا .. ما بتوصلني .. بمشي براي ..
قال لي .. تمشي براك شنو؟ انتي هبلة ولاشنو يابت ؟ قسما" بالله احسن تسمعي الكلام ..
وهاج فيني كدا لمن خوفت .. سكت ساي ..قربت ابكي.. وامه وابوهو يعاينو بعيونهم ..
قلت ليهو خلاص تمشي معانا معزة .. معزة دي اختو .. قال لي ما مشكلة معزة ولاغيرها ..بس مابتمشي بعد كدا بالمواصلات ..
انتي ماعرفة البلد عاملة كيف.. اسألينا منها نحن ..انت قايلاها دي الشمالية ؟
المهم معزة تنقنق .. وما رضيانة تمشي ..ودي ماعرفها مالها كمان.. احتمال يكون عندها برنامج خربو عليها ..
غايتو لاحسرة ولاندامه .. اريتني يايمه كان ماجيتهم الناس ديل ..
لكن اقول ليكم وحات بالرغم التصرفات العشوائية والاستبداد بتاع مصعب ده
انا الولد ده مالي عيني لامن مدفق ..
حتى البت الاسمها معزة دي ماقدرت تقول ليهو ما ماشة .. النهرة الاداني ليها دي تخلي الزول يرجف ..
اظنها خايفة منها ..وشكلو بلطش كف كمان بي يدو الزي يد الناقة دي ..
اها ياطبعا مشينا ركبنا معاهو انا ومعزة ..
وفي الشارع غشى ليهو دكان كدا ..نادى واحد صاحبو اسمو وجدي .. ركب معاهو قدام وانا ومعزة راكبين ورا بنتوسوس ..
قت ليها انا اسفة يامعزة .. بوظت عليك برامجك ..
قالت لي يخسي عليك يا فاطمة.. ليه تقولي كدا نحن لاقنك وين يا بت خالي ..
بس عليك الله ماتنقطعي مننا ..
وصلوني الداخلية .. الوقت عصر متأخر كدي .. قام مصعب قال لي رقمك كم يابت .. مليتو ليهو .. قال لي اكتبي رقمي ده معاك.. لو في اي حاجة .. وما لقيتي عمك اضربي لي انا .. كتبت رقمو سجلتو عندي .. ودخلت .. وهم فاتو ..
غايتو مصعب ده انا كل يوم بكتشف فيهو حاجة جديدة ..ماعارفة اتكيف منو ولا اكجنو ..
بالاختصار مرت الايام عادية وطبيعية .. وشايفاهو في الجامعة متابع قصة التسجيل ..وسجل في القبول الخاص من الداخل .. ماعارفة كيف بعد نص السمتسر قرب ينقسم
احتمال بالواسطة ولاشنو؟
المهم قبلوهو في الجامعة وخلاص .. وطبعا القبول الخاص ده قصة وحكاية قايمة بي ذاتها ما ح احكي ليكم عنها ..
اها طبعا مع مرور الايام انا اتعودت عليهو شديد .. وبقيت بفتش ليهو .. انا بعجبني الراجل البحس بيك زي اختو .. وبحترمك ويقدرك تقدير لي ذاتك وروحك .. الرومانسيات والهبالة والقصص دي من الله خلقني بكجنها عند اهلها .. وهو طبعا" يعجبك مابعرف للكلامات دي كلو كلو ..
اها يوم من ذات الايام على غير العادة .. قال لي كلام غريب خلاص .. وانا ماكنت كلو كلو متوقعاهو منو ..وشكلو حيبقى رومانسي ..
.الى اللقاء