القماري الغريبة... طارق اللبيب

4

  كدي انا قبل ما احكي ليكم بناكل شنو وبنشرب شنو .. النوصف ليكم السراير اللقيناها .. لقينا سراير تاني دور .. بعدين فيها المعمول بالخوص.. وفيها المعمول بالسكسبندا .. يعني بدل العصب والحبال .. اها المعمول بالسكسبندا ده بدوهو بنات معينات كدا .. ماعارفة ليه لكن بنعرف لي قدام ..يعني الحكاية ما طالقة ..
والمعمول بالخوص ده ..بدونا ليهو نحن ناس العشوائي ..
الخوص ده حديد كدي زي المساطر ..بتلقاهو معارض فوق السرير ..
بعدين طبعا زي ما حكيت ليكم مافيهو لحاف .. اها ضربت لي عمي .. ياعمي انت وين؟ ..قال لي انا قريب .. مابعدت قلت اطمن عليك حتن امشي .. اها كل حاجة تمام ؟؟
. قلت ليهو . عليك الله تعال لي راجع ..
قال لي في شنو؟ يافاطمة نعل ماقابلتك عوجة؟.
قلت ليهو لالا كلو تمام بس انت تعال ..
اها وصفت ليهو بالضبط وجا انتظرني قدام الاستقبال .. واستاذنت من الحرص .. ومشيت معاهو السوق قريب اشترينا لحاف ..وجابني .. والبنات المعاي برضو ضربن لاهلن ولقيت في بنات اخوانهم سبقوهن جابوليهن لحافات ومراتب ..
اها عارفين المشكلة وين ؟.. السراير بتاعات الخوص ديل ماينفع فيهن اللحاف.. الا الزول يجيب كراتين.. ولا يشوف ليهو شي يحشرو تحت المرتبة ..لانو بكون زي الراقد ليهو فوق طوب ..
غايتو اليوم الاول ده رقدت فوقو ..تاني يوم قمت بي فلايت وقطايع .. زي الداقني بي عكاكيز .. بعد يومين مشينا انا وزميلاتي اشترينا كراتين فاضية بي 12 جنية ..عشان نفرشها تحت اللحافات والمراتب ..
اما بالنسبة للاكل والشراب .. جوة الداخلية في كافتيريات كدا شغالات فيهن حريم .. والطالبات بشترن منها بقروشهن .. الوجبات الاساسية .. لكن والله الحريم ديل . اكتر حريم استغلاليات شفتهن في حياتي .. يعني بالجد الاكل في الداخلية اغلى بي كتير من البرة .. يعني انا بخليكم تتخيلو ... انو الليمونة ببيعنها لينا بي خمسمية .. الليمونة الواحدة .. موش الناس بدوها ساي ؟
يلا على كدا قيسو .. الطلب عندهن على حسب الحاجة الببيعوها ..
والطلب كمشة واحدة .. وكمشة صغيرونة كدي ..كديسة ماتشبعا .. وحات الله الطلب التقولي بروح في السنينات .. مابتضوقي طعمو سمح.. تلقيهو كمل .. عشان كدي الواحدة عشان تسند روحها .. بتضطر تشتري طلبين تلاتة للوجبة .
يعني انا متأكدة انو في اسبوع باقي القريشات المعاي دي بتنقرض بالحسابات ..اها تاني اكل من وين ؟ ..مع انو انا متأكدة اني احسن واحدة في رفاقتي ديل .. الظاهر عليهن حالتن وحالة اهلهن اصعب مني بكتير .. غايتو الله كريم علينا ..
المهم قصة الاكل دي قصة طويلة ..بجي افصلها ليكم بي رواقة لي قدام ..
واوريكم اكتر شريحة بتضوق طعم الجوع في السودان هي بنات الداخلية ..
نرفع الشكية لي الله .. وحده هو القادر على الانصاف ..
اتلملمنا كدا انا والبنات المعاي ..في الغرقة قريب المغرب .. واول حاجة قبل التعارف ..اي واحدة فينا رمت ليها دمعات حارااات كدي ..وبكينا واتنهفنا .. وعزينا بعض .. وعرفنا انو نحن موعودين بي سنين من العذاب ..
والله لو السجن زي الداخلية دي ..معناها السجن ده عقاب مابعدو عقاب ..
عايتو البنيات دي بكن جنس بكا .. وانا العويرة كل ما أشوفن يبكن ..ببكي معاهن .. فعلا والله .. الشي الشايفنو ده يبكي ..
الحتة كئيبة .. وريحة الوطاويط .. جاية من وين ماعارفة .. ولمن جينا فتحنا الشبابيك ديك بقينا نقشقش في بيت العنكبوت .. والمروحة شغالة براحة زي الساقية .. وفيها صوت تعمل .. حوك حوك حوك حوك .. يعني شكلها باكر بتقيف .. وهي اساسا مي جايبة هوا .. ونور الممر حقنا ده طافي ..
غايتو لو ماضربني شيطان في الحتة دي .. تاني مابتجيني عوجة .. لانو الحتة دي .. مية المية مسكونة بالشواطين .. بسم الله ..يا الله تحفظنا .. كوف كوف ..
كلنا اتكومنا في سريرين بس ..وبقينا نطمن في بعضنا .. غايتو بعد شوية حتى قعدنا نتعرف ..
اختكم فاطمة محمد من الولاية الشمالية ..
بدرية طه من شرق سنار..
عشة عبدالله من ابودليق ..
ليلى جعفر من شندي ..
سيدة عمر تندلتي ..
واخريات ..
اتنحنحنا وقمنا صلينا .. وجينا قعدنا تاني .. وطبعا لغاية هسي يسمنا في لقمة.. الا الفول الصباح الاكلتو مع عمي .. ولا اكلت سمح كنت مشلهتة بالتسجيل ..
قلت ليهن قوماكن يابنات ..نشوف لينا اكل .. انتن ماجيعانات ؟..
عشه قالت اناجيعانة دايره اموت لكن حالفة ما ادخل لي لقمة في خشمي .. هسع دي الداخلية البقولوها ؟؟..
انا قلت ليها يابت امي خلاص الحصل حصل.. واهلنا بقولو الصقر ان وقع كترة البتابت عيب..
واحد اسمها بدرية قالت والله انا ساي ابيت القعدة مع ناس خالتي.. لكن شكلي باكر بمشي احنسهم ..
قالو تاباها مملحة تكوسلها قروض ..
وانابقيت اعاين ليهن بس .. غايتو مشيت على الكفتيريا ..لقيتهم يادوب بجهزن في العشا دابن .. والكافتيريا دي وسخانة ..وحالتها بالبلا والمواعين ديل شكلهن يجيب الطمام .. لكن انا مضطرة اكل ..اعمل شنو ؟
يعني بعد ده امرق وين اكوس لي اكل؟؟ واساسا الحرص مابخلوني اطلع بعد كدا .. طبعا اخر مواعيد ممكن تطلعي فيها من الداخلية الساعة 6 ..
تاني لو كراع برة وكراع جوة مابخلوك تمرقي ..
وقصة الحرس دي دايرا ليها قعدة .. اصبرو معاي بس ..
قلت ليها عندكم شنو .. المهم اشتريت لي منها اكل خمسة طلبات ..بمبلغ يأكل ليهو خمستاشر نفر.. والاكل ما بكفينا نحن الخمسة ديل ..
المهم سقت البنيات ديل .. ومشينا شفنا لينا ضروة كدي اكلنا فيها ..
اكل المصظر انا باكل وشعر جلدي كاشي .. مكلبة كليبة ..
والاكل فيهو طعم غريب كدي زي طعم الجبكسين .. (مادة برشو بيها المحاصيل من الافات )..
لكن غايتو اتوكلنا على الله وبلعناهو وشربنا فوقو الموية .. الموية في جركانة جوة قاعدة في الكفتريا ادونا منها بي جك بلاستيك .لامن مسود ..ولونو البرتقالي .. بدا في الزوال والانقراض المهم اكلنا وطردنا الجوع داك ورجعنا اتلملمنا صلينا .. وبدت وفود الطالبات تجي طبعا نحن جينا في الافواج البدري .. بقت كل مرة تجي كوتة ..
وغرفتنا ديك الكان فيها خمسة بنات.. بقن اظن 17 بت .. وزعوهم معانا كمية وجنس دفسيبة .. والبيئة غير صالحة نهائيا" للمعيشة ..
ما معروف في السخانة نسوي شنو وفي البرد نسوي شنو الخريف ..
وغايتو ربك يستر ..
لكن غايتو انا براي زولة دهرية وبعيش في اي وضع الكلام البنات المنعمات .. هسع قالو في واحدي تبكي بيغادي جايبنها شهادة عربية ..النمشي اقول ليها احسن الله عزاءكم ..
الى اللقاء ..