دموع السماء

"13"

***

جلس هو يحادث نفسه كمجنون : وانت مالك يعني ؟

_ اخت صاحبي يعني واجبي احافظ عليها برضو

: لا يا راجل !

_ اه ، اخرس انت خالص

: ده خطيبها

_ ايوة مش جوزها

: ولا انت يا عم الحمق ، وبعدين لو اتكلمت هتعمل مشكلة

_ وايه يعني ده الصح

: مش يمكن كاتبين الكتاب ؟

_ لا معتقدش

: وده بناءً على حاستك العاشرة مثلا ؟!

_ قولتلك اخرس شوية

: طب انخمد

_ مش مخمود

: طب هتنيل ايه ؟!

_ انا مش مرتاح للواد ده

: يعني ؟

_ ممكن اخلي آسية تكلمها

: تقولها ايه ، تقولها انت وخطيبك مينفعش تمسكوا ايد بعض كده ؟

_ ما ده الصح

: ما انا عارف بس قولتلك ممكن يكونوا كاتبين الكتاب

_ انخمد يلا انا غلطان اني بكلمك

: غلطان فعلا ، نام

و اغمض جفينيه وهو يحاول ايقاف تلك المحادثة حتى غط في النوم بصعوبة ....

***

( الاحد 3.)

صباح جديد بدأ ذهب آسر للشركة وسما كذلك اما وسيم فقد ظل بمنزله بسبب حالته حسنا ... ظل في منزله لبعض الوقت على الاقل

مروا بيوم عمل عادي حتى الساعة الواحدة والنصف ، دخلت سما لتعطي آسر بعض الملفات ثم اخبرته

: آسر انا اتفقت مع آسية نخرج على الساعة اتنين
_ ماشي يا سما متتأخروش
قالت بابتسامة : حاضر
خرجت من المكتب لتجد وسيم امامها فقالت بدهشة : وسيم ! انت خرجت ليه ؟ اقعد ارتاح في البيت
_ مش مستاهلة انا كويس ، حاجة بسيطة متقلقيش
نظرت له بعدم اقتناع صامتة فقال : آسر جوه ؟
: ايوة
_ ماشي
كان سيدخل له فقالت : وسيم انا هروح اشتري شوية حاجات مع آسية
توقف قائلا : آسية ؟
: ايوة آسية مش فاكرها ؟
قال بتعجب : لا فاكرها بس مكنتش اعرف انكم بقيتوا اصحاب
غمزت قائلة بابتسامة : واحتمال اكتر قريب
قال باستغراب : قصدك ايه ؟
اشارت للباب برأسها : اسال صاحبك بقى ، سلام
وقف مبتسما بينما هي عادت لمكتبها ففتح الباب ودخل لآسر : ازيك يا bro
: تمام يا وسيم تعال ، عامل ايه دلوقتي ؟
_ اشطا تمام ....

***
: آدم انا خارجة مع ايمو وسما ممكن ؟
نظر لها بانتباه : خارجين فين ؟
_ هيشتروا شوية حاجات
: امتى ؟
_ الساعة 2
: ماشي
قالت ببهجة : تمام هلبس وتوصلني بقى
رد بمضض : ماشي
وبالفعل ارتدت ملابسها ثم استقلت السيارة بجواره وانطلقا ..
***
خرج وسيم من مكتب آسر ولم يجد سما فنزل من الشركة ليجدها امامها تنتظر سيارة اجرة توصلها اقترب منها : مستنية ايه ؟
التفتت بخضة : وسيم فزعتني مستنية تاكسي عشان اروح للمول آسية مستنياني هناك
هز رأسه ثم قال : طيب هوصلك
_ ماشي ..
وبالفعل استقلا سيارة اجرة وذهبا لهناك حيث ستقابل حبيبة و آسية ..
وصلا ولم تكن احداهما قد وصلت بعد فقال : تعالي نقعد هنا في كافية على ما ييجوا
هزت كتفها : ماشي .
جلسا على طاولة ما ثم قالت : هات موبايلك اكلمها واقولها اننا في الكافية
اعطاها الهاتف فاتصلت بآسية : الو
واجابها صوت آدم حيث اعطته آسية الهاتف ليجيب عن ذاك الرقم الغريب : ايوة ؟!
تنحنحت : ده رقم آسية الحسيني ؟
_ ايوة وانا اخوها مين حضرتك ؟
: سما الشافعي يا استاذ آدم ممكن اكلمها ؟
وبدون رد اعطى آسية الهاتف وهو يصغي لما تقول : الو
_ ايوة يا اسية ، انا سما انت وصلتي ؟
: ايوة يا سما لا احنا في الطريق اهوه انت وصلتي ؟
_ ايوة احنا في الكافية تعالي هناك لما توصلي
: تمام ، هو ده رقمك اسجله ؟
_ لا مش رقمي ده رقم وسيم
: اه تمام ، لما اوصل هجيلك
_ تمام سلام
: سلام
اغلقت الهاتف وبعد قليل وصلا للمول فقالت آسية وهي تبحث بعيناها عن الكافية : هي قالت انها في كافيه هنا
اشار على الكافية قائلا : هناك اهوه تعالي نشوفها
دخلا وبدأت اسية في البحث عنها بعيناها وآدم كذلك وسريعا ما التقطتت عيناه ذاك الثنائي الجالس ووسيم يتغزل بها وهي تبتسم بخجل اقترب منهما بغيظ : اهلا يا استاذ وسيم ، عامل ايه دلوقتي ؟
قالها وهو يجز على اسنانه بينما قال وسيم بنبرة لم ترُق لآدم : كويس الحمد لله
لم تفهم سما نظرة آدم الحانقة التى رماها لها بينما يقول : اتمنى مكونش ضايقتكم
ووسيم اجابه بنفس النبرة : لا ابدا اتفضل
اقتربت منهم آسية التي لاحظت توا اختفاء آدم من جوارها بحثت عنه واخيرا وجدت كلاهما : السلام عليكم
ومن اجابتها كانت سما لأن من الواضح ان الاخران ليسا في افضل حالتهما : وعليكم السلام
نظرت لهما آسية بستغراب ثم قالت لسما : مش يالا ؟
اخذت سما حقيبيتها سريعا وكأنها تهرب مثلا : ايوة فعلا عشان منتأخرش عن اذنكم يا جماعة
آدم : انا ماشي يا آسية لما تخلصوا كلميني
واطاعته : حاضر
رحل وكذلك وسيم بينما خرجت الفتاتان الى حبيبة التى وصلت توا وعلى ملامح كل منهما حيرة واندهاش ...
اشارت لهما حبيبة ثم اقترب منهما عرفتهما آسية : سما ، حبيبة
سلمتا على بعضهما ثم همست حبيبة لآسية : الحمد لله مقولتيش ايماجو
فقالت بتذكر وهي تخرجها من حقيبتها : كويس انك فكرتيني ، اتفضلي يا ستي الايماجو اهيه كده خالصين
اخذتها منها وهي تضحك : ومالو
ابتسمت سما ثم بدأت رحلة التسوق ...
***
: يعني ايه اتصرفوا ، عايز الحاجات اللي معاه فورا
قالها بهاء بغضب وهو يقف امامهم ليقول احدهم بشر وحقد : نخطف اخته تاني وكمان اخت الظابط اللي اتعرف عليه ..... يجيب الحاجة لحد هنا وبعد ما نتأكد منها نخلص على الاربعة وبعدين المساعد بتاعه اللي مرمي عندنا ده
وقد كان ............
اتى امجد لكريم الجالس ببرود يرتشف من شراب ما بيده : قوم يالا
سأل كريم : هنعمل ايه ؟
جهز امجد سلاحه وهو يقول : هيخطفوا اخته وبنت كمان يعرفها
: دلوقتي ؟
_ ايوة عرفنا الاتنين فين دلوقتي والباشا مستعجل خايف ليعمل حاجة
: بس انا مبعرفش اضرب نار
_ لا انت دورك تعرف خطوات الشاهين بس مش اكتر ، خليك مكانك لحد ما نرجع .....
وغادر امجد ليلحق بالاوغاد الاخرين ...
***
ohhhhhh I was lost and no one was with me :
I was blind but now I see ..by your mercy..
تمتمت آسية بكلمات تلك الاغنية بصوت خافت بينما يتجولن في المول
حبيبة : بطلي بقى يا آسية
آسية : oh god above.. bless me with your love
زفرت بحنق فآسية لن تستمع على اي حال فلتهتم بما تفعل
سما : ايه رايك في ال"dress" ده
حبيبة : شكله جميل ، ايه رأيك يا أيشا
نظرت له آسية ثم هزت رأسها باعجاب بينما لازالت تتمتم بكلمات الاغنية ...
: and keep me true ...
تنهدت حبيبة بضجر ثم دخلن المحل ....
على اي حال بعد ساعتين من التسوق ، قالت آسية بتعب : انا تعبت
سما : وانا كمان
حبيبة : طب نشرب حاجة ونقعد شوية
سما : تمام ماشي
آسية : اشطا ..
جلست آسية مع سما على طاولات خارج الكافية امام المول مباشرة بينما دخلت حبيبة المحل لتحضر العصائر
نظرت آسية للسماء بحزن وهي تلتقط نفساً عميقا : الجو زعلان
: نعم ؟
دُهشت سما فاوضحت : احيانا بحس ان في حاجة وحشة بتحصل وعلى الاغلب بل دايما بتحصل والموضوع ده بيتكرر كتير مؤخرا
_ وانت بتعرفي منين ، ده غيب
فقالت بسرعة : لا ربنا لوحده اللي يعرف الغيب ، انا بس ... بحس ان في مشكلة او حاجة غلط بابا الله يرحمه كان بيقول انها ممكن تكون هبة من ربنا او ان من كتر ما انا بتعلق باللي حواليا بحس بيهم ، مش عارفة يمكن ده ويمكن ده
هزت رأسها ثم عم الصمت حتى تنحنحت آسية : سما ممكن اكلمك في حاجة ؟
_ اتفضلي
: من غير زعل ؟
عقدت حاجبيها : في ايه ؟
: انت مش شايفة ان تعاملك مع وسيم خطيبك غلط شوية
_ ازاي يعني ؟
: بصي المفروض ان في اداب للخطوبة يعني مينفعش يمسك ايدك او يقولك كلام حب والجو ده
_ بس ده خطيبي
: يعني مش زوجك برضو عشان يحصل كده ، بصي فكري انت في الموضوع و ابحثي عنها اهم حاجة ربنا يرضى عنكم يا سما عشان يوفقكم قدام
ظلت صامتة ولم تجيب وكذلك صمتت آسية ليجدوا فجأة رجالا ضخام الجثة يقتربون منهما ، احدهما يسحب سما والاخر أخذ اسية وكلتاهما تصرخ ولكن سريعا ما كمما فميهما وفي ثوان كانوا في سيارة سوداء منطلقين الى وكرهم بينما وقفت حبيبة مصدومة وقد تركت ما بيدها لتسقط الاكواب محطمة وتسقط دموعها رعبا وهي تخرج هاتفها بسرعة لتتصل بآدم : الحقني آسية اتخطفت ..............
------------
السلام عليكم ، بداية كده باقي بالظبط اربع فصول على الرواية ، البارت اللي فات مكنش فيه تفاعل زي اللي قبله!
عايزة تفاعل بعد اذنكم ، فوت وكومنت ورايكم وتخمينات للي جاي
وبس
دمتم بخير
سلام تاني