اغلال القدر

الجزء الخامس

البارت الخامس
اغلال القدر

زينب ...
اخذنه غسان و طلعنه من الريس ... الريس مو كولش چبير ازغر من ابوية بهواية .... يعني هو شاب بس خشن و ملامحه غاضبه... و راح ودانه للقاعه الي بيها البقية ... كال هنا ناموا ...و راح
ظلينه واكفين نباوع نريد مكان ماكو ... انداريت يمنة و يسرة .... الكل نايمة و كل ٣ او ٤ متغطين ببطانية و ماكو جواهم شي ... ع الگع نايمين
اسيل گلتلي .. هاي شنووو احنه وين ...كتلهة ما اعرف .. بس الحمدلله ما كتلونه ... كالت بصوت عالي وين رح ننام هسة ..؟ جان الكل تكعد و الكبار البيهم كامو يعيطيون ... نرييد نام بس .. كافي ..
كتلها اسكتي ... ليروحون يتعاركون ويانه ..
ورة ثواني الولد الي دست على رجله قبل شوية كام ... بس بحركات انفعالية و يكول ... ما ننهطر استغفر الله ... و راح طلع من القاعة ..
اسيل كلتلي تعاي نگعد بمكانه ... اني خفت منه كلت هسة يجي و يصير عصبي لان اخذنه مكانه ...
بس هو من طلع دار وجهه علينه وكف شوية و شافنه كعدنه و طلع ... المكان صح صغير بس تحاشكنه و كعدنه ... و غفينه على كعدتنه ...
و صار الصبح ...
و كعدنه كلنا على  صياح غسان يضرب بالولد الي اخذنه مكانه .. يكتل و يصيح ولك جواد گزيزة انت تموت ع الكتل شطلعك برة مو نايم هنا ... ..يموتك كتل ..و يمكن يكهربك هم ....
الكاعدين و احنه وياهم بس صافنين على غسان شلون يكتل ... و يعيط على جواد ...  كله تريدني اكول للريس على وزايعك هذه .. ميخالف اصبرلي اني الك ... هو شلون يحبك عيني... ليش طالع برة وين انخمدت ..؟ هااا تريد تنهزم مووو؟ مثل هذيج المرة ... انت تعرف شنو مصير الينهزم و صارت وية رائد و رضاب و انتو حضرتوا الدفنه ... تريد الريس يتعصب منك .. متحصل غير گبر بالنجف ...
اني گلبي صار طبل من الخوف حضنت خواتي و صرت ابچي بس بدون صوت بس دموع ... شفت الولد الي اسمه جواد يباوعلي و نظراته تأنبني .. لان صار مرتين ينكتل من وراية هو نطانه مكانه بدون ميحجي ... بس حسيته كام حتى يفسح النه مجال ...
و على غفلة الكل وكفوا مثل الاصطفاف و صاروا سراوين و ظلينا وحدنه اني و خواتي بالكع ...
جان يصير يمنه هذا الولد جواد ... اشرلي بعينه يعني گومي ... اني بسرعة شلت نونو و كمت لان لمحت الريس طلع ... و شكله عصبي ...
جان يجي غسان يوكف يمه ...
الريس ..: غسان وين ام ميثم و الباقيات ...؟
غسان ..: ريس هسة همه على جية ...
الريس ... : ياله كل من على شغلة ...
و تفرقوا و طلعوا من البيت بس مو كلهم كل ٥ يطلعون سوة ... اني مفتهمت السالفة و اسيل دكولي شو متريكنه بس اكو بنية واكفه يمي كالت انت تعرفين وين رح نروح كتلهة لا ... كالت نرح نطلع نجدي ... كتلها شنووووو كالت احنه متقسمين مجاميع كل مجموعة بمنطقة .. نطلع من الصبح و نرجع باليل لهنا و الي نحصله ننطي للريس .. الريس هو الي معيشنا لو ما هو جان احنه بالشارع  من زمان ...باوعتلها و اتعجبت لقناعتها و امتناننها للريس ...
اني و خواتي صرنه بمجموعة جواد ... غسان گله جواد .. و احمد عينكم على هاي .. هي و خواتها ...هذوله جدد و ديربالك لحد يضحك عليها ... غسان كال جواد ... باريلها ...
جواد باوعلي بنظرة مستهزئة و دار وجهه ..
مجموعتنه اني و خواتي و جواد و احمد و ربيعة هاي البنية الي سولفتلي على الشغل ... و نادر... 
احنه واكفين و جان تطب ٣ نسوان لابسات عبي و ياهم جهال عددهم هواية و رياجيل ٣  ... كالت ربيعة هذولة هم ويانه بس هذوله النسوان جانوا زغار مثلنه و تزوجوا و ازواجهم منا من نفس البيت .. جانوا هنا ...الريس زوجهم و كونوا عوائل  و طلعوا برة سكنوا ببيوت... و بقوا ولائهم للريس ... هذوله ينطيهم الريس رواتب احسن من عدنه مو مثلنا احنه ينطينا قليل لان يكص منها المنام و الاكل و اللبس .... 
مجموعتنا ٧ و المنطقة الي رح نشتغل بيها هي  الكرادة ... و هاي حتكون منطقتنه الثابتة .. ربيعة بالطريق فهمتني هواية امور هي اكبر مني ب ٣ سنوات ... فهمتني شلون الوضع صاير بالبيت ... طبعاً البيت اسمه (بيت السبيل) و اسمه يرجع لعبارة الريس المشهورة ( كله في سبيل الله ) وهمه كل واحد و قصة انجمعوا بلا ميعاد يجمعهم الفقر و الفقد ... مثلاً ربيعة هي لقيطة متعرف اهلها دكول اني فتحت عيني هنا بهذا البيت و جانت اكو بنية عمرها ١٧ سنة هي الي دارتها و كبرت على ايدها  .. و صارت تتطلع تكدي بيها ... دكول ربيعة بعد  ما صار عمري خمس سنوات البنية اختفت و رادت تنهزم ... لان ملت هالعيشة و رادت تزوج و تكون عائلة حبت واحد سايق تكسي و الريس درى انها تريد تعوف الكار .. سلط عليها حمايته والي همه مراقبين علينه امثال غسان  و دوروها و لگوها ... و اكو ناس كالوا كتلها و اكو ناس نفوا هذا الشي ... جواد ايضاً مينعرف منو ابوه لكن امه جانت احد البنات الموجودات هنا و حبلت و محد عرف شلون ... يعني بلا اب معروف ... ( المعلومة صدمتني ) و بيوم ولادتها لجواد توفت لان جانت كلش زغيرة تربى جواد بلا ام و اب و نشأ قاسي و صار يتعارك هواية و دائماً يشيل كزيزة وياه من يريد يتعارك يجرح نفسه و يتعارك ... فتشوفين هذا الجرح الي بحواجبه هذا اثر اول عركة و جسمه ملياه شخط
... اشرتلي على احمد ..احمد اكبر من جواد بس شخصيته ممفهومة اغلب الوقت ساكت بس عينه بيها دهاء ... كلتلي هذا مختطفي من مستشفى الامراض العقلية ... بس هو ما بي شي ...ربيعة كالت مفد يوم حسيت بي شي ... بس هو قليل يحجي ... و من يعصب ينسى نفسه يكتل كتل ما صاير ...
كالت اكو ناس مختطفيهم ... والريس اشتراهم من العصابات ... مثل نادر ... نادر مبين عليه فقير ولا يهش و لا ينش و يلبس مناظر ... عمره ٩ سنوات تقريباً .. جواد و احمد همه القايدي يكولوله يمنه .. يروح يمنه ..يكولوله يسرة يروح يسرة....
المهم ... فهمتني لازم اسمع الكلام حتى لا اتأذه و افهم خواتي انه هاي عيشتنه هنا بعد ... ولازم نحمد الله لان وكعنه بيد رجل مثل الريس ...و لازم احصل ايراد زين لان غسان مخصص لكل فرد المبلغ الي لازم يجيبه مثلا ربيعة كالتلي هي ملزمة تجيب يومية ١٠٠ و فوگ و اذا جابت اقل تتحاسب و الكل مثلها ... كلتلي انت بحالتج لازم تجيبين ٥٠ اقل شي و خواتج هم ... يعني ثلاثتكم غسان ياخذ منكم بالبيوم ١٥٠ الف مو اقل ... كتلها زين مو اني ما اريد خواتي يشتغلن خطية ... كالت ميصير ... لازم لان وحدج متكدرين ... و تتحاسبين اذا ما جبتي مبلغ زين ...
وصلنه للمنطقة و اسيل بدت تتذرنح .. و تتأفأف ... وشمة كذلك ...
فلوس عمو ابو همسة باقي منها شوية كعدتهم ع الرصيف و رحت جبت صمون و كلاص جبن و حفاظات لنونو ... كعدوا ياكلون و اني سويت ممة لنونو .. دا ارضعه ... اجة احمد يباوعلي بنظرة قاسية اني افتهمت شيريد لان غسان كلهم ديروا بالكم عليها ... يعني لان شافني كاعدة ... كمت ع السريع حطيت نونو يم اسيل و رحت امشي .. صعبة عليه امد ايدي للناس ... استصعبتها ... حتى اني مرتبة و هدومي نظيفة و مسوية ظفيرة لشعري ممبين عليه محتاجة ...
جواد و احمد يباوعولي من بعيد يريدون ابدي .. بس اني مديطلع بايدي شي ...
عيني دمعت و وصلت يم محل تسجيلات فاتح انشودة صوتها عالي و كلماتها گطعت گلبي ( يتيم الضيع اهله تجي الوادم تذله... و انه الربولي علة العافوني  على موتي .. يا دنية وين اهلنه وين اهل المحنه .. تفارگنه حزنه و يبس دمعي و يه دمي ) كعدت بالكع و صرت ابجي و طلعت الحسرة الخانكتها و الدمع الحابسته بعيني من شهور ... من يوم الي امي ماتت و عافتنة و يتمتنه .. ضعنه بموتها ... جانت لامتنه .. جانت عازتنه .. صرنه بلا انتماء و بلا هوية .. صرنه بلا اسماء و بلا اصل .. تيهنا الحياة .. اتمنى ترجع ولو يوم واحد و اصيحلها يمة ... و تلمنه بحضنها ... تشردنه ... اتمنى اشوف بسمة وحدة من ابتساماتها الجانت تضوي حياتي ... راحت .. بعد ما عندي خيمة ولا مأوى ... امي خيمتي و امي انتمائي ...
اني ابچي و اصيح يمة ... وينج يمة اني صرت يتيمة  من بعدج ... وكاعدة بالكع و الناس الي تفوت ... كاموا يستخطوني و الي يشمرلي الف و الي يشمر خمسمية و اشكال الفلوس كامت تكت علية ...
ردت اصرخ و اكول مااا اريد اني ما اريد الفلوس ... اني اريد امي .. اريد ايد اتوچة عليها ... اريد حضن دافي اغفى بي ... تكدرون ترجعولي امي ...؟
بس تذكرت حجي ربيعه ... من كالت ديري بالج لازم تجيبين مبلغ زين حتى لا يأذوج ... و مردت خواتي يكومون يكدون ... شسوي ... خفت عليهم ...
الناس بقت تنطيني فلوس بس ما مديت ايدي همه من شافوني ابجي و اصيح امي ... اتعاطفوا وياية ... جتني ربيعة ورة كم ساعة و كالت تعاي جواد يريدج ...
رحت وياها بس اني تعبانة و نعسانة ... لا غفيت و لا اكلت و البجي و الذكريات القديمة وجعتلي گلبي ..
وصلت يمه و جان يسألني بطريقة قاسية  ... شكد طلعتي ..؟ كتله ما ادري محسبتهن ... كلي تعاي وراية ...
رحت وراه و طبينه لدربونه ... انطيته الفلوس وعدهن ... كلي هذني بس ٤٠ الف ولعد مين اشتريتي ريوك كتله هاي فلوس مال عمو ابو همسة جيراننا نطانياها  ... سكت معلق ... كلي ترة بعد خمس ساعات و نرجع ... تعرفين غسان شرح يسوي بيج ..؟ خواتج الهوانم ليش مكومتيهن .. كتله لا عفية خواتي لا ما اريدهم يكدون ... اني ميخالف ... بس همه لا ... كلي و شنو على راسهم ريشة ...؟ غسان هسة يبهذلج اذا رحتي بهالمبلغ ... وراج حساب و كتاب ... واني معليه كل هالحجي اسولفه اله .. و عافني و مشى و صرت اركض وراه .. كتله عفية لا لا تكوله الله يخليك رح اروح هسة اني و اعوض عن خواتي و كدامي وقت طويل ...بلكي اكدر ...
وكف جان يندار عليه ... طبعاً جواد اسمر و كولش طويل و عنده بحواجبه جرح بس قديم و حواجبه مرفوعة و عينه سودا هو اكبر مني ب ٣ سنوات بس اطول مني بكومة ... عينه شكد ما قاسية بس بيها شي يشد .. حزن او قصة قديمة .. لمعة تعكس روح بداخله غير عن وجهه الغاضب ...
باوعلي بعمق عينه الحزينه ... و اني دمعت عيني ... بهالنظرة شكالي حال سنين... حال اردء من حالي ... و ليالي اظلم من السواد نفسه  ... بس ولا كلمة نطق ... شافني ابجي جان يندار و يكول انت شسمج ... و من بين البجي كتله زينب .. كال انت تندلين هاي المنطقة ... امسح بعيني و هزيت راسي .. كتله لا ... كلي امشي اوديج لمكان بي ازدحام...
مشى و اني امش وراه ... و جابني يم فرع هو سوگ و بسطات و جان يحجي وية واحد بس مشفته بالبيت البارحة .. كله ايهاب هاي وياية ترة رح اخليها هنا ... الولد كله جواد ميصير عيني .. هم انت و هنوب تجيبلي هاي ... ماكو .. جواد كله...  لك زما.. افتهم اني اعرف القوانين و الييصير و الميصير .. زينب بمكاني رح تصير ...
ونطاني وصلة و ملمع جام و كلي باعي امسحي جام السيارت و كدي الاثنين سوة ... مرة هيج و مرة هيج .. هزيت راسي كتله اي ...
كال اني رايح راح و جان اني اظل اباوعله .. تذكرت علي ... اندار عليه و شافني ابجي ... نظرته جانت سوالف ليل بارد و طويل ... و خنگة كاظيها  حسرات وبواچي و  عويل .... عافني و مشى ....
الوضع جديد عليه و ما اعرف شلون .. اكدي و شلون امسح السيارات .. و اغلبية الناس قاسية وياية بالتعامل ... هواية سمعت كلام جارح .. من اتقدم لسيارة اريدامسحها ... هذا الي يكلي ولي منا .. وهذا اليسد الجامة و ميسمعني .. و هذا الي يكلي شوكت تنقرضون ... ومن هالسوالف ...
كلساع اروح اخم خواتي و نونو و ارجع ... و الناس مدتتجاوب وياية ... و جواد ماكو و ربيعه هم ... بس لاحلي نادر و شفته دياكل و ما مهتم ابد ...
صارت الدنية مغرب و مبقة شي للرجعة .. اجتني ربيعة ... ربيعة روحها حلوة و لا شايلة هم ... تضحك و تشاقة وية نادر و تلاطف احمد و تريده يعصب حتى تركض و هو يركض وراها .. حسيتهم متأقلمين كلهم و ربيعة جداً ذايبة وياهم .. معتبرتهم اخوتها ... گلتلي تعاي خبلة ... باوعتلها ... كتلها اني ..؟ كالت لا عروگ اذاني .. هههههه لعد منو جدي ... انت شسمج ... ؟ كتلها زينب .. كالت وخواتج ..؟ كتلها اسيل و شمة .. واخوية نونو ... كالت هااا .. كالت شعجب انت بمكان جواد ... كتلها هو كلي ... كالت هو نحس وين يقبل ينطي مكانه ... كتلها ما اعرف ... كالت يولي شفتي ايهاب ... كتلها منوووو؟ كالت هذا الي يوكف هنا ... هم يمسح جام و يبيع جاي ايام الخميس ... كتلها هااا هذا الولد الجبير ،. كالت اي يخبل ... يخبل .. اني ضحكت على فطاريتها .. كالت لج مو تحطين عينج عليه والله ادمرج ... كتلها لا والله ما اباوعله ... ضحكت كالت احلم اتزوجه و يبوسني ... و يكلي ربيعة انت احلى وحدة بحياتي ... جان دكول اكلج زينب .. اني حلوة ،،؟ ربيعة سمرا حييل بس دمها حلو عيونها صغيرة بس بيها ملح ... و عدها شامة بحنچها زايدتها جمال و طولها مناسب ... كتلها اي حلوة و دمج ينحب ... كالت اكو امل يحبني ايهاب ...؟
كتلها اي ليش لا ....
ورة شوية اجة جواد و احمد كالوا ياله صار وكت الرجعة ... رحت على خواتي اخذتهم و شلت نونو و مشينه
رجعنا للبيت هلكانين .. اجة غسان و كال كل واحد يطلع دخله حتى اخذه ...
اني لزمتهن بايدي وصل السرة لربيعة اخذ منها حسبهن و كلها روحي ولي منا .. و احمد كذلك و نادر الي مشتغل بس اخذ منه فلوس  و عدهن وكله.. ولي منا  ثور ...
وجواد هم ... كلهم جانوا مشتغلين .. وصل لخواتي و كتله هاي فلوسي و فلوسهم ... اخذها مني و عينه علية بقسوة يباوعلي ... عدهن ... جان يكول بسسسسسس؟
انسة وين الباقي ..؟ هذني بس ٧٠ الف من الصبح للليل انتي و الهوانم شجنتوا تسوون ... لعد ... جان يجرني من ياختي و نطاني راشدي خله اذني تنصم ...
كمت ابجي .. كلي تعرفين شنو عقاب الي يجيب وارد قليل ... ؟ كتله لا كال حمييييد ..تعال... اخذها للغرفة الفوگ خلي تستراح خطية ...
جواد كله غسان ... بس اسمعني ترة زينب هذا يومها الاول ... واني مدليتها كل الاماكن ... كله جواد كزيزة ... انت انطم و اسكت ... جواد سكت وصار يباوع عليه من حميد جرني و صعدني فوك واني ابجي و اكله لا عفية الله يخليك وين موديني ... و خواتي صاروا يبجون واني افرفح بيد حميد لان ما اعرف شنو الفوك و وين حيوديني .. الدرج اظلم و وصلنه الغرفة فتحها ظلمة و باردة قفلها وراه  و شمرني ... و جان ينزع الحزام و ...........