اغلال القدر

الجزء العاشر

البارت العاشر
اغلال القدر

زينب ...
وضع علي ما عجبني و حجايته الاخيرة قلقتني ... المضمد اخذ جواد و حجة وياه على صفحة ... و جواد ظل يباوع لعلي .... بنظرات غاضبة ... ورة شوية صاحني
و طلعت يمه ... گلي و شراراتغضب تتطاير من عينه ... تعرفين علي شبي ...؟ كتله شبي غير متصوب ... گلي لا ... يالنايمة على اذنج ... علي مدمن مخدرات .......
اني اندهشت و صحت .. شنووووو ؟؟ لا جواد ... علي ميسويها .. علي صح جان يشرب جكاير بس ميسويها و يشرب مخدرات... كلي هسة المضمد حجالي ...
جسمه مزرف تزرف من ضرب الابر ..
اني دمعت عيني تذكرت حجاية علي قبل شوية من كال اني تهت و مالي رجعة ...
كمت ابجي و درت وجهي عليه شفته ممدد و مغمض عينه ... صرت احجي بلسان گلبي ... كتله لجواد لا ... علي ما افقده ... لا ... عفية جواد ... الا علي ... جواد باوعلي و بنظرة غاضبة ... كلي ..انت صاحية .... شبيج ... اكولج مدمن .. مخدرااات يعني .. مريض و على عتبة الموت ...
اني فزيت .. و گلبي گام يدك و صار طبل ... كتله لا جواااد ... لا دكولها ... ما بيةحيل افقد غالي بعد .. كمت ابجي و جواد ملامحه صارت غاضبة اكثر و عيونه تجدح نار... كلي زينب اصحي ... شبيج كلبتيها عزة و مناحة ..
طبيت للغرفة و بسرعة .. رحت على علي .. لكيته نايم .. كعدت بالكع و بالزاوية ظلييت ابجي و اباوع لعلي ... و اريد اسكت بعد ما اكدر .. اني سمعت من ربيعة فد مرة ع المخدرات ... و طاشة هسة كلش .. بين الشباب ... ديقشمروهم و ينطوهم منها اما يشموها و تجي باودر و بي انواع هواية..... و اما عن طريق الابر ..
و نهايته وحدة هي المووت ... اما يموتون بجرعة زايدة .. او من كثرة الجرعات الي ياخذوها على مدار الايام لان الدماغ يتلف ... من كثرة الخدر الي يصيبها ...
علي ضاع .. شلون لكة هالطريق .. شلون تعلم ع هالصخام ... ورة شوية .. المضمد كال لجواد .. ها هي طلعوا .. دنسترزق انتو كاطعين رزقي .. جواد سأله .. على وضع علي ... المضمد كله هذا جسمه متعلم .. على مخدرات لازم ياخذ ... لان النوع الياخذه ظاهر قوي لان من دا اخيط الجرح نطيته بنج هواية بس هو حاس ع الخياط .. يعني جسمه متعود على جرع جبيرة ... جواد هز براسه و صاحني ...
كلي زينب ... المضمد كلي الاخ متعود ع مخدرات و جرع زايدة و نوعها قوي ... و ين حنولي بالطلابة الجديدة ...
كتله ..: شتقصد جواد ....؟ علي ما اعوفه و ما راح افقده ... ضيعته مرة ... بس ما رح اكررها ...
كلي .. و بعصبية .... انسة انت حيري بي ... اني معلية ..
و راح و عافني ... ركضت وراه كتله جواد الله يخليك لا تعوفني وحدي .. علي لازم يجي وياية .. و ما اكدر وحدي عليه .. و اني ما عندي احد اتوچة عليه غيرك ...
اندار و بعصبية كلي ... انت شخبصتي نفسج بهالولد ... دتشوفي مدمن و شغلته منتهية ... التفتي لنفسج ... و التهي بروحج ...
و راح ..... ظليت ابجي و اكول هاي عگب ما لكيته لعلي الگاه منتهي و مدمن ... اني الي جنت ادعي ليلي نهاري الكاه ... تالي الكاه بهالوضيعية ..؟ يا رب عافيه... و رجعه لحيله ...
رجعت للمضمد و لكيت علي كاعد لحيله لان المضمد كله اطلع ... كام وكف و ملامحه هسة شفتهن بوضوح اكثر ...
شاحب ... و عينه بهالات سودة و  طافي بريق الامل و العنفوان الي جان بيها... هزيل و ما بي شرارات  الحياة الي جانت محاوطته قبل  ... و ممسيطر على روحه يريد يمشي ميكدر ... يترنح ... و كلساع يحك خشمه و اماكن متفرقة من جسمه ...
باوعلي و ابتسم باستهزاء كلي شسووين باقية ... روحي ... و عوفيني... و طلع ..
ركضت وراه ... كتله انت وين رايح ... كال مثل ما جنت قبل ... بلا وجهة و بلا انتماء ... هيج ... بارض الله الواسعه ...
كتله ليش هيجي ... علي .. ليش وكعت نفسك بهالدرب ...
ما جاوبنه و مشة ...
رجعت لشغلي لان تاخرت هواية ... بعد ما تاكدت انه علي كعد بالكهوة الي بالشارع الي قبل فرع البيت ....
الوقت كله تايهة .. اشتغل و بالي يم علي ...جواد ما اجة يمي ابد .. بس اباوعله من بعيد يتحاشة يجي للشارع الي اني بي .. ما فهمته شبي ...
صار الليل و دنرجع للبيت ... جواد ما اجة علية اخذ احمد و نادر و مشوا و اني و اسيل نمشي وراهم ... نزلته من التكسي يم فرع البيت .. و اني ركضت للكهوة .. و لكيت علي مدد يم محل بالكاع.. ركضت عليه .. و لكيت ايدة مزرفه و بيهة طكع دم .. و هو فاقد لا يحجي و لا اصلاً فاتح عينه ... صرت اكمز .. عبالي مات ... نزلت راسي على صدره و سمعت لا گلبه دينبض الحمدلله ..
ورة شوية اجتني اسيل كلتلي زينب ... رح يدخلون للبيت و انت ماكو .. كتلها ميهلني اعوف علي هنا وحده .. شوفي حالته صعبة ...
كالت غسان يشرنه ع الحبل كلنه اذا ماكو انت ...
و جان اعوفه بعين تبجي و عين تضحك و مشيت رحت للبيت لكيت جواد بالباب .. واحمد و نادر دينتظرونه حتى ندخل سوة ... كال بصوت عالي .. استغفر الله شوكت نخلص من هالطلابة ...؟
اني باوعتله بنظرة عتب ... جواد اعرفه هو عصبي و نارر بس يملك قلب طيب و يهتم بلي محتاج اهتمام ...
استهزء و ضحك و فر ايده و كالت تهييي بهييي ...
و دخل .... دخلنا و كظينه فترة تسليم الوارد و تحضرنا للنوم ... اني دا الوب ... بقيت من اكلي نص صمونة و ضميتها بجيبي حتى ورة مينامون كلهم اطلع اروح لعلي ... اوديها اله ...
و فعلاً مددت و سويت روحي نايمة ... و رفعت راسي لكيتهم كلهم نايمين و صوت الشخير ما شاءالله يصم الاذن ...
اتسحبت من الفراش على كيفي ... و بهدوء طلعت ..
و عبرت السياج بالگوة و ركضت متوجهة للمكان الي شفت علي بي ...
وصلت للمكان و جان اوقت متاخر و الشارع اظلم و لا سيارة بي و لا حركة ..... بس هاي شنووو  وين  علي اشو  ماكو ... اتخبلت ... ركضت ... ادور .. و رحت للدربونه الي بصف الكهوة و دخلت بيها ... جانت ظلمة و صوت الجلاب يرهب ...
مشيت على كيفي و جان اشوف ولد اثنين يطلعولي بس مين ما اعرف ... يضحكون بنبرة گزبرت جلدي و خوفتني ... حوطت جسمي بايدي و صرت ارجع ليورة و همه يتقدمون علية و يحجون كلام محلوو ... و نيتهم گشرة ...
واحد منهم كال خوش طيرة ... الثاني كله ولك احنه باليل هاي مو طير هاي بومة ... و صاروا يضحكون بطريقة تلعب النفس و يستهزئون و يكولون كلام بذيء ...
صرت ارجف و اريد اصيح مطلع صوتي و اريد انهزم مكدرت رجلي مساعدتني ...كمت  ابجي لان صاروا كلش قريبين عليه ..
كلي واحد منهم شعندج هنا بومة ... صرت ابجي بصوت اقوى .. كلي نطقي ... كتله جيت لعلي و عليت صوتي .. و جان يكلي اني علي جاية علمودي ... تعالي و جان يركض علية و لزمني بايدانته و الثاني طلع سچينه لان شافني اعيط كلي و الله هسة اذبحج اذا سمعت صوتج ... الثاني صار يشمم بيه مثل الچلب و يمشي لسانه على رگبتي .. و اني صرت اقاوم اكثر .. و بلحظة جان اسمع كزيز  انكسر .. و عيطه قوية كله ولك ساقط انت وهو لو زلم تعالوا الي ... وخررررر .. شلت راسي و اباوع هذا جواد ... و خده بي دم ..
و جان يكمز عليهم و دفرات نطاهم و خلصني منهم اني رحت ليغاد و بعدني ارجف و جواد حسيته صار ذئب ما ادري بي هيج يكتل ... لو شايفته بالتلفزيون جان كلت كذب .. سكطهم... اخر شي واحد منهم كمز على چتاف جواد و ديخنگه من رگبته بهالاثناء الثاني كام و نطه لجواد بوكس ببطنه .. و الثاني على وجهه و الثالث شهگت على بطنه بس اقوة واحد ... بحيث خلت الدم يطلع من حلگة ...
و بثواني شفت اجة شخص و كمز على الي اكتاف جواد و وكعه .. هذا علي .. يا ربي .. علي ما بي شي .. و صاروا جواد و علي ضد هالولد .. بس علي مو بقوة جواد و تعبانه حركاته .. مع ذلك خلوا الولد اثنينهم ينهزمون ركض ...
و اني ظليت بمكاني متبسمرة و ارجف .. من الخوف ..
جواد ظل يباوعلي من بعيد و عصبي .. و علي وكع بالكع و يصيح راسي ...
كمت اتوچيت على المتبقي من القوة العندي .. و ركظت لعلي .. كتله شبيك علي .. كوووم ..
كلي زينب اشتريني ... راااسي .. حموت ..
كتله شسوووي .. كلي اريد مخدر ... جواد باوعلي و كام يبتسم باستهزاء و الدم على خدة كلي هااا شكلنه .. روحي دبريله جرعة حبابة ..
ركضت على جواد و اني ابجي كتله الله يخليك شوفله حل .. شنسويله .. ما اكدر اشوفه بهالحالة و اني واكفة ساكته ... كلي بابا انت مخبلة ... تعرفين شنو مخدرات ..؟ تعرفين منو يبيعها و شلون نجيبها ..؟
بابا هاي قضية و تهمة و بلاوي زركة ... توكعين روحج بيها و توكعيني ؟ ... زينب امشي روحي للبيت ترة بالگوة ساكت .. و لازم اعصابي ...شطلعج بهالليل ..؟ و شلون عبرتي سياج البيت .. لو ما اطلع و اجي وراج .. جان كتلوج هالساقطين هذوله .....
كتله ما ارجع للبيت و ما اعوف علي ..
كلي سمعي زينب ... انت دترسمين خطة موتج بايدج ... كلي خاف شفتي غسان سكت على قصة اخوج و شمة .. ترة اني اعرفه مينضحك عليه بس بارادته ضحكنا عليه.. و يعرف كلش زين سالفة الاختطاف كلاوات ... لان هو يضوج من دلالج لخواتج و لاخوج ... و خوفج عليهم .. اجته من الله تنطيهم .. حتى تتفرغين اله ..
عرفتي ..؟ و هسة انت بهذا تصرفج ميعوفج غسان ... ابد ...
كتله و اني ما اريد ارجع و شيصير خلي يصير ... و جان اكعد يم علي و علي ديتلوى ... لازم راسه و يون .. ظل جواد حاير .. شال ايده و اتخصر و كلي ... انت غبية .... و ثولة ... مسح شعره و جان اشوفه يضغط على اسنانه و بعصبية و بصوت يخنك ثورة براكين ... كلي امري لالله كومي اشوفله حل لهالمصيبة  هذا ..............

بعد اسبوع....
زينب ... بهذيج الليلة ... ضغط على نفسه جواد .. و عاند رأيه الثابت الي جان يكول ما علية بهذا ... و عوفي ...
شال علي و كلي امري لالله .. رح اشوفله حل ..
فرحت و الدنية ما وسعتني ... اني كلش اثق بقدرات جواد .. جواد عنده قوة و صلابة و ارادة من يريد شي .. يسووي .. و بقراره هذا كدرنا نساعد علي ...
بهالفترة هذه سال على حالة جواد هواية و اجة كلي الحلول ..
كلي زينب علي لازم نحرمه من الجرعات ... و نحبسه بمكان بس هو بي ... جان يكمل ..: طلع  هذا علي يا ست زينب يتعاطى اقوى انواع المخدرات الباودر اسمه ((كرستال)) و هذا مو بسهولة يتعافى منه الشخص الي يتعاطاه ... اني جبتله مرة بس و ع الجايات رح نقلل بالبداية الجرعات و اخر شي نحرمه منها و نحطه بمكان بس هو بي .. اني گلبي انمرد بس وافقت لان هذا الحل الوحيد الي رح يخلص علي من هالمصيبة ...

و هاي احنه صارلنه اسبوع حابسي هنا بعمارة مهجورة فوك بغرفة بالطابق الثاني .. نجي الصبح نحطله اكل و مي و نقفل الباب و نطلع ... بس ما احجيلكم شنو وضع علي ....
علي متهستر ... انقلب حاله ... صار اشبه بالحيوانات المفترسة اذا شاف واحد من عدنه ... و يحك بجسمه و يدور اشياء يجرح بيها نفسه بس اني حريصة ما انسة انظف الغرفة ع السريع يومية ... هاي ما عدا صياحه    .. كم مرة اتهجم على جواد من يدخل يحطله الماي .. طبعاً هو يرادله استشارات طبية مو بس هالحبسة ... بس احنه منكدر نودي لاي مكان .. و حالته حرجة واصل مرحلة من الادمان يعني حتى بيها مراكز شرطة و تحقيقات و الموضوع يكبر ... اني مو سهلة علية شوفة علي بهالحال .... يعصر گلبي من يباوعلي من اريد اسد الباب و اطلع ... اكعد ورة الباب ابجي و اشهنك و ادعي ربي يتحسن علي و يصير زين ...
اما جواد ما انساله هالوكفة هاي  .. وكف وياية وكفة اخ لاخته .. اتحمل مزاج علي من يدخل للغرفة لان علي مزاجه كلش عصبي بلا مخدرات .. لو يتقيء عليه لو يهجم عليه يريد يضربه لو يعضه .. و جواد ما يسويله اي شي.. يطلع من يمه و يفرغ اعصابه بالحايط و يضربه برجله و ايده و يعيط و بعدين يعدل روحه و يروح لان جواد مو سهلة يسكت للي يأذي متعلم يرد الصاع صاعين.. و بادوات جارحة هم ...
المهم .. بعد هذا الاسبوع الفات .. علي بدأ يضعف و تخمل حركته .. بس قل وجع راسه و ترك تجريح نفسه ...
و كاعد على نفس الكعدة و مرجع راسه ع الحايط و عينه بالسگف ...
اليوم جواد كلي روحي انت حطي الاكل و طلعي ع السريع ما اكدر اعوف مكاني و الكاج هنا بعد نص ساعه ان تاخرتي و الله يا زينب اكلب عليج العمارة ...
اني هم جيت و جايبة لكمة لعلي لان وكع من الجوع مديقبل ياكل ...
طبيت و شفته كاعد على كعدته و عينه بالسكف ... و بهدوء تقربت حطيت الاكل و انداريت حتى اطلع ... جان اسمع علي بصوت مخنوك بس بوعيه هذه المرة ..: ليش دتساعديني زينب ..؟
وكفت و عيني ع الباب ناطيته ظهري ... ما اريد اندار لان گلبي يأذيني من اشوف دمع عيون علي المحبوس .. و روحي تتكطع من اسمع صوت رجفة الحزن بنبراته ...
انداريت ببطيء  و عيوني دتترجم كلام عيونه .. كتله علي انسى الي سويته وياية... اني يتيمة و انت اول واحد اتبناني ... تقربت منه .. كتله صرتلي سكف و خيمة ... بعد ما جنت بشارع كاعدة ... صرتلي ابو و اخو بعد ما ماتوا العزاز ... علي انهض و ارجعلي سند .. تعبت والله ... باوعلي بعينه و ابتسم كلي زينب ... علي تعبان ... و هو محتاج السند .. كتله اني وياك علي و ما اعوفك ... نزلت دمعة من عينه و مسحها ... و دار وجهه .. بهالاثناء سمعت حركة برة الغرفة ...
انداريت ع السريع و جان اشوف جواد بس صاير عصبي ناررر ... ...........

صوتوا للجزء اذا عجبكم
مشكورين للمتابعة❤️