ترياقي

11

دقيـت اليميـن انـو القمـر إتدلى

في نص النهار سارح يحوم في الحله

غيمت السما وشـرقت نجـوم تتجلى

وانبهرت عيون عاجـباها خـلقة الله

نهلة ماعرفت روحها نامت كيف ومتين كل العارفاهو هو الزول الغريب ال دخل قلبها وأبا يطلع

لبست واستعدت ل يومها مشت صبحت على امها وابوها وشربت معاهم الشاي وطلعت

ومروة وصفاء برضو طلعو صفاء مشت على شغلها ومروة مشت تقدم للشغل الجديد وهي شايلا فايلا وقبل الفايل شايلا دعوات امها وابوها

نهلة وصلت الجامعة واول واحد شافتو مزمل شكلو كدا كان منتظرا مشى عليها وبقى يعتزر منها وهي اصلا ما ادتو فرصة قالت ليهو

- لحد هنا وكفاية ياخ انا ماعايزاك ماتعب روحك ساي انت زول كويس ومية بت تتمناك لكن انا ماعندي حاجة ليك لا اظلمك لا تظلمني

- بس انا بحبك وما بقدر اعيش من غيرك اديني فرصة وانا بخليكي تحبيني

قالت جوة نفسها دا عبيط ولا شنو

- ي ود الناس افهمني للمرة المية انا وانت مابينفع نكون ل بعض لو سمحت بعد عن طريقي وخليني في حالي

ما انتظرت ردو وطوالي مشت خلتو واقف مكانو وهو بيكلم روحو و بيقول

أزمعتي الرحيل قصدك تزيدي جروحي

يا ام خشماً تقيل بى حبي مابيا تبوحي

حبك في الفؤاد دايماً مشحتف روحي

وين القى الرقاد كان ناوية انتي تروحي

فتاح شاف نهلة وهي بتتكلم مع مزمل وظاهر عليها معصبة

- مالو الزول دا معاكي ما يكون ضايقك

- لا ، بس اعتذر على موقف الخميس

- موقف 😡 موقف شنو

نهلة اتذكرت أنها ماحكت ليهم عشان ماعايزا مشاكل حكت ليهو الحاصل وقالت انو في واحد مابتعرفو ساعدا

- فتاح زعل وقال الليلة ماحيخليهو كيف يتجرأ يعمل كدا الليلة الا يشوف ليهو جامعة تانية

- ما حصل شي وهو جاء اعتزر انا ماعايزا مشاكل

بس فتاح شكلو ماعايز يجيبها البر ومشى منها وهو غضبان ،

نهلة اتصلت على ريم وقالت ليها حصليني

ريم جات ب سرعة

- في شنو ي بت خوفتيني عليك

- نهلة قالت ليها زولك دا حيجلطني و حكت ليها الحاصل