ترياقي

19

سايق حظي لي ست الجمال و مكانو
وعاني سهمتك آ البلد الحنان سكانو
دعشيب النسيم بيهب محل ما كانو
تبيت حافي ليك مارجيتو قيد فككانو

مرت الامتحانات ع خير ب سهلها وصعبها والنتايج ع الأبواب وخلاص حنقفل صفحة من اجمل الصفحات جامعة والصداقات الاتكونت والمواقف المرت ب مرها وحلوة بتكون راسخة في الذاكرة وما بتتنسي ياخي انا لما اشوف زول من دفعتي بفرح فرح زي الرايحة لي حاجة ولقيتها

نهلة رجعت فرحانة انها خلصت الامتحانات وبتقول ل روحها ي سرير جاك زوا😂
بعد سلمت على ناس البيت ابوها قال ليها
- تعالي ي بتي عايزك في موضوع
-  طيب ي ابوي
- الاب : متذكرا ي بتي ناس خالتك نبوية كانو جيرانا
- نهلة : خالتي نبوية ي حليلا كيفن انساها مرة طيبة خلاص لكن ي ابوي الذكرك بيها شنو
- الاب : جاتنا زيارة لما كنتي في الجامعة وسالت منك
- نهلة يسأل منها الخير ،، دا الموضوع ي ابوي
- الاب : اصبري ي بتي جايك في الكلام ،، طارق ولدها اتخرج وبقى دكتور كبير شغال في السعودية وقال عايزك
- نهلة : طارق دا انا بعتبرو زي اخوي ،، وبعدين انا ما مفكرة في العرس اسة ،، عايزا اشتغل بالأول انا ما قريت عشان اعرس اول زول يجيني لازم اشتغل واعالجك

- الاب : دي سنة الحياة وبعدين الولد بنعرفو زول كويسو ووضعو ممتاز وماتختينا في حساباتك احنا ما عايزين منك عوض عايزين مصلحتك بس ،، فكري واستخيري .
نهلة الموضوع مااا خاشي ليها في راسها نهائي لانو قلبها مافيهو غير زول واحد مهند وبس لكن ما حتقدر تقول ل ابوها كدا وتقول ليهو شنو بتحب زول احتمال يكون مامتذكر حتى اسمها لكن هي ماقادرا تنساهو ولسان حالها بيقول
كل م اقول انساك لابيني لابينك😒 القى الحنين 💓جواي يسال يقول وينك 💔

مرت الايام سريع وجاء يوم النتايج والكل خايف ومترقب ونهلة مع انها أنها زولة شاطرة برضو كانت خايفة لدرجة انها ماقادرا تمشي الجامعة بس في الاخير اتشجعت و مشت لقت الشلة مجتمعة ووشهم نهائي ما كان بينزر ب خير قلبها وقع مشت ليهم وهي مخلوعة سألتهم مالكم عاملين كدا
- هوبا : ماعارفين نقول ليك شنو الحصل اصلو ماكان متوقع
نهلة المرة دي قلبها وقف عديل ماقدرت تقيف قعدت في اقرب حتة وما باقي ليها الا تبكي، ، الساعة الشلة كلها تضحك وريم تقول ليها
- ي بت افرحي نجحنا كلنا واقلا تقدير جيد جدا وانتي ونور ممتاز ،،
نهلة ما صدقت بقت تبكي زي العويرة يحاولو يهدو فيها وهي تزيد في البكاء ومرة يهدوها ومرة يضحكو على شكلها ،، نهلة كانت شايلا كرستالة موية في يدها رشتهم،، شكلهم كان مضحك بالذات ريم الكانت بتقول ليها نهول حاسبي ع المكياج😁 ضحكتهم زيادة وضحكتني انا زاتي معاهم
المهم اليوم عدى واتفقوا كلهم يعملو تخريج ،، واختارو الاغاني الحيتخرجو بيها واتفقوا على اللبسات واللون

لما جوه طالعين لاقوه مزمل برضو نجح سلم عليهم وبارك ليهم ولما سلم على ايهاب عيونو كانت بطق شرر شكلو مانسى الله يجيب العواقب سليمة

🍃
مرت الايام سريع وجاء اليوم الموعود
اليوم دا كان مهم بالنسبة ل ايهاب كان منتظرو ب فارق الصبر عشان يعرف ميرال ب ناس البيت ،؛ ول نور العرسها اتحدد بعد التخريج طبعا خطبها عمار

يوم التخريج الكل فرحان الصبايا قشرو ب ملابسهم الاشتروها مخصوص لليوم دا مشو الكوافير ما خلو حاجة حتى الحنة ،، بالله التقول عرسان😂 ،،اما ميرال كانت متوترة شوية كل مرة تسألهم رأيكم شنو ،، تفتكروا اهلو حيحبوني ،، ياربي حاعجبهم ،، ريم انتي تعجبي بلد ب حالها بس سيبي توترك دا
الاهل والأصحاب جو عشان يشاطرو الخريجين فرحتهم حتى ميرال ابوها جاء يقيف معاها في اليوم دا ،، كلهم اتلمو ،، ايهاب كان سايق العربية ومعاهو ناس البيت مبسوط وبيدندن مع ود الأمين

يا ريتنى لو أقدر أقول
فيكِ الكلام الما انْكتب
واجلى المقاطع بالدهب
وافرد صباح حُسنِك وشاح
يمسح عذاب عمرى المسطرّ باللهب
بريدك
كلمه كان رفّت
يِهش ثغر النجوم ويسطعَ
ولما ينادى همس الشوق
يقيف كل الزمن ويسمع
عيونك ديل عيون أهلى
حُنان زى نغمة فى مقطع
وطُهرِك تاج جواهرهُ العزه
وانتى العزه ليك تركع
بحبِك يا صباح العيد
ويا فَرَح العريس السار
واحِسّك فى سما الأزمان
شمس بِتضَوى للمشوار
زمان يا حلوه ساقنى الليل
وغِبْتَ وضعتَ فى الأسفار
ولّما لقيت عيونك ديل
بديت اعشق عيون الدار
وَحَاة ريدى اللى شاف طيفِك
كتير قُباّل يلاقى ويشوف

ب هناك الشلة كلها مجتمعة ومنتظرين ايهاب اتصلو عليهو كتير مابرد على تلفونو
التخريج بدا وايهاب لسه ماجاء والشلة كلها ماليها نفس يبدو من غير هوبا
ميرال طلبت من فتاح يتصل على ابوه فتاح اتصل برضو تلفون ابوه مقفول وميرال خلاص فاض بيها وبقت تقول ليهم انا ما مطمنة وقلبي مقبوض اكيد في حاجة حاصلة قبيل اتكلمت معاهو كان مبسوط وهم بيطمنو فيها وبقولو ليها الغايب عزرو معاهو ومن جواهم عايزين اليطمنهم
حالتهم كانت صعبة وكلهم بقو متوترين وميرال ميرال قالت ما حتتخرج من غير هوبا ،، واثناء مابيندهو في الأسماء تلفون فتاح رنة
عاين للشاشة لقى دا رقم ايهاب رد على الخط ب فرحة انت وين ي مان ال قبل يتم كلامو جاهو صوت غريب قال ليهو صاحب التلفون دا عمل حادث
فتاح : انت بتقول شنو ! متين ووين؟؟!

نهاية الجزء الثاسع عشر
صلو على رسول الله