ترياقي

24

ﺍﺻﻠﻰ ﻣﺎ ﺻﺪﻗﺖ ﺍﻧﻚ ﺗﻘﻄﻊ ﺍﻟﻌﻬﺪ ﺍﻟﻤﻌﺎﻳﺎ
ﻭﺗﻤﺸﻰ ﻓﻰ ﺩﺭﺑﻚ ﺗﺴﻴﺒﻨﻰ ﻋﺎﻳﺶ ﺍﻻﺣﺰﺍﻥ ﺑﺮﺍﻳﺎ
ﻛﻨﺖ ﺩﺍﻳﺮﻙ ﺗﺒﻘﻰ ﺻﺎﺩﻕ ﻭﻟﻰ ﺗﻮﺿﺢ ﻓﻰ ﺍﻟﺒﺪﺍﻳﺎ
ﺍﻧﻮ ﺭﻳﺪﻙ ﻟﻰ ﻋﺎﺑﺮ ﻭﺍﻧﻰ ﻟﻴﻚ ﻣﺎﻛﻨﺖ ﻏﺎﻳﺎ
ﻛﺎﻥ ﻋﺰﺭﺗﻚ ﻭﺍﺣﺘﺮﻣﺘﻚ ﻭﻛﺖ ﺑﻔﺎﺭﻗﻚ ﺑﻰ ﺭﺿﺎﻳﺎ

مهند بعد ماكان مابطيقها اتغير 180 درجة كأنها سحرتو او عملت ليهو عمل
دخلت ليه ب مدخل البت المسكينة المغلوب ع أمرها ابوها ومرتو بيعزبوها ،، واخواتها بيكرهوها واضطرت هي وامها يخلو البيت ويسكنو براهم ،، ونزلت ليها دموع تماسيح
وهو قلبو حنين مابستحمل يشوف واحدة بتبكي،، حن عليها وهي استغلت الحتة دي بالإضافة ل جمالا الماكان بيقاوم ،، ياخي دي الما فيها شنو ،، بس الجمال الداخلي هو الأهم هي كانت زولة سطحية ومادية ،،، .
حباها بكل جوارحه ،،، حب كان حقيقي ،، بقى بيتكلم معاها صباح ومساء واليوم كلو مع بعض طلعات وفسح وهدايا ،،، حتى لما يكون معانا بيتكلم عنها ،،،وبكتب فيها شعر، ،مرة كتب عن وجنتها وصف عمري ما حنساهو

عندها وجنه إن بسمت هي شكلها صار
ذي كيس الدعايه الشاهبه فوقو النــار

كنا خايفين عليه من الحب دا ،،، لأننا شايفنها على حقيقتها،،، أما هو شايفة ب قلبو شايفة الملاك البري

مرة انا كنت في كافيه في الخرطوم مشيت بالصدفة لقيتها قاعدة مع واحد تاني وشكلو مرطب،،، ما ختيت حاجة قلت يمكن قريبها ومشيت اسلم عليهم ،، بس هي لما شافتني ارتبكت واتلعثمت في الكلام عرفتني عليهو وقالت قريبها لكن قعدتهم واندماجهم بيوحي ب غير كدا ،، قلت احسن الظن ،، حكيت ل مهند الشفتو لانو من واحنا صغار مابندس حاجة عن بعض ،،، تاني يوم لقيت مهند عايز يطرشق من الزعل
- سالتو مالك،،
- قال لي كلو منك ،،
وعرفت منو انو سال نجمة،،،ع فكرة نسيت اقول ليك اسمها نجمة ،،،،
- نهلة قالت ليهو ما مشكلة واصل كل همها كان انو تعرف القصة
عرفت منو انو سال نجمة وهي قالت ليهو
- انت ما بتثق فيني وانت صدقت كلام صحبك المهم كبرت القصة وبقت سبب في زعل مهند مني ، من احنا صغار ما حصل نمنا واحنا. زعلانين من بعض ،، الا اليوم داك،،، تاني يوم اتصالحنا
-  و قلت ليهو انا خايف عليك
-  قال لي انا عارف مصلحتي

كل يوم الحب بينهم بيزيد ومهند اتعلق بيها شديد وقرر يتزوجها،،،عارفنو بيحبها ،،، لكن ما اتوقعنا يتزوجها بالسرعة دي قدر ما حاولنا معاهو رفض ،،
- قلنا ليهو خلاص اعمل خطوبة وعرسها بعد التخريج ،،،
- وافق ،،
ومشى خطبها من امها لانو ابوها مسافر ع حسب كلامها،،، عملو الخطوبة وامو ما حبت نجمة نهائي وقالت ليهو دي ما بتمسك بيت لكن هو كان مصر ع قرارو ،،، تمت الخطبة وأجلو العرس لحد ما هو يتخرج

السنة انتهت ومهند بقة عايز يعمل العرس بس هي كل مرة تتحجج ب ابوها وانها ما اتكلمت معاهو لسه ،، ومابينفع تتزوج من غير علمو ،،، وكدا

مرة مهند كان زهجان اتصل عليها كتير ما بترد قلق قال يمكن ابوها رجع وعمل ليها مشكلة مشة الشقة لقى الباب متكي خشى واريتو ماخشة
سمع اصوات ضحكات جاية من الغرفة ميز صوت نجمة قرب ع الغرفة سمعهم بيتكلمو
- نجمة: خلاص ي عمري وحياتك قربنا،،،اصبر شوية ،،، بس يشتري لي الدهب وافكو عكس الهواء
- الطرف التاني : يعني انتي ما بتحبيهو
- نجمة: أحبو شنو ،، دا كان تحدي بيني وبين صحبتي
- الطرف التاني : تحدي 🙄 ما وريتيني الرصة
- نجمة : كنا قاعدين في شارع النيل وهو وشلتو جو نازلين الصراحة الود قررررض وكمان مرتاح ،،،
- صحبتي قالت لي وااااي شوفي السماحة دي
شفتو اسمر قيافة ومسكتني رجافة😁
-  ي بت اثبتي
- واااااي ي نجمة انا عمري ماشفت لي ولد بالجمال دا ،،تقول نجم سينمائي ،،قلبي الصغير! لا يتحمل😘 ،، دي البتقع فيهو بختها،،،
- قلت ليها والبنات احسن مننا في شنو ،
- ما فهمتك!
- قصدي ما أقع فيهو فيهو الا انا
- ما تعبي روحك دا شكلو ما بيعاين للبنات ،،
- ولو وقعتو في حبي
- صحبتي قالت لي بديكي العايزاهو
- قلت ليها استني وشوفي
بعد داك مشينا قعدنا قصادهم ولقينا معاهم حنك وهو الصراحة تقيل شديد لامن فقدت الامل وصحبتي شمتت فيني ،،بس قلت ما حنسحب ،، جمعت معلومات عنو وعرفت نقطة ضعفو وخشيت ليهو بالفهم دا ،،، واستخدمت اسلحتي كلها وشوية شوية وقع في حبي ،، عملت الخطوبة عشان ما يشك في حاجة واصلا امي واقفة معاي بعد داك بقيت استنزفو، ،،
- الطرف التاني : ياخي انتي الشيطان بيخاف منك
- نجمة : ههههه حبيبتك مفتحة ،،  ح شيل منو البقدر عليهو واقول ليهو باي، دا من اسة شابكني ما تلبسي كدا وماتعملي كدا خنقة ياخ
- الطرف التاني : انت منك خوفة ،،
مهند كان بسمع في الحوار ومتمني يكون كابوس ويصحى منو،،، ما اتخيل انو ممكن الإنسان الوحيدة الحباها تكون كدا،، الانسانة القرب يخسر ص
توأم روحك ب سببها ،، الانسانة الكان مستعد يضحي ب حياتو عشانها ،، كانت صدمة قاسية ،،

ما يؤلمني ،حقا هو اني تالمت على يد اناس تمنيت ان لا اراهم يتالمون 💔

ساق العربية ب اعلى سرعة وصوت ضحكتها وكلامها بيتردد في ودانو،، ختة يدينو في اضانو كانو ماعايز يسمع الصوت الجواهو والعربية بقت ماشة براها ،،، وفجأة خبط العربية القدامو وعربيتو اتدحرجت كم مرة ووقعت

انا كنت في البيت قلبي اتقبض،،، طوالي اتصلت عليهو ماكان في رد وبعد شوية جانا الخبر

نهاية الجزء القبل الاخير
صلو على رسول الله