ترياقي

25 (2)

هي البتداوي وجع الريد والم الجرحة
هيا.... مسبب الروقة وبوادي الفرحة
عندها حركة بيها الروح بتاخد سرحة
ختت اصابعة البين الخدود والطرحة

الطلقة طلعت لتستقر في القلب
كلهم بقو مخلوعين وبقولو ب صوت واحد

ندى ،،

*أيوة ندى ما ممكن اخربها ليكم في النهاية 😉

الا مهند من الخلعة ما قدر يفتح خشمو ،،، وبسال روحو ليه عملت كدا ،،، ليه ضحت ب روحها عشاني

يلا اوريكم ندى اضربت كيف
ندى لما دخلت جوة لقت مزمل موجه المسدس ناحية مهند ،،، من غير ما تحس لقت روحها واقفة قدامو والطلقة جات فيها ( البباري الهنود بمشي الاخرة😁)
،، في نفس اللحظة الشرطة جات وقبضت ع مزمل وعصابتو وانقذو البقية وشالو ندى بالأسعاف ع المستشفى

في المستشفى الشلة كلها كانت موجودة حتى العرسان خلو الحفلة واجلو شهر العسل
الاصدقاء الحقيقين دايما بنكتشفهم وقت الشدة

ندى حالتها كانت صعبة ،، عملو ليها العملية ،، بعد العملية الدكتور جاء طالع قال ليهم عملنا العلينا لكن الحالة حرجة ،، ممكن تدخلو بس ما طولو،، ندى كانت تعبانة شديد والدكتور مانعها من الكلام،،، بس قالت لازم تتكلم، ،، طلبت منهم يعفو ليها ،، قالو ليها ما تتكلمي عشان ماتتعبي
🍂
ب هناك مهند ماكان فاهم حاجة لما عرف انو ندى هي زاتها نجمة وهي شقيقة نهلة وصفاء ومروة اخواتها بالاب ،، قعد في الواطة وختة يدينو فوق راسو ودموعو جرن،،،
- معقولة ي حسام لما احب نهلة تطلع اخت نجمة انا عايز اجن ،، للدرجة دي حظي كعب ،، ليه ما وريتني ي حسام ،،
- حسام قال ليهو انا ماعرفت غير الليلة في العربية قالو دي اختهم كانت مسافرة وجات وطلب منو ينسى الموضوع ويتعامل عادي،،
- مهند : انسى كيف الحصل دا ولا في الخيال
- حسام : اسة ما وقتو، ، اتعامل عادي عشان مايحسو ب حاجة، ، مافي زول عارف انو ندى هي نجمة غيرنا الاتنين
- مهند : قصدك شنو
- حسام : قصدي ماتضيع حبك ب يدك نهلة ما بتستاهل منك كدا ،،، قوم نمشي عليهم

- مهند دخل ل نجمة او ندى في الغرفة وقال ليها انتي عملتي كدا ليه
- ندى : كنت سبب في ضياع حياتك ،، ماحبيت تضيع للمرة التانية سامحني ي مهند،،، انا تاني ما حعيش ،،، شايفة الموت ب عيوني ،، كل الطالباهو منك انك تسامحني عشان اموت مرتاحة ،، وماتكلمو اخواتي ب ماضي ،، اعتبروا اخر طلب مني ،، شفت حبك ل نهلة اختي بترجاك ما تخليها عشاني
- مهند: ربنا يغفر ليك،، ما تتكلمي لانو الكلام بيتعبك
ندى وهي نفسها قايم قالت ليهو خليني اطلع كل الجواي،،
- نادي لي نهلة
مشى نادى نهلة وجاء
- ندى ل نهلة : سامحيني لاني ما سالت منك ولا مرة ولا حتى قلت عندي اخوات او ابو
- نهلة : خلي الكلام دا ل بعدين
- ندى: خليني اخلص كلامي ،، ما من حقي اطلب منك حاجة ولا عندي وش بس بترجاكي حافظي ع حبك الحب دا اجمل واطهر شي ،،اتزوجي مهند لانو بيحبك شديد ،،،،، اوعك تتخلي ،، قبل ماتتم كلامها الأجهزة عملت أنزار جاء الدكتور طلب منهم يطلعو برا،،، بعد شوية الدكتور جاء طالع
وقال ليهم البركة فيكم الدوام لله

مرت الايام حزينة ب وفاة ندى مع انها ما كانت معاهم من زمان لكن في النهاية دي اختهم وما بتمنو ليها غير كل خير، ، أما امهم ف الحادث خلاها تتعظ وتلتزم وتندم ع العملتو ،،طلبت من طليقها يرجعها وهو رجعها وبقت عايشة معاهم في البيت

مزمل دخلوه المصحة لانو فقد عقلو وجن الريد ما اظن ينطبا،، ولو بقى كويس حيلقى السجن في انتظارو اما عصابتو ف حكمو عليهم بالسجن

ريم سامحت فتاح لكن بعد ادبتو عشان شك فيها وحددو العرس ،،وصفاء خطبها المحامي وعرسهم في العيد ،، ابو مهند قرر يرجع السودان نهائي وطلب منهم يسامحهم ع تقصيرو في حقهم ،، والأبناء لازم يغفرو للاباء ،،،انت ومالك لابيك

نهلة الشغل ماشي معاها تمام وقررت تسافر ب ابوها الأردن عشان تعالجو ،،، اول ما وصلت الشركة في البوابة لقت لوحة كبيرة مكتوب فيها

أنتِ الترياق
أشتاقك جداً غاليتي  وسأبوح بشوقي للأوراق
كَمْ أفتقدكِ سيدتي  وقلبي ينبض بالأشواق
فاشتقت لحديثٍ يربكني  وصوت يضرب بالأعماق
وضحكة ثغرٍ أعشقها  ليس بروعتها مثل في الآفاق
أميرتي .. بغيابكِ عني سمٌ ** وقربكِ مني هو الترياق

و مكتوب تحت تقبلي تتزوجيني
مهند ❤️
نهلة ما قادرا تستوعب بقت تقرأ في الكلام وتعيد بعد شوية مهند جاء قعد قصادا وهو واقف ع كراعو زي ما بنشوف في الأفلام وقال ليها تاني تقبيلي تتزوجيني وطلع ليها الدبلة
نهلة ماعارفة تتصرف كيف دي اللحظة المنتظراها طول عمرها معقولة أخيرا السعادة حتجيها
- مهند : انا حقيف كدا كتير، ، رجولي وجعتني😘
- نهلة : هههه اتعزب شوية ياما عزبتني معاك
- مهند: نهووووول
نهلة ب خجل مدت ليهو يدها
بعد داك سمعت صفافير وصفيق عاينت لقت الشلة كلها موجودة حتى ميرال و ايهاب
كانت فرحة نستهم كل اللحظات الحزينة الفاتت ،،
مهند وحسام عملو عرسهم مع بعض ودخلو ب زفة

كملت بيك انا نص ديني،،، وقولو قولو ماشاءالله

عاشو في سعادة وهنا واول بت سموها ندى ع اسم المرحومة

*نسيت اقول ليكم الرسايل الكانت بتصل ل مهند كانت من حلا بت عمو بس اوع زول يوريهو لانها وقفتها اول ما عرس وآخر رسالة باركت ليهو وقالت ليهو دي اخر رسالة تاني ما حزعجك

النهايات السعيدة يحق لنا انتظارها وان طالت

بتمنى الرواية تكون عجبتكم وبشكركم ع دعمكم لي واستحمالكم لي وماقصدي اشحتف زول مع اني شغالة أصريت اني اخلصها ليكم
ونتلاقى في رواية أخرى قد تنقلنا الي صفحات حزينة او سعيدة

لكم مني كل الحووووووب
وقلب كبير ليكم 💜
صلو ع رسول الله