رشة عطر

الجزء 16

اول شعور جاءني الخوف خفت ابوي

ما يتصرف معي تصرف كأب بل يتصرف معي كرجل شرطه وقانون ...... مابين امل والم جاءني براحه كده يا بنتي ياريم انتي عارفاني بحبك قدر شنو ..........

وعشان بخاف عليك تموتي ولايجيك مرض خطير انا حأدخلك المصحة الفلانيه"....."

وان شاءالله تتعالجي وبعداك نتفاهم ........... انا التعامل العاملني ليهو ابوي ده

كان اكبر دفعة لأني اخلي الادمان ويزيد

من رغبتي في التخلي عن الحاجة دي الاسلوب دائما هو البأثر سواء كان سلبا او ايجابا اعتقد انو ابوي لو كان اتعامل معي بعنف كان حيخسرني للأبد .... ابوي كسب ثقتي ومحبتي وحسسني بالامان وبعدها ممكن يرغمني اني اعمل العاوزو بس بي رضاي ..... خطوه خطوة

المهم رقدت في المصحه دي فتره من الزمن حمدلله كنت امتحنت وخلاص حأبقي خريجة ........ المصحة فيها دكاتره

نفسين بشوفو الاسباب التي تؤدي للأدمان

النتايج الطلعت أنو اغلب الشباب البكون عندهم صراعات ونزاعات اسرية بنتهي

بيهم الحال للأدمان كهروب من الواقع

او احساس بالسعاده حتي ولو لفترة مؤقته . طبعا ستنا واعوانها تم القبض عليهم واعترفت بالجهة البتتعامل معاها

لحد ما احبطو اكبر عملية للترويج في العاصمة ومجموعه الشباب المدمنين كلهم دخلوهم علي المصحه والبعض منهم استجاب للعلاج ...... حمدلله وجود مازن وابوي واختي هبة كان عندي بالدنيا لاول

مره ما احس بأني مهمشة وغير مرغوبه

وبقي عندي حاجه احبها واعيش عشانها

اخوي وائل في سجمو ورمادو ولا

اتعظ من الحال الحصلت علي .........

المهم حمدلله مرت علي ايام وانا بقاوم في نفسي .... عشان ما انتكس مره تانيه

في المصحه النفسيه دايما بهتمو بأنو وقتنا كلو يكون ملان عشان ما نفكر في حاجات سيئة ممكن تخرب اي حاجه ....... مع الاراده والناس الجميله الواقفه معي دي

قدرت اني اتجاوز اسوأ سنوات حياتي بس احلا مفاجأه حصلت لي لمن امي جات سلمت علي وانا مريضه ودمعتها في

عينها وقتها قلت اكيد الامهات ما قاسيات بس بكون في حاجه انا م عارفاها مخلية

امي بعيده مننا ,, كل البعد الوجداني ده

ما كنت حأقدر اني اتجاهل عواطف امي المنسابه جواي زي شلال غزير

بعد ما خرجت من المصحه طلعت انسانه جديده

غاليه جات اعتذرت لي بس ما عارفه حاسه بأني لازم

ابعد منها ابعد المسافات الممكنة

لاني كل ما اشوفها بتذكر انها مروجة قلت ليها يا غاليه لو عاوزاني اسامحك وفي قلبك ده لسه في ذره انسانيه او محبه لي بترجاكي ابعدي عن واختي سكتي ودربتي

وربي انا لا استطيع اتحملك او اتحمل اشوفك ...... المهم حسيت بأني قاسيه علي غاليه بس مضطره اني اعاملها كده

الحصل علي بسببها ما شوية بعد ما اتحسنت جاءني ابوي قال لي يا ريم يا

بنتي قبل ما تتصرفي اي تصرف احمق ختي صورتي قدامك انا ابوك ومنتظر ارفع راسي بيك وبي نجاحك ما عاوزين الناس تتكلم علينا ريم فعلت ريم تركت كده سمعتنا كلنا حتتشوه وده عندو

اثار نفسيه حتكون كبيره شديد بس بتمني انك لا تخزليني ولا تكسري ضهري يا بتي

قلت لي ان شاءالله ياا بوي البقدرني عليهو

الله بعملو ...... مازن جاني كالعاده بطرقو

الغريبه دي اتكلم معاي كلام طيب جدا

قال لي لحد هنا ياريم وطلعناك من مشكلة

الادمان ,,,,,, انا الماستر خلصتو والحمدلله

يعني سنه رابعه دي حاولي غيري من شخصيتك المطرده دي وعلي فكره

انا عازمك زواجي حدد لي يوم الحنه والعقد قلت ليهو كم مره هو مش انت

متزوج فريده ضحك شديد وقال لي ياريم

لسه في وهمك ده ولا ماعارفاني كويس

انا وفريده الثقه البينا كانت هشة ولينه

عشان كده هي صدقتك وخليتها علي ذلك

والحنه الشفتيها في يدي اتحننتها مع صحبي وما تسأليني عرفت كيف بعرف اسألتك من

عيونك ياريم العروس دي بت عمنا باللفه كده ....... واوعي تفكري بغباء وتحاولي تعترضي طريقي يلا سلام

ياربي مازن كان قاصد يفور دمي ولا ياتو لعبه في راسسو تعبت من التفكير قلت ليهو

عروسك دي ما سمحه ما بتستاهلك قال لي ببساطة عقلها كبير انا الما بستاهلها

وجاء الموعد حق الحنة.....

يتبع....