عشان ما اكون ناكره للجميل العملتو
معي الزولة الغريبه دي قلت ليها شكرا ليك يا أخت غالية ...
بس أنتي لشنو اتصرفتي معي كده
وليه انا بالتحديد وبتعرفي اسمي من وين؟؟؟
.... اسفه للأسئله الكتيره دي بس ختي نفسك مكاني ...
اها البت دي قالت لي يا ستي قصة بسيطه خالص أنا مربته يعني مفترض اكون الدفعه القبالك بس شاءت الاقدار
وبسبب الظروف ما اتوفقت في دراستي
و عدت سنه ثانيه معاكم.
انا دفعتكم دي ما بعرف فيها زول بس من خلال الانا شايفاهو ناسكم ديل كلهم داخلين في بعض وعباره عن قروبات واصدقاء واصحاب .
وانتي ما زيهم طوالي قاعده براك لاحظت ليك وهدؤك الغريب ده واتعرفت علي اسمك من خلال الحضور ......
شكرتها وانصرفت علي كده
طبعا غاليه دي أول وحده انا اتعامل معاها في الجامعه تعامل مباشر كده
كل يوم بمر بلاقي غالية بس اقصي ما
بينا كان السلام وكيف الحال والقراية معاك
من غير تدخل في الامور الشخصيه او خلافها
**دائره العزلة الانا فيها لسه ما مقتنعه بأني اخليها او حاسة بي خوف
اني اكون لي صداقات رهاب اجتماعي عديل بس يوم بعد يوم حاسة انو
الحاجز ده بقي ينكسر وغالية دايما بتذاكر معي ومرات بتحكي لي عن حياتها
هي عايشة في داخليه شويه
حياتها صعبه واهلها ناس علي قدر حالهم
لدرجه انو انا ببكي لمن تحكي لي بوضعهم
طبعا لمن تغيب بتقطع لي راسي
المهم كل مره الصداقة ماشه اقوي
والقروش العندي بساعدها عشان
بقول صحبتي ما تحتاج حاجة من زول
اكتر حاجة خلتني في اجواء من الفرح والحزن لمن هبة اختي جاها خطيب
وابوي وافق كانت مبسوطة شديد
والحاجه دي واضحه في ملامح وجها
خطوبه اختي دي مرات بتخليني افكر انو انا خلاص حأفقد اختي وحبيبتي هبة لانها حتتزوج كل ما افكر كده بلقي نفسي متمسكة بي غاليه شديد لأنو في رائي دي الانسانه الوحيده الحتطلعني من العزله والحزن تواصلي مع نجلاء كان طفيف
كل يوم بقل وفوهة البعد بتكبر
طبعا أمي بعد ما دخلت الجامعة ما
حصل مره اتصلت علي علاقتنا سطحية بنتصل عليها سلامات وبس
ولا كأني بهمها في شئ اخوي وائل خشي الثانوي بس مع الاسف بعيد نفس السناريو الأنا كنت عايشاهو يعني متابع ليهو شرزمة من الشباب الما نافعين
وكذا مره لقيتو بشرب سجاير وداخل في فجوة ضياع وما لاقي البنقذو
أنا بحمل ذنب ضياعنا ده لأمي وابوي
لأنهم لمن انفصلو ما فكرو فينا
اي واحد منهم فكر في نفسو وسعادتو
ولا واحد فيهم قرر إنو يضحي عشانا
ماف انا مرات بحس الطرق الصعبه الانا
ماشه عليها دي نديه ودرس قاسي
لابوي وامي ...
يوم سألت غالية من صديقاتها بكل بساطه قالت لي انا ما عندي اي صديقات
كلهم في الدفعه القدام ممكن وجه الشبه
البينا كل منا ما عندو اصحاب او ناس
حوليه يحسسو بالامان
يوم ماشه اصلي الظهر انا وغالية
فجأه لقيت مازن والله لمن خفت
الزول ده مالو معاي مباريني من مكان
لمكان ياربي مازن بعمل هنا شنو؟؟؟ أنا عاوزه اعرف واكتر حاجه اتفاجأت بيها.
لمن غالية قالت لي ماشه اسلم علي الزول ده وجاية انتظريني دقايق .. طوالي اتخارجت منهم قبل ما يشوفني
بس غاليه دي خلتني في دوامة من الاسئلة يارب شبح الماضي لسه حيلاحقني لحدي متين ؟ وغاليه بتعرفو من وين ؟
يتبع....
