وفعلا وصلت لمكانو
كنت قلقانة من ردت فعلو
بما انو شافني قبل كده وعارف اني صحبت نجلاء اتكلمنا عادي وبقيت الف وادور
حول الموضوع قام علي حيلو وضرب الطربيزه وقال لي اختي دربي يا بت الناس ما تحشري انفك في الما بخصك
يلا مع السلامه ياخ انا قلبي انقطع منو رجعت لي مازن يد ورا ويد قدام وخلاص كده الامال العندي اتقطعت ، ما بيدي شئ غير اني اشوف قرايتي وسنة ثالثه دي الايام ماشه بي سرعة شديده ونجلاء مرات مرات بتصل عليها بس ما كتير وزولها الخبر الحصلني قالو سافر لبلد اجنبيه ما متذكراها اسمها غريب كده
وفاء مخيف من ناحيتي لنجلاء خلاص الامتحانات
كبست وامتحنت كان جواي كلام كتتير وامال كبيره وخوف عميق لأنو خلاص مرحلة الثانوي حتنتهي بعد اعرف نتيجتي والشخص كل ما يكبر . المسؤوليات بتزيد وبتكبر معاهو وخلاص مفترض احدد سكتي بس انا تايهه ما عارفة نفسي ماشه علي وين ...
في يوم مازن اتصل علي طلب يقابلني
والله فرحت فرح وقلت خلاص اخيرا
عاوز يقول لي مشاعرو من ناحيتي واساسا هو بكون منتظرني اخلص ثالثه
وكميه من الاحلام الوردية والذهبيه
وفرحت شديد لمن مشيت وقعدت معاهو قال لي ياريم أنا الليله عندي ليك خبر حلو شديد وعارفك حتفرحي لي طبعا زي ما عارفه انتي اختي الصغيره عشان كده مفترض اني كان اقوليك حسيت بموجة حقت صدمة قوية جايه علي ......
" أنا خطبت فريده " وان شاءالله زواجنا قريب
والله اتحطمت عدييل وحسيت نفسي حأبقي وحييده ...... حاسه بأنو وهم الحب الانا خاتاهو من ناحيتو بدأ يتساقط وبقيت مرتبكه متين وكيف حصل؟
قال لي مالك متعجبه ومندهشة كده
انا خطبت فريده يا ريم والله اتمنيت
انو يكون ده خيال
ما عارفه الحصل علي شنو؟
كل الخصال حقت الطيبه العندي دي بقت مطموسه بالحقد والحسد لدرجة اني قررت امشي لفريده دي وادمر حياتها عارفه ده تصرف غلط بس الحقد بعمي البصيره قلت ليهو بلهجة منكسره الله يسعدك ومشيت علي كده وما عارفه شيطان نفسي بزين لي في شنوو
مرت اسابيع وأنا بجمع معلومات عن فريده ولسة ما خاته خطوات واضحه ناحيتها بس اي كان الخطوات دي حتكون شريره .... كل يوم كنت بحاول برقمي الجديد في تلفون امي بس يا خساره ما كان بترد ما عارفاها مالها علي الاقل صوتها
ده كان ممكن يشيل عني هموم كتير
من الصباح جات مكالمة لهبه اختي خلتنا
عايشين علي اعصابنا الصادق ولد زياد .....
قال لينا والدتكم جاها تسمم ومرقده في المستشفي ما بقي فينا قلب ولا عقل هرعنا للمستشفي ودموعنا تغرق بحر
لقينا زياد بره والله الكلام الفي عيونو
كتير وتصرفاتو وافعالو زي الطردنا عديل واكتر حاجة غضبتني لما قال لينا انتو الجابكم هنا شنو !! كأنو المخلوقه دي ما والدتنا قلت ليها لو انت زوجها احنا اولادها ومشيت منو
اكتر زول رحب بوجودنا ولدو الصادق ولدو . لمن لاقيت امي سلمنا عليها قلبي التقول عليهو داير يتشق من الشوق
بس اتظاهرت بالبرود واللامباله وانو
جيتنا دي اداء واجب ليس الا ..
حسيت بنفسي قاسية لكن ببساطه اتجاهلت الشعور ده
المهم اليوم مر علي خير والحمدلله الوالده بقت بخير ........ وقت كنا راجعين البيت لمحت ليك فريده خطيبه مازن
من بعيييد وقررت أني لازم امش ليها الصباح وافرقهم من بعض .....
يتبع....
