ابوي جاء خاشي علينا ودمو فاير
وبهذه الطريقه " اسمعي ياريم
أنا حأحولك المدرسة الفلانية " ......."
مدرستكم دي ما نافعه مستوي متدني واخلاق ازفت من الزفت حسبي الله ونعم الوكيل وابوي ده جايط جوطه لمن مخرمج في الكلام طبعا ابوي طبعا هو شغال في الشرطة ودايما الشايع بقولو ناس الشرطه ديل صعبين وابوي جزء لا يتجزء منهم بس الحاجة الحلوة فيهو أنو بفصل ما بين طبيعه العمل حقو وطبيعه التعامل معانا كأسره ؛ المهم أنا طولت ما شوفت ابوي في الحال ده من وقت كان مع امي زول غضبان مفترض ما اتكلم معاهو سكت ساي بس بسمع في قراراتو دي قلبي من جوة مقبوض ياربي ابوي ده مالو فجأه قرر
كده اللهم اجعلو خير يومين انا عايشة في توتر وحرق اعصاب ما قادره اطلع من البيت لحد ما ابوي جاب النقلية وتم لي اجراءات النقل بالصدفه كنت خاشه المطبخ و سمعتو وهو بتكلم
مع هبه طوالي وقفت الكلام نص سمعتو ونص ما سمعتو قال ليها قبضنا طالبة من طالبات المدرسة دي في وضع غير اخلاقي وكمان طلعت حامل سفاحا "
انا حيلي كلو مات الله يستر ما تكون دي نجلاء المهم انا في الوقت داك لازم
كان اشوف لي طريقه اطلع بيها المهم بي طريقه دبلوماسيه قدرت اطلع ومشيت لميمي في بيتهم من شافتني قعدت تبكي قلت ليها اوعي يكون الكلام السمعتو صحي ميمي قالت لي اي الكلام ده صحي قالت لي بس دي ما المشكلة
نجلاء حامل ودي مصيبه حلت علي عائلتها قبل ما تحل عليها هي
والله كنت مفجوعة بالكلام ده قلت ليها
اها حتتصرف كيف_!!
قالت لي الناس ديل راسهم بقي في التراب من عملت نجلاء عشان كده راحلين ومخلين البلد دي والله غلبني الاعملو استأذنت منها وطلعت
اثناء ما طالعه من بيت ناس ميمي لاقيت مازن قال لي سمعتي الحصل لي صحبتك قلت ليهو ابعد من هنا عشان ابوي لو شافك بديك طلقه في نص راسك ما تنسي احنا قريبين للبيت وبي ضحكة كده
قال لي سبحان الله شوفي الدنيا دي
عفنه كيف نجلاء قبضها ابوك وما عارف دي صحبت بتو الدلوعه ريم
اتضايقت من كلامو بس كان معاهو حق
لمن وصلت بيتنا هبة قالت لي
سجمك يا ريم الرماد كال خشمك يابت
نجلاء مش دي صحبتك الكان جاتك في البيت
انتي عارفة الصدمة حتبقي اضعاف لو ابوي
عرف انو دي صحبتك
سكت ساي عاد اقول شنو صاح الكارثه دي ما فيني أنا بس الصديق بحكموه بصديقو لو طيب ولا خبيث
نزلت المدرسة الجديده ملخبطه شديد
ومقرره أني ما احاول اخش في شلليات ولا قروبات بنات كفايه الحصل لي في
السنوات الماضيه بس كان في نبضة في قلبي بتقول لي لازم اعرف نجلاء دي العمل فيها كده لازم يمش يتزوجها وأنا واجب علي
اعرفو وكنت محتاجه لتفاصيل كتيره
بعد ما بعدت من المدرسة القديمه
حسيت بي وحده شديده وحزن ما مفارقني
اقرب زول كان لي ياهو مازن ده
انا عارفه ما من الحكمه اني يكون عندي علاقه مع ولد بس اعمل شنو الزول ده
دايما بوجهني للصح وكمان حيساعدني عشان نساعد نجلاء تتحل من مصيبتها
حسيت بيهو يد عطوفه في زمن قاسي مازن حبل النجاه الوحيد الممكن ينقذني
بالرغم من انو نجلاء ما معانا في الحلة ولا في المدرسة كنت دايما
بتواصل معاها بالدس نفسي اعمل
حاجه عشانها ما عارفة الزوله دي سلوكياتها
كلها سيئة وكانت حتجرني لسكة ما تمام
بس والله بريدها بالرغم من ده كلو
واثقه انو ابوي لو عرف حاجة زي دي
اقلاها حيديني رصاصة في نص راسي
كل يوم بعدي بلقي نفسي بتورط في مازن لو غاب مني يومين لا باكل لا بشرب برغم ده
هو ما صرح لي بأي نوع من المشاعر
في يوم غير كل الايام مازن قال لي
الود الاصفر داك هو والد الطفل بس في مشكلة يا ريم الزول ده شكلو مسافر بره
ولو سافر تاني ما حنلم فيهو
حاولت امنعو بس رفض قلت ليهو اسمع يا مازن خليني أنا بتكلم معاهو وبقدر اقنعو
قال لي واثقة ياريم!!
قلت ليهو ايوة واثقة وفي نفس اليوم مازن رتب لي موعد معاهو
يتبع....
