عباس كان غريب علي ..... فكنت خايفه انو ما يحسن التعامل معي ..... لكن
فاجأني بي كرمو واهتمامو والمحبة وانا
ما كنت بكن ليهو في قلبي ولو مثقال ذره من حب فقط الاحترام بس ما معروف الحال ده يستمر لمتين ....... تعاملي معاهو عادي جدا ...... غايتو حمدلله لفيت ولايات السودان وعشت ايامي كل يوم عزومه وطلعات .. ما مقصر معاي نهائي بس من جواي حاسة بي نقص ..... مرات كتير بقول خلاص عباس ده انا مفترض احكي ليهو الماضي حقي عن حبي لمازن وعن ادماني للمخدرات بس تاني بتراجع عن كلامي ........ لأنو في حقايق واسرار مفترض ما نبوح بيها لانو ممكن نخسر شخص .... مره هبه اختي جاتني زياره وسألتني عن حالي قلت ليها عن رغبتي اني اكلم عباس عن حياتي السابقه طوالي هبه وقفت علي حيلها قالت لي ريم انتي مجنونة ؟؟؟ ياريم الماضي ماضي سموه كده عشان ما حيرجع ياريت لا تدمري علاقتك بزوجك بحاجات حصلت وانتهت فكري بي ايجابيه شوية
سكت مسافه قلت ليها يا هبة انا حاسه بنفسي ما انا ريم كأني لابسة لي قناع
وما قادره اتعامل مع عباس .... ياخ هسي لو اتزوجت مازن ما كان احسن علي الاقل عارف عني كل شئ هبه قالت لي انتي لسه بتفكري فيهو ؟؟؟ ريم انتي
شخصيتك دي غريبه جدا انتي صاح اختي بس تصدقي اني مرات كتيره ما بقدر افهمك
ساعتها ضحكت شويه وقلت ليها انا البفهمني مازن رغم اني ما قادره افهمو
شوفي الدنيا دي غريبه كيف .........
يا هبة انتي عارفه اكتر حاجه واجعاني انو
امي ما اتصلت علي من وقت اتزوجت ولا
كأني بنتها وحتي ابوي جافي شوية كأنو
ما صدق يخلص مني سكتنا مسافه طويله
كأنو الكلام خلص فجأه قاطعت الصمت ده وقلت ليها اسمعيني ياهبة اوعك تتزوجي زي زواجي ده والله بحزرك ما حتكوني سعيده ولو الدنيا دي اتملت ليك قيراطات دهب هبه عاينت لي بي نظره لمن ارتكبت قالت لي حأبقي سعيده ياريم
لأنو نظرتي للحياه ما زيك انتي غايتو العرفتو هبه دي قنوعه لدرجه بعيده وواثقه من روحها وبتصنع الفرح لي نفسها
ما محتاجه زول يسعدها ............
بعد برهة من الزمن جاني اتصال هاتفي الرقم مكتوب فيهو مازن والله قلبي قال شححح ورديت كانت دي المره الاولي اتكلم فيها معاهو بعد زواجي سلمت عليهو ورحبت بيهو قلت ليهو ما اتوقعتك تتصل علي ..... قال لي مستدرك بس انا اتصلت بي سبب مقنع بالنسبه لي ...... وحيكون مقنع بالنسبه ليك لمن اوريك
قلت ليهو خير اتفضل قول بدل اتلاف الاعصاب الانا عايشة فيهو ..... قال لي ياريم اولا عاوزك تتعاملي مع الموضوع بعقلانيه واوعك تتصرفي تصرف ما مسؤول وعاوزك تفكري قبل تعملي اي حاجه
ساعتها الخوف دب في داخلي قلت ليهو
يا مازن لسه في عوارتك دي ياخ احكي انا الفيني كملت ....... قال لي وائل اخوك
بالصدفة اكتشفت انو مصاحب مجاهد وبلبل وشرزمه من الاولاد انا ما عارف اسمائهم قلت ليهو طبيعي ماهو ولد لازم
يكون عندو اصحاب ...... قال لي ياريم
صاحب ولا ساحب تفرق كتير ريم
الشباب ديل اكتشفت انهم بمارسو والعياد بالله جريمه ال لوط وانا صراحه شلت
هم اخوك تبقي مصيبتكم مصيبه لو وائل
بقي منهم ........ والله حاسه كأنو بتكلم
عن زول ما اخوي وراسي ده جاط وكرعيني ديل بقن تقيلات وصوت مازن ده حسيت بيهو بعيد ..... الو الو ريم انتي وين ردت هبة قالت ليهو خلاص كفايه حنرجع ليك بعدين ............ هبه دي مسكتني وبكينا بكاء عمرنا ما بكيناهو
قربت اقع من طولي بس الله ستر ........
وجود هبة ده امتص ألغضب الكان علي
اخوي الوحيد حيضيع واحنا قاعدين بس لازم كان نتصرف وبأقصي سرعه ممكنه.....
يتبع....
